ທ່ານຮອງລັດຖະມົນຕີກະຊວງກະສິກຳ ແລະ ປ່າໄມ້ ລົງຊຸກຍູ້ການຜະລິດທີ່ແຂວງຫົວພັນ.
ໃນລະຫວ່າງວັນທີ 10-11 ມີຖຸນາ 2020 ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ພ້ອມດ້ວຍຄະນະໄດ້ລົງມາເຄື່ອນໄຫວວຽກງານກະສິກຳ ແລະ ຊຸກຍູ້ການຜະລິດ ທີ່ເມືອງຊ່ອນ, ເປັນກຽດຕ້ອນຮັບໂດຍ ທ່ານ ສີວິໄລ ພີມມະວົງ ເຈົ້າເມືອງໆຊ່ອນ, ທ່ານ ສໍສະຫັວນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ຈາກນັ້ນວັນທີ 11 ມີຖຸນາ 2020 ເພີ່ນຍັງໄດ້ໂອ້ລົມພະນັກງານ ລັດຖະກອນພາຍໃນພະແນກກະສິກຳ ແລະ ປ່າໄມ້ແຂວງ ທີ່ຫ້ອງປະຊຸມພະແນກ ໂດຍ ທ່ານ ສໍສະຫັວນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງໄດ້ລາຍງານໂດຍຫຍໍ້ສະພາບການຈັດຕັ້ງປະຕິບັດການນຳພາ-ຊີ້ນຳວຽກງານກະສິກຳ ແລະ ປ່າໄມ້ ໃນໄລຍະ 6 ເດືອນຜ່ານມາ, ຕີລາຄາການຊີ້ນຳ-ນຳພາຂອງຄະນະພັກຕໍ່ດ້ານການເມືອງແນວຄິດ, ຕໍ່ວຽກງານວິຊາສະເພາະຂອງພະນັກງານ-ລັດຖະກອນ ແລະ ທິດທາງແຜນການໃນຕໍ່ໜ້າ, ສືບຕໍ່ສູ້ຊົນບັນດາຕົວເລກ ຄາດໝາຍທີ່ວາງໄວ້ໃນແຕ່ລະແຜນດຳເນີນງານ ເປັນຕົ້ນແມ່ນສູ້ຊົນຕາມມະຕິສະພາປະຊາຊົນແຂວງຫົວພັນໄດ້ກຳນົດເຊັ່ນ: ການຜະລິດເຂົ້າ, ການຜະລິດພຶດສະບຽງອາຫານ ແລະ ການຂະຫຍາຍຝູງສັດໃຫ້ໄດ້ຕາມຈຸດປະສົງ ແລະ ຄາດໝາຍທີ່ວາງໄວ້.
ໃນໂອກາດນີ້, ທ່ານຮອງລັດຖະມົນຕີ ໄດ້ເນັ້ນໜັກໃຫ້ພະແນກກະສິກຳ ແລະ ປ່າໄມ້ແຂວງ, ຕ້ອງສືບຕໍ່ຄົ້ນຄ້ວາບັນດາໜ້າວຽກ, ວິຊາສະເພາະທີ່ຕິດພັນກັບຂະແໜງກະສິກຳໃຫ້ເລິກເຊີ່ງ, ກ້ວາງຂວາງ, ເປັນຕົ້ນແມ່ນຂະແໜງການຄ້າ, ສາທາ, ເອົາໃຈໃສ່ລົງຊຸກຍູ້ສົ່ງເສີມປະຊາຊົນທຳການຜະລິດຫຼາຍຂື້ນ ເພື່ອຮັບປະກັນຄວາມໝັ້ນຄົງທາງດ້ານສະບຽງອາຫານ, ຕິດພັນກັບການຜະລິດທີ່ສະອາດ, ຈຳກັດການໃຊ້ສານເຄມີທີ່ຕ້ອງຫ້າມ, ມອບໃຫ້ສູນສົ່ງເສີມເຕັກນິກກະສິກຳທົດລອງນຳໃຊ້ເຕັກນິກກະສິກຳອັ່ນໃໝ່ເຂົ້າໃນການປູກ-ການລ້ຽງ, ເປັນຕົວແບບ ເປັນບ່ອນຖ່າຍທອດເຕັກນິກໃຫ້ແກ່ປະຊາຊົນ ໂດຍໃຫ້ໄດ້ທັງປະລິມານ ແລະ ຄຸນນະພາບ, ຈັດຕັ້ງກຸ່ມຜະລິດສະຫະກອນຜະລິດເປັນສິນຄ້າທີ່ຕະຫຼາດຕ້ອງການຕາມຄວາມເໝາະສົມ, ການຄຸ້ມຄອງຊັບພະຍາກອນປ່າໄມ້ຕ້ອງໄດ້ກຳນົດລະອຽດ ເຂດປ່າຜະລິດ, ປ່າຊົມໃຊ້ ແລະ ປ່າປ້ອງກັນ, ປູກໄມ້, ຟື້ຟູປ່າໄມ້, ປົກປັກຮັກສາປ່າໄມ້ໃຫ້ຫຼາຍຂື້ນຕື່ມ, ມອບໃຫ້ຂະແໜງພັດທະນາຊົນນະບົດ ແລະ ສະຫະກອນ, ເອົາໃຈໃສ່ປະຕິບັດຕາມແຜນນະໂຍບາຍຂອງພັກ ໃນການພັດທະນາຊົນນະບົດແບບໃໝ່, ສ້າງບ້ານໃຫ້ເປັນບ້ານພັດທະນາ, ສ້າງບ້ານໃຫ່ຍໃຫ້ເປັນບ້ານສີສັນຕົວເມືອງນ້ອຍ, ຈັດສັນພູມລຳເນົາ ແລະ ອາຊີບຄົງທີ່ກຳນົດທີ່ຢູ່ອາໄສໃນການທຳມາຫາກີນຂອງປະຊາຊົນໃຫ້ດີຂື້ນກ່ວາເກົ່າ.
ບັນນາທິການ ປອ ສົມສັກ ຈັນມາລີ
ພາບ-ຂ່າວ ຄຳພະແກ້ວ ອິນທະວົງ
