ພະແນກກະສິກຳ ແລະ ປ່າໄມ້ແຂວງ ສຳເລັດພິທີປ່ອຍປາຄືນສູ່ທຳມະຊາດໃນວັນອະນຸລັກສັດນ້ຳ – ສັດປ່າ ວັນທີ 13 ກໍລະກົດ 2019.
ວັນທີ 13 ກໍລະກົດ 2019 ຫ້ອງການກະສິກຳ ແລະ ປ່າໄມ້ ເມືອງຊຳເໜືອ ຈັດພິທີປ່ອຍປາຄືນສູ່ທຳມະຊາດ, ໃນວັນອະນຸລັກສັດນ້ຳ – ສັດປ່າ, ທີ່ສວນສາທາລະນະລາວ – ກວາງໜິງ, ເປັນກຽດເຂົ້າຮ່ວມທ່ານ ວັນໄຊ ແພງຊຸມມາ ເລຂາພັກແຂວງ, ເຈົ້າແຂວງໆ ຫົວພັນ, ມີຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ຫົວໜ້າ, ຮອງຫົວໜ້າພະແນກການ, ອົງການທຽບເທົ່າ, ທະນາຄານ, ໂຮງຮຽນ, ໂຮງໝໍໍ, ການນຳເມືອງຊຳເໜືອ ແລະ ອຳນາດການປົກຄອງບ້ານ 10 ໝູ່ບ້ານອ້ອມຂ້າງເທດສະບານຕົວເມືອງຊຳເໜືອເຂົ້າຮ່ວມ.
ເພື່ອປະຕິບັດຕາມກົດໝາຍວ່າດ້ວຍສັດນໍ້າ – ສັດປ່າສະບັບເລກທີ 07/ສພຊ ລົງວັນທີ 27 ທັນວາ 2007 ແລະ ລັດທະບານລາວໄດ້ກຳນົດເອົາ ວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາແຫ່ງຊາດ, ສະນັ້ນເມືອງຊຳເໜືອຈິ່ງໄດ້ຈັດພິທີປ່ອຍປາຂື້ນທີ່ສວນສາທາລະນະລາວ – ກວາງໜິງ, ລວມມີ 10 ບ້ານຄື: ບ້ານ ພັນໄຊ, ທາດເມືອງ, ນາໜອງບົວ, ນາທົ່ງຈອງ, ມີສຸກ, ນາສະກາງ, ນາອ່າງ, ຊຳເໜືອ, ໂພໄຊ ແລະ ບ້ານນາລິວ. ຈຳນວນປາທີ່ປ່ອຍຄັ້ງນີ້ມີປາທຳມະຊາດຈຳນວນ 4500 ໂຕ ມີປາຜົ້ງ, ປາຈາດ, ປາເຕັດ, ປາຂ້າມ ແລະ ປາອື່ນໆ ປາລ້ຽງ 70 ກິໂລ, ມີປານິນ, ປາໄນ,ປາແຝກ ແລະ ປາພຽງຢາງ. ທັງນີ້ກໍ່ເພື່ອເປັນການອະນຸລັກສັດນ້ຳໃຫ້ແພ່ພັນນັບມື້ນັບຫຼາຍຂື້ນເລື້ອຍໆ. ການປ່ອຍປາໃນຄັ້ງນີ້ແມ່ນໄດ້ແບ່ງໃຫ້ການນຳແຂວງ, ການນຳເມືອງ, ທຸກພາກສ່ວນ ແລະ 10 ໝູ່ບ້ານຈົ່ງນຳເອົາປາໄປປ່ອຍຢູ່ວັງສະຫງວນ ແລະ ວັງຫວງຫ້າມຂອງຕົນ.
ຕອນທ້າຍພິທີ ທ່ານ ພຸດພັນ ແກ້ວວົງໄຊ ເລຂາພັກເມືອງ, ເຈົ້າເມືອງໆ ຊຳເໜືອ, ມີຄຳເຫັນວ່າ, ຈິ່ງຮຽກຮ້ອງໃຫ້ບັນດາພໍ່ – ແມ່ປະຊາຊົນ ແລະ ການຈັດຕັ້ງທຸກພາກສ່ວນຕ້ອງເປັນເຈົ້າການ ໃນການປົກປັກຮັກສາວັງສະຫງວນ ແລະ ວັງຫວງຫ້າມໃນຂອບເຂດຄວາມຮັບຜິດຊອບຂອງບ້ານ, ເພື່ອໃຫ້ເປັນບ່ອນເພາະພັນ ແລະ ແພ່ພັນປາໃນທຳມະຊາດໃຫ້ນັບມື້ນັບຫຼາຍຂື້ນເລື້ອຍໆ.
ບັນນາທິການ
ຄຳປານ ສຸວັນທອນ
ຜູ້ຂຽນຂ່າວ.
ຄຳພະແກ້ວ ອິນທະວົງ