ການນຳ ພະແນກກະສິກຳ ແລະ ປ່າໄມ້ ລົງຊຸກຍູ້ ແລະ ຕິດຕາມການຈັດຕັ້ງປະຕິບັດ ປູກພືດລະດູແລ້ງໃນສົກປີ 2021 ເມືອງຊ່ອນ, ແຂວງຫົວພັນ.

ໃນ​ວັນ​ທີ 17-19 ກຸມ​ພາ 2021 ນີ້ ທ່ານ ພູ​ວົງ ສີ​ສົ​ມ​ຮັກ ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ​ມີການ​ນຳ​ເມືອງ ແລະ ພາກ​ສ່ວນ​ກ່ຽວ​ຂ້ອງ​ຂອງ​ແຂວງ, ເມືອງ, ໄດ້​ລົງ​ຊຸກ​ຍູ້ ແລະ ຕິດ​ຕາມ​ການ​ປູກ​ພືດ​ລະ​ດູ​ແລ້ງ, ເມືອງ​ຊ່ອນ, ແຂວງ​ຫົວ​ພັນ.

ອິງ​ຕາມ​ການ​ລາຍ​ງານ​ຂອງ​ຫົວ​ໜ້າ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ ໃຫ້​ຮູ້​ວ່າ: ຜ່ານ​ມາ​ການ​ຈັດ​ຕັ້ງ​ປະ​ຕິ​ບັດ​ແຜນ​ການ​ຕົວ​ເລກ​ປູກ​ພືດ​ລະ​ດູ​ແລ້ງ​ປີ 2020 ໂດຍ​ລວມ​ແລ້ວ​ແຜນ​ການ​ທີ​ຄາດ​ໝາຍວາງ​ໄວ້​ແມ່ນ​ສາ​ມາດ​ປະ​ຕິ​ບັດ​ໄດ້ ເປັນ​ໄປ​ຕາມ​ຈຸດ​ສຸມ​ທີ່​ໄດ້​ກຳ​ນົດ​ໄວ້, ປະ​ຊາ​ຊົນ​ພາຍ​ໃນ​ເມືອງ​ມີ​ຄວາມ​ຕື່ນ​ຕົວ​ທຳ​ການ​ຜະ​ລິດ, ເລີ່ມ​ມີ​ການ​ໃຊ້​ເຕັກ​ນິກວິ​ທະ​ຍາ​ສາດ ເປັນ​ຕົ້ນ​ມີ​ການ​ໃສ່​ຝຸ່ນ​ປັບ​ປຸງ ແລະ ບຳ​ລຸງ​ດິນ ເພື່ອ​ຍົກ​ສູງ​ສະ​ມັດ​ຕະ​ພາບ, ນຳ​ໃຊ້​ແນວ​​ພັນ​ປັບ​ປຸງ, ການ​ຜະ​ລິດໄດ້​ເລີ່ມ​ມີ​ການ​ຕິດ​ພັນ​ກັບ​ການ​ຕະຫຼາດ ແລະ ໃຊ້​ເຄື່ອ​ງ​ມື​ກົນ​ຈັກ​ເຂົ້າ​ໃນ​ການ​ຜະ​ລິດຫຼາຍ​ຂື້ນ​ເທື່ອ​ລະ​ກ້າວ. ໃນ​ລະ​ດູ​ແລ້ງ​ຜ່ານ​ມາ ສັງ​ເກດ​ເຫັນ​ວ່າ: ເມືອງ​ພວກ​ເຮົາ​ສາ​ມາດ​ຄ້ຳ​ປະ​ກັນ​ດ້ານ​ສະ​ບຽງ​ອາ​ຫານ ສະ​ໜອງ​ພືດ​ຜັກ​ທັນ​ຍາ​ຫານ ເຂົ້າ​ສູ່​ຄອບ​ຄົວ, ຕາມ​ທ້ອງ​ຕະຫຼາດ, ບໍ​ລິ​ການ​ສັງ​ຄົມ​ໄດ້​ໃນ​ລະ​ດັບ​ໜື່ງ ແລະ.  ບາງ​ຊະ​ນິດ​ພືດກໍ່​ໄດ້​ກາຍ​ເປັນ​ສິນ​ຄ້າ​ເຊັ່ນ: ຖົ່ວ​ເຫຼືອງ, ແຕງ​ໂມ, ແຕງ​ຊັ້ງ, ສາ​ລີ​ຫວານ ແລະ ພືດ​ຜັກ​ຕ່າງໆ. ເຂດ​ຈຸດ​ສຸມ​ການ​ປູກ​ພືດ​ລະ​ດູ​ແລ້ງ​ທີ່​ເດັ່ນ​ກ່​ວາ​ໝູ່​ແມ່ນ: ການ​ປູກ​ເຂົ້າ​ນາ​ແຊງ​ຂອງ​ປະ​ຊາ​ຊົນ ບ້ານ ຊ່ອນ​ເໜືອ, ຊ່ອນ​ໃຕ້ ແລະ ບ້ານ ນາ​ໝໍ້ ຂະ​ບວນ​ການ​ປູກ​ຜັກ​ຫອມ, ຜັກ​ບົ່ວ, ທຽມ​, ຖົ່ວເຫຼືອງ, ການ​ປູກ​ແຕງ​ຊັ້ງ, ແຕງ​ໂມ, ກະ​ລຳ​ປີ,  ບ້ານ ມັ້ນ, ບ້ານ ຊາຍ. ຜ່ານ​ການຈັດ​ຕັ້ງ​ປະ​ຕິ​ບັດ​ແຜນ​ການ​ສົ່ງ​ເສີມ​ການ​ປູກ​ພືດ​ລະ​ດູ​ແລ້ງ​ປີ 2020 ​ພາຍ​ໃນ​ເມືອງສາ​ມາດ​ບັນ​ລຸ​ຕາມ​ເປົ້າ​ໝາຍ​ຄື້: ເຂົ້າ​ນາ​ແຊງ, ປະ​ຕິ​ບັດ​ໄດ້​ເກືອບ 40 ເຮັກ​ຕາ, ສະ​ມັດ​ຕະ​ພາບເກືອບ 4 ໂຕນ/ເຮັກ​ຕາ, ແຕງ​ໂມ-ແຕງ​ຊັ້ງ, ປະ​ຕິ​ບັດ​ໄດ້​ເກືອບ 25 ເຮັກ​ຕາ, ສະ​ມັດ​ຕະ​ພາບ 10 ໂຕນ/ເຮັກ​ຕາ,  ສາ​ລີ​ຫວານ-ສາ​ລີ​ອາ​ຫານ​ສັດ​, ປະ​ຕິ​ບັດ​ໄດ້​ເກືອບ 37 ເຮັກ​ຕາ, ສະ​ມັດ​ຕະ​ພາບ 7 ໂຕນ/ເຮັກ​ຕາ, ຖົ່ວ​ເຫຼືອງ, ປະ​ຕິ​ບັດ​ໄດ້​ເກືອບ 25 ເຮັກ​ຕາ, ສະ​ມັດ​ຕະ​ພາບ ໂຕນ​ເຄີ່ງ/ເຮັກ​ຕາ, ຜັກ​ບົ່ວ-ຜັກ​ທຽມ, ພືດ​ຜັກ​ຕ່າງໆ, ປະ​ຕິ​ບັດ​ໄດ້​ເກືອບ 370 ເຮັກ​ຕາ, ສະ​ມັດ​ຕະ​ພາບ 4 ໂຕນ/ເຮັກ​ຕາ ແລະ ມັນ​ຝ​ຣັ່ງ, ປະ​ຕິ​ບັດ​ໄດ້​ເກືອບ 2 ເຮັກ​ຕາ, ສະ​ມັດ​ຕະ​ພາບ 15 ໂຕນ/ເຮັກ​ຕາ .

ດ້ານ​ດີ​ໃນ​ການ​ຈັດ​ຕັ້ງ​ປະ​ຕິ​ບັດ​ແຜນ​ການ​ປູກ​ພືດ​ລະ​ດູ​ແລ້ງ, ກໍ່​ຍ້ອນ​ມີ​ຄະ​ນະ​ພັກ, ອຳ​ນາດ​ການ​ປົກ​ຄອງ​ນັບ​ແຕ່​ຂັ້ນ​ແຂວງ, ຂັ້ນ​ເມືອງ, ໄດ້​ຊີ້​ນຳ​ລົງ​ໃກ້​ຊິດ​ຕິດ​ແທດ, ມີ​ແຜນ​ການ​ສູ້​ຊົນ​ຢ່າງ​ລະ​ອຽດ, ແຕ່​ລະ​ຈຸດ​ສຸມ​ເຂດ​ບ້ານ, ຫັນ​ເອົາ​ພະ​ນັກ​ງານ​ວິ​ຊາ​ການ​ລົງ​ຊຸກ​ຍູ້​ແນະ​ນຳ​ກັບ​ທີ່ ແຕ່​ລະ​ຈຸດ​ສຸມ​ເພື່ອ​ນຳ​ພາ​ປະ​ຊາ​ຊົນ​ທຳ​ການ​ຜະ​ລິດ​ໃຫ້​ທ່ວງ​ທັນ​ກັບ​ລະ​ດູ​ການ.

ພາບ-ຂ່າວ, ນັກ​ຂ່າວ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ.