ພະແນກກະສິກຳ ແລະ ປ່າໄມ້ແຂວງ ສົມທົບກັບ ເມືອງຫົວເມືອງ, ໂຄງການປ້ອງກັນດິນຟ້າອາກາດ, ຮ່ວມກັນປູກຕົ້ນໄມ້ເພື່ອປົກປັກຮັກສາສິ່ງແວດລ້ອມ ເນື່ອງໃນວັນປູກຕົ້ນໄມ້ແຫ່ງຊາດ
ພະແນກກະສິກຳ ແລະ ປ່າໄມ້ແຂວງ ສົມທົບກັບ ເມືອງຫົວເມືອງ, ໂຄງການປ້ອງກັນດິນຟ້າອາກາດ, ໄດ້ຈັດພິທີປູກຕົ້ນໄມ້ ທີ່ ອ່າງນ້ຳອົ້ມເມືອງຫົວເມືອງ ໃຫ້ກຽດເຂົ້າຮ່ວມພິທີປູກຕົ້ນໄມ້ໃນຄັ້ງນີ້ມີ ທ່ານ ພູວົງ ສີສົມຮັກ ກຳມະການພັກແຂວງ ຫົວໜ້າພະແນກກະສິກຳ ແລະ ປ່າໄມ້ແຂວງ ມີທ່ານ ອ່ອນພັນ ທອງທິດາ ເລຂາພັກເມືອງ ເຈົ້າເມືອງໆ ຫົວເມືອງ ນອກນັ້ນ ຍັງມີຜູ້ຕາງໜ້າທີມງານໂຄງການປ້ອງກັນດິນຟ້າອາກາດຈາກສູນກາງ ຫ້ອງການ, ອົງການຈັດຕັ້ງມະຫາຊົນ, ບັນ ດາບໍລິສັດ, ນັກຮຽນ-ນັກສຶກສາ ມີຜູ້ເຂົ້າຮ່ວມທັງໝົດ 2 ຮ້ອຍກ່ວາຄົນ
ເພື່ອເປັນການຈັດຕັ້ງປະຕິບັດຍຸດທະສາດປ່າໄມ້ ແຕ່ນີ້ ຮອດປີ 2020 ຂອງກະຊວງກະສິກຳ ແລະ ປ່າໄມ້ ກໍ່ຄືຂອງລັດຖະບານ ໃນການເພີ່ມຄວາມປົກຫຸ້ມຂອງເນື້ອທີ່ປ່າໄມ້ໃຫ້ໄດ້ 70 % ແລະ ປູກໄມ້ໃຫ້ໄດ້ 500,000 ເຮັກຕາ ຮອດປີ 2020 ໃຫ້ປະກົດຜົນເປັນຈິງ ລັດຖະບານໄດ້ກຳນົດເອົາວັນທີ 1 ມິຖຸນາ ຂອງທຸກໆປີເປັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ, ພ້ອມທັງເປັນການສະເຫຼີມສະຫຼອງວັນສິ່ງ ແວດລ້ອມໂລກ ວັນທີ 5 ມິຖຸນາ ທີ່ຈະມາເຖີງນີ້, ເພື່ອເປັນການປູກຈິດສຳນືກໃຫ້ທຸກຄົນມີສ່ວນຮ່ວມໃນການປົກປັກຮັກສາປ່າໄມ້ ແລະ ຮັກສາສະພາບແວດລ້ອມໃຫ້ສວຍງາມ ເຫັນໄດ້ຄຸນປະໂຫຍດຂອງປ່າໄມ້ທີ່ມີຕໍ່ຄົນ ແລະ ສິ່ງທີ່ມີຊິວິດ ທັງເປັນການໂຄສະນາເຜີຍແຜ່ໃຫ້ມວນຊົນ ໃນການປົກປັກຮັກສາສິ່ງແວດລ້ອມ. ຕົ້ນໄມ້ທີ່ນໍາມາປູກໃນຄັ້ງນີ້ມີ 2 ຈຸດ, ຈຸດອ່າງນ້ຳອົ້ມເທດສະບານເມືອງ ແລະ ຈຸດບ້ານນາເກງ, ລວມ 11 ເຮັກຕາ, ມີຈໍານວນ ທັງໝົດ 2 ພັນ 5 ຮ້ອຍກວ່າຕົ້ນ ຊະນິດຕົ້ນໄມ້ມີ: ໄມ້ໂລງເລງ, ໄມ້ດູ່ລາຍ, ໄມ້ດູ່ທຳມະດາ, ໄມ້ຄະຍຸງ, ໄມ້ຈວງ, ດອກຄູນ ແລະ ເບ້ຍໄມ້ຄາຍປ່າ. ເພື່ອໃຫ້ຕົ້ນໄມ້ທຸກຕົ້ນທີ່ນຳມາປູກໃນຄັ້ງນີ້ໄດ້ເຕີບໃຫຍ່, ເປັນປ່າໄມ້ສີຂຽວ ແລະ ມີຄວາມຍືນຍົງພະແນກກະສິກຳ ແລະ ປ່າໄມ້ແຂວງ ແລະ ຫ້ອງການກະສິກຳ ແລະ ປ່າໄມ້ ເມືອງຫົວເມືອງ, ຮຽກຮ້ອງມາຍັງບັນດາທ່ານຈົ່ງພ້ອມກັນປະກອບສ່ວນເຂົ້າໃນການບົວລະບັດຮັກສາຕົ້ນໄມ້, ປ້ອງກັນບໍ່ໃຫ້ໄຟໄໝ້ລາມປ່າ,ອານະໄມຕົວເມືອງ, ບໍ່ຖີ້ມ ແລະ ບໍ່ຈູດຂີ້ເຫຍື້ອຊະຊາຍ ຈົ່ງພ້ອມກັນອະນຸລັກຊັບພະຍາກອນທໍາມະຊາດ ແລະ ການປົກປັກຮັກສາສິ່ງແວດລ້ອມ ຕາມທິດສີຂຽວ ແລະ ຍືນຍົງແມ່ນໜ້າທີ່ຂອງໝົດທຸກຄົນ.
ບັນນາທິການ ພວງວັນ ມີວົງສາ
ພາບ-ຂ່າວ ຄຳພະແກ້ວ ອິນທະວົງ
