ກອງປະຊຸມ ສະຫຼຸບການຈັດຕັ້ງປະຕິບັດແຜນພັດທະນາວຽກງານກະສິກຳ ແລະ ປ່າໄມ້ ປະຈຳປີ 2019 ແລະ ທິດທາງແຜນການ 2020
ວັນທີ 17 ກຸມພາ 2020 ພະແນກກະສິກຳ ແລະ ປ່າໄມ້ແຂວງ ຈັດກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາວຽກງານກະສິກຳ, ປ່າໄມ້ ປະຈຳປີ 2019 ແລະ ວາງທິດທາງແຜນການ ປີ 2020 ທີ່ຫ້ອງປະຊຸມພະແນກ ໃຫ້ກຽດເປັນປະທານຮ່ວມຂອງ ທ່ານ ພັນທອງ ເພັດໄຊສົມພັນ ຄະນະປະຈຳພັກແຂວງ ຮອງເຈົ້າແຂວງຫົວພັນ ແລະ ທ່ານ ພູວົງ ສີສົມຮັກ ກຳມະການພັກແຂວງ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີບັນດາພະແນກກການທີ່ກ່ຽວຂ້ອງຂອງແຂວງ, ຫົວໜ້າຫ້ອງການກະສິກຳ ແລະ ປ່າໄມ້ເມືອງ 10 ເມືອງ ແລະ ພະນັກງານລັດຖະກອນພາຍໃນພະແນກເຂົ້າຮ່ວມ 100 ກ່ວາທ່ານ.
ກອງປະຊຸມທ່ານ ພູວົງ ສີສົມຮັກ ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້ຜ່ານບົດສະຫຼູບການຈັດຕັ້ງປະຕິບັດແຜນການພັດທະນາກະສິກຳ ແລະ ປ່າໄມ້ປະຈຳປີ 2019 ແລະ ທິດທາງແຜນການປະຈຳປີ 2020, ການຈັດຕັ້ງປະຕິບັດແຜນຈຸດສຸມຜະລິດເປັນສິນຄ້າ, ການນຳເຂົ້າ-ສົ່ງອອກ ຜົນຜະລິດກະສິກຳ ຢູ່ພາຍໃນ ແລະ ຕ່າງປະເທດ, ງົບປະມານການລົງທຶນຂອງພາກລັດ ເຂົ້າໃນຂົງເຂດກະສິກຳ ແລະ ປ່າໄມ້, ນະໂຍບາຍສົ່ງເສີມການລົງທຶນ, ສັງເກດຕີລາຄາຄືນ ການປະຕິບັດນະໂຍບາຍທາງດ້ານກະສິກຳ ຕໍ່ປະກອບການທາງດ້ານກະສິກຳ, ຈາກນັ້ນຜູ້ແທນກອງປະຊຸມປະກອບຄຳເຫັນຕໍ່ບົດສະເໜີແຕ່ລະພາກສ່ວນໂດຍໄດ້ເນັ້ນໜັກຕໍ່ຄຳຖາມເຈາະຈີ້ມ.
ຕອນທ້າຍຂອງກອງປະຊຸມ ທ່ານ ພັນທອງ ເພັດໄຊສົມພັນ ກໍ່ໄດ້ໂອ້ລົມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະພະແນກເຂົ້າໃນຂົງເຂດວຽກງານກະສິກຳ, ພ້ອມນີ້ຍັງໄດ້ກະຕຸກຊຸກຍູ້ວິຊາການເອົາໃຈໃສ່ຈັດຕັ້ງປະຕິບັດບັນດາແຜນງານຄ້ຳປະກັນທາງດ້ານສະບຽງອາຫານ, ຄຸ້ມຄອງປ່າໄມ້ ແລະ ຊັບພະຍາກອນປ່າໄມ້, ພັດທະນາຊົນນະບົດ ແລະ ລຶບລ້າງຄວາມທຸກຍາກ, ເພື່ອເປັນການຈັດຕັ້ງປະຕິບັດແຜນງານ 2020 ໃຫ້ບັນລຸຕາມເປົ້າໝາຍທີ່ວາງໄວ້, ການຜະລິດສະບຽງອາຫານໃນທ່າແຮງກະສິກຳທີ່ສະອາດ, ຫັດຖະກຳມູນເຊື້ອ, ການທ່ອງທ່ຽວຕິດພັນກັບການບໍລິການຜ່ານ, ການຜະລິດເປັນສິນຄ້າ, ປູກ, ລ້ຽງ, ປ່າໄມ້, ການປ້ອງກັນແລະແກ້ໄຂໄພພິບັດ.
ຂ່າວ-ພາບ ຄຳພະແກ້ວ ອິນທະວົງ
