ການນຳພະແນກລົງຊຸກຍູ້ຕ້ານ ແລະ ສະກັດກັ້ນພະຍາດ ປາກເປື່ອຍລົງເລັບ ງົວ, ຄວາຍ ບ້ານ, ໂພນຊອງ, ເມືອງຊ່ອນ, ແຂວງຫົວພັນ.

ວັນ​ທີ 17 ກຸມ​ພາ 2021 ການ​ນຳ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົ​ວ​ພັນ ນຳ​ໂດຍ​ທ່ານ ພູ​ວົງ ສີ​ສົມ​ຮັກ ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ທ່ານ ວາ​ສະ​ນູນ ສໍ​ອິນ​ໄຊ ຮອງເຈົ້າ​ເມືອງໆ ຊ່ອນ, ຫົວ​ໜ້າ​ຂະ​ແໜງ​ການ, ວິ​ຊາ​ການ​ທີ່​ກ່ຽວ​ຂ້ອງ​ຂັ້ນ​ແຂວງ, ເມືອງ ແລະ ພໍ່​ແມ່​ປະ​ຊາ​ຊົນ​ຜູ້​ລ້ຽງ​ສັດ​ເຂົ້າ​ຮ່ວມ​ຢ່າງ​ພ້ອມ​ພຽງ.

ໂດຍ​ໄດ້​ຮັບ​ການ​ລາຍ​ງານ​ຈາກ​ພໍ່​ແມ່​ປະ​ຊາ​ຊົນ ແລະ ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ​ຊ່ອນ​ໃຫ້​ຮູ້​ວ່າ: ໃນ​ລະ    ​ຫ່​ວາງວັນ​ທີ 10 ຫາ 13 ກຸມ​ພາ 2021 ນີ້​ໄດ້​ມີ​ສັດ​ລ້ຽງປະ​ເພດ​ງົວ, ຄວາຍ ​ຂອງ​ປະ​ຊາ​ຊົນ​ບ້ານ​ ໂພນຊອງ, ເມືອງ​ຊ່ອນ, ໄດ້​ຕິດ​ເຊື້ອ​ພະ​ຍາດ​ປາກ​ເປື່ອຍ​ລົງ​ເລັບ ແລະ ຕາຍ​ໄປ​ຈຳ​ນວນ 5 ໂຕ, ອາ​ການ​ຕາຍ​ແມ່ນ​ຕາຍ​ແຕ່​ອາ​ຍຸ 1 ປີ ລົງ​ມາ, ແລະ ລາຍ​ງານ​ວ່າ​ສ່ວນ​ທີ່​ຕິດ​ເຊື້ອພົບ​ເຫັນ​ແມ່ນ 30 ກ່​ວາ​ໂຕ, ສະ​ນັ້ນ, ​ມາ​ຮອດ​ວັນ​ທີ 17 ກຸມ​ພາ 2021 ວິ​ຊາ​ການພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ລົງ​ສົມ​ທົບ​ກັບ​ວິ​ຊາ​ການ​ຫ້ອງ​ການ​ກະສິ​ກຳ ແລະ ປ່າ​ໄມ້​ ແລະ ສັດ​ຕະ​ວະ​ແພດ​ບ້ານ​ໄດ້​ລົງ​ກວດ​ກາ​ຕົວ​ຈິງ​ເຫັນ​ວ່າ: ສັດ​ລ້ຽງ​ປະ​ເພດ​ງົວ, ຄວາຍ​ໄດ້​ຕິດ​ພະ​ຍາດ​ປາກ​ເປື່ອຍ​ລົງ​ເລັບ 100% ຂອງ​ຈຳ​ນວນ​ສັດ​ທັງ​ໝົດ 300 ກ່​ວາ​ໂຕ ແລະ ຕາຍ​ແລ້ວ 15 ໂຕ, ຈາກນັ້ນ​ການ​ນຳ​ພະ​ແນກ​ໄດ້​ສັ່ງ​ອັ່ນ​ເລ່ງ​ດ່ວນ​ໃຫ້ວິ​ຊາ​ການ​ສັດ​ຕະ​ວະ​ແພດ​ຂອງ​ແຂວງ, ເມືອງ​ປະ​ຕິ​ບັດ​ປິ່ນ​ປົວ​ຕົວ​ຈິງ, ​ນຳ​ສັດ​ລ້ຽງ​ຂອງປະ​ຊາ​ຊົນ​ ​ມາ​ປິ່ນ​ປົວ​ທຸກ​ໂຕ ເປັນ​ຕົ້ນ​ແມ່ນ​ນຳ​ຢາ​ມາ​ລ້າງ​ປາກ​ສັດ, ລ້າງ​ຕີນ​ສັດ ແລະ ແນະ​ນຳ​ໃຫ້​ລ້າງ​ເຊົ້າ​ແລງ​ແຕ່​ລະ​ມື້​ຈົນ​ກ່​ວາ​ອາ​ການ​ດີ​ຂື້ນ, ​ໂຕ​ທີ່​ຕາຍ​ນຳ​ໄປ​ຝັງ, ຈາກນັ້ນ​, ຫ້າມ​ນຳ​ສັດ​ພາຍ​ໃນ​ບ້ານ​ອອກ​ໄປ​ຂາຍ​ໃນ​ຊ່ວງ​ໄລ​ຍະ​ຕິດ​ເຊື້ອ, ຫ້າມ​ນຳ​ສັດ​ຂອງ​ຕົນ​ອອກ​ໄປ​ລ້ຽງ​ຢູ່​ບ້ານ​ອື່ນ, ໂຕ​ທີ່​ຕາຍ​ແລ້ວ​ຫ້າມ​ນຳ​ມາ​ບໍ​ລິ​ໂພກ (ມາ​ກິນ​ເປັນ​ອາ​ຫານ) ສາ​ເຫດ ສັດ​ທີ່​ຕິດ​ເຊື້ອ​ພະ​ຍາດຍ້ອນ​ປະ​ຊາ​ຊົນ​ພາຍ​ໃນ​ບ້ານ​ນຳ​ຊີ້ນ​ສັດ​ຈາກ​ບ່ອນ​ອື່ນ​ນຳ​ມາ​ບໍ​ລິ​ໂພກ (ບໍ່​ໄດ້​ຜ່ານ​ການກວດ​ກາ​ຈາກ​ສັດ​ຕະ​ວະ​ແພດ) ແລະ ໄດ້​ມອບ​ຢາ​ປິ່ນ​ປົວ​ສັດ​ໃຫ້​ບ້ານ ຈຳ​ນວນ​ໜື່ງ.

ຈາກນັ້ນ ການ​ນຳ​ແຂວງສົມ​ທົບ​ກັບ​ການ​ນຳ​ເມືອງ, ພາກ​ສ່ວນ​ທີ​ກ່ຽວ​ຂ້ອງ​ ຂອງ​ເມືອງ ​ໄດ້​ປະ​ກາດ​ໃຫ້​ບ້ານ​ທີ່​ມີ​ພະ​ຍາດ​ສັດຫ້າມ​ນຳ​ສັດ​ພາຍ​ໃນ​ບ້ານ​ອອກ​ຂາຍ​ໃຫ້​ພໍ່​ຄ້າ ຫ້າມ​ນຳ​ສັດ​ຢູ່​ບ່ອນ​ອື່ນ​ມາ​ລ້ຽງ, ຕິດ​ຕາມ​ກັກ​ກັນ​ບໍ່​ໃຫ້​ພະ​ຍາດ​ແພ່​ລາມ​ຂະ​ຫຍາຍ​ໄປ​ບ້ານ​ທີ່​ມີ​ຊາຍ​ແດນ​ຕິດ​ຈອດ​ກັນ​ຢ່າງ​ເດັດ​ຂາດ.

ພາບ-ຂ່າວ, ຄຳ​ພະ​ແກ້ວ ອິນ​ທະ​ວົງ ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ.