Khamphakeo Inthavong

ພະແນກກະສິກຳ ແລະ ປ່າໄມ້, ສຳເລັດພິທີອະນຸມັດໃຫ້ພະນັກງານ-ລັດຖະກອນຮັບອູດໜູນບຳນານ.

ໃນຕອນເຊົ້າວັນທີ 16 ມັງກອນ 2020 ນີ້, ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ ໄດ້ຈັດພິທີປະກາດໃຫ້ພະນັກງານ-ລັດຖະກອນຮັບອູດໜູນບຳນານ, ໂດຍ​ການ​ເປັນ​ປະ​ທານຂອງທ່ານ ພູ​ວົງ ສີ​ສົມ​ຮັກ ກຳ​ມະ​ການ​ພັກ​ແຂວງ ເລ​ຂາ​ຄະ​ນະ​ພັກ​ຮາກ​ຖານ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ,ມີບັນດາຂະແໜງການຂອງພະແນກ ແລະ ພະ​ນັກ​ງານ​ວິ​ຊາ​ການ​ເຂົ້າ​ຮ່ວມ 50 ກ່​ວາ​ທ່ານ.

ໃນພິທີ ​ຜູ້ຕາງ​ໜ້າ​ຫ້ອງ​ການ​ບໍ​ລິ​ຫານ, ຈັດ​ຕັ້ງ – ພະ​ນັກ​ງານໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງກະສິກຳ ແລະ ປ່າໄມ້ວ່າດ້ວຍການອະນຸມັດໃຫ້ພະນັກງານ-ລັດຖະກອນຮັບອູດໜູນບຳນານ.ອິງຕາມກົດໝາຍວ່າດ້ວຍພະນັກງານ – ລັດຖະກອນສະບັບເລກທີ 74/ສພຊ ລົງວັນທີ 18ທັນວາ 2015. ຕາມແຈ້ງການຂອງກະຊວງພາຍໃນ ສະບັບເລກທີ 1807/ພນ ລົງວັນທີ 25 ພະຈິກ 2019 ອະນຸມັດໃຫ້ລັດຖະກອນອອກຮັບອູດໜູນບຳນານຈຳນວນ 4 ສະຫາຍ.

ກອງ​ປະ​ຊຸມ​ດັ່ງ​ກ່າວ ທ່ານ ​ພູ​ວົງ ສີ​ສົມ​ຮັກ ​ໃນ​ນາມ​ປະ​ທານກອງ​ປະ​ຊຸມກໍ່​ໄດ້​ຊົມ​ເຊີຍ​ຜົນ​ງານ​ທີ່​ຍາດ​ມາ​ໄດ້​​ຂອງ 3 ສະຫາຍໃນໄລຍະຜ່ານມາ, ຫຼັງຈາກທີ່ໄດ້ຮັບອູດໜູນບຳນານແລ້ວຂໍໃຫ້ເປັນແບບຢ່າງໃນການນຳພາ-ຊີ້ນຳພະນັກງານ

ລຸ້ນໃໝ່ຈັດຕັ້ງປະຕິບັດສືບທອດຜົນງານອັນດີຂອງວຽກງານກະສິກຳ ແລະ ປ່າໄມ້ຕໍ່ໄປ.

 

ຂ່າວ-ພາບ ພະແນກກະສິກຳ ແລະ ປ່າໄມ້ແຂວງຫົວພັນ

 

 

ການນຳພະແນກກະສິກຳ ແລະ ປ່າໄມ້ແຂວງ, ລົງຊຸກຍູ້, ສົ່ງເສີມການລ້ຽງງົວຂອງບໍລິສັດ ສຸກຈະເລີນ ກໍ່ສ້າງ. ບ້ານ ໜອງຄ້າງ, ເມືອງຊຳເໜືອ, ແຂວງຫົວພັນ.

ວັນ​ທີ 14 ທັນ​ວາ 2019 ທ່ານ ພົນຈັດຕະວາ ສຸ​ລິນ​ພອນ ຄຳ​ພະ​ຈັນ ຄະ​ນະ​ປະ​ຈຳ​ພັກ​ແຂວງ, ຫົວ​ໜ້າ​ກອງ​ບັນ​ຊາ​ການ​ທະ​ຫານ​ແຂວງ, ທ່ານ ພູ​ວົງ​ ສີ​ສົມ​ຮັກ ກຳ​ມະ​ການ​ພັກ​ແຂວງ, ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ກາ​ນ​ນຳ​ເມືອງ​ຊຳ​ເໜືອ, ພ້ອມ​ດ້ວຍ​ຂະ​ແໜງ​ການ​ທີ່​ກ່ຽວ​ຂ້ອງ​ເຂົ້າ​ຮ່ວມ​ນຳ.

ໃນ​ວາ​ລະ​ການ​ລົງ​ຊຸກ​ຍູ້, ສົ່ງ​ເສີມ ແລະ ຢ້ຽມ​ຢາມ, ກໍ່​ໄດ້​ຮັບ​ຟັງ​ການ​ລາຍ​ງານ​ຈາກ ​ບໍ​ລິ​ສັດ, ສຸກ​ຈະ​ເລີນ ກໍ່​ສ້າງວ່າ: ສະ​ຖານ​ທີ່​ລ້ຽງ ບ້ານ ໜອງ​ຄ້າງ​ເຊື່ອມ​ຕໍ່​ເຂດ​ແດນ, ບ້ານ​ ນາ​ເອົ້າ ໃນ​ເບື້ອງ​ຕົ້ນ​ໄດ້​ຊື້​ງົວ​ນຳ​ປະ​ຊາ​ຊົນ​ມາ​ລ້ຽງ​ຈຳ​ນວນ 21 ໂຕ, ຄວາຍ 5 ໂຕ, ແຕ່​ປີ 2018. ສ້າງ​ຄອກ​ໄດ້ 2 ຫຼັງ, ມີ​ເນື້ອ​ທີ່​ປູກ​ຫ້​ຍາ ແລະ ບ່ອນ​ສັດ​ລ້ຽງ​ຢູ່ 78 ເຮັກ​ຕາ, ມີ​ກຳ​ມະ​ກອນ​ລ້ຽງ 2 ຄອບ​ຄົວ, ປະ​ຈຸ​ບັນ​ງົວ​ໄດ້​ເກີດ​ລູກ​ ຂະ​ຫຍາຍ​ອອກ​ເປັນ 63 ໂຕ, ພາຍ​ໃນ 1 ປີ ແລະ ຄວາຍ​ກຳ​ລັງ​ຖື​ພາ​ມານ 4 ໂຕ. ທຶນ​ທັງ​ໝົດ​ໃນ​ການ​ສ້າງ​ຮົ້ວ, ແຮງ​ງານ, ງົບປະມານຊື້ສັດ, ອາຫານສັດ, ແນວພັນຫ້ຍາ ແລະ ຢາປ້ອງກັນພະຍາດ, ການ​ບໍ​ລິ​ຫານ​ອື່ນໆ. 3 ຕື້​ 2 ຮ້ອຍກ່​ວາ​ລ້ານ​ກີບ.

ຈາກນັ້ນທ່ານການນຳພະແນກກໍ່ໄດ້ແນະນຳຮູບແບບວິທີການປູກຝັງຂະຫຍາຍເນື້ອທີ່ປູກໃຫ້ຫຼາຍຂື້ນເພື່ອຜະລິດເປັນສິນຄ້າ ແລະ ທອມສັດໃຫ້ເປັນພໍ່ພັນແມ່ພັນຕຸ້ຍດີມີສຸຂະ ພາບແຂງແຮງເພື່ອ ຂະຫຍາຍພັນສັດໄດ້ຫຼາຍຂື້ນ.

 

ພາບ-ຂ່າວ, ພະແນກກະສິກຳ ແລະ ປ່າໄມ້ແຂວງຫົວພັນ

 

ບ້ານ ກ້ຽນ ແລະ ບ້ານ ໂສຍ ເມືອງວຽງໄຊ, ແຂວງຫົວພັນ, ກະກຽມພື້ນທີ່ປູກພືດລະດູແລ້ງ 2019

ຕາມ​ການ​ລາຍ​ງານ​ຂອງ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​, ໜ່ວຍ​ງານ​ປູກ​ຝັງ, ເມືອງວຽງ​ໄຊ​ໃຫ້​ຮູ້​ວ່າ: ການ​ກະ​ກຽມ​ພື້ນ​ທີ່​ປູກ​ພືດ​ລະ​ດູ​ແລ້ງ 2019 ເຂດ​ໂສຍ, ເມືອງວຽງ​ໄຊ, ບ້ານ ​ກ້ຽນ 30 ຫຼັງ​ຄາ​ເຮືອນ​ໄດ້​ກະ​ກຽມ​ເນື້ອ​ທີ່​ປູກ 3 ເຮັກ​ຕາ​ກ່​ວາ, ມີ​ໝາກ​ແຕງ​ຊັ້ງ, ແຕງ​ລາຍ, ໝາກ​ອຶ ແລະ ໝາກ​ຖົ່ວ. ບ້ານ​ໂສຍ 112 ຫຼັງ​ຄາ​ເຮືອນ​ໄດ້​ກະ​ກຽມ​ເນື້ອ​ທີ່​ປູກ​ຈຳ​ນວນ 35 ເຮັກ​ຕາ, ມີ​ໝາກ​ແຕງ​ຊັ້ງ, ແຕງ​ລາຍ, ໝາກ​ໂມ, ໝາກ​ຖົ່ວ​ຍາວ, ຜັກ​ບົ່ວ ແລະ ຜັກ​ທຽມ, ການ​ປູກ​ພືດ​ຄັ້ງ​ນີ້ ໂດຍ​ແມ່ນ​ທຶນ​ຂອງ​ປະ​ຊາ​ຊົນ​ເອງ, ສ່ວນ​ວິ​ຊາ​ການ​ໜ່ວຍ​ງານ​ປູກ​ຝັງ​ຂອງ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ​, ແມ່ນ​ລົງ​ຊຸກ​ຍູ້, ຕິດ​ຕາມ​ແນະ​ນຳ ແລະ ປ້ອງ​ກັນ​ສັດ​ຕູ​ພືດ

ຂ່າວ, ພາບ ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງວຽງ​ໄຊ.

 

ກົມຊົນລະປະທານກະຊວງກະສິກຳ ແລະ ປ່າໄມ້, ລົງຊຸກຍູ້, ຕິດຕາມສະພາບການສ້ອມແປງ, ຟື້ນຟູລະບົບຊົນລະປະທານ ແລະ ມອບເຄື່ອງບັນເທົາທຸກຢູ່ບ້ານ ສົ້ນຂົວ, ເມືອງຫົວເມືອງ.

ໃນ​ລະ​ຫ່​ວາງວັນ​ທີ 31 ຕຸ​ລາ – 2 ພະ​ຈິກ 2019 ທ່ານ ບຸນ​ຄຳ ສີ​ດາ​ວົງ ຫົວ​ໜ້າ​ກົມ​ຊົນ​ລະ​ປະ​ທານ ພ້ອມ​ດ້ວຍ​ທີມ​ງານ, ​ກະ​ຊວງ​ກະ​ສິ​ກຳ ແລະ ປ່າ​ໄມ້, ການ​ນຳ​ ພະ​ແນກ ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ພ້ອມ​ດ້ວຍ​ຄະ​ນະ, ການ​ນຳ​ເມືອງວຽງ​ໄຊ, ຫົວ​ໜ້າ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງວຽງ​ໄຊ, ພ້ອມ​ດ້ວຍ​ຂະ​ແໜງ​ການ​ກ່ຽວ​ຂ້ອງ​ຂອງແຂວງ, ເມືອງ, ເຂົ້າ​ຮ່ວມ.

ໃນ​ວາ​ລະ​ການ​ລົງ​ຊຸກ​ຍູ້ ແລະ ຕິດ​ຕາມ ກໍ່​ໄດ້​ຮັບ​ຟັງ​ການ​ລາຍ​ງານ ​ຈາກ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ, ສະ​ພາບ​ການ​ຟື້ນ​ຟູ ແລະ ສ້ອມ​ແປງ​ຊົນ​ລະ​ປະ​ທານ ທີ່ນຳ​ໃຊ້​ງົບ​ປະ​ມານ​ຂອງ​ລັດ​ຖະ​ບານ, ​ໄດ້​ຈັດ​ຕັ້ງ​ປະ​ຕິ​ບັດ ປີ​ຜ່ານ​ມາ​ຈຳ​ນວນ 12 ໂຄງ​ການ, ສ້ອມ​ແປງ​ຫົວ​ງານ ແລະ ລະ​ບົບ​ຄອງ​ເໝືອງ 8 ໂຄງ​ການ, ສ້ອມ​ແປງ​ຄອງ​ເໝືອງ 3 ໂຄງ​ການ ແລະ ການ​ຟື້ນ​ຟູ ​ເນື້ອ​ທີ່​ນາ​ມີ​ທັງ​ໝົດ 55 ບ້ານ​ຈຸດ​ທີ່​ຖືກ​ຜົນ​ກະ​ທົບ​ຈາກ​ດິນ​ທັບ​ຖົມ, ມີ​ມູນ​ຄ່າ​ທັງ​ໝົດ 29 ຕື້​ກ່​ວາ​ກີບ, ໄດ້​ຮັບ​ຟັງ​ການ​ລາຍ​ງານ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານສູນບໍລິການເຕັກນິກກະສິກຳ ແລະ ປ່າ​ໄມ້ຮ່ວມມືລາວ – ຫວຽດ ບ້ານອົ້ງ, ເມືອງ​ຊຳ​ເໜືອ, ​​ສະ​ຖາ​ນີ​ບໍ​ລິ​ການ​ເຕັກ​ນິກ​ກະ​ສິ​ກຳ ແລະ ປ່າ​ໄມ້​ຫ້ວຍ​ສາ, ເມືອງວຽງ​ໄຊ, ຈາກນັ້ນທີມ​ງານ​ກົມ​ຊົນ​ລະ​ປະ​ທານ, ​ໄດ້​ມອບ​ເງີນບ່ອນ​ລະ ​ຈຳ​ນວນ 3 ລ້ານ​ກີບ, ໃຫ້​ສູນ ແລະ​ສະ​ຖາ​ນີ, ເພື່ອ​ຊຸກ​ຍູ້​ການ​ປູກ, ລ້ຽງ, ເປີດ​ຝຶກ​ອົບ​ຮົມ​ໃຫ້​ຊາວ​ກະ​ສິ​ກອນ​ຜູ້​ທີ່​ມີ​ຄວາມ​ສົນ​ໃຈ​ຢາກ​ຮຽນ, ມອບ​ເງີນ ຈຳ​ນວນ 5 ລ້ານ​ກີບ​ເພື່ອ​ຊຸກ​ຍູ້​ກອງ​ປະ​ຊຸມ​ໃຫ່​ຍ​ອົງ​ຄະ​ນະ​ພັກ​ເມືອງວຽງ​ໄຊ, ທີ່​ຈະ​ໄຂ​ຂື້ນ​ໃນ​ມໍ່ໆ​ນີ້.

ຈາກນັ້ນ ທ່ານ ຫົວ​ໜ້າ​ກົມ ຊົນ​ລະ​ປະ​ທານ ​ກະ​ຊວງ​ກະ​ສິ​ກຳ ແລະ ປ່າ​ໄມ້ ກໍ່​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ​ທີ່​ມີ​ຜົນ​ສຳ​ເລັດຫຼາຍ​ດ້ານ ແລະ ເພີ່ງ​ພໍ​ໃຈ​ຕໍ່​ຄວາມ​ພະ​ຍາ​ຍາມ​ຂອງ​ຄະ​ນະ​ນຳ​ເມືອງ ແລະ ຂະ​ແໜງ​ການ​ທີ່​ກ່ຽວ​ຂ້ອງ​ເຮັດ​ໃຫ້​ວຽກ​ງານ​ໄດ້​ຈັດ​ຕັ້ງ​ປະ​ຕິ​ບັດ​ມີ​ຜົນ​ສຳ​ເລັດ ແກ້​ໄຂ​ບັນ​ຫາ​ຂອງ​ປະ​ຊາ​ຊົນ​ໄດ້​ທຳ​ການ​ຜະ​ລິດ​ຢ່າງ​ທ່ວງ​ທັນ​ກັບ​ລະ​ດູ​ການ, ມອບ​ໝາຍໃຫ້​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ​ສັງ​ລວມ​ລາຍ​ລະ​ອຽດ​ຕໍ່​ກັບ​ວຽກ​ງານ​ຊົນ​ລະ​ປະ​ທານ, ຜົນ​ການ​ລົງ​ທຶນ, ຜົນ​ຕອບ​ແທນ, ຄວາມ​ຕັ້ງ​ໃຈ​ຂອງ​ປະ​ຊາ​ຊົນ​ໃນ​ການ​ນຳ​ໃຊ້​ນ້ຳ​ຊົນ​ລະ​ປະ​ທານ, ຈະ​ໄດ້​ປະ​ເມີນ ແລະ ປະ​ຕິ​ຮູບ​ພື້ນ​ຖານ​ໂຄງ​ລ່າງ, ການ​ປະ​ຕິ​ບັດ​ຄາດ​ໝາຍ​ແກ້​ໄຂ​ຄວາມ​ທຸກ​ຍາກ, ຈາກ​ການ​ສ້າງ​ລາຍ​ຮັບ​ຜົນ​ຜະ​ລິດ​ກະ​ສິ​ກຳ, ​ການ​ພັດ​ທະ​ນາ​ໃຫ້​ສອດ​ຄອງ​ກັບ​ສະ​ພາບ​ຄວາມ​ເປັນ​ຈິງ​ທ່າ​ແຮງ​ໃນ​ທ້ອງ​ຖິ່ນ, ໃນ​ໂອ​ກາດ​ດັ່ງ​ກ່າວ​ທີມ​ງານ​ກົມ​ຊົນ​ລະ​ປະ​ທານ, ກໍ່​ໄດ້​ນຳ​ເອົາ​ວັດ​ຖຸ​ປັດ​ໃຈ​ໄປ​ມອບ​ໃຫ້​ປະ​ຊາ​ຊົນ​ຜູ້​ໄດ້​ຮັບ​ເຄາະ​ຮ້າຍ​ຈາກ​ອັກ​ຄີ​ໄຟ​ໄໝ້, ​ຢູ່​ບ້ານ ສົ້ນ​ຂົວ, ເມືອງ​ຫົວ​ເມືອງ, ​ເຄື່ອງ​ທີ່​ນຳ​ມາ​ມອບ​ໃນ​ຄັ້ງ​ນີ້ປະ​ກອບ​ມີ: ອາ​ຫານ​ແຫ້ງ ແລະ ເຄື່ອງ​ນຸ່ງ​ຫົ່ມ ມູນ​ຄ່າ 22 ລ້ານ​ກ່​ວາ​ກີບ, ເງີນ​ສົດ 13 ລ້ານ​ກ່​ວາ​ກີບ, ພະ​ແນກ​ກະ​ສິ​ກຳ ແລະ ປ່າ​ໄມ້ ມອບອຸ​ປະ​ກອນ​ຮັບ​ໃຊ້​ຄົວ​ເຮືອນ ມູນຄ່າ​ 4 ລ້ານ 6 ແສນ​ກ່​ວາ​ກີບ, ມອບໂດຍ​ທ່ານ ບຸນ​ຄຳ ສີ​ດາ​ວົງ, ​ຫົວ​ໜ້າ​ກົມ​ຊົນ​ລະ​ປະ​ທານ ແລະ ທ່ານ​ ສໍສະ​ຫັວນ ບານ​ຄຳ​ມີ ຮອງ​ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ກ່າວ​ຮັບ​ໂດຍ ທ່ານ ຄຳ​ພອນ ພັນ​ວົງ​ໄຊ ຮອງ​ເລ​ຂາ​ພັກ​ເມືອງ, ຮອງ​ເຈົ້າ​ເມືອງ, ເມືອງ​ຫົວ​ເມືອງ ແລະ ມອບ​ຕໍ່​ໃຫ້ອຳ​ນາດ​ການ​ປົກ​ຄອງ​ບ້ານ ແລະ ປະ​ຊາ​ຊົນ, ໂດຍ​ຊ້ອງ​ໜ້າ ທ່ານ ພັນ​ທອງ ​ເພັດ​ໄຊ​ສົມ​ພັນ, ​ຄະ​ນະ​ປະ​ຈຳ​ພັກ​ແຂວງ, ຮອງ​ເຈົ້າ​ແຂວງ, ແຂວງ​ຫົວ​ພັນ, ​ເຂົ້າຮ່ວມ​ເປັນ ສັກ​ຂີ​ພິ​ຍານນຳ.

 

ບັນ​ນາ​ທິ​ການ

ແອ​ຊຳ ວິ​ໄລ​ຈິດ

ຜູ້​ຂຽນ​ຂ່າວ

ຄຳ​ພະ​ແກ້ວ ອິນ​ທະ​ວົງ

ພະແນກກະສິກຳ ແລະ ປ່າໄມ້, ໂຄງການຮ່ວມມືລາວ-ຫວຽດ ລົງກວດກາຄວາມຄືບໜ້າ ແລະ ຊຸກຍູ້ການຜະລິດ, ໃນການຈັດຕັ້ງປະຕິບັດໂຄງການບັນດາກິດຈະກຳຍ່ອຍຢູ່ 6 ບ້ານເປົ້າໝາຍ, ເມືອງວຽງໄຊ ແຂວງຫົວພັນ.

ໃນ​ວັນ​ທີ 22 ຕຸ​ລາ 2019 ທີ່​ຜ່ານ​ມາ ໂຄງ​ການ​ຮ່ວມ​ມື​ລາວ-ຫວຽດ ນຳ​ໂດຍ ທ່ານ ແອ​ຊຳ ວິ​ໄລ​ຈິດ ຫົວ​ໜ້າ​ຫ້ອງ​ການ​ບໍ​ລິ​ຫານ ແລະ ຈັດ​ຕັ້ງ-ພະ​ນັກ​ງານ ພະ​ແນກ​ກະ​ສິ​ກຳ ແລະ ປ່າ​ໄມ້ ທັງ​ເປັນ​ຄະ​ນະ​ປະ​ສານ​ງານ​ໂຄງ​ການ​ແ​ບ່ງ​ເຂດ​ການ​ຜະ​ລິດ​ກະ​ສິ​ກຳ ແຂວງ​ຫົວ​ພັນ, ​ພ້ອມ​ດ້ວຍ​ທີມ​ງານ​ຈາກ​ຂະ​ແໜງ, ປູກ​ຝັງ, ລ້ຽງ​ສັດ ແລະ ຄຸ້ມ​ຄອງພັດ​ທະ​ນາ​ທີ່​ດິນ​, ຜູ້​ຊ່ຽວ​ຊານ​ຈາກ​ສະ​ຖາ​ບັນ​ວາງ​ແຜນ ແລະ ອອກ​ແບບ​ກະ​ສິ​ກຳ, ກະ​ຊວງ​ກະ​ສິ​ກຳ ແລະ ພັດ​ທະ​ນາ​ຊົນ​ນະ​ບົດ, ການ​ປູກ, ລ້ຽງ ຈາກ ສ​ສ ຫວຽດ​ນາມ ທີມ​ງານ​ວິ​ຊາ​ການ, ຫ້ອງ​ການ​ກະ​ສິ​ກຳແລະປ່າ​ໄມ້​ເມືອງວຽງ​ໄຊແລະຄອບ​ຄົວ​ເປົ້າ​ໝາຍ​ຂອງ​ໂຄງ​ການ​ເຂົ້າ​ຮ່ວມ​ນຳ

ຈຸດປະສົງ ເພື່ອຊຸກຍູ້ ແລະ ຕິດຕາມ ການປະຕິບັດ ກິດຈະກຳສາ​ທິດ​ການ​ປູກ,ການ​ລ້ຽງຂອງໂຄງການຮ່ວມ​ມື​ລາວ-ຫວຽດ 6 ບ້ານເປົ້າໝາຍຂອງໂຄງການ ໃນໄລຍະທີ່​ຜ່ານ​ມາ ຊຶ່ງເປົ້າໝາຍຂອງໂຄງການແມ່ນ ເພື່ອເຮັດໃຫ້ປະຊາຊົນ ໄດ້ມີການຜະລິດແບບຍືນຍົງ ປະກອບສ່ວນໃນການຫຼຸດຜ່ອນຄວາມທຸກຍາກ ແລະ ປັບປຸງຊີວິດການເປັນຢູ່ທີດີຂື້ນໂດຍການຜະລິດກະສິກຳທີ່ຫຼາກຫຼາຍຊະນິດ

ໂອກາດທີມງານລົງມາຊຸກຍູ້ຄັ້ງນີ້ໄດ້ເຂົ້າຢ້ຽມຢາມ 6 ບ້ານເປົ້າໝາຍຂອງໂຄງການ ເພື່ອເບິ່ງກິດຈະກຳການ​ປູກຜັກ​ເຮືອນ​ຮົ່ມ ຢູ່ ບ້ານ ລ້ອງ​ກູ້, ມີ​ຄອບ​ຄົວ​ຕົວ​ແບບ​ທົດ​ລອງ​ປູກ 1 ຄອບ​ຄົວ, ຜັກ​ທີ່​ປູກ​ໄລ​ຍະ​ນີ້ງອກ​ງາມ​ດີ, ຜັກ​ຈຳ​ນວນ​ໜື່ງ​ໄດ້​ຂາຍ​ອອກ​ຕະຫຼາດ​ແລ້ວ, ການ​ປູກ​ໄມ້​ໃຫ້​ໝາກ ຢູ່ ບ້ານ​ພູ​ໄຊ, ປະ​ຈຸ​ບັນເບ້ຍ​ໄມ້​ແມ່ນ​ຂຽວ ແລະ ງອກ​ງາມດີ​ເປັນ​ຕົ້ນ​ແມ່ນ​ເບ້ຍ​ໝາກ​ນາວ, ໝາກ​ແປ້ນ, ການ​ລ້ຽງ​ໄກ່​ຢູ່ ບ້ານ ​ນາ​ເມືອງ, ມີ​ຈຳ​ນວນ 11 ຄອບ​ຄົວ ທີ່​ໄດ້​ຮັບ​ທຶນ​ສົ່ງ​ເສີມ​ສ້າງ​ຄອກ​ ແລະ ຮົ້ວ​ອ້ອມ​ຄອກ​ໄກ່, ແຕ່​ລະ​ຄອບ​ຄົວ​ໄດ້​ຮັບ​ແນວ​ພັນ​ໄກ່ 50 ໂຕ, ການ​ລ້ຽງົວ ຢູ່ ບ້ານ ນາ​ລວງ ມີ​ຈຳ​ນວນ 11 ຄອບ​ຄົວ​ທີ່​ໄດ້​ຮັບ​ທຶນ​ສົ່ງ​ເສີມ​ສ້າງ​ຄອກ ແລະ ແນວ​ພັນ, ສົ່ງ​ເສີມ​ການ​ລ້ຽງ​ປາ ແລະ ຍົກ​ສະ​ມັດ​ຕະ​ພາບ​ເຂົ້າ ຢູ່ ບ້ານ ນາ​ວິດ ມີ​ຈຳ​ນວນ 11 ຄອບ​ຄົວ​ລ້ຽງ​ປາ ແລະ 8 ຄອບ​ຄົວ​ຍົກ​ສູງ​ສະ​ມັດ​ຕະ​ພາບ​ເຂົ້າ, ການ​ປູກ​ເຂົ້າ​ໄກ່​ນ້ອຍ ຢູ່ ບ້ານ, ຊຽງ​ລວງ, ໄດ້​ຮັບ​ທືນ​ສົ່ງ​ເສີມ​ຈຳ​ນວນ 20 ຄອບ​ຄົວ, ໄດ້​ແນະ​ນຳ​ເຕັກ​ນິກ​ການ​ໃສ່​ຝຸ່ນ, ຕົ້ນ​ເຂົ້າ​ງອກ​ງາມ​ດີ, ບໍ່​ມີ​ສັດ​ຕູ​ພືດ​ທຳ​ລາຍ ປະ​ຈຸ​ບັນ​ກຳ​ລັງ​ເກັບ​ກ່ຽວ ແລະ ຄັດ​ເລືອກ​ເມັດ​ພັນ​ເຂົ້າເພື່ອ​ປູກ​ໃນ​ປີ​ຕໍ່​ໄປ. ຕອນ​ທ້າຍ​ການ​ລົງ​ຢ້ຽມ​ຢາມ ແລະ ສົ່ງ​ເສີມ​​, ທາງ​ໂຄງ​ການ​ຍັງ​ໄດ້​ສະ​ໜອງແນວ​ພັນ​ພືດ, ແນວ​ພັນ​ສັດ, ​ຝຸ່ນ​ປຸຍ, ອາ​ຫານ​ສັດ, ຢາ​ປາບ​ສັດ​ຕູ​ພືດ ແລະ ແນະ​ນຳເຕັກ​ນິກ​ວິ​ທີ​ນຳ​ໃຊ້​ໃຫ້​ຄອບ​ຄົວ​ເປົ້າ​ໝາຍ​ຂອງ​ໂຄງ​ການ​ນຳ​ອີກ, ນອກ​ຈາກນີ້​ຍັງ​ໄດ້​ແນະ​ນຳ​ໃຫ້​ວິ​ຊາ​ການ​ຂັ້ນ​ເມືອງ​ສືບ​ຕໍ່​ລົງ​ຊຸກ​ຍູ້​ຢ່າງ​ໃກ້​ສິດ ບັນ​ດາ​ກິດ​ຈະ​ກຳ, ​ຄອບ​ຄົວ​ເປົ້າ​ໝາຍ​ຂອງ​ໂຄງ​ການໃນ​ການ​ຈັດ​ຕັ້ງ​ປະ​ຕິ​ບັດ​ໃນ​ຕໍ່​ໜ້າ.

 

ບັນ​ນາ​ທິ​ການ   ​ແອ​ຊຳ ວິ​ໄລ​ຈິດ                                                                            

ຜູ້​ຂຽນ​ຂ່າວ ຄຳ​ພະ​ແກ້ວ ອິນ​ທະ​ວົງ

ການນຳພະແນກກະສິກຳ ແລະ ປ່າໄມ້ ລົງຊຸກຍູ້ ແລະ ຕິດຕາມ ການຈັດຕັ້ງປະຕິບັດແຜນ 5 ປີ ແລະ ວາງທິດທາງແຜນການ 5 ປີ ຢູ່ເມືອງຊຳເໜືອ.

   ວັນ​ທີ 8 ຕຸ​ລາ 2019 ທ່ານ​ພູ​ວົງ ສີ​ສົມ​ຮັກ ກຳ​ມະ​ການ​ພັກ​ແຂວງ, ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ ພ້ອມ​ດ້ວຍ​ທີມ​ງານຂະ​ແໜງ​ການ​ໄດ້ລົງ​ຊຸກ​ຍູ້ ແລະ ຕິດ​ຕາມ​ການ​ຈັດ​ຕັ້ງ​ປະ​ຕິ​ບັດ​ແຜນ 5 ປີ​ ແລະ ວາງ​ທິດ​ທາງ​ແຜນ​ການ​ໃນ 5 ປີ​ ( 2020-2025) ​ຢູ່ທີ່​ສະ​ໂມ​ສອນ​ແຂວງ, ໃນ​ການ​ລົງ​ເຮັດ​ວຽກ​ໃນ​ຄັ້ງ​ນີ້ ມີການ​ນຳ​ເມືອງ, ​ມີຫົວ​ໜ້າ, ຮອງ​ຫົວ​ໜ້າ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ, ມີ​ພາກ​ສ່ວນ​ທີ່​ກ່ຽວ​ຂ້ອງ​ຂັ້ນ​ເມືອງ ແລະ ພະ​ນັກ​ງານ​ລັດ​ຖະ​ກອນພ້ອມ​ດ້ວຍ​​ອຳ​ນາດ​ການ​ປົກ​ຄອງ 10 ໝູ່​ບ້ານເຂົ້າ​ຮ່ວມ​.

   ​ຈຸດ​ປະ​ສົງ​ຂອງ​ການ​ເຄື່ອນ​ໄຫວ​ວຽກ​ໃນ​ຄັ້ງ​ນີ້ ແມ່ນ​ເພື່ອ​ຊຸກ​ຍູ້​ຕິດ​ຕາມ ການ​ຈັດ​ຕັ້ງ​ປະ​ຕິ​ບັດ ແຜນ​ພັດ​ທະ​ນາເສດ​ຖະ​ກິດ-ສັງ​ຄົມ​ໂດຍ​ສະ​ເພາະ​ແມ່ນ, ຂົງ​ເຂດກະ​ສິ​ກຳ ແລະ ປ່າ​ໄມ້, ກະ​ກຽມ​ໃນ​ການ​ວາງ​ແຜນ ພັດ​ທະ​ນາກະ​ສິ​ກຳ ແລະ ປ່າ​ໄມ້ ແຕ່​ປີ 2020-2025, ໃນ​ກອງ​ປະ​ຊຸມ​ດັ່ງ​ກ່າວ ຜູ່​ເຂົ້າ​ຮ່ວມ​ໄດ້ສະ​ແດງ​ແນວ​ຄວາມ​ຄິດ ໃນ​ການ​ພັດ​ທະ​ນາ ກະ​ສິກຳ ແລະ ປ່າ​ໄມ້, ຕາມ 3 ທັດ​ສະ​ນະ​ຊີ້​ນຳ​ຂອງ​ອຳ​ນາດ​ການ​ປົກ​ຄອງ​ແຂວງ ເຊັ່ນ: ລຸດ​ຜ່ອນກໍ່​ສ້າງ​ພື້ນ​ຖານ​ໂຄງ​ລ່າງ ທີ່ບໍ່​ຈຳ​ເປັນ, ເລັ່ງ​ໃສ່​ສົ່ງ​ເສີມ​ຊາວ​ກະ​ສິ​ກອນເພີ່ມ​ທະ​ວີ​ການ​ປູກ – ກາ​ນ​ລ້ຽງ ແລະ ຊຸກ​ຍຸ້​ປັບ​ປຸງ​ການ​ເຄື່ອນ​ໄຫວ​​ຊີ້​ນຳ-ນຳ​ພາ, ບັນ​ດາ​ສະ​ຖາ​ນີບໍ​ລິ​ການເຕັກ​ນິກ ກະ​ສິ​ກຳ ແລະ ປ່າ​ໄມ້, ສູນ​ບໍ​ລິ​ການ​ເຕັກ​ນິກ, ທີ່​ມີ​ຢູ່​ແລ້ວໃຫ້​ມີ​ການ​ເຄື່ອນ​ໄຫວ ບໍ​ລິ​ການ​ປະ​ຊາ​ຊົນກາ​ຍ​ເປັນ​ບ່ອນ​ເຝິກ​ອົບ​ຮົມ, ລິ​ເລີ່ມ​ໃຫ້ຊາວ​ກະ​ສິ​ກອນ​ສ້າງ​ແນວ​ຄວາມ​ຄິດ​ຢາກ​ປູກ, ຢາກ​ລ້ຽງ ຢ່າງ​ກ້​ວາງ​ຂວາງ ແລະ ແຜນ​ຍຸດ​ທະ​ສາດ​ແຫ່ງ​ຊາດ ໃນ​ການ​ພັດ​ທະ​ນາກະ​ສິກຳ ແລະ ປ່າ​ໄມ້ ຕາມ 3 ເສົາ​ຄ້ຳ 4 ແຜນ​ງານ ແລະ 10 ແຜນ​ດຳ​ເນີນ​ງານ ຂອງ​ກະ​ຊວງ ກະ​ສິ​ກຳ ແລະ ປ່າ​ໄມ້.

  ໃນ​ວາ​ລະ​ການ​ປະ​ຊຸມ  ທ່ານ ​ພູ​ວົງ ສີ​ສົມ​ຮັກ ​ໄດ້ມີຄຳ​ເຫັນ​ຕໍ່​ກອງ​ປະ​ຊຸມ ​ໂດຍ​ປຸກ​ລະ​ດົມ​ແນວ​ຄວາມ​ຄິດ​ຊີ້​ນຳ-ນຳ​ພາໃນ 5 ປີ​ຕໍ່​ໜ້າ ທີ່​ຈະ​ມີ​ແຜນ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ຄາດ​ໝາຍ ແລະ  ສິ່ງ​ທ້າ​ທາຍ​ເຊັ່ນ: ​ພື້ນ​ທີ່​ທຳ​ການ​ຜະລິດ​ມີ​ຈຳ​ກັດ​ຍ້ອນ​ພູມ​ສັນ​ຖານ, ​ຮູບ​ແບບ​ການ​ຜະ​ລິດ​ຍັງ​ບໍ່​ທັນ​ຕິດ​ພັນ​ກັບ​ການ​ຕະຫຼາດ, ທຶນ​ຮອນ ແລະ ບຸກ​ຄະ​ລາ​ກອນ​ມີ​ຈຳ​ກັດ, ຊຶ່ງ​ໄລ​ຍະ​ຜ່ານ​ມາແຂວງ​​ຫົວ​ພັນ ໄດ້​ຮັບຜົນ​ກະ​ທົບ​ຈາກ​ໄພ​ທຳ​ມະ​ຊາດ ​ເຮັດ​ໃຫ້​ເນື້ອ​ທີ່​ການ​ຜະ​ລິດ, ພື້ນ​ຖານ​ໂຄງ​ລ່າງ​ ​ຖືກ​ເສຍ​ຫາຍ​ເປ່​ເພ ແລະ ​ມີ​ການ​ລະ​ບາດຂອງ​ຕັກ​ແຕນ​ຝູງໄມ້​ປ່ອງ, ບົ້ງ​ແມ​ງ, ສັດ​ຕູ​ພືດ ແລະ ພະ​ຍາດ​ສັດ, ຍຸດ​ທະ​ສາດ​ແຫ່ງ​ຊາດ​ຕໍ່​ການ​ພັດ​ທະ​ນາ​ຂົງ​ເຂດ​ກະ​ສິ​ກຳ ແລະ ປ່າ​ໄມ້, ເສົາ​ຄ້ຳ​ທາງ​ດ້ານ​ກະ​ສິ​ກຳ ແລະ ປ່າ​ໄມ້, ​ແນ​ໃສ່​ເຮັດ​ໃຫ້​ຮັບ​ປະ​ກັນ​ຄວາມ​ໝັ້ນ​ຄົງ​ທາງ​ດ້ານ​ສະ​ບຽງ​ອາ​ຫານ, ປ່າ​ໄມ້ ແລະ ຊັບ​ພະ​ຍາ​ກອນ​ປ່າ​ໄມ້ ​ຕ້ອງ​ໃຫ້​ມີ​ເນື້ອ​ທີ່​ປ່າ​ໄມ້​ປົກ​ຄຸມ 70% ທົ່ວ​ປະ​ເທດ, ເລັ່ງ​ໃສ່​ວາງ​ແຜນເພື່ອ​ພັດ​ທະ​ນາ​ຊົນ​ນະ​ບົດ ແລະ ລຶບ​ລ້າງ​ຄວາມ​ທຸກ​ຍາກ. ເພື່ອ​ຈັດ​ຕັ້ງ​ປະ​ຕິ​ບັດ​ໜ້າ​ວຽກ​ດັ່ງ​ກ່າວ​ຕ້ອງ​ໄດ້​ເອົາ​ໃຈ​ໃສ່ ​ປະ​ສານ​ສົມ​ທົບ​ກັບ​ຂະ​ແໜງ​ການ​ ແລະ ພາກ​ສ່ວນ​ຂອງ​ເມືອງ ເພື່ອ​ວາງ​ແຜນ-ຈັດ​ຕັ້ງ​ປະ​ຕິ​ບັດ​ໃຫ້​ໄດ້​ຮັບ​ຜົນ​ດີ, ໃຫ້​ຖື​ເອົາ​ປັດ​ໃຈ​ການ​ຕະຫຼາດ​ເພື່ອ​ມາ​ແກ້​ໄຂ​ຂອດ​ການ​ຜະ​ລິດ, ຈຳ​ກັດ​ການ​ນຳ​ເຂົ້າ​ເພື່ອ​ໃຫ້​ສິນ​ຄ້າ​ໝັ້ນ​ຄົງ ແລະ ສົ່ງ​ເສີມ​ການ​ປູກ-ການ​ລ້ຽງ​ໃຫ້ຫຼາຍ​ຂື້ນ, ທ່ານ​ຍັງ​ໄດ້​ຍ້ອງ​ຍໍ​ຊົມ​ເຊີຍຕໍ່​​ຜົນ​ງານໃນ​ໄລ​ຍະ 5 ປີ​ຜ່ານ​ມາ, ການ​ຊີ້​ນຳ​-ນຳ​ພາຂອງ​ການ​ນຳ​ເມືອງ, ​ຄວາມ​ຮັບ​ຜິດ​ຊອບຂອງ​ຄະ​ນະ​ຫ້ອງ​ການ​ກະ​ສິ​ກຳ ແລະ ປ່າ​ໄມ້ ແລະ ພະ​ນັກ​ງານ​ວິ​ຊາ​ການ​ເມືອງ, ທີ່​ມີ​ຜົນສຳ​ເລັດ​​ຕະຫຼອດ​ມາ ໃນ​ຂົງ​ເຂດ​ວຽກ​ງານ​ກະ​ສິ​ກຳ.

 

ບັນ​ນາ​ທິ​ການ 

 ສຸ​ນີ​ຄຳ ພົມ​ມາ​ສີ                                                                  

  ຜູ້​ຂຽນ​ຂ່າວ

 ຄຳ​ພະ​ແກ້ວ ອິນ​ທະ​ວົງ

ງານພົບປະແລກປ່ຽນບົດຮຽນ ລະຫ່ວາງ ສູນສົ່ງເສີມ ເຕັກນິກກະສິກຳ ແລະ ປ່າໄມ້ ຮ່ວມມື ລາວ-ຫວຽດນາມ ແຂວງຫົວພັນ ແລະ ແຂວງຊຽງຂວາງ

ວັນ​ທີ 3 ຕຸ​ລາ 2019 ທີ່​ຜ່ານ​ມາ, ພະ​ແນກ​ກະ​ສິ​ກຳ ແລະ ປ່າ​ໄມ້, ຈັດ​ກອງ​ປະ​ຊຸມ​ພົບ​ປະ​ແລກ​ປ່ຽນ​ບົດ​ຮຽນຂື້ນ​ທີ່​ຫ້ອງ​ປະ​ຊຸມ ​ຂອງສູນ​ສົ່ງ​ເສີມ​ເຕັກ​ນິກ​ກະ​ສິ​ກຳ ແລະ ປ່າ​ໄມ້  ຮ່ວມ​ມື ລາວ-ຫວຽດ​ນາມ ​ຢູ່ສູນ​ບ້ານອົ້ງ ​​ໂດຍເປັນ​ປະ​ທານ​ຮ່ວມ ​ທ່ານ ກອນ​ໄທ ແກ້ວ​ນະ​ຄອນ ຮອງ​ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ທ່ານ ສອນ​ສະ​ຫັວດ ວັນ​ທະ​ລາ ຮອງ​ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຊຽງ​ຂວາງ ພ້ອມ​ດ້ວຍ​ຄະ​ນະ ແລະ ວິ​ຊາ​ການ​ກ່ຽວ​ຂ້ອງ 2 ແຂວງ ເຂົ້າ​ຮ່ວມ 30 ກ່​ວາ​ທ່ານ.

ໃນ​ວາ​ລະ​ງານ​ພົບ​ປະ​ແລກ​ປ່ຽນ​ບົດ​ຮຽນ ການ​ຈັດ​ຕັ້ງ​ວຽກ​ງານ​ຂອງ​ສູນ​ຄັ້ງ​ນີ້, ​ໜ້າ​ຫົວ​ໜ້າ​ສູນໄດ້​ລາຍ​ງານ​ ການກໍ່​ສ້າງ​ພື້ນ​ຖານ​ໂຄງ​ລ່າງ​​ຂອງ​ສູນ, ​ເພື່ອ​ຈັດ​ຕັ້ງ​ຜັນ​ຂະ​ຫຍາຍ​ຍຸດ​ທະ​ສາດ​ຂະ​ແໜງ​ການ​ກະ​ສິ​ກຳ ແລະ ປ່າ​ໄມ້, ທີ່​ກຳ​ນົດ​ອອກ​ຕາມ​ແຕ່​ລະ​ໄລ​ຍະ​ໂດຍ​ການ​​ຊຸກ​ຍູ້ສົ່ງ​ເສີມ​ການ​ຜະ​ລິດ​ສະ​ບຽງ​ອາ​ຫານ, ການ​ຜະ​ລິດ​ກະ​ສິ​ກຳ​ເປັນ​ສິນ​ຄ້າ​ຂອງ​ປະ​ຊາ​ຊົນ, ໃຫ້​ການ​ຜະ​ລິດ​ຕິດ​ພັນ​ກັບ​ການ​ຕະຫຼາດ ແລະ ການ​ປຸງ​ແຕ່ງ, ຊຸກ​ຍູ້​ການ​ຜະ​ລິດ​ກະ​ສິ​ກຳ ແບບ​ປະ​ຫັຍ​ດ, ສະ​ອາດ​ປອດ​ໄພ​ຕໍ່​ຜູ້​ຜະ​ລິດ ແລະ ຜູ້​ບໍ​ລິ​ໂພກ​ຜົນ​ຜະ​ລິດ​ຂອງ​ທ້ອງ​ຖິ່ນ, ຮັບ​ປະ​ກັນ​ດ້ານ​ໂພ​ສະ​ນາ​ການ, ຫຼຸດ​ຜ່ອນ​ການ​ໃຊ້​ສານ​ເຄ​ມີ​ທີ່​ອັ່ນ​ຕະ​ລາຍ, ສູນ​ບໍ​ລິ​ການ​ເຕັກ​ນິກ​ກະ​ສິ​ກຳ​​ແຫ່ງນີ້ຈະ​ກາຍ​ເປັນ​ຕົວ​ແບບ​ໜື່ງ​ຂອງ​ການ​ຮ່ວມ​ມື​ພິ​ເສດ ກໍ່​ຄື​ການ​ຮ່ວມ​ມື​ທີ່​ຍືນ​ຍົງ​ໃນ​ຂະ​ແໜງ​ການ​ກະ​ສິ​ກຳ​, ສ້າງ​ຕົວ​ແບບ​ສາ​ທິດປູກ​ຝັງ, ລ້ຽງ​ສັດ ແລະ ປ່າ​ໄມ້, ພາຍ​ໃນ​ສູນ​ຕາມ​ເຕັກ​ນິກ​ທີ່​ທັນ​ສະ​ໄໝ​ເພື່ອ​ໃຫ້​ປະ​ຊາ​ຊົນ, ພະ​ນັກ​ງານ​ເມືອງ, ແຂວງ, ສາ​ມາດ​ເຂົ້າ​ໄປ​ທັດ​ສະ​ນະ​ສຶກ​ສາ, ເຂົ້າ​ຮ່ວມ​ຝຶກ​ອົບ​ຮົມ​ນຳ​ເອົາ​ບົດ​ຮຽນ​ໄປ​ໝູນ​ໃຊ້​ໃນ​ການ​ຜະ​ລິດ​ຕົວ​ຈິງ, ຍົກ​ສະ​ມັດ​ຕະ​ພາບ​ການ​ຜະ​ລິດ, ການ​ນຳ​ໃຊ້​ເຕັກ​ໂນ​ໂລ​ຊີ, ກົນ​ຈັກ​ອັ່ນ​​ໃໝ່​ເຂົ້າ​ໃນ​ການ​ຜະ​ລິດ, ເປັນ​ສູນ​ກາງ​ຜະ​ລິດ​ເປັນ​ແນວ​ພັນ​ພຶດ​ປູກ ແລະ ພັນ​ສັດ​ລ້ຽງ​ທີ່​ມີ​ຄຸນ​ນະ​ພາບ, ພາຍຫຼັງ​ມອບ-ຮັບ​ສູນ, ຝ່າຍ​ຫວຽດ​ນາມ​ໄດ້​ມອບ​ກິດ​ຈະ​ກຳ​ ​ເຊັ່ນ: ​ໄມ້​ໃຫ້​ໝາກ, ການ​ລ້ຽງົວ, ການ​ລ້ຽງ​ໄກ່​ພັນ​ໄຂ່, ນອກ​ຈາກນີ້​ທັງ 2 ແຂວງ​ຍັງ​ໄດ້​ຖອດ​ຖອນ​ບົດ​ຮຽນ​ທີ່​​ມີ​ຜົນ​ສຳ​ເລັດ ແລະ ປະຕິ​ບັດ​ໄດ້​ເຊັ່ນ: ສືບ​ຕໍ່​ຮ່ວມ​ມື​ພົວ​ພັນ​ສ້າງ​ຕົວ​ແບບ​ສົ່ງ​ເສີມ​ກະ​ສິ​ກຳ ຖ່າຍ​ຖອດ​ເຕັກ​ນິກດ້ວຍ​ການ​ປູກ, ການ​ລ້ຽງ​ເຊັ່ນ: ການ​ປູກ​ໄມ້​ໃຫ້​ໝາກ, ການ​ລ້ຽງ​ໄກ່ ແລະ ການ​ລ້ຽງ​ງົວ​ພັນ​ຊີ້ນ​ໃນ​ເຊີງ​ເສດ​ຖະ​ກິດ, ຫັນ​ໄປ​ສູ່​ສິນ​ຄ້າ​ຂາຍ​ພາຍ​ໃນ ແລະ ສົ່ງ​ອອກ​ຕ່າງ​ແຂວງ.

ຕອນ​ທ້າຍ​ການ​ພົບ​ປະ ທັງ 2 ແຂວງ​ ຍັງ​ໄດ້​ຢ້ຽມ​ຢາມ​ ກິດ​ຈະ​ກຳ​ການ​ປູກ​ໄມ້​ໃຫ້​ໝາກ, ການ​ລ້ຽງ​ງົວ​ພັນ​ຊີ້ນ ແລະ ການ​ລ້ຽງ​ໄກ່​ພັນ​ໄຂ່​ນຳ​ອີກ.

 

ບັນ​ນາ​ທິ​ການ     

ແອ​ຊຳ ວິ​ໄລ​ຈິດ                                                                             

  ຜູ້​ຂຽນ​ຂ່າວ

    ຄຳ​ພະ​ແກ້ວ ອິນ​ທະ​ວົງ

 

ການນຳພະແນກກະສິກຳ ແລະ ປ່າໄມ້ ລົງຊຸກຍູ້ ແລະ ຕິດຕາມ ການຈັດຕັ້ງປະຕິບັດແຜນ 5 ປີ ແລະ ວາງທິດທາງແຜນການ 5 ປີ ຢູ່ເມືອງຊຳໃຕ້ ແລະ ເມືອງກວັນ.

  

ວັນ​ທີ 8-12 ກັນ​ຍາ 2019 ທ່ານ​ພູ​ວົງ ສີ​ສົມ​ຮັກ ກຳ​ມະ​ການ​ພັກ​ແຂວງ, ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ ພ້ອມ​ດ້ວຍ​ທີມ​ງານ ​ໄດ້ລົງ​ຊຸກ​ຍູ້ ແລະ ຕິດ​ຕາມ​ການ​ຈັດ​ຕັ້ງ​ປະ​ຕິ​ບັດ​ແຜນ 5 ປີ​ ແລະ ວາງ​ທິດ​ທາງ​ແຜນ​ການ​ໃນ 5 ປີ​ ( 2020-2025) ​ຢູ່ 2 ເມືອງຄື: ເມືອງ​ກັວນ ແລະ ຊຳ​ໃຕ້, ໃນ​ການ​ລົງ​ເຮັດ​ວຽກ​ໃນ​ຄັ້ງ​ນີ້ ມີການ​ນຳ​ເມືອງ, ​ມີຫົວ​ໜ້າ, ຮອງ​ຫົວ​ໜ້າ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ, ມີ​ພາກ​ສ່ວນ​ທີ່​ກ່ຽວ​ຂ້ອງ​ຂັ້ນ​ເມືອງ ແລະ ພ້ອມ​ດ້ວຍພະ​ນັກ​ງານ​ວິ​ຊາ​ການ​ເຂົ້າ​ຮ່ວມ​.

   ​ຈຸດ​ປະ​ສົງ​ຂອງ​ການ​ເຄື່ອນ​ໄຫວ​ວຽກ​ໃນ​ຄັ້ງ​ນີ້ ແມ່ນ​ເພື່ອ​ຊຸກ​ຍູ້​ຕິດ​ຕາມ ການ​ຈັດ​ຕັ້ງ​ປະ​ຕິ​ບັດ ແຜນ​ພັດ​ທະ​ນາ ຂົງ​ເຂດກະ​ສິ​ກຳ ແລະ ປ່າ​ໄມ້ ແລະ ກະ​ກຽມ​ໃນ​ການ​ວາງ​ແຜນ ພັດ​ທະ​ນາກະ​ສິ​ກຳ ແລະ ປ່າ​ໄມ້ ແຕ່​ປີ 2020-2025, ໃນ​ກອງ​ປະ​ຊຸມ​ດັ່ງ​ກ່າວ ຜູ່​ເຂົ້າ​ຮ່ວມ​ໄດ້ສະ​ແດງ​ແນວ​ຄວາມ​ຄິດ ໃນ​ການ​ພັດ​ທະ​ນາ ກະ​ສິກຳ ແລະ ປ່າ​ໄມ້, ຕາມ 3 ທັດ​ສະ​ນະ​ຊີ້​ນຳ​ຂອງ​ອຳ​ນາດ​ການ​ປົກ​ຄອງ​ແຂວງ ເຊັ່ນ: ລຸດ​ຜ່ອນກໍ່​ສ້າງ​ພື້ນ​ຖານ​ໂຄງ​ລ່າງ ທີ່ບໍ່​ຈຳ​ເປັນ, ເລັ່ງ​ໃສ່​ສົ່ງ​ເສີມ​ຊາວ​ກະ​ສິ​ກຳ ເພີ່ມ​ທະ​ວີ​ການ​ປຸກ – ກາ​ນ​ລ້ຽງ ແລະ ຊຸກ​ຍຸ້​ປັບ​ປຸງ​ການ​ເຄື່ອນ​ໄຫວ​ຂອງ​ບັນ​ດາ​ສະ​ຖາ​ນີບໍ​ລິ​ການເຕັກ​ນິກ ກະ​ສິ​ກຳ ແລະ ປ່າ​ໄມ້ ທີ່​ມີ​ຢູ່​ແລ້ວ ໃຫ້​ມີ​ການ​ເຄື່ອນ​ໄຫວ ບໍ​ລິ​ການ​ປະ​ຊາ​ຊົນ ກາ​ຍ​ເປັນ​ບ່ອນ​ເຝິກ​ອົບ​ຮົມ ໃຫ້​ຊາວ​ກະ​ສິ​ກອນ ຢ່າງ​ກ້​ວາງ​ຂວາງ ແລະ ແຜນ​ຍຸດ​ທະ​ສາດ​ແຫ່ງ​ຊາດ ໃນ​ການ​ພັດ​ທະ​ນາກະ​ສິກຳ ແລະ ປ່າ​ໄມ້ ຕາມ 3 ເສົາ​ຄ້ຳ 4 ແຜນ​ງານ ແລະ 10 ແຜນ​ດຳ​ເນີນ​ງານ ຂອງ​ກະ​ຊວງ ກະ​ສິ​ກຳ ແລະ ປ່າ​ໄມ້.

  ໃນ​ວາ​ລະ​ການ​ປະ​ຊຸມ  ທ່ານ ທ່ານ​ພູ​ວົງ ສີ​ສົມ​ຮັກ ກຳ​ມະ​ການ​ພັກ​ແຂວງ, ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ,   ​ໄດ້ຄຳ​ເຫັນ​ຕໍ່​ກອງ​ປະ​ຊຸມ ​ໂດຍ​ປຸກ​ລະ​ດົມ​ແນວ​ຄວາມ​ຄິດ​ຊີ້​ນຳ-ນຳ​ພາໃນ 5 ປີ​ຕໍ່​ໜ້າ ທີ່​ຈະ​ມີ​ແຜນ​ການ​ຈັດ​ຕັ້ງ​ປະ​ຕິ​ບັດ​ບັນ​ດາ​ຄາດ​ໝາຍ ແລະ  ສິ່ງ​ທ້າ​ທາຍ​ເຊັ່ນ: ເນື້ອ​ທີ່​ທຳ​ການ​ຜະລິດກໍ່​ເປັນ​ຮ່ອງ​ຫ້ວຍ, ທ່າ​ແຮງ​ພັດ​ທະ​ນາ​ເສດ​ຖະ​ກິດ, ທ່າ​ແຮງ​ດ້ານ​ການ​ທ່ອງ​ທ່ຽວຜູ້​ປະ​ກອບ​ການ​ເພື່ອ​ຫັນ​ເປັນ​ອຸດ​ສາ​ຫະ​ກຳ ແລະ ​ຕະຫຼາດ​ຮອງ​ຮັບ​ທາງ​ດ້ານ​ແຮງ​ງານ. ຊຶ່ງ​ໄລ​ຍະ​ຜ່ານ​ມາແຂວງ​​ຫົວ​ພັນ ໄດ້​ຮັບຜົນ​ກະ​ທົບ​ຈາກ​ໄພ​ທຳ​ມະ​ຊາດ ​ເຮັດ​ໃຫ້​ເນື້ອ​ທີ່​ການ​ຜະ​ລິດ, ພື້ນ​ຖານ​ໂຄງ​ລ່າງ​ ​ຖືກ​ເສຍ​ຫາຍ​ເປ່​ເພ ແລະ ​ມີ​ການ​ລະ​ບາດຂອງ​ຕັກ​ແຕນ​ຝູງໄມ້​ປ່ອງ, ບົ້ງ​ແມ​ງ, ສັດ​ຕູ​ພືດ ແລະ ພະ​ຍາດ​ສັດ, ​ຕາມ​ທິດ​ຊີ້​ນຳ​ຂອງ​ການ​ນຳ​ແຂວງ ​ໃຫ້​ເລ່ງ​ໃສ່ 3 ທິດ​ຊີ້​ນຳ​ຄື: ພະ​ຍາ​ຍາມຫຼຸດ​ຜ່ອນ​ການກໍ່​ສ້າງ​ພື້ນ​ຖານ​ໂຄງ​ລ່າງ​ທາງ​ດ້ານ​ກະ​ສິ​ກຳທີ່ບໍ່​ຈຳ​ເປັນ​ລຸດ​ລົງ, ​ເລ່ງ​ໃສ່​ກິດ​ຈະ​ກຳ​ສ້າງ​ລາຍ​ຮັບ​ແກ່​ປະ​ຊາ​ຊົນ, ຕາມ​​ເງືອນ​ໄຂທ່າ​ແຮງທີ່​ມີ, ສືບ​ຕໍ່​ຊຸກ​ຍູ້​ຊີ້​ນຳ​ແຕ່​ລະ​ເມືອງ​ເຮັດ​ທຸກວິ​ທີ​ການ​ໃຫ້​ຂະ​ບວນ​ການ​ປູກ, ການລ້ຽງ, ຂອງ​ພໍ່​ແມ່​ປະ​ຊາ​ຊົນ​ເພີ່ມ​ຂຶ້ນກາຍ​ເປັນ​ສິນ​ຄ້າສະ​ໜອງ​ພາຍ​ໃນ ແລະ ສົ່ງ​ອອກ, ໃຫ້​ສືບ​ຕໍ່​ເລ່ງ​ໃສ່​​ປັບ​ປຸງບັນ​ດາ​​ສູນ​​​ສົ່ງ​ເສີມເຕັກ​ນິກ ແລະ ສະ​ຖາ​ນີ​​ບໍ​ລິ​ການ​ເຕັກ​ນິກກະ​ສິ​ກຳ ​ທີ່​ມີ​ແຕ່​ລະ​ເມືອງ​ໃຫ້​ມີ​ການ​ເຄື່ອນ​ໄຫວ ແລະ ຝຶກ​ອົບ​ຮົມ​ດ້ານ​ກະ​ສິ​ກຳ​ໃຫ້​ແກ່​ຊາວ​ກະ​ສິ​ກອນກ້າວ​ໄປ​ສູ່​ຜະ​ລິດ​ສະ​ໜອງ​ແນວ​ພັນ ​ໃຫ້​ແກ່​ຜູ້​ປະ​ກອບ​ການ, ກໍ່​ຄື​ພໍ່​ແມ່​ປະ​ຊາ​ຊົນ, ຍຸດ​ທະ​ສາດ​ແຫ່ງ​ຊາດ​ຕໍ່​ການ​ພັດ​ທະ​ນາ​ຂົງ​ເຂດ​ກະ​ສິ​ກຳ ແລະ ປ່າ​ໄມ້, ເສົາ​ຄ້ຳ​ທາງ​ດ້ານ​ກະ​ສິ​ກຳ​ແນ​ໃສ່​ເຮັດ​ໃຫ້​ຮັບ​ປະ​ກັນ​ຄວາມ​ໝັ້ນ​ຄົງ​ທາງ​ດ້ານ​ສະ​ບຽງ​ອາ​ຫານ, ປ່າ​ໄມ້ ແລະ ຊັບ​ພະ​ຍາ​ກອນ​ປ່າ​ໄມ້ ​ຕ້ອງ​ໃຫ້​ມີ​ເນື້ອ​ທີ່​ປ່າ​ໄມ້​ປົກ​ຄຸມ 70% ທົ່ວ​ປະ​ເທດ, ເລັ່ງ​ໃສ່​ວາງ​ແຜນເພື່ອ​ພັດ​ທະ​ນາ​ຊົນ​ນະ​ບົດ ແລະ ລຶບ​ລ້າງ​ຄວາມ​ທຸກ​ຍາກ. ເພື່ອ​ຈັດ​ຕັ້ງ​ປະ​ຕິ​ບັດ​ໜ້າ​ວຽກ​ດັ່ງ​ກ່າວ​ຕ້ອງ​ໄດ້​ເອົາ​ໃຈ​ໃສ່ ​ປະ​ສານ​ສົມ​ທົບ​ກັບ​ຂະ​ແໜງ​ການ​ ແລະ ພາກ​ສ່ວນ​ຂອງ​ເມືອງ ເພື່ອ​ວາງ​ແຜນ-ຈັດ​ຕັ້ງ​ປະ​ຕິ​ບັດ​ໃຫ້​ໄດ້​ຮັບ​ຜົນ​ດີ ແລະ ທ່ານ​ຍັງ​ໄດ້​ຍ້ອງ​ຍໍ​ຊົມ​ເຊີຍຕໍ່​​ຜົນ​ງານການ​ຊີ້​ນຳ​ນຳ​ພາຂອງ​ການ​ນຳ​ເມືອງ, ​ຄວາມ​ຮັບ​ຜິດ​ຊອບຂອງ​ຄະ​ນະ​ຫ້ອງ​ການ​ກະ​ສິ​ກຳ ແລະ ປ່າ​ໄມ້ ແລະ ພະ​ນັກ​ງານ​ວິ​ຊາ​ການ​ເມືອງ, ທີ່​ມີ​ຜົນສຳ​ເລັດ​​ຕະຫຼອດ​ມາ ໃນ​ຂົງ​ເຂດ​ວຽກ​ງານ​ກະ​ສິ​ກຳ ​ໃນ​ໄລ​ຍະ​ທີ່​ຜ່ານ​ມາ.

 

ບັນ​ນາ​ທິ​ການ

ສຸ​ນີ​ຄຳ ພົມ​ມາ​ສີ                                                                       

  ຜູ້​ຂຽນ​ຂ່າວ

ຄຳ​ພະ​ແກ້ວ ອິນ​ທະ​ວົງ

ໂຄງການກະສິກຳເພື່ອໂພສະນາການ ສຳເລັດກອງປະຊຸມ ແລກປ່ຽນບົດຮຽນ ການປູກຜັກອິນຊີໃນເຮືອນຮົ່ມ ບ້ານ ນາວຽງເມືອງຮ້ຽມ ແຂວງຫົວພັນ.

​ວັນ​ທີ 9 ສິງ​ຫາ 2019 ທີ່​ຜ່ານ​ມາ ໂຄງ​ການ​ກະ​ສິ​ກຳ​ເພື່ອ​ໂພ​ສະ​ນາ​ການ ໄດ້​ຈັດ​ກອງ​ປະ​ຊຸມ ແລ​ກ​ປ່ຽນ​ບົດ​ຮຽນ​ການ​ປູກ​ຜັກ​ອິນ​ຊີ​ໃນ​ເຮືອນ​ຮົ່ມ ທີ່​ສະ​ໂມ​ສອນ​ຂອງ​ບ້ານ​ນາ​ວຽງ, ໂດຍ​ເປັນ​ປະ​ທານ ທ່ານ ບຸນ​ພອນ ບຸດ​ພະ​ຈັນ ຫົວ​ໜ້າ​ປະ​ສານ​ງານ​ໂຄງ​ການ​ຂັ້ນ​ແຂວງ, ມີຫົວ​ໜ້າ​ປະ​ສານ​ງານ​ເມືອງ​ຊ່ອນ, ​ກຸ່ມ​ປູກ​ຜັກ​ອິນ​ຊີ​ໃນ​ເຮືອນ​ຮົ່ມ​ບ້ານ ນາ​ວຽງ ແລະ ນັກ​ສຳ​ມະ​ນາ​ກອນ​ຈາກກຸ່ມ​ບ້ານ ນາ​ໜົມ ແລະ ບວມ​ຝາດ ເມືອງ​ຊ່ອນ​ ​ເຂົ້າຮ່ວມ 20 ກ່​ວາ​ທ່ານ.

ຈຸດ​ປະ​ສົງ​ກອງ​ປະ​ຊຸມ​ກໍ່​ເພື່ອ​ພົບ​ປະ ແລກ​ປ່ຽນ​ຄວາມ​ຄິດ​ເຫັນ​ ແລະ ບົດ​ຮຽນໃນ​ການ​ປູກ​ຜັກ​ອິນ​ຊີ​ໃນ​ເຮືອນ​ຮົ່ມ, ​ໃນ​ວາ​ລະ​ດັ່ງ​ກ່າວ ທ່ານ ນາງ ເປະ ​ຫົວ​ໜ້າ​ກຸ່ມ ບ້ານ​ນາ​ວຽງໄດ້​ລາຍ​ງານຄວາມ​ຄືບ​ໜ້າ​ໃນ​ການ​ປູກ​ຜັກ​ອິນ​ຊີ​ວ່າ: ໃນ​ເບື້​ອງ​ຕົ້ນ​ໄດ້​ສ້າງ​ເຄືອ​ຂ່າຍ​ຊາວ​ກະ​ສິ​ກອນ ແລະ ໄດ້​ຂໍ​ທຶນ​ໄດ້ 25 ລ້ານ​ກີບ, ປີ 2017 – 2018 ໄດ້​ຂະ​ຫຍາຍ​ເຮືອນ​ຮົ່ມ 21 ຄອບ​ຄົວ ປີ 2019 ໄດ້​ຮັບ​ທຶນ​ບ້ານ 3 ສ້າງ​ຈຳ​ນວນ 35 ລ້ານ​ກີບ, ມາ​ມອບ​ໃຫ້​ກຸ່ມ, ປະ​ຈຸ​ບັນ​ເພີ່ມ​ເຮືອນ​ຮົ່ມ​ໄດ້ 4 ຄອບ​ຄົວ, ປະ​ຈຸ​ບັນ​ມີ​ສະ​ມາ​ຊິກ 25 ຄອບ​ຄົວ, ​ມີ​ເຮືອນ​ຮົ່ມ 43 ຫຼັງ, ເນື້ອ​ທີ່ 7 ພັນ 8 ຮ້ອຍ 92 ຕາ​ແມັດ, ສ້າງກອງ​ທຶນ​ຊ່ວຍ​ເຫຼືອ​ເຊີ່ງ​ກັນ ແລະ ກັນ​ປະ​ຈຸ​ບັນ​ມີ​ເງີນ​ຝາກ 9 ລ້ານ​ກ່​ວາ​ກີບ, ໃນ​ປີ 2019 ຂາຍ​ຜັກ​ໄດ້ 1 ຮ້ອຍ 60 ກ່​ວາ​ລ້ານ​ກີບ, ຈາກນັ້ນ​ວິ​ຊາ​ການ​ກຸ່ມກໍ່​ໄ​ດ້​ແນະ​ນຳ​ເຕັກ​ນິກ​ໃນ​ການ​ປູກ​ຜັກ​ໃນ​ເຮືອນ​ຮົ່ມ​ໃຫ້​ຖືກ​ຕາມຫຼັກ​ວິ​ຊາ​ການ, ​ການ​ສ້າງ​ເຮືອນ​ຮົ່ມ, ການ​ບົວ​ລະ​ບັດ​ຮັກ​ສາ, ການ​ໃສ່​ຝຸ່ນ, ວິ​ທີ​ເຮັດ​ຝຸ່ນ​ບົ່ມ​ຈາກ​ທຳ​ມະ​ຊາດ ແລະ ວິ​ທີ​ກຳ​ຈັດ​ສັດ​ຕູ​ພືດ​ທີ່​ຈະ​ມາ​ທຳ​ລາຍ, ຫຼັງ​ຈາກນັ້ນ​ໄດ້​ເປີດ​ໂອ​ກາດ​ໃຫ້​ຜູ້​ເຂົ້າ​ຮ່ວມ​ມີ​ຄຳ​ຖາມ – ຕອບ​ເພື່ອ​ແລກ​ປ່ຽນ​ບົດ​ຮຽນ​ເຊີ່ງ​ກັນ​ແລະ​ກັນ ແລະ ລົງ​ເບິ່ງ​ກິດ​ຈະ​ກຳ​ຕົວ​ຈິງ​ຢູ່​ບ້ານ ນາ​ວຽງ, ​ເມືອງ​ຮ້ຽມ​ນຳ​ອີກ.

ຕອນທ້າຍກອງປະຊຸມທ່ານ ສຸ​ລິນ​ໄຊ ພົງ​ສະ​ຫັວດ ປະ​ສານ​ງານ​​ໂຄງການກະສິກຳເພື່ອໂພສະນາການ

ເມືອງ​ຊ່ອນ ເປັນ​ຕົວ​ແທນ​ໃຫ້​ແກ່​ກຸ່ມ​ປູກ​ຜັກ​ອິນ​ຊີ​ບ້ານ ນາ​ໜົມ ແລະ ບ້ານ ບວມ​ຝາດ, ກໍ່​ໄດ້​ສະ​ແດງ​ຄວາມຊົມ​ເຊີຍ​ຜົນ​ງານ​ໃນ​ການ​ຈັດ​ຕັ້ງ​ປະ​ຕິ​ບັດ​​ກຸ່ມ​ປູກ​ຜັກ​ອິນ​ຊີ​ ​ຂອງ​​​ບ້ານ ນາ​ວຽງ ແລະ  ນອກ​ຈາກນີ້​ກໍ່​ຈະ​ໄດ້​ນຳ​ເອົາ​ບົດ​ຮຽນ​ທີ່​ຖອດ​ຖອນ​ໄດ້​ຄັ້ງ​ນີ້​ນຳ​ໄປ​ຈັດ​ຕັ້ງ​ປະ​ຕິ​ບັດ​ພາຍ​ໃນ​ກຸ່ມ​ປູກ​ຜັກ​ອິນ​ຊີ​ໃຫ້​ມີ​ຜົນ​ສຳ​ເລັດ. (ສະ​ໜັບ​ສະ​ໜູນ​ໂດຍ​ໂຄງ​ການ​ກະ​ສິ​ກຳ​ເພື່ອ​ໂພ​ສະ​ນາ​ການ AFN/SSFSNP)

 

  ບັນ​ນາ​ທິ​ການ   

ບຸນ​ພອນ ບຸດ​ພະ​ຈັນ                                                                                

   ຜູ້​ຂຽນ​ຂ່າວ

ຄຳ​ພະ​ແກ້ວ ອິນ​ທະ​ວົງ

 

ທ່ານຮອງລັດຖະມົນຕີກະຊວງກະສິກຳ ແລະ ປ່າໄມ້ ລົງຊຸກຍູ້ການຜະລິດທີ່ແຂວງຫົວພັນ.

 

ໃນລະຫວ່າງວັນທີ 09 – 12  ສິງ​ຫາ 2019  ທ່ານ ບຸນ​ຂວາງ ຄຳ​ບຸນ​ເຮືອງ ຮອງລັດຖະມົນຕີກະຊວງກະສິກຳ ແລະ ປ່າໄມ້ ພ້ອມດ້ວຍຄະນະໄດ້ເດີນທາງໄປເຄື່ອນໄຫວວຽກງານ ແລະ ຊຸກຍູ້ການຜະລິດ ທີ່ບ້ານ ​ໂພນ​ສະ​ອາດ, ເມືອງ ​ຮ້ຽມ, ບ້ານ ເຕົາ​ຫີນ ເມືອງ​ຫົວ​ເມືອງ, ບ້ານ ນາ​ລວງ, ເມືອງວຽງ​ໄຊ ແລະ ເຂົ້າ​ພົບ​ການ​ນຳ​ແຂວງ ໂດຍການຕ້ອນຮັບຂອງ ທ່ານ ​ພູ​ໂຊນ ທຳ​ມະ​ວິ​ໄຊ, ຄະ​ນະ​ປະ​ຈຳ​ພັກ​ແຂວງ, ຮອງ​ເຈົ້າ​ແຂວງ, ແຂວງ​ຫົວ​ພັນ. ​ຈາກນັ້ນວັນ​ທີ 11 ສິງ​ຫາ 2019 ​ເພີ່ນ​ຍັງ​ໄດ້​ໂອ້​ລົມ​ພະ​ນັກ​ງານ ລັດ​ຖະ​ກອນ​ພາຍ​ໃນ​ພະ​ແນກ​ກະ​ສິ​ກຳ ແລະ ປ່າ​ໄມ້​​ແຂວງທີ່​ຫ້ອງ​ປະ​ຊຸມ​ພະ​ແນກ ໂດຍ ທ່ານ ຄິ່ນ ທຸມ​ມາ​ລາ ຮັກ​ສາ​ການ​ຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ໄດ້ລາຍຫຍໍ້ສະ​ພາບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ການ​ຜະ​ລິດ​ກະ​ສິ​ກຳ, ແຜນ​ງານ​ຄ້ຳ​ປະ​ກັນ​ຄວາມ​ໝັ້ນ​ຄົງ​ດ້ານ​ສະ​ບຽງ​ອາ​ຫານ, ການ​ຜະ​ລິດ​ເຂົ້າ, ມີ​ເນື້ອ​ທີ່​ທັງ​ໝົດ 29 ພັນ 300 ກ່​ວາ​ເຮັກ​ຕາ, ຄາດ​ຄະ​ເນ​ຜົນ​ຜະ​ລິດ 113 ພັນ 2 ຮ້ອຍ​ກ່​ວາ​ເຮັກ​ຕາ, ໄດ້​ຊຸກ​ຍູ້​ສົ່ງ​ເສີມ​ຊາວ​ກະ​ສິ​ກອນ​ປູກ ສາ​ລີ​ຫວານ, ເຜືອກ, ມັນ​ດ້າງ, ຖົ່ວ​ດິນ, ໝາກ​ເພັດ, ໝາກ​ເຂືອ, ຖົ່ວ, ຜັກ​ບົ່ວ, ຜັກ​ທຽມ ແລະ ພືດ​ຜັກ​ອື່ນໆ ຕິດ​ພັນ​ກັບ​ການ​ຜະ​ລິດ​ເປັນ​ສິນ​ຄ້າ, ເນື້ອ​ທີ່​ແຜນ​ການ​ມີ 5 ພັນ 9 ຮ້ອຍ​ກ່​ວາ​ເຮັກ​ຕາ ຄາດ​ຄະ​ເນ​ຜົນ​ຜະ​ລິດ 142 ພັນ 6 ຮ້ອຍ​ກ່​ວາ​ໂຕນ, ວຽກ​ງານ​ລ້ຽງ​ສັດ, ການ​ບໍ​ລິ​ໂພກ​ຊີ້ນ, ປາ ແລະ ໄຂ່ ຢູ່​ພາຍ​ໃນ​ແຂວງ​ໄດ້ 22 ກິ​ໂລ​ຕໍ່​ຄົນ ຕໍ່ 6 ເດືອນ, ດ້ານ​ສັດ​ຕະ​ວາ​ແພດ: ສັກ​ຢາ​ປ້ອງ​ກັນ​ພະ​ຍາດ​ສັດ, ງົວ, ຄວາຍ, ໝູ, ແບ້, ມ້າ ແລະ ສັດ​ປີກ​ໄດ້ 1 ແສນ 72 ພັນ 7 ແສນ​ກ່​ວາ​ໂຕ, ການ​ຂະ​ຫຍາຍ​ຝູງ​ສັດ​ໃຫ້​ໄດ້ 3 ແສນ 64 ພັນ 8 ຮ້ອຍ​ກ່​ວາ​ໂຕ, ສັດ​ປີກ 1 ລ້ານ 7 ແສນ 7 ພັນ ​ກ່​ວາ​ໂຕ ແລະ ​ປາ 27 ລ້ານ 9 ແສນ​ກ່​ວາ​ໂຕ. ວຽກ​ງານ​ການ​ປ້ອງ​ກັນ ແລະ ແກ້​ໄຂ​ຜົນ​ກະ​ທົບ​ຈາກ​ໄພ​ພິ​ບັດ​ເປັນ​ຕົ້ນ​ແມ່ນບົ້ງ​ຝູງ​ສາ​ລີ, ເຂົ້າ​ໄຮ່ ແລະ ການ​ລະ​ບາດ​ຂອງ​ພະ​ຍາດ​ອາ​ຫິ​ວາ​ໝູ​ອາ​ຟ​ຣິ​ກາ​ໃນ​ປະ​ຈຸ​ບັນ​ທົ່ວ​ແຂວງ​ຫົວ​ພັນ​ມີ​ໝູ​ຕາຍ​ທັງ​ໝົດ 9 ພັນ 5 ຮ້ອຍ​ກ່​ວາ​ໂຕ ຄິດ​ເປັນ​ມູນ​ຄ່າ 4 ຕື້ 7 ຮ້ອຍ 46 ກ່​ວາ​ລ້ານ​ກີບ.                           

  ທິດ​ທາງ​ແຜນ​ການ​ໃນ​ຕໍ່​ໜ້າ, ສືບ​ຕໍ່​ສູ້​ຊົນ​ບັນ​ດາ​ຕົວ​ເລກ ຄາດ​ໝາຍ​ທີ່​ວາງ​ໄວ້​ໃນ​ແຕ່​ລະ​ແຜນ​ດຳ​ເນີນ​ງານ ເປັນ​ຕົ້ນ​ແມ່ນ​ສູ້​ຊົນ​ຕາມ​ມະ​ຕິ​ສະ​ພາ​ປະ​ຊາ​ຊົນ​ແຂວງ​ຫົວ​ພັນ​ໄດ້​ກຳ​ນົດ​ເຊັ່ນ: ການ​ຜະ​ລິດ​ເຂົ້າ, ການ​ຜະ​ລິດ​ພຶດ​ສະ​ບຽງ ແລະ ການ​ຂະ​ຫຍາຍ​ຝູງ​ສັດ​ໃຫ້​ໄດ້​ຕາມ​ຈຸດ​ປະ​ສົງ ແລະ ຄາດ​ໝາຍ​ທີ່​ວາງ​ໄວ້.                                                                          

   ໃນໂອກາດນີ້, ທ່ານຮອງລັດຖະມົນຕີ ໄດ້ເນັ້ນໜັກໃຫ້​ພະ​ແນກກະສິກຳ ແລະ ປ່າໄມ້ແຂວງ ​ສົມ​ທົບ​ກັບ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງລົງຊຸກຍູ້ສົ່ງເສີມປະຊາຊົນ ໂດຍສະເພາະ​ແມ່ນ​ການ​ປ້ອງ​ກັນ ແລະ ປາບ​ປາມບົ້ງ​ຝູງ​ສາ​ລີ, ການ​ປ້ອງ​ກັນ, ປາບ​ປາມ​ຕັກ​ແຕນ​ຝູງ​ໄມ້​ປ່ອງ, ຕ້ານ ແລະ ສະ​ກັດ​ກັ້ນ​ພະ​ຍາດ​ອາ​ຫິ​ວາ​ໝູ​ອາ​ຝ​ຣິ​ກາ,ການສັກຢາສັດລ້ຽງຂອງປະຊາຊົນໃຫ້ທົ່ວເຖິງແລະປູກພືດຜັກຊະນິດຕ່າງໆໃຫ້ທ່ວງທັນກັບລະດູການ ເພື່ອຕອບສະໜອງ​ຄ້ຳ​ປະ​ກັນທາງດ້ານສະບຽງອາຫານ ແລະ ໂພ​ສະ​ນາ​ການ ໃຫ້ພຽງພໍພາຍໃນແຂວງ ແລະ ສາມາດສົ່ງອອກເປັນສິນຄ້າໄປຍັງບັນດາແຂວງອ້ອມຂ້າງຕື່ມອີກ.

ບັນ​ນາ​ທິ​ການ    ນ. ພວງວັນ ​ມີ​ວົງ​ສາ                                                                                       

 ຜູ້​ຂຽນ​ຂ່າວ      ຄຳ​ພະ​ແກ້ວ ອິນ​ທະ​ວົງ