ຂະແໜງຊົນລະປະທານ – ກວດກາລັດ ສຳເລັດກອງປະຊຸມປະເມີນສະມາຊິກພັກ ແລະ ໜ່ວຍພັກ ປອດໃສ, ເຂັ້ມແຂງ, ໜັກແໜ້ນ, ປະຈຳປີ 2019 ຄັ້ງທີ 2 ແລະ ທິດທາງແຜນການຄັ້ງທີ 3 ປະຈຳປີ 2020.
ຕອນເຊົ້າ ເວລາ 8 ໂມງ ຂອງວັນທີ 22 ມັງກອນ 2020 ໜ່ວຍພັກຂະແໜງຊົນລະປະທານ-ກວດກາລັດ ທີ່ຂຶ້ນກັບ ພະແນກກະສິກຳ ແລະ ປ່າໄມ້ ແຂວງຫົວພັນ, ໄດ້ຈັດກອງປະຊຸມປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຂອງຕົນຂື້ນທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງ, ກອງປະຊຸມດັ່ງກ່າວໄດ້ດຳເນີນເປັນເວລາ 1 ຕອນ, ໂດຍພາຍໃຕ້ການເປັນປະທານຮ່ວມ ຂອງສະຫາຍ ກອນໄທ ແກ້ວນະຄອນ ຄະນະພັກພະແນກກະສິກຳ ແລະ ປ່າໄມ້ແຂວງ,ປະທານກວດກາພັກ ສະຫາຍ ໄຈເພັດ ເຮືອງຖາວອນ ຄະນະພັກຮາກຖານພະແນກ, ເລຂາໜ່ວຍພັກຂະແໜງຊົນລະປະທານ, ຍັງມີເລຂາຄະນະໜ່ວຍພັກອ້ອມຂ້າງທີ່ຂື້ນກັບພະແນກ, ສະມາຊິກພັກສົມບຸນ, ສຳຮອງ ແລະ ຜູ້ຕາງໜ້າຈາກອົງການຈັດຕັ້ງມະຫາຊົນ ເຂົ້າຮ່ວມທັງໝົດ 25 ສະຫາຍ, ຍິງ 5 ສະຫາຍ.
ກອງປະຊຸມຄັ້ງນີ້ ໄດ້ຜ່ານມະຕິຕົກລົງຂອງຄະນະພັກຮາກຖານວ່າດ້ວຍການອະນຸມັດໃຫ້ໜ່ວຍພັກເປີດກອງປະຊຸມມະເມີນສະມາຊິກພັກ ແລະ ໜ່ວຍພັກປະຈຳປີ 2019, ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບກອງປະຊຸມ, ຜ່ານບົດສະຫຼຸບສ້າງໜ່ວຍພັກປອດໃສ, ເຂັ້ມແຂງ, ໜັກ
ແໜ້ນ ປະຈຳປີ 2019 ແລະ ວາງທິດທາງແຜນການປີ 2020, ຜ່ານຮ່າງບົດສຳຫຼວດການຊີ້ນຳ-ນຳພາຂອງຄະນະໜ່ວຍພັກ. ນອກຈາກນີ້ຜູ້ແທນເຂົ້າຮ່ວມກອງປະຊຸມຍັງໄດ້ປະກອບຄຳຄິດ-ຄຳເຫັນໃສ່ບົດສະຫຼຸບ ແລະ ບົດສຳຫຼວດຂອງໜ່ວຍພັກ.
ຕອນທ້າຍຂອງກອງປະຊຸມຍັງໄດ້ຮັບຟັງຄຳເຫັນໂອ້ລົມຈາກສະຫາຍ ກອນໄທ ແກ້ວນະຄອນ ຄະນະຮາກຖານພັກຂອງພະແນກ, ໄດ້ຍ້ອງຍໍຊົມເຊີຍຕໍ່ການຊີ້ນຳ-ນຳພາ ຂອງຄະນະໜ່ວຍພັກ, ເຫັນໄດ້ຄວາມສາມັກຄີເປັນເອກະພາບ, ມີແບບແຜນວິທີເຮັດວຽກແບບລວມສູນປະຊາທິປະໄຕ, ແບ່ງງານໃຫ້ບຸກຄົນຮັບຜິດຊອບຈິ່ງເຮັດໃຫ້ວຽກງານທີ່ໄດ້ຈັດຕັ້ງປະຕິບັດສຳເລັດ, ພ້ອມກັນນັ້ນໄດ້ຮັບການຢັ້ງຢືນເປັນໜ່ວຍພັກແຂງ – ຮູ້ນຳພາຮອບດ້ານໄດ້ 4 ສະໄໝຕິດຕໍ່ກັນ, ຊຶ່ງມັນສະແດງໃຫ້ເຫັນເຖິງຄວາມຮັບຜິດຊອບທາງດ້ານການເມືອງຂອງບັນດາສະຫາຍ, ບັນດາສະຫາຍໃນຄະນະໜ່ວຍພັກຈະຍົກສູງຄວາມສາມັກຄີພາຍໃນໃຫ້ດີກ່ວາເກົ່າ, ຈາກນັ້ນສະຫາຍ ເລຂາໜ່ວຍພັກກໍ່ໄດ້ຮັບຄຳໂອວາດຈາກຄະນະພັກຂັ້ນເທິງ, ໃນການຊີ້ນຳ – ນຳພາໜ່ວຍພັກໃຫ້ໜ່ວຍພັກເປັນໜ່ວຍພັກ, ປອດໃສ,ເຂັ້ມແຂງ, ໜັກແໜ້ນ.
ພາບ-ຂ່າວ, ພະແນກກະສິກຳ ແລະ ປ່າໄມ້ ແຂວງຫົວພັນ.
