ກອງປະຊຸມເອກະພາບ ຮັບຮອງແຜນພັດທະນາເມືອງຊ່ອນເປັນເມືອງຕົວແບບພົ້ນທຸກ

ວັນ​ທີ 1 ຕຸລາ 2020 ພະແນກກະສິກຳ ແລະ ປ່າໄມ້ແຂວງ ສົມທົບກັບການນຳເມືອງຊ່ອນໄດ້ເປີດກອງປະຊຸມ ເອກະພາບຮັບຮອງແຜນພັດທະນາເມືອງຊ່ອນເປັນເມືອງຕົວແບບພົ້ນທຸກໃນປີ 2020 ຂື້ນທີ່ຫ້ອງປະຊຸມໃຫຍ່ອາຄານເສດຖະກິດ ໂດຍການເຂົ້້າຮ່ວມເປັນປະທານຂອງທ່ານ ສໍສະຫວັນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ແລະ ທ່ານ ສີວິໄລ ພິມມະວົງ ເຈົ້າເມືອງໆຊ່ອນ ມີພະແນກການທີ່ກ່ຽວຂ້ອງຂັ້ນແຂວງ, ມີຫົວໜ້າກົມກອງຫ້ອງການທຸກພາກສ່ວນພາຍໃນເມືອງ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມທັງໝົດ 54 ທ່ານ ຍິງ 13 ທ່ານ.

ໃນ​ກອງ​ປະ​ຊຸມ​ໄດ້​ຜ່ານ​ແຜ​ນ​ພັດ​ທະ​ນາ​ເມືອງ ຊ່ອນ ເປັນ​ຕົວ​ແບບ​ເມືອງ ພົ້ນ​ທຸກ​ໃນ​ໄລ​ຍ​ະ 5 ປີ , ໂດຍ​ປະ​ຕິ​ບັດ​ຕາມ​ມະ​ຕິ​ກອງ​ປະ​ຊຸມ​ສະ​ພາ​ແຫ່ງ​ຊາດ​ສະ​ບັບ​ເລກ​ທີ່ 099/ສ​ພ​ຊ, ລົງ​ວັ​ນ​ທີ 18 ພະ​ຈີກ 2018 ວ່າ​ດ້ວຍ​ການ​ຮັບ​ຮອງ​ເອົາ ບົດ​ລາຍ​ງານ​ຂອງ​ລັດ​ຖະ​ບານ​ກ່ຽວ​ກັບ ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ປີ 2018 ແລະ ທິດ​ທາງ​ແຜນ​ການ​ປີ 2019 ເພື່ອ​ຈັດ​ຕັ້ງ​ປະ​ຕິ​ບັດ​ຂາດ​ໝາຍ​ສຸມ​ໃສ່​ເມືອງ ຊ່ອນ​ໃຫ້​ມີ​ເງື່ອນ​ໄຂ​ບັນ​ລຸ​ຕາມ​ມາດ​ຖານ​ເມືອງ ພົ້ນ​ທຸກ, ໂດຍ​ເລັ່ງ​ໃສ່​ການ​ພັດ​ທະ​ນາ​ຊົນ​ລະ​ບົດ ແລະ ແກ້​ໄຂ​ຄວາມ​ທຸກ​ຍາກ​ຂອງ​ປະ​ຊາ​ຊົນ, ເມືອງ ຊ່ອນ ແຂວງ ຫົວ​ພັນ ເປັນ​ໜື່ງ​ໃນ 10 ເມືອງ ຂອງ​ແຂວງ ຫົວ​ພັ​ນ ທົ່ວ​ເມືອງ ມີ​ເນື້ອ​ທີ່​ປະ​ມານ 2.129 ກິ​ໂລ​ຕາ​ແມັດ, ມີ​ເນື້ອ​ທີ່​ປ່າ​ໄມ້ 185.200 ເຮັກ​ຕາ, ມີ​ເນື້ອ​ທີ​ປູກ​ຝັງ 10.500 ເຮັກ​ຕາ, ມີ​ສາຍ​ແດນ​ຕິດ​ຈອດ​ກັບ​ເມືອງ ສົບ​ກົກ ສ​ສ​ຫວຽດ​ນາມ.

ໃນ​ໄລ​ຍະ5 ປີ່​ແຜນ​ການ​ຈັດ​ຕັ້ງ​ປະ​ຕິ​ບັດ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ ຂອງ​ເມືອງ ຊ່ອນ ແຂວງ​ຫົວ​ພັນ ແມ່ນ​ໄດ້​ມີ ​ການ​ຂະ​ຫຍາຍ​ຕົວ​ຢ່າງ​ຕໍ່​ເນື້ອງ​ເປັນ​ຕົ້ນ​ແມ່ນ​ ດ້ານ​ວຽກ​ງານ​ການ​ສຶກ​ສາ, ສາ​ທາ​ລະ​ນາ​ສຸກ, ວັດ​ທະ​ນາ​ທຳ​ສັງ​ຄົມ ແລະ ດ້ານການ​ຜະ​ລິດ, ການ​ບໍ​ລິ​ໂພກ, ການ​ຊົມ​ໃຊ້ ແລະ ການ​ລົງ​ທືນ​ເຂົ້າ​ໃນ​ວຽກ​ງານ​ພັດ​ທະ​ນາ​ຕ່າງໆ, ​ ດ້ວຍ​ອັດ​ຕາ​ການ​ຂະ​ຫຍາຍ​ຕົວ​ທາງ​ດ້ານ​ເສດ​ຖະ​ກິດ​ສະ​ເລ່ຍ​ໃນ​ແຕ່​ລະ​ປີ​ຢູ່​ໃນ​ລະ​ດັບ 8.30 % ຕໍ່​ປີ, ລວມຍອດ​ຜະ​ລິດ​ຕະ​ພັນ​ພາຍ​ໃນ GDP 5 ປີ​ບັນ​ໄດ້ 466.95 ຕື້​ກີບ , ໃນ​ປີ 2019 ລວມຍອດ​ຜະ​ລິດ​ຕະ​ພັນ​ພາຍ​ໃນ​ເມືອງ ບັນ​ດຸ​ໄດ້ 109.64 ຕື້​ກັບ, ສະ​ເລ່ຍ​ຕໍ່​ຫົວ​ຄົນ ໄດ້ 6.483.981 ກີບ​ຕໍ່​ຄົນຕໍ່​ປີ, ໄດ້​ຮັບ​ການ​ຈັດ​ຕັ້ງ​ປະ​ຕິ​ບັດໂຄງ​ການ​ລົງ​ທືນ​ເພື່ອ​ພັດ​ທະ​ນາ​ພື້ນ​ຖານ​ໂຄງ​ລ່າງ ລວມ​ທັງ​ໂຄງ​ການ​ລົງ​ທືນ​ຂອງ​ລັດ ແລະ ທືນ​ຊ່ວຍ​ເຫຼືອ​ລ້າ ແລະ ກູ້​ຍືມ ທັງ​ໝົດ 116 ໂຄງ​ການ​ລວມ​ມູນ​ຄ່າ​ທັງ​ໝົດ  2 ພັນ 446.70 ຕື້​ກີບ, ມີ​ຄງ​ການ​ທີ່ນອນ​ຢູ່​ໃນ​ແຜນ 68 ໂຄງ​ການ, ດ້ານ​ການ​ຄ້າ ແລະ​ການ​ບໍ​ລິ​ການ ສາມ​າດ​ສົ່ງ​​ອອກສິນ​ຄ້າ ​ໄດ້​ທັງ​ໝົດ 8.43 ຕື້​ກ່​ວາ​ກີບ, ເກັບ​ລາຍ​ຮັບ​ເຂົ້າ​ງົບ​ປະ​ມານ​ໄດ້​ທັງ​ໝົດ 8.24 ຕື້​ກີບ​, ເລັ່ງ​ໃສ່​ຜະ​ລິດ​ກະ​ສິ​ກຳ ຊຸກ​ຍູ້​ປະ​ຊາ​ຊົນ​ຜະ​ລິດ​ເປັນ​ສິນ​ຄ້າ ພາຍ​ໃນ​ເມືອງ ມີ​ເນື້ອ​ທີ່​ປູກ​ຝັງ​ທັງ​ໝົດ 16.400 ເຮັກ​ຕາ ຜົນ​ຜະ​ລິດ​ໄດ້ 79.492 ໂຕນ.

ໃນ​ແຜນ​ກາ​ນ​ພັດ​ທະ​ນາ​ເມືອງ ຊ່ອນ​ໃຫ້​ເປັນ​ຕົວ​ແບບ​ເມືອງ ພົ້ນ​ທຸກ​ແຕ່ ປີ 2020-2024 ແມ່ນ​ຈະ​ໄດ້​ເລັ່ງ​ໃສ່​ກ​ານ​ລົງ​ທືນ​ຂອງ​ລັດ ມີ​ທັງ​ໝົດ 56 ໂຄງ​ການ, ມູນ​ຄ່າ​ທັງ​ໝົດ 94.892.80 ຕື້​ກີບ, ໃນ​ນັ້ນ​ມີ​ໂຄງ​ການ​ທີ່​ປີ້ນ​ອ້ອມ​ຕາມ 6 ມາດ​ຖານເມືອງ ພົ້ນ​ທຸກ, ນອກ​ຈາກ​ນີ້​ຍັງ​ຈະ​ໄດ້​ເພີ່ມ​ທະ​ວີ ເປັນ​ໃຈ​ກາງ​ປະ​ສານ​ສົມ​ທົບ ກັບ​ພະ​ແນກ​ການ​ທີ່​ກ່ຽວ​ຂ້ອງ, ລົງ​ສົມ​ທົບ​ກັບ​ເມືອງ ແລະ ບັນ​ດາ​ບ້ານ ແກ້​ໄຂ​ບ້ານ​ທີ່​ທຸກ​ຍາກ​ໃຫ້​ຫຼຸດ​ລົງ 12 ບ້ານ, ສູ້​ຊົນ​ໃຫ້​ຈຳ​ນວນ​ຄອບ​ຄົວ ທຸກ​ຍາກ​ໃຫ​້​ຫຼຸດ​ລົງ 315 ຄອບ​ຄົວ, ສູ້​ຊົນ​ສ້າງ​ບ້ານ​ພັດ​ທະ​ນາ ໃຫ້​ໄດ້ 6 ບ້ານ, ສ້າງ​ຄອບ​ຄົວ​ພັດ​ທະ​ນາ​ໃຫ້​ໄດ້ 565 ຄອບ​ຄົວ, ເອົາ​ໃຈ​ໃສ່​ຊຸກ​ຍູ້​ຕິດ​ຕາມກວດ​ກາ ແລະ ປະ​ເມີນ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ມາດ​ຖານ, ສ້າງ ເງືອນ​ໄຂ​ຕ່າງໆ​ໃຫ້​ໄດ້​ຕາມ​ມາດ​ຖານ ເມືອງ ພົ້ນ​ທຸກ.