ພະແນກກະສິກຳ ແລະ ປ່າໄມ້ແຂວງ ລົງຊຸກຍູ້ການຜະລິດເຂົ້ານາປີ ຢູ່ເມືອງຫົວເມືອງ ແຂວງຫົວພັນ.
ໃນວັນທີ 01 ມີຖຸນາ 2020 ນີ້ ພະແນກກະສິກຳ ແລະ ປ່າໄມ້ແຂວງ ລົງຊຸກຍູ້ ແລະ ຕິດຕາມການປັກດຳນາປີ ຢູ່ 4 ບ້ານ ອ້ອມຂ້າງເທດສະບານເມືອງຫົວເມືອງ, ນຳໂດຍທ່ານ ນາງພວງວັນ ມີວົງສາ ຮອງຫົວໜ້າຫ້ອງການບໍລິຫານ ແລະ ຈັດຕັ້ງ-ພະນັກງານ, ມີວິຊາການຈາກຫ້ອງການກະສິກຳ ແລະ ປ່າໄມ້ເມືອງ, ອຳນາດການປົກຄອງບ້ານ ບ້ານ 4 ບ້ານ ແລະ ປະຊາຊົນເຂົ້າຮ່ວມນຳ
ເພື່ອເປັນການຊຸກຍູ້ ແລະ ຍົກສູງສະມັດຕະພາບການຜະລິດຂອງຊາວກະສິກອນເປັນຕົ້ນແມ່ນການຜະລິດເຂົ້ານາປີ ຕາມການລາຍງານຂອງນາຍບ້ານ ແຕ່ລະບ້ານໃຫ້ຮູ້ວ່າ: ໃນໄລຍະນີ້ແມ່ນໄດ້ເລັ່ງສຸມໃສ່ການປັກດຳນາປີ ອິງໃສ່ສະພາບດິນຟ້າອາກາດມີຝົນຕົກເຮັດໃຫ້ມີນ້ຳພຽງພໍໃນການດຳນາ, ໂດຍສະເພາະແມ່ນ ບ້ານເມືອງເປີນ ແລະ ບ້ານຄ້ອງ ມີເນື້ອທີ່ນາ 9 ສິບກ່ວາເຮັກຕາ, ນ້ຳປ້ອງ ແລະ ບ້ານຫົວຊຽງ ມີເນື້ອທີ່ 70 ກ່ວາເຮັກຕາ ຜົນຜະລິດ 5 ໂຕນກ່ວາ/ເຮັກຕາ, ສຳເລັດແລ້ວ 90% ນອກຈາກນີ້ບ່ອນໃດມີນ້ຳພຽງພໍກໍ່ໄດ້ປ່ອຍປາໃສ່ນານຳອີກ, ສ່ວນເຕັກນິກໃນການດຳນາແມ່ນຍັງດຳນາແບບເດີມ, ບາງຄອບຄົວກໍ່ຫັນມາເຮັດກ້າກີບດຽວ, ແນວພັນເຂົ້າແມ່ນເຂົ້າຄາຍຫອມ, ຜົນຜະລິດສູງກ່ວາເຂົ້າອື່ນໆ ສະເພາະເຂດນີ້.
ຍ້ອນຄວາມດຸໝັ່ນຫ້າວຫັນຂອງປະຊາຊົນໃນການປັກດຳນາປີຂອງຕົນເພື່ອໃຫ້ທ່ວງທັນກັບລະດູການ, ນອກຈາກເຮັດນາແລ້ວຍັງໄດ້ປູກປ່າ, ປູກພືດເປັນສິນຄ້າ ແລະ ລ້ຽງສັດ ເພື່ອເຮັດໃຫ້ປະຊາຊົນເຂດດັ່ງກ່າວຫຼຸດຜ່ອນຄວາມທຸກຍາກເທື່ອລະກ້າວ,
ບັນນາທິການ ນ. ພວງວັນ ມີວົງສາ
ພາບ-ຂ່າວ. ຄຳພະແກ້ວ ອິນທະວົງ
