ທ່ານ ປອ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ເຄື່ອນໄຫວ ແລະ ເຮັດວຽກຢູ່ແຂວງຫົວພັນ.

ວັນທີ 13 ມີ​ນາ 2021 ທ່ານ ປອ. ເພັດ ພົມ​ພິ​ພັກ ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະ ປ່າ​ໄມ້ ພ້ອມດ້ວຍກົມ​ທີ່​ກ່ຽວ​ຂ້ອງ​ຂອງ​ກະ​ຊວງ, ໄດ້​ລົງ​ມາ​ເຮັດ​ວຽກ​ຢູ່​ແຂວງ​ຫົວ​ພັນ, ໃນ​ນີ້​ເພີ່ນ​ຍັງໄດ້ນຳເອົາ​ເຄື່ອງ​ຈັກ​ສູບ​ນ້ຳ, ​ດ້ວຍນ້ຳ​ມັນ​ເຄື່ອນ​ທີ່ ( 10 ແຮງ​ມ້າ) ​ຈຳ​ນວນ 8 ເຄື່ອງ, ມາ​ມອບ​ໃຫ້ ພະແນກກະສິກຳ ແລະ ປ່າໄມ້ແຂວງຫົວພັນ ແລະ ທ່ານ​ລັດ​ຖະ​ມົນ​ຕີ​ຍັງ​ໄດ້ໂອ້​ລົມ​ຕໍ່​ພະ​ນັກ​ງານ​ລັດ​ຖະ​ກອນ​ພາຍ​ໃນ​ພະ​ແນກ

​ທ່ານ​ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ໄດ້​ລາຍ​ງານການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ກະ​ສິ​ກຳ ແລະ ປ່າ​ໄມ້ ປີ 2021, ມີຫຼາຍ​ດ້ານ​ທີ່​ພົ້ນ​ເດັ່ນ​ເປັນ​ຕົ້ນ​ແມ່ນການ​ປູກ, ການ​ລ້ຽງ. ຈາກນັ້ນ​ທ່ານ ປອ. ເພັດ ພົມ​ພິ​ພັກ ມີ​ຄຳ​ເຫັນ​ໂອ້​ລົມ​ບາງ​ຕອນ​ເພີ່ນ​ກ່າວ​ວ່າ: ທິດ​ທາງ​ໃນ​ຕໍ່​ໜ້າ​ຂະ​ແໜງ​ການ​ກະ​ສິ​ກຳ ແລະ ປ່າ​ໄມ້, ແຜນ​ພັດ​ທະ​ນາ​ເສດ​ຖະ​ກິດ​ສັງ​ຄົມ, ກອງ​ປະ​ຊຸມ​ຄັ້ງ​ທີ່ 11 ໄດ້​ຮັບ​ຮອງ​ຂະ​ແໜງ​ການ​ກະ​ສິ​ກຳ​ລວມ​ມີ 4 ແຜນ​ງານ​ໃຫ່​ຍ, ຮັບ​ປະ​ກັນ​ທາງ​​ດ້ານຄວາມ​ໝັ້ນ​ຄົງດ້ານ​ສະ​ບຽງ​ອາ​ຫານ ແລະ ໂພ​ສະ​ນາ​ການ, ຈະ​ໄດ້​ລົງ​ເລີກ​ບາງ​ຈຸດ​ເປັນ​ຕົ້ນ​ແມ່ນ​ກຳ​ລັງ​ການ​ຜະ​ລິດ, ໃຫ້​ສອດ​ຄ່ອງ​ກັບ​ຕົວ​ຈິງ, ທ່າ​ແຮງ​ການ​ປູກ-ການ​ລ້ຽງ, ມີ​ອາ​ຫານ​ພຽງ​ພໍ​ມີ​ສ່ວນ​ແຮ​ໄວ້ ແລະ ຂາຍ​ສົ່ງ​ອອກ, ວຽກ​ງານ​ການ​ຜະ​ລິດ​ກະ​ສິ​ກຳ​ເປັນ​ສິນ​ຄ້າເປັນ​ກຸນ​ແຈ ​ການ​ພັດ​ທະ​ນາ, ວຽກ​ງານ​ການ​ພັດ​ທະ​ນາ​ປ່າ​ໄມ້ ມີ 3 ປະ​ເພດ​ປ່າ, ປ່າ​ສະ​ຫງວນ, ປ່າ​ປ້ອງ​ກັນ, ປ່າ​ຜະ​ລິດ ສູ້​ຊົນ​ຮັກ​ສາ​ປ່າ ປົກ​ຄຸມ​ໃຫ້​ໄດ້ 70% ຂອງ​ເນື້ອ​ທີ່​ປ່າ​ທົ່ວ​ປະ​ເທດ, ວາງ​ແຜນ​ພັດ​ທະ​ນາ​ປົກ​ປັກ​ຮັກ​ສາ​ປ່າ​ໄມ້, ແຜນ​ພັດ​ທະ​ນາ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໃຫ້​ດີ​ຂື້ນ, ແຜນ​ງານ​ພັດ​ທະ​ນາ​ຊົນ​ນະ​ບົດ​ແກ້​ໄຂ​ຄວາມ​ທຸກ​ຍາກ ໃຫ້​ຖືກ​ຕ້ອງ​ຕາມ​ພາ​ລະ​ບົດ​ບາດ​ກັບ​ນະ​ໂຍ​ບາຍ​ຂອງ​ລັດ​ຖະ​ບານ, ການ​ພັດ​ທະ​ນາ​ພື້ນ​ຖານ​ໂຄງ​ລ່າງ​ລົງ ໂດຍ​ຫັນ​ມາ​ສູ່​ຊຸກ​ຍູ້​ກິດ​ຈະ​ກຳ​ການ​ຜະ​ລິດ, ການ​ປູກ-ການ​ລ້ຽງ, ເລັ່ງ​ໃສ່​ແກ້​ໄຂ​ການ​ສ້າງ​ອາ​ຊີບ​ຄົງ​ທີ່​ໃຫ້​ແກ່​ປະ​ຊາ​ຊົນ, ຕ້ອງ​ສຸມ​ໃສ່​ປັ​ບ​ປຸງ​ການ​ຈັດ​ຕັ້ງ​ພາ​ລະ​ບົດ​ບາດ ແລະ ເລີ່ມ​ຕົ້ນ​ຈາກ​ສູນ​ເຕັກ​ນິກ​ກະ​ສິ​ກຳ ເປັນ​ກຳ​ລັງ​ແຮງ​ການ​ຜະ​ລິດ, ການ​ສາ​ທິດ, ການ​ສະ​ໜອງ​ແນວ​ພັນ, ການ​ເຝຶກ​ອົບ​ຮົມ​ໃຫ້​ປະ​ຊາ​ຊົນ, ຫັນ​ເອົາ​ພະ​ນັກ​ງານ​ລົງ​ສູ່​ທ້ອງ​ຖິ່ນຈຸດ​ສຸມ​ພັດ​ທະ​ນາ​ແກ້​ໄຂ​ຄວາມ​ທຸກ​ຍາກ​ໃຫ້​ດີ​ຂື້ນ​ເທື່ອ​ລະ​ກ້າວ.

ໂອ​ກາດ​ດັ່ງ​ກ່າວກໍ່​ໄດ້​ມີ​ພິ​ທີ​ເຊັນ​ສັນ​ຍາ​ມອບ-ຮັບ, ຈັກ​ສູບ​ນ້ຳ​ດ້ວຍ​ນ້ຳ​ມັນ​ເຄື່ອນ​ທີ່​ຂະ​ໜາດ 10  ແຮງ​ມ້າ, ຈຳ​ນວນ 8 ເຄື່ອງ​ໃຫ້​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ມອບ​ໂດຍ ທ່ານ ບຸນ​ຄຳ ສີ​ດາ​ວົງ ຫົວ​ໜ້າ​ກົມ​ຊົນ​ລະ​ປະ​ທານ ກະ​ຊວງ​ກະ​ສິ​ກຳ ແລະ ປ່າ​ໄມ້, ຮັບ​ໂດຍ ທ່ານ ພູ​ວົງ​ ສີ​ສົມ​ຮັກ ຫົວ​ໜ້າ ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ໂດຍ ທ່ານ ປອ. ເພັດ ​ພົມ​ພິ​ພັກ ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະ ປ່າ​ໄມ້, ທ່ານ ພອນ​ສຸກ ອິນ​ທະ​ວົງ ຮອງ​ເຈົ້າ​ແຂວງໆ ຫົວ​ພັນ, ພະ​ນັກ​ງານ​ລັດ​ຖະ​ກອນ​ພາຍ​ໃນ​ພະ​ແນກ​ຮ່ວມ​ເປັນ​ສັກ​ຂິ​ພິ​ຍານ​. ເຄື່ອງ​ທີ່​ນຳ​ມາ​ມອບ​ຄັ້ງ​ນີ້​ແມ່ນ​ມີ​ຄວາມ​ສຳ​ຄັນ​ກ່ຽວ​ກັບ​ການ​ປູກ-ການ​ລ້ຽງ, ຕ້ານ​ໄພ​ແຫ້ງ​ແລ້ງ, ນ້ຳ​ຖ້ວມ ແລະ ນຳ​ໃຊ້​ເຂົ້າ​ໃນ​ການ​ຜະ​ລິດ​ໃຫ້​ມີ​ປະ​ສິດ​ທິ​ຜົນ​ສູງ​ສຸດ.

ພາບ-ຂ່າວ, ນັກ​ຂ່າວ​ພະ​ແນກ​ກະ​ສິ​ກຳ ແລະ ປ່າ​ໄມ້ ແຂວງ​ຫົວ​ພັນ.