ການຢ້ຽມຢາມພົບປະແລກປ່ຽນບົດຮຽນ ລະຫ່ວາງ ສູນສົ່ງເສີມເຕັກນິກກະສິກຳຮ່ວມມືລາວ-ຫວຽດ ບ້ານອົ້ງ ແລະ ເຈົ້າເມືອງ 5 ເມືອງແຂວງຫົວພັນ.

ວັນ​ທີ 1 ເມສາ 2021 ສູນ​ສົ່ງ​ເສີມ​ເຕັກ​ນິກ​ກະ​ສິ​ກຳ ຮ່ວມມືລາວ-ຫວຽດ ຈັດພິທີພົບປະແລກປ່ຽນບົດຮຽນ, ​ທີ່​ຫ້ອງ​ປະ​ຊຸມສູນສົ່ງເສີມເຕັກນິກກະສິກຳຮ່ວມມືລາວຫວຽດ, ໂດຍ​ເປັນ​ປະ​ທານ ທ່ານ ພູວົງ ສີສົມຮັກ ຫົວ​ໜ້າ​ພະ​ແນກ​ກະ​ສິ​ກຳ ແລ​ະ ປ່າ​ໄມ້​ແຂວງ, ​ ມີ​ເຈົ້າເມືອງ​ສົບ​ເບົາ, ເມືອງຊຽງຄໍ້, ເມືອງແອດ, ເມືອງຫົວເມືອງ ແລະ ເຈົ້າເມືອງໆຮ້ຽມ, ມີຕົວແທນຈາກພະແນກແຜນການ ແລະ ການລົງທຶນ, ພ້ອມດ້ວຍວິຊາການພາຍໃນສູນເຂົ້າຮ່ວມນຳ.

​ທ່ານ ແອຊຳ ວິໄລຈິດ ຫົວ​ໜ້າ​ສູນ​ສົ່ງ​ເສີມ​ເຕັກ​ນິກ​ກະ​ສິ​ກຳ​ຮ່ວມມືລາວ-ຫວຽດ, ໄດ້​ຜ່ານ​ບົດ​ສະຫຼູບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ປະ​ຈຳ​ປີ 2020, ທິດ​ທາງ​ແຜນ​ການ​ປີ 2021  ແລະ ແຜນ​ພັດ​ທະ​ນາ​ໃນ​ໄລ​ຍະ 5 ປີ​ນັບ​ແຕ່ 2021-2025. ຈາກນັ້ນຜູ້​ເຂົ້າ​ຮ່ວມກອງ​ປະ​ຊຸມ​ຍັງໄດ້ຍ້ຽມຢາມກິດຈະກຳຂອງສູນຄື: ສວນກ້າເບ້ຍໄມ້, ການຜະລິດລູກໝູລາດ-ໝູປ່າ, ການລ້ຽງປາໃນໜອງ ແລະ ການຕໍ່ກິ່ງງ່າໝາກພຸກ-ໝາກກ້ຽງ.​

ຕອນ​ທ້າຍ​ ເຈົ້າເມືອງ 5 ເມືອງຍັງໄດ້ປະກອບຄຳຄິດ-ຄຳເຫັນຢ່າງກົງໄປ-ກົງມາ, ​ເນັ້ນໜັກໃຫ້ພະນັກງານ-​ວິ​ຊາ​ການພາຍໃນສູນແຫ່ງນີ້, ເພີ່ມທະວີຄວາມ​ເອົາ​ໃຈ​ໃສ່​ດ້ວຍຄວາມຮັບຜິດຊອບສູງ, ດ້ວຍການເຝຶກອົບຮົມຖ່າຍທອດຄວາມຮູ້ວິຊາການຕ່າງໆ, ເປັນຕົ້ນແມ່ນການເພາະພັນໝູລາດ-ໝູປ່າ, ໄກ່ພັນຊີ້ນ ແລະ ວິທີຕໍ່ກິ່ງງ່າໄມ້ໃຫ້ໝາກ, ເພື່ອຜັນ ຂະຫຍາຍ  ໃຫ້ແກ່ພໍ່ແມ່ປະຊາຊົນໃນເຂດເປົ້າໝາຍ ສາມາດຍົກລະດັບຜົນຜະລິດຕະພັນໃຫ້ສູງກວ່າເກົ່າ, ເຮັດໃຫ້ເຂົາເຈົ້າມີລາຍຮັບນັບມື້ຫຼາຍຂຶ້ນເພື່ອແນໃສ່ພັດທະນາຄອບຄົວໃຫ້ຫຼຸດພົ້ນຈາກຄວາມທຸກຍາກ ຕາມແຜນຍຸດທະສາດຂອງລັດຖະບານ.

ພາບ-ຂ່າວ, ນັກຂ່າວພະແນກກະສິກຳ ແລະ ປ່າໄມ້ແຂວງຫົວພັນ.