ພະແນກກະສິກຳ ແລະ ປ່າໄມ້ ລົງກວດກາການລະບາດຂອງພະຍາດອາຫິວາໝູ, ຢູ່ບ້ານ ປ່າຄາໃຕ້, ເມືອງຫົວເມືອງ ແລະ ປະກາດເຝົ້າລະວັງທົ່ວແຂວງ.
ວັນທີ 6 – 7 ຕົ້ນເດືອນກໍລະກົດ 2019 ທີ່ຜ່ານມາ ພະແນກກະສິກຳ ແລະ ປ່າໄມ້ແຂວງ ລົງກວດກາການລະບາດຂອງພະຍາດອາຫິວາໝູ, ຢູ່ບ້ານ ປ່າຄາໃຕ້, ເມືອງຫົວເມືອງ, ແຂວງຫົວພັນ. ເຊິ່ງນຳໂດຍ ທ່ານ ສໍສະຫັວນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້, ພ້ອມດ້ວຍຂະແໜງການກ່ຽວຂ້ອງຂອງແຂວງ, ເມືອງ, ເຂົ້າຮ່ວມນຳ.
ຕາມການລາຍງານຂອງປະຊາຊົນຜູ້ລ້ຽງໝູວ່າ: ບ້ານ ປ່າຄາໃຕ້, ໃຫ້ຮູ້ວ່າ: ພາຍໃນບ້ານມີໝູ 400 ກ່ວາໂຕ ແລະ ຕາຍຍ້ອນພະຍາດ 100 ກ່ວາໂຕ, ສະນັ້ນທິມງານວິຊາການຂັ້ນແຂວງ, ຂັ້ນເມືອງ, ໄດ້ລົງກວດກາຕົວຈິງ ແລະ ເກັບຕົວຢ່າງ, ສົ່ງໃຫ້ກົມລ້ຽງສັດ ແລະ ການປະມົງເພື່ອວິໄຈຫາສາເຫດພະຍາດ ຈົນຮອດວັນທີ 8 ກໍລະກົດ 2019 ຜົນກວດ ແມ່ນພົບເຊື້ອພະຍາດອາຫິວາໝູອາຟຣິກາ, ສະນັ້ນ ເຈົ້າແຂວງໆ ຫົວພັນ. ຈິ່ງໄດ້ອອກຄຳສັ່ງແນະນຳເຖິງ ທ່ານ ຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ເຈົ້າເມືອງ 10 ເມືອງທົ່ວແຂວງ, ທ່ານ ຫົວໜ້າດ່ານກວດກາສັດຕະວະແພດສາກົນ ແລະ ດ່ານທ້ອງຖິ່ນ, ທ່ານຫົວໜ້າຫ້ອງການກະສິກຳ ແລະ ປ່າໄມ້ເມືອງ 10 ເມືອງທົ່ວແຂວງ, ເລື່ອງ: ກ່ຽວກັບການເພີ່ມທະວີຄວາມຮັບຜິດຊອບຕໍ່ກັບການເຝົ້າລະວັງ, ປ້ອງກັນ, ສະກັດກັ້ນ ແລະ ຄວບຄຸມ ພະຍາດໝູອາຟຣິກາ, ຕາມກົດໝາຍວ່າດ້ວຍການປົກຄອງທ້ອງຖິ່ນ ແຫ່ງ ສປປລາວ ສະບັບເລກທີ 68/ສພຊ, ລົງວັນທີ 14 ທັນວາ 2015 ໝວດທີ IV ມາດຕາ 20 ວ່າດ້ວຍສິດ ແລະ ໜ້າທີ່ຂອງເຈົ້າແຂວງ, ກົດໝາຍວ່າດ້ວຍການລ້ຽງສັດ ແລະ ການສັດຕະວະແພດ (ສະບັບປັບປຸງ) ສະບັບເລກທີ 8/ສພຊ, ລົງວັນທີ 11 ພະຈິກ 2016, ພະຍາດອາຮິວາໝູອາຟຣິກາທີ່ເກີດຂື້ນໃນຄັ້ງນີ້ ມີລັກສະນະແຜ່ລາມໄວ ແລະ ຂະຫຍາຍອອກເປັນວົງກ້ວາງຢ່າງຕໍ່ເນື່ອງ ສ້າງຄວາມສູນເສຍທາງດ້ານຊັບສິນ, ເງິນຄຳໃຫ້ແກ່ປະຊາຊົນລາວບັນດາເຜົ່າຢ່າງໜັກໜ່ວງສົມຄວນ, ພະຍາດອາຮິວາໝູອາຟຣິກາ ແມ່ນພະຍາດຊືມເຊື້ອທາງເລືອດຕິດຕໍ່ຮ້າຍແຮງ ແຜ່ລາມໄວ, ສາມາດຕິດຕໍ່ໃສ່ໝູທຸກຊະນິດ ແລະ ທຸກເພດໄວເຊີ່ງມີຄວາມທົນທານສູງຕໍ່ສະພາບແວດລ້ອມ; ມີຊີວິດທົນຢູ່ໄດ້ໃນເງື່ອນໄຂທີ່ມີຄວາມເປັນກົດ, ເປັນດ່າງ, ຢູ່ໃນຊາກສັດແຊ່ແຂງໄດ້ດົນເຖີງ 15 ປີ ແລະ ສາມາດຖືເຊື້ອຢູ່ໄດ້ເຖີງ 4 ປີ, ສາມາດຕິດຕໍ່ກັບໝູດ້ວຍກັນ ການສຳພັດລະຫ່ວາງໝູຕິດເຊື້ອ ກັບໝູ ທີ່ມີສຸຂະພາບແຂງແຮງ, ເຊື້ອພະຍາດຕິດມານຳ ໂດຍຜ່ານຄົນ, ພາຫະນະ, ອຸປະກອນ ແລະ ອາຫານ, ຜ່ານພາຫະນະນຳເຊື້ອຈຳພວກເຫັບ, ເຫົາ, ໂດຍມີການຕາຍແບບກະທັນຫັນ ແລະ ໝູທີ່ເປັນພະຍາດນີ້ຈະມີອາການໄຂ້, ໄຂ້ຂື້ນສູງ 42 ອົງສາເຊ, ໃບຫູ ແລະ ຜີວໜັງ ອາດພົບປ່າມແດງຊ້ຳ, ມີຈຸດເນື້ອຕາຍເປັນຈຸດຢູ່ຕາມຜີວໜັງພື້ນທ້ອງ, ອັດຕາການຕາຍສູງ 90 – 100 ເປີເຊັນ, ປະຈຸບັນຍັງບໍ່ທັນມີຢາປ້ອງກັນ ແລະ ປີ່ນປົວເທື່ອ, ເພື່ອສະກັດກັ້ນບໍ່ໃຫ້ເຊື້ອພະຍາດແຜ່ລາມອອກສູ່ວົງກ້ວາງ, ສົ່ງຜົນກະທົບດ້ານລົບຕໍ່ການຜະລິດໝູ ແລະ ການດຳລົງຊີວິດຂອງປະຊາຊົນບັນດາເຜົ່າ ມີຄວາມຈຳເປັນຕ້ອງໄດ້ພ້ອມກັນຕ້ານ ແລະ ສະກັດກັ້ນຕອບໂຕ້ພະຍາດໃຫ້ສະຫົງບລົງໂດຍໄວ. ມອບໃຫ້ພະແນກກະສິກຳ ແລະ ປ່າໄມ້, ທ່ານເຈົ້າເມືອງທຸກເມືອງທົ່ວແຂວງ ແລະ ຫົວໜ້າຫ້ອງການກະສິກຳ ແລະ ປ່າໄມ້ທຸກເມືອງ ຊີ້ນຳນຳພາໃນການກວດກາ, ຊຸກຍູ້ແນະນຳ ບັນດາໜ່ວຍງານລ້ຽງສັດທີ່ຂື້ນກັບຕົນເອງ ໃຫ້ເອົາໃຈໃສ່ຄຸ້ມຄອງ, ໃນການເຄື່ອນຍ້າຍໝູ – ນຳເຂົ້າຊີ້ນໝູ, ໝູພໍ່ແມ່ພັນ, ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດບໍ່ວ່າຈະຈາກຕ່າງປະເທດ, ຫຼືພາຍໃນປະເທດຊ່ວງໄລຍະພະຍາດກຳລັງລະບາດ, ແຕ່ງຕັ້ງຄະນະສະເພາະກິດຕ້ານ ແລະ ຕອບໂຕ້ພະຍາດອາຮິວາໝູອາຟຣິກາທີ່ເກີດຂື້ນໂດຍໄວ ພ້ອມທັງວາງແຜນກຽມຄວາມພ້ອມເປັນຕົ້ນກຳລັງຄົນ, ວັດຖຸອຸປະກອນ, ພາຫະນະ ແລະ ງົບປະມານ ເພື່ອລົງເຄື່ອນໄຫວຕ້ານ ແລະ ຕອບໂຕ້ສະກັດກັ້ນພະຍາດໃຫ້ທັນການ ແລະ ໃຫ້ທ່ານເຈົ້າເມືອງປະກາດເປັນເຂດລະບາດພະຍາດໂດຍດ່ວນ ເມືອງທີ່ກຳລັງເກີດພະຍາດ, ໃຫ້ເພີ່ມທະວີຄວາມຮັບຜິດຊອບ ແລະ ຕິຕາມກວດກາການເຄື່ອນຍ້າຍໝູ ແລະ ຜະລິດຕະພັນໝູ, ຕັ້ງຈຸດດ່ານກວດກາສັດຕະວະແພດຊົ່ວຄາວ ກວດຍຶດໝູ ແລະ ຜະລິດຕະພັນໝູ ທີ່ເຄື່ອນຍ້າຍຈາກເຂດລະບາດພ້ອມທັງຈັດຕັ້ງສີດພົ່ນຢາຂ້າເຊື້ອພາຫະນະທີ່ອອກຈາກເຂດດັ່ງກ່າວ ເພື່ອປ້ອງກັນບໍ່ໃຫ້ເຊື້ອພະຍາດແຜ່ລາມໄປສູ່ບ້ານອື່ນ ຫຼືສະຖານທີ່ອື່ນ, ຖ້າຫາກພົບເຫັນຜູ້ລະເມີດຜ່າຝືນ ການນຳເຂົ້າ ຫຼື ລັກລອບການນຳເຂົ້າຊີ້ນໝູ ແລະ ຜະລິດຕະພັນຊີ້ນໝູທຸກຊະນິດ ຈາກ ສສ ຫວຽດນາມ ເຂດທີ່ລະບາດເຂົ້າສູ່ແຂວງຫົວພັນ ທີ່ບໍ່ຖືກຕ້ອງໃຫ້ສົມທົບກັບພາກສ່ວນທີ່ກ່ຽວຂ້ອງ ດຳເນີນຄະດີຕາມກົດໝາຍຢ່າງເຂັ້ມງວດ, ຊຸກຍູ້ລະດົມປະຊາຊົນທຳລາຍໝູທີ່ຕິດເຊື້ອ ຫຼື ສ່ຽງຕໍ່ການຕິດເຊື້ອໃນວົງແຄບ, ເພື່ອຕັດວົງຈອນຂອງເຊື້ອພະຍາດ, ບໍ່ໃຫ້ນຳໝູທີ່ເຈັບ ຫຼື ຕາຍຍ້ອນພະຍາດນຳມາບໍລິໂພກ ຫຼື ຖີ້ມຕາມຫ້ວຍນ້ຳລຳເຊ, ຕາມທຳມະຊາດຢ່າງເດັດຂາດ, ນຳພາປະຊາຊົນເຮັດອະນາໄມ ແລະ ຂ້າເຊື້ອຄອກສັດ ສີດພົ່ນດ້ວຍຢາຂ້າເຊື້ອ, ໂຮຍດ້ວຍປູນຂາວໃຫ້ທົ່ວເຖີງໃນບໍລິເວນຄອກສັດ ແລະ ບ່ອນທີ່ໝູຍ່າງໄປມາແຕ່ລະມື້, ໃຫ້ລາຍງານສະພາບການລະບາດຂອງພະຍາດ ແລະ ຄວາມຄືບໜ້າຂອງການປະຕິບັດມາດຕາການຕອບໂຕ້ພະຍາດໃຫ້ຂັ້ນເທີງແຕ່ລະວັນ, ປະຕິບັດມາດຕາການອື່ນ ຕາມກົດໝາຍ ແລະ ຕາມຫຼັກວິຊາການທີ່ເໝາະສົມ, ຊີ້ນໝູທີ່ນຳເຂົ້າມາຈຳໜ່າຍຢູ່ທ້ອງຕະຫຼາດ, ຕ້ອງໄດ້ຮັບການກວດກາຢັ້ງຢືນ ຈາກເຈົ້າໜ້າທີ່ສັດຕະວະແພດປະຈຳແຂວງ ແລະ ເມືອງກ່ອນ ແລະ ຫຼັງຂ້າ ຕ້ອງແມ່ນຊີ້ນທີ່ຜ່ານໂຮງຂ້າສັດ ຈິ່ງສາມາດຈຳໜ່າຍໄດ້ ພາຍຫຼັງໄດ້ຮັບຄຳແນະນຳສະບັບນີ້ແລ້ວ, ຮຽກຮ້ອງໃຫ້ທຸກພາກສ່ວນ, ອຳນາດການປົກຄອງທຸກຂັ້ນ, ຜູ້ປະກອບການຕະຫຼອດຮອດພໍ່ແມ່ປະຊາຊົນທົ່ວແຂວງຫົວພັນ, ພ້ອມກັນເປັນເຈົ້າການໃນການຕິດຕາມ – ລາຍງານ, ປະກອບສ່ວນໃນການເຝົ້າລະວັງ, ສະກັດກັ້ນຄວບຄຸມການລະບາດຂອງພະຍາດອາຮິວາໝູອາຟຣິກາດ້ວຍຄວາມຮັບຜິດຊອບສູງ, ຮັບປະກັນບໍ່ໃຫ້ລະບາດໃນວົງກ້ວາງ.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ
ຄຳພະແກ້ວ ອິນທະວົງ
