ພະແນກກະສິກຳ ແລະ ປ່າໄມ້ແຂວງຫົວພັນ, ພົບປະແລກປ່ຽນບົດຮຽນ ພະແນກກະສິກຳ ແລະ ປ່າໄມ້ແຂວງບໍ່ແກ້ວ.
ໃນລະຫ່ວາງວັນທີ 23 – 25 ກໍລະກົດ 2019 ທີ່ຜ່ານມາ ໄດ້ມີກອງປະຊຸມພົບປະແລກປ່ຽນບົດຮຽນ ລະຫ່ວາງ, ພະແນກກະສິກຳ ແລະ ປ່າໄມ້ແຂວງຫົວພັນ ແລະ ພະແນກກະສິກຳ ແລະ ປ່າໄມ້ແຂວງບໍ່ແກ້ວ, ໂດຍເປັນກຽດເຂົ້າຮ່ວມກອງປະຊຸມ ທ່ານ ຄິ່ນ ທຸມມາລາ ຮັກສາການ ຫົວໜ້າພະແນກກະສິກຳ ແລະ ປ່າໄມ້ແຂວງ, ໃຫ້ກຽດຕ້ອນຮັບ ທ່ານ ປາລະມີ ສົນບຸດຕະແສນ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງບໍ່ແກ້ວ, ມີຫົວໜ້າຫ້ອງການບໍລິຫານ ແລະ ຈັດຕັ້ງ – ພະນັກງານ ແລະ ພະນັກງານວິຊາການ ທັງ 2 ຝ່າຍເຂົ້າຮ່ວມຢ່າງພ້ອມພຽງ.
ຈຸດປະສົງກອງປະຊຸມໃນຄັ້ງນີ້ກໍ່ເພື່ອ ພົບປະສອງຝ່າຍ ແລະ ແລກປ່ຽນຄວາມຄິດເຫັນໃນການຈັດຕັ້ງວຽກງານ ຂອງຫ້ອງການບໍລິຫານ ແລະ ຈັດຕັ້ງ – ພະນັກງານ ທີ່ຂື້ນກັບພະແນກກະສິກຳ ແລະ ປ່າໄມ້, ໃນກອງປະຊຸມດັ່ງກ່າວ, ທ່ານ ຮອງພະແນກກະສິກຳ ແລະ ປ່າໄມ້ ແຂວງບໍ່ແກ້ວ ໄດ້ລາຍງານສະພາບພົ້ນເດັ່ນການຈັດຕັ້ງປະຕິບັດວຽກງານວິຊາສະເພາະເປັນຕົ້ນແມ່ນການຜະລິດສະບຽງອາຫານ, ປູກເຂົ້າ, ສາລີຫວານ, ເຟືອກ, ມັນ, ພືດຜັກຕ່າງໆ ແລະ ລ້ຽງສັດເປັນສິນຄ້າເພື່ອບໍລິໂພກພາຍໃນ ແລະ ສົ່ງອອກຕ່າງປະເທດ. ມາຮອດປະຈຸບັນມີຄວາຍ 19 ພັນກ່ວາໂຕ, ງົວ 64 ພັນກ່ວາໂຕ, ໝູ 59 ພັນກ່ວາໂຕ, ແບ້ 17 ພັນກ່ວາໂຕ ແລະ ສັດປີກ 5 ແສນ 3 ພັນກ່ວາໂຕ. ທິດທາງແຜນການໃນຕໍ່ໜ້າ, ເພື່ອເຮັດໃຫ້ວຽກງານກະສິກຳ ແລະ ປ່າໄມ້ໄດ້ຮັບຜົນດີແມ່ນສຸມໃສ່ແຜນງານຂອງກະຊວງກະສິກຳ ແລະ ປ່າໄມ້ 3 ເສົາຄ້ຳ ແລະ 4 ແຜນງານ 10 ແຜນດຳເນີນງານ, ຈັດຕັ້ງປະຕິບັດຕິດພັນກັບຄຳສັ່ງເລກທີ 12/ນຍ ວ່າດ້ວຍມາດຕະການຊຸກຍູ້ເສດຖະກິດຂອງແຂວງ ແລະ ຊຸກຍູ້ 13 ນະໂຍບາຍປູກ, ນະໂຍບາຍລ້ຽງ. ຂອງກະຊວງວາງອອກເປັນຕົ້ນແມ່ນການຜະລິດສະບຽງອາຫານ, ນອກນີ້ທັງສອງຝ່າຍຍັງໄດ້ແລກປ່ຽນບົດຮຽນເປັນຕົ້ນແມ່ນ: ໜ້າທີ່ຂອງຫ້ອງການບໍລິຫານ ແລະ ຈັດຕັ້ງ – ພະນັກງານ, ວຽກງານຄຸ້ມຄອງເອກະສານລະບົບຂາເຂົ້າ – ຂາອອກ, ການຄຸ້ມຄອງພາຫະນະ, ວຽກງານຂໍ້ມູນຂ່າວສານ, ການຈັດຕັ້ງປະຕິບັດວຽກງານບົດບາດຍິງ – ຊາຍ, ວຽກງານແຜນການ ແລະ ການເງິນ ແລະ ວຽກງານຈັດຕັ້ງພະນັກງານ.
ຕອນທ້າຍກອງປະຊຸມທ່ານ ຄິ່ນ ທຸມມາລາ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ ກໍ່ໄດ້ສະແດງຄວາມຊົມເຊີຍຕໍ່ການຕ້ອນຮັບແບບສະໜິດ, ສະໜົມ, ຊົມເຊີຍຜົນງານໃນການຈັດຕັ້ງປະຕິບັດຄາດໝາຍ ຂອງພະແນກກະສິກຳ ແລະ ປ່າໄມ້ແຂວງບໍ່ແກ້ວ ໃນໄລຍະຜ່ານມາ ນອກຈາກນີ້ຫ້ອງການບໍລິຫານ ແລະ ຈັດຕັ້ງ – ພະນັກງານຍັງໄດ້ພາທີມງານຢ້ຽມຢາມກິດຈະກຳການປູກ – ການລ້ຽງສັດເຊັ່ນ: ຢ້ຽມຢາມສວນໝາກມ່ວງພັນ ແລະ ການລ້ຽງງົວເປັນສິນຄ້າ ຂອງປະຊາຊົນນຳອີກ.
ບັນນາທິການ
ແອຊຳ ວິໄລຈິດ
ຜູ້ຂຽນຂ່າວ
ຄຳພະແກ້ວ ອິນທະວົງ
