Khamphakeo Inthavong
ໜ່ວຍພັກຫ້ອງການບໍລິຫານ ແລະ ຈັດຕັ້ງ – ພະນັກງານ ສຳເລັດກອງປະຊຸມໃຫ່ຍ ຄັ້ງທີ 3 ຂອງໜ່ວຍພັກ.
ຕອນເຊົ້າ ເວລາ 8 ໂມງ ຂອງວັນທີ 03 ພຶດສະພາ 2019 ໜ່ວຍພັກ ຫ້ອງການບໍລິຫານ ແລະ ຈັດຕັ້ງ – ພະນັກງານ ທີ່ຂຶ້ນກັບ ພະແນກກະສິກຳ ແລະ ປ່າໄມ້ ແຂວງຫົວພັນ, ໄດ້ຈັດກອງປະຊຸມໃຫຍ່ສະໄໝ ທີ 3 ຂອງຕົນຂື້ນ ທີ່ຫ້ອງປະຊຸມພະແນກ, ກອງປະຊຸມດັ່ງກ່າວໄດ້ດຳເນີນເປັນເວລາ 1 ວັນ, ໂດຍພາຍໃຕ້ການເປັນປະທານ ຂອງສະຫາຍ ບຸນຄຳ ສີດາວົງ ເລຂາຄະນະພັກຮາກຖານພັກ ພະແນກກະສິກຳ ແລະ ປ່າໄມ້ແຂວງ, ສະຫາຍ ເດີນ ທະວີໄຊ ເລຂາໜ່ວຍພັກຫ້ອງການບໍລິຫານ, ຍັງມີຄະນະໜ່ວຍພັກອ້ອມຂ້າງທີ່ຂື້ນກັບພະແນກ, ສະມາຊິກພັກສົມບຸນ, ສຳຮອງ ແລະ ຜູ້ຕາງໜ້າຈາກອົງການຈັດຕັ້ງມະຫາຊົນ ເຂົ້າຮ່ວມທັງໝົດ 35 ສະຫາຍ, ຍິງ 09 ສະຫາຍ.
ກອງປະຊຸມໃຫ່ຍຄັ້ງນີ້ ໄດ້ຜ່ານບົດລາຍງານການເມືອງ ຂອງການຊີ້ນນຳນຳພາຂອງຄະນະພັກ ໃນໄລຍະ 1 ສະໄໝຜ່ານມາ ແລະ ຜູ້ເຂົ້າຮ່ວມໄດ້ພ້ອມກັນຄົ້ນຄ້ວາປະກອບຄຳຄິດ – ຄຳເຫັນ, ແລ້ວພ້ອມກັນລົງປະຊາມະຕິເປັນເອກະພາບກັນ, ຮັບຮອງເອົາບັນດາເນື້ອໃນການຈັດຕັ້ງມະຕິກອງປະຊຸມໃຫ່ຍ ແລະ ໄດ້ມອບໃບຍ້ອງຍໍໃຫ້ສະມາຊິກພັກຜູ້ທີ່ມີຜົນງານດີເດັ່ນຈຳນວນ 14 ສະຫາຍ, ຈາກເລຂາຄະນະພັກຮາກຖານພະແນກກະສິກຳ ແລະ ປ່າໄມ້ແຂວງ, ສະເໜີຄະນະປະຈຳພັກແຂວງຍ້ອງຍໍຈຳນວນ 8 ສະຫາຍ, ນອກຈາກນີ້ຜູ້ແທນກອງປະຊຸມຍັງໄດ້ໃຊ້ສິດປະຊາທິປະໄຕບ່ອນບັດເລືອກຕັ້ງຄະນະພັກຊຸດໃໝ່ ບົນພື້ນຖານຖືກຕ້ອງສອດຄ່ອງກັບມາດຖານ, ເງື່ອນໄຂທີ່ກຳນົດໄວ້, ເຊີ່ງມີຜູ້ຮັບສະໝັກເລືອກຕັ້ງ 05 ສະຫາຍ, ກອງປະຊຸມໄດ້ເປັນເອກະພາບເລືອກເອົາ ເລຂາຄະນະໜ່ວຍພັກ, ຮອງເລຂາໜ່ວຍພັກ ແລະ ຄະນະພັກຈຳນວນ 3 ສະຫາຍ;
ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຈາກສະຫາຍ ບຸນຄຳ ສີດາວົງ ເລຂາພັກຮາກຖານຂອງພະແນກ ຊື່ງສະຫາຍໄດ້ຍ້ອງຍໍຊົມເຊີຍຕໍ່ການຊີ້ນຳ – ນຳພາ ຂອງຄະນະໜ່ວຍພັກ, ເຫັນໄດ້ຄວາມສາມັກຄີເປັນເອກະພາບ, ມີແບບແຜນວິທີເຮັດວຽກແບບລວມສູນປະຊາທິປະໄຕ, ແບ່ງງານໃຫ້ບຸກຄົນຮັບຜິດຊອບຈິ່ງເຮັດໃຫ້ວຽກງານທີ່ໄດ້ຮັບການມອບໝາຍ ຈັດຕັ້ງປະຕິບັດສຳເລັດ, ພ້ອມກັນນັ້ນໄດ້ຮັບການຢັ້ງຢືນເປັນໜ່ວຍພັກແຂງ – ຮູ້ນຳພາຮອບດ້ານໄດ້ 5 ສະໄໝຕິດຕໍ່ກັນ; ຈົ່ງໃຫ້ປະກົດຜົນເປັນຈິງ, ບຸກບືນສ້າງໜ່ວຍພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນໃນປີຕໍ່ໄປ. ຮຽກຮ້ອງໃຫ້ຄະນະໜ່ວຍພັກ, ສະມາຊິກພັກ ພ້ອມກັນເອົາໃຈໃສ່ເຕົ້າໂຮມຄວາມສາມັກຄີ, ມີຄວາມເປັນເອກະພາບພາຍໃນພັກ, ຊີ້ນຳ – ນຳພາວຽກງານວິຊາສະເພາະຕາມຂອບເຂດສິດ – ໜ້າທີ່ຂອງຕົນໃຫ້ມີຜົນສຳເລັດ, ສ້າງໃຫ້ໄດ້ຕົວແບບພາຍໃນໜ່ວຍ, ເອົາໃຈໃສ່ເຊີດຊູນ້ຳໃຈເປັນເຈົ້າຕົນເອງ ເພື່ອພ້ອມກັນຈັດຕັ້ງປະຕິບັດທິດທາງແຜນການ ຂອງໜ່ວຍພັກນັບແຕ່ປີ 2019 – 2023.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ
ຄຳພະແກ້ວ ອິນທະວົງ
ພິທີກວດກາ 100% ໂຄງການສ້ອມແປງ – ຕໍ່ເຕີມຄອງເໝືອງ ແລະ ໂຄງການສ້ອມແປງຕໍ່ເຕີມນ້ຳລິນ, ຂອງໂຄງການກະສິກຳ ເພື່ອໂພສະນາການ, ເມືອງຊ່ອນ, ແຂວງຫົວພັນ.
ວັນທີ 2 ພຶດສະພາ 2019 ທີ່ຜ່ານມາ, ເຈົ້າຂອງໂຄງການ ແລະ ບໍລິສັດຜູ້ຮັບເໝົາກໍ່ສ້າງໄດ້ລົງກວດກາຄວາມຄືບໜ້າໂຄງການກໍ່ສ້າງຊົນລະປະທານ ຕໍ່ເຕີມຄອງເໝືອງ ແລະ ໂຄງການສ້ອມແປງຕໍ່ເຕີມນ້ຳລິນ, ເຊີ່ງນຳໂດຍ ທ່ານ ຄຳພຽນ ໄຊສົມພັນ ຮອງເຈົ້າເມືອງ, ຜູ້ຊີ້ນຳວຽກງານຂົງເຂດເສດຖະກິດ, ມີພາກສ່ວນທີ່ກ່ຽວຂ້ອງຂັ້ນເມືອງ, ອຳນາດການປົກຄອງບ້ານເຂົ້າຮ່ວມນຳ.
ໂຄງການຕໍ່ເຕີມຄອງເໝືອງ, ບ້ານໂພນຊອງ, ໄດ້ເລີ່ມລົງມືກໍ່ສ້າງຕົ້ນເດືອນ ເມສາ 2019 ສຳເລັດລົງໃນທ້າຍເດືອນເມສາ 2019 ລວມມູນຄ່າທັງໝົດ 92 ລ້ານກ່ວາກີບ, ທຶນ ຂອງໂຄງການ ກະສິກຳ ເພື່ອໂພສະນາການ 64 ລ້ານກ່ວາກີບ, ທຶນປະກອບສ່ວນຂອງປະຊາຊົນ 13 ລ້ານກ່ວາກີບ. ໜ້າຝາຍມີຄວາມຍາວ 20 ແມັດ, ຄອງເໝືອງມີຂະໜາດກ້ວາງ 1 ແມັດ, ສູງ 80 ຊັງຕີແມັດ ແລະ ລວງຍາວ 120 ແມັດ, ສາມາດເອົານ້ຳເຂົ້າຫົດເນື້ອທີ່ນາໄດ້ 14 ເຮັກຕາ, ໂຄງການສ້ອມແປງ ແລະ ຕໍ່ເຕີມນ້ຳລິນ, ບ້ານໂພນຊອງ, ບ້ານທາດ ແລະ ບ້ານຫ້ວຍສະຫງອນ.ໄດ້ເລີ່ມລົງມືຈັດຕັ້ງປະຕິບັດແຕ່ຕົ້ນເດືອນ ເມສາ 2019 ແລະ ສຳເລັດການສ້ອມແປງໃນທ້າຍເດືອນ ເມສາ 2019 ລວມມູນຄ່າທັງໝົດ 3 ບ້ານ 342 ລ້ານກ່ວາກີບ, ທຶນ ຂອງໂຄງການ ກະສິກຳ ເພື່ອໂພສະນາການ 240 ລ້ານກ່ວາກີບ ແລະ ທຶນປະກອບສ່ວນຂອງປະຊາຊົນ 50 ລ້ານກ່ວາກີບ, ສາມາດສະໜອງນ້ຳຮັບໃຊ້ປະຊາຊົນໄດ້ 156 ຄອບຄົວ, ເຊິ່ງທັງ 4 ໂຄງການດັ່ງກ່າວແມ່ນບໍລິສັດ ໂຊກຊັບໄຊ ກໍ່ສ້າງຂົວທາງ – ເຄຫາສະຖານ ເປັນຜູ້ຮັບເໝົາກໍ່ສ້າງ.
ພາຍຫຼັງກວດກາການກໍ່ສ້າງສຳເລັດແລ້ວ, ທ່ານຮອງເຈົ້າເມືອງ ໃຫ້ຄຳຄິດເຫັນວ່າ: ການຈັດຕັ້ງປະຕິບັດໂຄງການ ຕ້ອງມີການຕິດຕາມ, ກວດກາ, ປະເມີນຜົນຄວາມຄືບໜ້າຂອງໂຄງການ ແລະ ໃຫ້ແຕ່ລະພາກສ່ວນຕ້ອງເປັນເຈົ້າການໃນການຈັດຕັ້ງປະຕິບັດ, ອຳນາດການປົກຄອງບ້ານ, ແມ່ນໝາກຫົວໃຈຫຼັກທີ່ນຳພາປະຊາຊົນໃຊ້ນ້ຳໃຫ້ເກີດປະໂຫຍດສຸງສຸດ ແລະ ຮັກສາໃຫ້ໄດ້ຮັບໃຊ້ນ້ຳລິນໄດ້ຢ່າງຍາວນານ. ປະກອບສ່ວນເພີ່ມຜົນຜະລິດກະສິກຳ ໃຫ້ເພີ່ມຂື້ນ, ແກ້ໄຂການຂາດດ້ານໂພສະນາການ, ແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫຼຸດລົງເທື່ອລະກ້າວ.
ບັນນາທິການ
ບຸນພອນ ບຸດພະຈັນ
ຜູ້ຂຽນຂ່າວ
ຄຳພະແກ້ວ ອິນທະວົງ
ພະແນກກະສິກຳ ແລະ ປ່າໄມ້ ແຂວງຫົວພັນ ໄດ້ຮັບການຊ່ວຍເຫຼືອລ້າ ແນວພັນເຂົ້າ ຈາກ ສສ ຫວຽດນາມ.
ວັນທີ 24 ເມສາ 2019 ທີ່ຜ່ານມາ ພະແນກກະສິກຳ ແລະ ປ່າໄມ້ແຂວງຫົວພັນໄດ້ຮັບແນວພັນເຂົ້າ ຊ່ວຍເຫຼືອລ້າ ຂອງກົມສົ່ງເສີມເຕັກນິກ ແລະ ປຸງແຕ່ງກະສິກຳ ຈາກລັດທະບານ ສາທາລະນະລັດ, ສັງຄົມນິຍົມຫວຽດນາມ, ຈຳນວນ 40 ໂຕນ, ໃນນີ້ ມີເຂົ້າຈ້າວຈຳນວນ 5 ໂຕນ ແລະ ເຂົ້າໜຽວຈຳນວນ 35 ໂຕນ. ເພື່ອແກ້ໄຂຜົນກະທົບຈາກໄພພິບັດທຳມະຊາດ ໃນປີ 2018 ທີ່ຜ່ານມາ, ຈຳນວນເຂົ້າດັ່ງກ່າວ, ຈະໄດ້ແຈກຢາຍໃຫ້ຊາວກະສິກອນທີ່ໄດ້ຮັບຜົນກະທົບຈາກໄພພິບັດທຳມະຊາດ, ນຳໄປປູກພາຍໃນລະດູຝົນ ປີ 2019.
ພິທີມອບ – ຮັບ, ໄດ້ຈັດຂື້ນທີ່ສູນສົ່ງເສີມ ບໍລິການເຕັກນິກຮ່ວມມືລາວ – ຫວຽດນາມ, ບ້ານອົ້ງ, ເມືອງຊຳເໜືອ, ກ່າວມອບໂດຍທ່ານ ມະນີລັດ ຊາສີດາວົງ ຮອງພະແນກສົ່ງເສີມການຜະລິດ ແລະ ນຳໃຊ້ແນວພັນ, ຕາງໜ້າກ່າວຮັບໂດຍທ່ານ ສີວຽງຊຳ ແພງພົມມາ ຫົວໜ້າຂະແໜງປູກຝັງ, ຮັບຮູ້ ແລະ ຢັ້ງຢືນ ເປັນສັກຂິພິຍານ ທ່ານ ກອນໄທ ແກ້ວນະຄອນ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງຫົວພັນ.
ຜູ້ຂຽນຂ່າວ
ຄຳະແກ້ວ ອິນທະວົງ
ພະແນກກະສິກຳ ແລະ ປ່າໄມ້ ຈັດພິທີທຳລາຍສີ້ນສ່ວນຂອງສັດປ່າທີ່ຍຶດມາໄດ້
ວັນທີ 6 ທັນວາ 2018, ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງຫົວພັນໄດ້ສົມທົບກັບພາກສ່ວນທີ່ກ່ຽວຂ້ອງ ຂອງແຂວງ, ເມືອງຊຳເໜືອ, ບ້ານອ້ອມຂ້າງເທດສະບານ ແລະ ສະມາຄົມຕະຫຼາດ, ໄດ້ຈັດພິທີທຳລາຍສິ້ນສ່ວນສັດປ່າທີ່ຍຶດໄດ້, ຈາກການຄ້າຂາຍທີ່ຜິດກົດໝາຍຂອງທີມງານລາດຕາເວນ ແລະ ສະກັດກັ້ນຜູ້ທີ່ລັກລອບລະເມີດລ່າ, ຊື້ – ຂາຍ ສັດນ້ຳ – ສັດປ່າ ທີ່ບໍ່ຖືກຕ້ອງຕາມລະບຽບກົດໝາຍ, ຊື່ງສາມາດຍຶດໄດ້ສັດປ່າຈາກພໍ່ຄ້າຊາວຂາຍ, ປະຊາຊົນທີ່ລັກລອບຊື້ – ຂາຍ, ສັດນ້ຳ ສັດປ່າ ຢູ່ບັນດາເມືອງ, ຕາມສາຍທາງ ແລະ ຕະຫຼາດເທດສະບານແຂວງ, ຈຸດຫຼໍ່ແຫຼມຕ່າງໆ ທີ່ມີຄວາມສ່ຽງໃນໄລຍະຜ່ານມາ, ນັບແຕ່ວັນທີ 14 ມີນາ 2018 ຫາ ວັນທີ 17 ຕຸລາ 2018 ຈຳນວນສັດທີ່ຍຶດໄດ້ມີ: ສີ້ນສ່ວນເຍືອງຜາຈຳນວນ 1 ໂຕ, ມີນ້ຳໜັກ 31 ກິໂລກຣາມ; ເຫັງນຫາງຂໍ 1 ໂຕ, ນ້ຳໜັກ 4 ກິໂລກຣາມ, ໂຕເກຍຈຳນວນ 41 ໂຕ, ນ້ຳໜັກ 2 ກິໂລກຣາມ, ໂຕນົກຂວກ 71 ໂຕ, ນ້ຳໜັກ 4 ກິໂລກຣາມ, ໂຕໄກ່ປ່າ 3 ໂຕ, ມີນ້ຳໜັກ 2 ໂລເຄີ່ງ, ໂຕຮອກ 17 ໂຕ, ມີນ້ຳໜັກ 3 ກິໂລກຣາມ, ສີ້ນສ່ວນໂຕຟານ 1 ໂຕ, ມີນ້ຳໜັກ 21 ກິໂລກຣາມ, ສີ້ນສ່ວນໝູປ່ານ້ຳໜັກ 7 ກິໂລກຣາມ, ສີ້ນສ່ວນໂຕເໝັ້ນ 1 ໂຕ ມີນ້ຳໜັກ 2 ກິໂລກຣາມ, ລວມທັງໝົດມີນ້ຳໜັກ 74 ກິໂລກຣາມ.
ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງຫົວພັນຍັງໃຫ້ຮູ້ຕື່ມອີກວ່າ: ໃນຕົ້ນປີ 2018 ກອງກວດກາປ່າໄມ້ ສາມາດຍຶດສັດປ່າຫວງຫ້າມຈາກພວກລັກລອບຊື້, ຂາຍສັດປ່າ ໄດ້ເປັນປະ
ເພດໂຕລິ່ນຈຳນວນ 23 ໂຕ, ມີນ້ຳໜັກ 108 ກິໂລກຣາມ. ໃນນັ້ນ, ສະເພາະໂຕຕາຍຈຳນວນ 6 ໂຕແມ່ນນຳມາທຳລາຍຄັ້ງກ່ອນແລ້ວ, ສ່ວນ 17 ໂຕທີ່ຍັງມີຊີວິດ ໄດ້ປ່ອຍຄືນສູ່ທຳມະຊາດ ເຂດປ່າສະ
ຫງວນແຫ່ງຊາດນ້ຳແອດ – ພູເລີຍສຳເລັດແລ້ວ.
ບັນນາທິການ
ເພັດໄຊ ເພັດສົມແພງ
ຜູ້ຂຽນຂ່າວ
ຄຳພະແກ້ວ ອິນທະວົງ
ທ່ານຮອງລັດຖະມົນຕີ, ກະຊວງກະສິກຳ ແລະ ປ່າໄມ້, ລົງຕິດຕາມ ແລະ ຊຸກຍູ້ການຜະລິດຢູ່ເມືອງຊຳເໜືອ.
ໃນຕອນເຊົ້າວັນທີ 29 ພະຈິກ 2018 ທີ່ຜ່ານມາ ທ່ານ ຄຳບຸນນັດ ໄຊຍະນົນ ຮອງລັດຖະມົນຕີ ກະຊວງ ກະສິກຳ ແລະ ປ່າໄມ້ ມີທ່ານ ສໍສະຫັວນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ພ້ອມດ້ວຍຂະແໜງການທີ່ກ່ຽວຂ້ອງຂອງພະແນກ ລົງຢ້ຽມຢາມຄອບຄົວແບບຢ່າງໃນການຜະລິດກະສິກຳ.
ໃນການຢ້ຽມຢາມກໍ່ໄດ້ຮັບຟັງການລາຍງານຂອງທ່ານ ລຳພັນ ຢູ່ບ້ານຊຳເໜືອ, ເມືອງຊຳເໜືອວ່າ: ໃນເບື້ອງຕົ້ນໄດ້ລົງທືນຊື້ດິນຈຳນວນ 5 ເຮັກຕາ; ເພື່ອປູກມັນຕົ້ນ, ປູກໝາກສະຕໍເບີລີ່ ແລະ ລ້ຽງໄກ່ ຈຳນວນ 18 ແມ່, ໃນປີ 2015 ມາຮອດປະຈຸບັນມີໄກ່ພໍ່ – ແມ່ພັນຈຳນວນ 500 ໂຕ, ແລະ ປູກໝາກສະຕໍເບີລີ່ໃນເນື້ອທີ່ 1 ໄລ່, ລະເລ່ຍລາຍຮັບໃນການຂາຍຜົນຜະລິດໄດ້ປະມານ 60 ກ່ວາລ້ານກີບຕໍ່ປີ, ຫຼັງຈາກນັ້ນທີມງານກໍ່ໄດ້ໄປຍ້ຽມຢາມສວນປູກໝາກແອບເປີນ ແລະ ໝາກກໍ່ຝະ
ລັ່ງຂອງທ່ານ ສົມໄພ ບ້ານ ປ່າຈ້າ, ເມືອງຊຳເໜືອ, ໃນເນື້ອທີ່ 1 ເຮັກຕາ, ລົງທືນຊື້ເບ້ຍໃນເບື້ອງ
ຕົ້ນ 25 ລ້ານກີບ,ປູກແລ້ວ 1,000 ຕົ້ນ ເລີ່ມປູກແຕ່ປີ 2013ເປັນຕົ້ນມາປະຈຸບັນເລີ່ມໝາກແລ້ວ.
ໃນການລົງຢ້ຽມຢາມໃນຄັ້ງນີ້ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້, ໄດ້ໃຫ້ກຽດໂອ້ລົມຕໍ່ການລົງຢ້ຽມຢາມຊື່ງທ່ານໄດ້ຍ້ອງຍໍຊົມເຊີຍຕໍ່ຄອບຄົວດັ່ງກ່າວທີ່ມີແນວຄິດລິເລີ່ມຜະລິດເປັນສິນຄ້າ, ຖືໄດ້ວ່າເປັນບົດຮຽນອັ່ນໃໝ່ສຳລັບຊາວກະສິກອນພາຍໃນ
ແຂວງຫົວພັນ,ພ້ອມກັນນັ້ນເພີ່ນຍັງໄດ້ຊີ້ນຳພະນັກງານວິຊາການໃຫ້ລົງຊ່ວຍ ແນະ ນຳດ້ານເຕັກນິກ
ການປູກ, ການລ້ຽງເພື່ອເຮັດໃຫ້ຄອບຄົວດັ່ງກ່າວສາມາດມີລາຍຮັບເພີ່ມຂື້ນກ່ວາເກົ່າ ແລະ ສາມາດ
ກາຍເປັນຕົວແບບ – ເປັນບ່ອນຮຽນຮູ້ໃຫ້ແກ່ຜູ້ທີ່ມີຄວາມສົນໃຈຕໍ່ໆໄປ.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ
ຄຳພະແກ້ວ ອິນທະວົງ
ສະຖາບັນຄົ້ນຄ້ວາກະສິກຳ ສສ ຫວຽດນາມໄດ້ມອບກິດຈະກຳການປູກໄມ້ໃຫ້ໜາກໃຫ້ແກ່ພະແນກ ກະສິກຳ ແລະ ປ່າໄມ້ແຂວງຫົວພັນ
ວັນທີ 30 ພະຈິກ 2018 ທີ່ຜ່ານມານີ້ ຢູ່ທີ່ສູນສົ່ງເສີມເຕັກນິກກະສິກຳ ແລະ ປ່າໄມ້ຮ່ວມມືລາວ – ຫວຽດນາມບ້ານອົ້ງ, ເມືອງຊຳເໜືອ, ໄດ້ຈັດພິທີມອບ – ຮັບຜົນຂອງການຈັດຕັ້ງປະຕິບັດກິດຈະກຳປູກໄມ້ໃຫ້ໜາກ ໃຫ້ແກ່ພະແນກກະສິກຳ ແລະ ປ່າໄມ້ແຂວງຫົວພັນ ກ່າວມອບໂດຍທ່ານ ຮວາງວັນໂຫ້ງ ຕາງໜ້າສະຖາບັນຄົ້ນຄ້ວາກະສິກຳແຫ່ງຊາດຫວຽດນາມ ແລະ ກ່າວຮັບໂດຍ ທ່ານ ສໍສະຫັວນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ, ໃນການມອບຮັບກິດຈະກຳໃນຄັ້ງນີ້ຍັງມີພະນັກງານວິຊາການຝ່າຍລາວ ແລະ ຝ່າຍຫວຽດນາມເຂົ້າຮ່ວມເປັນສັກຂີພິຍານ 30 ກ່ວາທ່ານ.
ເພື່ອເປັນການສົ່ງເສີມວຽກງານກະສິກຳພາຍໃນສູນດັ່ງກ່າວໃຫ້ເປັນຈຸດສາທິດ – ເປັນບ່ອນຮຽນໃຫ້ຊາວກະສິກອນຜູ້ທີ່ມີຄວາມສົນໃຈ – ເປັນບ່ອນລົງຕົວຈິງໃນການຝຶກອົບຮົມ, ກິດຈະກຳທີ່ມອບ – ຮັບໃນຄັ້ງນີ້ປະກອບມີ: ຕົ້ນໝາກພຸກ, ໝາກກ້ຽງ ແລະ ໝາກສີດາ ລວມທັງໝົດຈຳນວນ 1,800 ເບ້ຍ, ປູກໃນເນື້ອທີ່ 2 ເຮັກຕາ, ຊື່ງໄດ້ປູກມາແຕ່ເດືອນ ພຶດສະພາ 2018 ແລະ ຝ່າຍຫວຽດນາມໄດ້ສົ່ງຜູ້ຊ່ຽວຊານ, ມາຊ່ວຍຝຶກອົບຮົມແນະນຳກ່ຽວກັບເຕັກນິກວິຊາການໃຫ້ພະນັກງານວິຊາການລາວພ້ອມດ້ວຍຊາວກະສິກອນ 10 ຄອບຄົວໃນກຸ່ມເປົ້າໝາຍຢູ່ໃນເມືອງຊຳເໜືອ.
ໃນຕອນທ້າຍ ທ່ານ ສໍສະຫັວນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ໄດ້ຮັບຮອງເອົາຜົນຂອງການຈັດຕັ້ງປະຕິບັດກິດຈະກຳປູກໄມ້ໃຫ້ໝາກ ແລະ ມອບຕໍ່ໃຫ້ສູນສົ່ງເສີມເຕັກນິກກະສິກຳ ແລະ ປ່າໄມ້ ຮ່ວມມືລາວ – ຫວຽດນາມ, ນຳໄປຈັດຕັ້ງປະຕິບັດໃຫ້ເກີດດອກອອກຜົນຕາມຈຸດປະສົງ ແລະ ເປົ້າໝາຍທີ່ວາງໄວ້.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ
ຄຳພະແກ້ວ ອິນທະວົງ
ພະແນກກະສິກຳ ແລະ ປ່າໄມ້ ລົງຊຸກຍູ້ ການຜະລິດ ກະສິກຳເປັນສິນຄ້າຢູ່ເມືອງກັວນ
ວັນທີ 13 ພະຈິກ 2018 ທີ່ຜ່ານມາ, ພະແນກກະສິກຳ ແລະ ປ່າໄມ້ ຮ່ວມກັບຫ້ອງການກະສິກຳ ແລະ ປ່າໄມ້ເມືອງ
ກັວນ ໄດ້ລົງຊຸກຍູ້ການຜະລິລະດູແລ້ງ ແລະ ປູກກາເຟເປັນສິນຄ້າ, ຂອງໂຄງການ ພັດທະນາທົດແທນການປູກຝິ່ນ, ຢູ່ບ້ານ ຜາແຫຼມ, ເມືອງກັວນ, ນຳພາໂດຍ ທ່ານ ອຳພອນ ສອນວິໄລ ຄະນະປະຈຳພັກເມືອງ, ຫົວໜ້າຫ້ອງການກວດກາພັກ – ລັດເມືອງ, ທ່ານ ສຸດວິໄສ ໄຊສົງຄາມ ຫົວໜ້າກອງກວດກາປ່າໄມ້ ຕາງໜ້າພະແນກກະສິກຳ ແລະ ປ່າໄມ້ແຂວງ, ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ມີໜ່ວຍງານທີ່ກ່ຽວຂ້ອງ ແລະ ພໍ່ແມ່ປະຊາຊົນຜູ້ປູກກາເຟເຂົ້າຮ່ວມນຳ.
ຈຸດປະສົງໃນການຕິດຕາມຊຸກຍູ້ການຜະລິດປູກພືດເປັນສິນຄ້າຄັ້ງນີ້ ກໍ່ເພື່ອປຸກລະດົມໃຫ້ພໍ່ແມ່ພີ່ນ້ອງຊາວກະສິກອນຜູ້ປູກກາເຟ ໃນຂອບເຂດທົ່ວເມືອງ ເວົ້າລວມ, ເວົ້າສະເພາະແມ່ນຢູ່ໃນບ້ານ ຜາແຫຼມ ຫັນມາຊົມໃຊ້ເຕັກນິກການປູກ
ແລະ ຖືຄວາມສຳຄັນຂອງການປູກພືດເປັນສິນຄ້າສ້າງລາຍຮັບໃຫ້ຄອບຄົວພົ້ນທຸກຈາກຄວາມຍາກຈົນ ແລະ ແນໃສ່ການລົບລ້າງຄວາມທຸກຍາກໃນອະນາຄົດ, ໃນໂອກາດດັ່ງກ່າວ, ວິຊາການຂອງໂຄງການພັດທະນາທົດແທນການປູກຝິ່ນໄດ້ລາຍງານຄວາມຄືບໜ້າຂອງໂຄງການວ່າ: ເປົ້າໝາຍຂອງໂຄງການ, ປູກກາເຟ, ຈຳນວນ 3 ບ້ານ. ບ້ານນາອໍ້ ມີ 44 ຄອບຄົວເລີ່ມປູກກາເຟໃນປີ 2017 ຈຳນວນ 68 ພັນ 400 ເບ້ຍ, 13 ເຮັກຕາ, ປີ 2018 ມີ 113 ພັນ 100 ເບ້ຍ, 23 ເຮັກຕາ, ບ້ານ ໜອງແຫວນ ມີ 39 ຄອບຄົວເລີ່ມປູກກາເຟໃນປີ 2017 ຈຳນວນ 30 ພັນເບ້ຍ, 6 ເຮັກຕາ, ປີ2018 ມີ 113 ພັນ 100 ເບ້ຍ, 27 ເຮັກຕາ ແລະ ບ້ານ ຜາແຫຼມ ມີ 21 ຄອບຄົວເລີ່ມປູກກາເຟໃນປີ 2017 ຈຳ
ນວນ 48 ພັນ 600 ເບ້ຍ, 9 ເຮັກຕາ, ປີ 2018 ມີ 60 ພັນເບ້ຍ, 12 ເຮັກຕາ.
ໃນຕອນທ້າຍຂອງພິທີ ທ່ານ ອຳພອນ ສອນວິໄລ ກໍ່ໄດ້ໃຫ້ຄວາມຄິດເຫັນວ່າ: ເພື່ອເຮັດໃຫ້ການປູກກາເຟດັ່ງກ່າວນີ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນຢ່າງກ້ວາງຂວາງ, ແນໃສ່ກ້າວໄປສູ່ການລົບລ້າງຄວາມທຸກຍາກຂອງປະຊາ
ຊົນໃນອະນາຄົດ ແລະ ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂື້ນ, ດັ່ງນັ້ນຂໍຮຽກຮ້ອງມາຍັງຊາວກະສິກອນຜູ້
ປູກຝັງທັງຫຼາຍ, ພະນັກງານວິຊາການທີ່ກ່ຽວຂ້ອງ, ຈົ່ງເອົາໃຈໃສ່ການຈັດຕັ້ງປະຕິບັດຊີ້ນຳ ນຳພາຊາວກະສິກອນໃຫ້ຮັບຮູ້ ແລະ ຕື່ນຕົວປູກພືດໃຫ້ຫຼາຍກາຍເປັນສິນຄ້າ ແລະ ເພື່ອຜົນປະໂຫຍດຂອງທ່ານ, ເຊື່ອແນ່ວ່າ: ຈະສາມາດພັດທະນາການປູກພືດ ໃຫ້ກາຍເປັນສິນຄ້າໄດ້ ແລະ ສາມາດບັນລຸ ຕົວເລກຄາດໝາຍຊົມໃຊ້ພາຍໃນ ແລະ ສົ່ງອອກຕ່າງເມືອງ, ຕ່າງແຂວງ ແລະ ຕ່າງປະເທດ.
ບັນນາທິການ
ເພັດໄຊ ເພັດສົມແພງ
ຜູ້ຂຽນຂ່າວ
ຄຳພະແກ້ວ ອິນທະວົງ
ລາຍການ ກະສິກຳວັນນີ້ ອອກວັນທິດ 25/11/2018 ຍ້ອນຫຼັງ
ກອງກວດກາປ່າໄມ້ແຂວງຫົວພັນ ພົບປະແລກປ່ຽນບົດຮຽນກັບກອງກວດກາປ່າໄມ້ແຂວງຊຽງຂວາງ
ໃນວັນທີ 16 ພະຈິກ 2018 ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງ ຫົວພັນ ໄດ້ຢ້ຽມຍາມ, ແລກປ່ຽນບົດຮຽນກັບ ກອງກວດກາປ່າໄມ້ແຂວງ ຊຽງຂວາງ ທີ່ຫ້ອງປະຊຸມພະແນກກະສິ
ກຳ ແລະ ປ່າໄມ້ ແຂວງຊຽຂວາງ ນຳໂດຍທ່ານ ຄີ່ນ ທຸມມາລາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ,ໃຫ້ກຽດຕ້ອນຮັບທີມງານໂດຍມີທ່ານ ສົມສະໝອນ ຜະລິຈັນ ຮອງຫົວໜ້າພະແນກ
ກະສິກຳ ແລະ ປ່າໄມ້ແຂວງຊຽງຂວາງ, ມີຫົວໜ້າກອງກວດກາ ແລະ ເຈົ້າໜ້າທີ່ປ່າໄມ້ທັງສອງແຂວງເຂົ້າຮ່ວມ 30 ທ່ານ,
ໃນໂອກາດດັ່ງກ່າວທັງສອງຝ່າຍໄດ້ພ້ອມກັນປືກສາຫາລືຖອດຖອນບົດຮຽນ, ກ່ຽວກັບກວດກາປ່າໄມ້, ສັດນໍ້າ – ສັດປ່າ ໃນສອງແຂວງ ໂດຍໄດ້ຍົກໃຫ້ເຫັນສີ່ງທີ່ທ້າທ່າຍ ຂໍ້ສະດວກ ແລະ ຂໍ້ຍຸ້ງຍາກໃນການຈັດຕັ້ງປະຕິບັດວຽກງານ ໂດຍສະເພາະວຽກງານກິດຈະກຳຂອງໂຄງການ ສ້າງຄວາມເຂັ້ມແຂງ ໃນການຈັດຕັ້ງປະຕິບັດ ໃຊ້ກົດໝາຍສັດນ້ຳ – ສັດປ່າ,ແລະ ເພື່ອເຮັດໃຫ້ການປະສານງານລະຫວ່າງເຈົ້າ
ໜ້າທີ່ປ່າໄມ້ແຂວງ ຫົວພັນ ກັບ ແຂວງ ຊຽງຂວາງໃຫ້ການສະກັດກັ້ນການຊື້ຂາຍສັດນຳ້ – ສັດປ່າທີ່ຫ່ວງຫ້າມ ໃຫ້ມີການປະສານສົບທົບກັນໃນດ້ານວຽກງານການກວດ ກາລາດຕະເວນ ຕາມເສັ້ນທາງ
ຕ່າງໆ, ຈຸດທີ່ມີເຂດແດນຮ່ວມກັນເປັນຕົ້ນ, ຍັງຈະໄດ້ສືບຕໍ່ຮ່ວມມືກວດກາລາດຕະເວນເຂດແດນ ລະຫ່ວາງເມືອງກັວນ ແລະ ເມືອງໜອງແຮດ , ເມືອງຫົວເມືອງ ແລະ ເມືອງຄຳ, ເມືອງຮ້ຽມ ແລະ ເມືອງພູກູດ,ເພື່ອຊ່ວຍເຫຼືອ ແລະ ຮ່ວມມືການຈັດຕັ້ງປະຕິບັດໃຫ້ມີປະສິດທິຜົນ ແລະ ມີຄວາມເຂັ້ມແຂງ, ເພື່ອເຮັດໃຫ້ກົດໝາຍວ່າດ້ວຍປ່າໄມ້ ແລະ ກົດໝາຍວ່າດ້ວຍສັດນ້ຳ ແລະ ສັດປ່າໄດ້ຖືກນຳໃຊ້ຢ່າງທົ່ວເຖຶງ ແລະ ເຂັ້ມງວດ.
ບັນນາທິການ ແອຊຳ ວິໄລຈິດ
ຜູ້ຂຽນຂ່າວ ຄຳພະແກ້ວ ອິນທະວົງ
ຟັງລາຍການ ກະສິກຳວັນນີ້ ຍ້ອນຫຼັງອອກວັນທີ 18/11/2018
