ກອງປະຊຸມສະຫຼຸບການຈັດຕັ້ງປະຕິບັດວຽກງານຂອງໂຄງການຫຼຸດຜ່ອນຄວາມທຸກຍາກ ແລະ ຂາດໂພຊະນາການໃນເຂດຊົນນະບົດ ປະຈຳປີ 2020 ແລະ ແຜນການປີ 2021 ແຂວງຫົວພັນ

      ວັນ​ທີ 14 ມັງ​ກອນ 2021 ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ໂຄງ​ການຫຼຸດ​ຜ່ອນ​ຄວາມ​ທຸກ​ຍາກ ແລະ ຂາດ​ໂພ​ຊະ​ນາ​ການ ໃນ​ເຂດ​ຊົນ​ນະ​ບົດ​ໄດ້​ຈັດ​ກອງ​ປະ​ຊຸມ​ສະຫຼຸບ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການ ປີ2020 ແລະ ວາງ​ແຜນ​ການ​ປີ 2021 ໂດຍ​ການ​ເປັນ​ປະ​ທານ​ຂອງ​ທ່ານ ຄິ່ນ ທຸມ​ມາ​ລາ ຮອງ​ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ ມີ​ທ່ານ ໄມ​ພຽງ ​ມາ​ດາ​ຈິດ ຫົວ​ໜ້າ​ຂະ​ແໜງ​ພັດ​ທະ​ນາ​ຊົນ​ນະ​ບົດ ແລະ ສະ​ຫະ​ກອນ ທັງ​ເປັນ​ຫົວ​ໜ້າ​ປະ​ສານ​ງານ​ຂອງ​ໂຄງ​ການ​ຂັ້ນ​ແຂວງ, ຮອງ​ເຈົ້າ​ເມືອງ, ເມືອງ​ຊຳ​ໃຕ້, ເມືອງ​ຊ່ອນ, ຫົວ​ເມືອງ ແລະ ເມືອງ​ກັວນ, ມີ​ຜູ້​ປະ​ສານ​ງານ​ຂັ້ນ​ເມືອງ​ເຂົ້າ​ຮ່ວມ​ທັງ​ໝົດ 30 ກ່​ວາ​ທ່ານ, ຍິງ 5 ທ່ານ

.

ໃນ​ວາ​ລະ​ກອງ​ປະ​ຊຸມ​ຜູ້​ຊີ້​ນຳ​ໂຄງ​ການ ​ໄ​ດ້​ຜ່ານ​ບົດ​ສະຫຼຸບການ​ຈັດ​ຕັ້ງ​ປະ​ຕິ​ບັດ​ວຽກ​ຂອງ​ໂຄງ​ການຫຼຸດ​ຜ່ອນ​ຄວາມ​ທຸກ​ຍາກ ແລະ ຂາດ​ໂພ​ຊະ​ນາ​ການ​ໃນ​ເຂດ​ຊົນ​ນະ​ບົດ, ໃນ​ພື້ນ​ທີ່​ເມືອງ​ເປົ້າ​ໝາຍ​ຂອງ​ໂຄງ​ການ ໂດຍ​ເອົາ​ເງິນ​ສົດ​ໃຫ້​ແບບ​ມີ​ເງື່ອນ​ໄຂ ແລະ ເພື່ອ​ສົ່ງ​ເສີມ​ການ​ລົງ​ທຶນ​ໃສ່​ວຽກ​ງານ​ດ້ານ​ໂພ​ຊະ​ນາ​ການ ເຮັດ​ໃຫ້​​ອັດ​ຕາ​ການ​ຂາດ​ໂພ​ສະ​ນາ​ການ​ແບບ​ຊ້ຳ​ເຮື້ອຫຼຸດ​ລົງ​ເທື່ອ​ລະ​ກ້າວ, ເພື່ອ​ຂະ​ຫຍາຍ​ການ​ບໍ​ລິ​ການ​ດ້ານ​ສຸ​ຂະ​ພາບ ແລະ ຂາດ​ໂພ​ຊະ​ນາ​ການ​ໃນ​ເຂດ​ຊົນ​ນະ​ບົດ​ໃຫ້​ທົ່ວ​ເຖີງ​ເປັນ​ຕົ້ນ, ເປົ້າ​ໝາຍ​ຜູ້​ໄດ້​ຮັບ​ຜົນ​ປະ​ໂຫຍດ​ຈາກ​ໂຄງ​ການ​ແມ່ນ: ຄົວ​ເຮືອນ​ທຸກ​ຍາກ, ທີ່​ມີ​ແມ່​ຍິງ​ຖື​ພາ ແລະ ເດັກ​ນ້ອຍ​ຕ່ຳ​ກ່​ວາ 2 ປີ​ລົງ​ມາ, ສຳ​ເລັດ​ການ​ເກັບ​ກຳ​ຂໍ້​ມູນ​ປະ​ເມີນ​ມາດ​ຕະ​ຖານ​ຄອບ​ຄົວ​ທຸກ​ຍາກ ແລະ ມາດ​ຖານ​ການ​ພັດ​ທະ​ນາ​ຕາມ​ດຳ​ລັດ 348/ລບ, ໄດ້​ສຳ​ເລັດ 4 ເມືອງ​ເປົ້າ​ໝາຍ, ມີ​ຈຳ​ນວນ 276 ບ້ານ, ມີ​ຄອບ​ຄົວ​ທັງ​ໝົດ 18 ພັນ 370 ຄອບ​ຄົວ ໃນ​ປີ 2020​, ທິດ​ທາງ​ແຜນ​ການ​ປີ 2021 ຂອງ​ໂຄງ​ການ ລຶບ​ລ້າງ​ຄວາມ​ທຸກ​ຍາກ ແລະ ຂາດ​ໂພ​ຊະ​ນາ​ການ​ໃນ​ຊົນ​ນະ​ບົດ, ສືບ​ຕໍ່ພັດ​ທະ​ນາ​ອົງ​ປະ​ກອບ​ພື້ນ​ຖານ​ຂອງ​ລະ​ບົບ​ການ​ປົກ​ປ້ອງ​ທາງ​ສັງ​ຄົມ, ແຜນ​ໂ​ອນ​ເງິນ​ສົດ​ໃຫ້​ແມ່​ມານ ແລະ ແມ່​ລູກ​ອ່ອນ​ອາ​ຍຸ​ລຸ່ມ 2 ປີ, ການ​ຄຸ້ມ​ຄອງ​ໂຄງ​ການ, ປະ​ສານ​ງານ ແລະ ຕິດ​ຕາມ​ປະ​ເມີນ​ຜົນ. ຈາກນັ້ນ​ຜູ້​ແທນກອງ​ປະ​ຊຸມ​ໄດ້​ແລກ​ປ່ຽນ​ຄຳ​ຄິດ ຄຳ​ເຫັນ​ຢ່າງ​ສ້າງ​ສັນ​ ກົງ​ໄປ​ກົງ​ມາ​ເພື່ອ​ວາງ​​ທິດ​ທາງແຜນ​ການ​ຈັດ​ຕັ້ງ​ປະ​ຕິ​ບັດ​ໃນ​ປີ 2021 ໃຫ້​ໄດ້​ຮັບ​ຜົນ​ດີ​ (ຕາມ​ມາດ​​ຕະຖານ​ພົ້ນ​ທຸກ 348/ລບ).

ກອງ​ປະ​ຊຸມຍັງ​ໄດ້​ຮັບ​ຟັ​ງ ທ່ານ ຄິ່ນ ທຸມ​ມາ​ລາ ເພີ່ນ​ມີ​ຄຳ​ເຫັນ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ​ທີ່​ຍາດ​ມາ​ໄດ້​ໃນ​ໄລ​ຍະ 1 ປີ ຜ່ານ​ມາ ແລະ ພ້ອມ​ກັນ​ສືບ​ຕໍ່​ຕີ​ລາ​ຄາ​ສັງ​ລວມ​ຜົນ​ໄດ້​ຮັບ​ບັນ​ດາ​ກິດ​ຈະ​ກຳ​ທີ່​ສຳ​ເລັດ ແລະ ສືບ​ຕໍ່​ວຽກ​ງານ​ແຜນ​ການ​ປີ 2021 ໃຫ້​ບັນ​ລຸ​ຕາມ​ເປົ້າ​ໝາຍ​ທີ່​ວາງ​ໄວ້ ແລະ ສືບ​ຕໍ່​ປັບ​ປຸງ​ບົດ​ສະຫຼຸບ​ ຜ່ານ​ຜູ້​ຊີ້​ນຳ​ຂັ້ນ​ແຂວງ​ເພື່ອ​ຮັບ​ຮອງ​ລົງ​ລາຍ​ເຊັນ​ເປັນ​ທາງ​ການ, ເພື່ອ​ລາຍ​ງານ​ສູນ​ກາງ.

 

ບັນ​ນາ​ທິ​ການ     ນ. ພວງວັນ​ ມີ​ວົງ​ສາ

ຜູ້​ຂຽນ​ຂ່າວ       ທ. ຄຳ​ພະ​ແກ້ວ ອິນ​ທະ​ວົງ