ວັນທີ 11 ພຶດສະພາ 2022 ຢູ່ທີ່ຫ້ອງປະຊຸມ ຂອງພະແນກອຸດສາຫະກຳ ແລະ ການຄ້າແຂວງ ໄດ້ຈັດພິທີ ມອບ-ຮັບ ການແບ່ງຄວາມຮັບຜິດຊອບໂຮງງານອຸດສາຫະກຳປຸງແຕ່ງກະສິກຳ ແລະ ປ່າໄມ້ ຂັ້ນຕົ້ນ ລະຫ່ວາງ ພະແນກອຸດສາຫະກຳ ແລະ ການຄ້າ ແລະ ພະແນກກະສິກຳ ແລະ ປ່າໄມ້ ແຂວງຫົວພັນ. ໂດຍໃຫ້ກຽດເປັນປະທານຂອງທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ທ່ານ ວັນແສງ ຄຳມັງໄຊ ຫົວໜ້າພະແນກອຸດສາຫະກຳ ແລະ ການຄ້າ, ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້, ມີບັນດາທ່ານຫົວໜ້າ, ຮອງຫົວໜ້າຂະ ແໜງການ ແລະ ວິຊາການຂອງຂະແໜງການກ່ຽວຂ້ອງ 2 ພະແນກການເຂົ້າຮ່ວມ 20 ທ່ານ,  ຍິງ 4 ທ່ານ.

ໂດຍພື້ນຖານ ສອງພະແນກການແມ່ນເຫັນດີ ເປັນເອກະພາບ ກ່ຽວກັບການມອບ-ຮັບ ວຽກງານໃນການຄຸ້ມຄອງ, ພັດທະນາ ແລະ ສົ່ງເສີມ ໂຮງງານອຸດສາຫະກຳປຸງແຕ່ງກະສິກຳ ຂັ້ນຕົ້ນ ເຊີ່ງມີ 11 ລາຍການກິດຈະການ ໂຮງງານຄື: ໂຮງສີເຂົ້າ, ໂຮງງານປຸງແຕ່ງແປ້ງມັນຕົ້ນ, ປຸງແຕ່ງອ້ອຍ, ໂຮງງານຂ້າສັດ, ໂຮງງານຜະລິດອາຫານສັດ, ໂຮງງານຜະລິດວັກຊິນ, ຢາປາບສັດຕູພືດ, ຢາປົວສັດ ແລະ ເຄື່ອງມືສັດຕະວະແພດ, ໂຮງງານປຸງແຕ່ງໄມ້, ໂຮງເລື່ອຍ, ໂຮງຊອຍ ແລະ ໂຮງເຟີນິເຈີໄມ້, ໂຮງງານປຸງແຕ່ງຢາງພາລາ ແລະ ເຄື່ອງປ່າຂອງດົງ, ໂຮງງານຜະລິດຝຸ່ນຊີວະພາບ, ອົງຄະທາດ, ໂຮງງານຂັດແຍກເມັດພັນ ແລະ ຫຸ້ມຫໍ່ຜົນຜະລິດກະສິກຳ, ໂຮງງານຜະລິດເຄື່ອງມື ແລະ ກົນຈັກກະສິກຳ. ພິທີດັ່ງກ່າວໄດ້ເຊັນບົດບັນທຶກມອບ-ຮັບ ວຽກງານອຸດສາຫະກຳປຸງແຕ່ງກະສິກຳ ປ່າໄມ້ ຂັ້ນຕົ້ນ ລະຫ່ວາງ ພະແນກອຸດສາຫະກຳ ແລະ ການຄ້າ. ໄດ້ມອບໃຫ້ ພະແນກກະສິກຳ ແລະ ປ່າໄມ້ແຂວງເປັນຜູ້ສືບຕໍ່ຈັດຕັ້ງປະຕິບັດຕໍ່ໄປ. ໂດຍການເປັນສັກຂິພິຍານ, ທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ.

ພິທີດັ່ງກ່າວຍັງໄດ້ຮັບຟັງຄຳເຫັນໂອ້ລົມຂອງທ່ານການນຳແຂວງ, ເພີ່ນໄດ້ຍ້ອງຍໍຊົມເຊີຍຕໍ່ຜົນງານຂອງຂະແໜງອຸດສາຫະກຳ ແລະ ການຄ້າທີ່ໄດ້ນຳພາ-ຊີ້ນຳ, ຈັດຕັ້ງປະຕິບັດໃນໄລຍະທີ່ຜ່ານມາ ວຽກງານມີຫຼາຍດ້ານທີ່ມີຜົນສຳເລັດ, ສະນັ້ນມອບໃຫ້ ພະແນກກະສິກຳ ແລະ ປ່າໄມ້, ສືບຕໍ່ຮັບຜິດຊອບວຽກງານຕໍ່ໄປ, ມີຫັຍງໃຫ້ປຶກສາຫາລືສົມທົບຮ່ວມມືກັນໃຫ້ສອດຄ່ອງ ແລະ ຕິດພັນກັບການພັດທະນາເສດຖະກິດສັງຄົມພາຍໃນແຂວງຫົວພັນດີຂື້ນ.

ບ້ານ ເມືອງເກົ້າ, ເມືອງຊ່ອນ ເປັນບ້ານໜື່ງທີ່ປະຊາຊົນມີຄວາມດຸໝັ່ນຂະຫັຍນພຽນ ໃນການເຮັດນາປູກເຂົ້າ, ປູກຝັງ ແລະ ລ້ຽງສັດ, ເປັນອາຊີບທີ່ໝັ້ນຄົງ, ບໍ່ວ່າຈະໜ້ອຍ ຫຼື ຫຼາຍກໍ່ຕາມ ແລະ ມີຫຼາຍຄອບຄົວທີ່ກາຍເປັນຄອບຄົວຕົວແບບ ທີ່ໄດ້ຮັບຜົນສຳເລັດໃນການສ້າງຄວາມເຂັ້ມແຂງໃຫ້ຄອບຄົວ ທາງດ້ານອາຊີບ ແລະ ຄວາມໝັ້ນຄົງທາງດ້ານລາຍໄດ້ ເພື່ອຕອບສະໜອງດ້ານສະບຽງອາຫານ, ໃຫ້ສັງຄົມທີ່ມີຄວາມຕ້ອງການຫຼາຍ, ຖືວ່າເປັນຊ່ອງທາງໜື່ງໃນການສ້າງລາຍໄດ້ເຂົ້າສູ່ຄອບຄົວ.  ແລະ ຫຼຸດພົ້ນອອກຈາກຄວາມທຸກຍາກ.

ທ່ານ ບິກໄຊ ສີມອນທອງ ອາຍຸ 43 ປີ ຮອງນາຍບ້ານ ໄດ້ເລົ່າລະອຽດວ່າ: ບ້ານ ເມືອງເກົ້າ ມີ 80 ຫຼັງຄາເຮືອນ, ມີພົນລະເມືອງ 490 ຄົນ, ຍິງ 247 ຄົນ, ມີ 2 ສາສະໜາຄື: ພຸດ ແລະ ຜີ, ມີເນື້ອທີ່ນາທັງໝົດ 45 ເຮັກຕາ, ເນື້ອທີ່ໄຮ່ 37 ເຮັກຕາ, ຜົນຜະລິດແຕ່ລະປີ 215 ໂຕນ, ສະເລ່ຍໃສ່ຫົວຄົນ 420 ກິໂລຕໍ່ຄົນຕໍ່ປີ. ນອກຈາກເຮັດນາ ແລະ ໄຮ່ແລ້ວ ຍັງໄດ້ນຳພາປະຊາຊົນປູກຝັງ ແລະ ລ້ຽງສັດ, ປະຈຸບັນ ບ້ານ ເມືອງເກົ້າ, ມີຄວາຍ 85 ໂຕ, ງົວ 116 ໂຕ, ແບ້ 350 ໂຕ, ໝູ 422 ໂຕ, ປະຊາຊົນຂາຍສັດລ້ຽງ ງົວ, ຄວາຍ, ໝູ, ແບ້, ສັດປີກ ແລະ ອື່ນໆ 1 ຕື້ 1 ຮ້ອຍ 68 ລ້ານກ່ວາກີບ. ສະເລ່ຍໃສ່ຄົນໄດ້ເກືອບ 3 ລ້ານກີບຕໍ່ຄົນ/ປີ, ສິ່ງທີ່ພົ້ນເດັ່ນກ່ວາໝູ່ແມ່ນຄອບຄົວຕົວແບບ ທ່ານ ລິດດາພອນ ສ້າງລາຍຮັບເຂົ້າສູ່ຄອບຄົວໄດ້ຫຼາຍກ່ວາໝູ່ຖ້າທຽບໃສ່ຄອບຄົວອື່ນ. ບ້ານຂອງພວກເຮົາຍັງມີ ອາຊີບເສີມ, ເປັນຕົ້ນແມ່ນປູກໝາກເພັດ, ຜັກທຽມ ແລະ ຕຳ່ຫູກທໍໄໝ, ຈັກສານອື່ນໆ ສິ່ງທີ່ມີຄວາມຍຸ້ງຍາກກ່ວາໝູ່ໃນການປູກຝັງ-ລ້ຽງສັດ, ແມ່ນຫ້ວຍເລິກ, ພູສູງ, ການເຮັດນາແມ່ນອາໄສນຳ້ຝົນ.

ທ່ານ ລິດດາພອນ ຄອບຄົວຕົວແບບໃຫ້ຮູ້ວ່າ: ສະມາຊິກໃນຄອບຄົວມີ 7 ຄົນ, ຍິງ 3 ຄົນ, ແຮງງານຕົ້ນຕໍມີ 2 ຄົນ, ອາຊີບຕົ້ນຕໍເຮັດນາປູກເຂົ້າ, ຜົນຜະລິດແຕ່ລະປີໄດ້ 4-5 ໂຕນ, ອາຊີບສຳຮອງຕົ້ນຕໍແມ່ນລ້ຽງສັດ, ລິເລີ່ມການລ້ຽງສັດແຕ່ປີ 2016 ເປັນຕົ້ນມາ, ທຳອິດມີງົວ 5 ໂຕ, ຕໍ່ຈາກນັ້ນມາໄດ້ຊື້ງົວຕື່ມ 15 ໂຕ, ລວມເປັນ 20 ໂຕ, ມາຮອດປີ 2020 ຂະຫຍາຍເນື້ອທີ່ປູກຫ້ຍາເພີ່ມເຕີມໃນປະຈຸບັນມີເນື້ອທີ່ປະມານ 12 ເຮັກຕາ ແລະ ມີແຜນການຂະຫຍາຍຕື່ມອີກ, ແນວພັນປູກແມ່ນຊື້ມາຈາກພໍ່ຄ້າ ແລະ ບ້ານອ້ອມຂ້າງ, ຈາກການລ້ຽງງົວ, ຄວາຍ, ໝູ, ລ້ຽງແບ້ ແລະ ສັດປີກຈຳນວນໜື່ງ. ພັກ-ລັດເຫັນຄວາມສຳຄັນໄດ້ສົ່ງເສີມໃຫ້ຂ້າພະເຈົ້າໄປຝຶກອົບຮົມດ້ານເຕັກນິກ ນຳຫ້ອງການກະສິກຳເມືອງ ແລະ ພະແນກກະສິກຳ ແລະ ປ່າໄມ້ແຂວງ, ໃນການຮັກສາສຸຂະພາບສັດ, ມາຮອດປີ 2021-2022 ມີງົວເພີ່ມຂື້ນ 70 ກ່ວາໂຕ, ຂາຍອອກໃຫ້ພໍ່ຄ້າ 4-5 ໂຕ. ເປັນເງີນ 30 ລ້ານ – 40 ລ້ານ. ສະເພາະ ຂາຍງົວ, ຂາຍຄວາຍປະມານ 20 ກ່ວາລ້ານກີບ. ຂາຍໝູ ປະມານ 12 ລ້ານກ່ວາກີບ. ສະເລ່ຍລາຍຮັບເຂົ້າສູ່ຄອບຄົວ 70 ກ່ວາລ້ານກີບ/ປີ ເງີນທີ່ໄດ້ມາຕົ້ນຕໍແມ່ນຂະຫຍາຍສວນຫ້ຍາ, ສາມາດຊື້ອຸປະກອນຮັບໃຊ້ຄອບຄົວເປັນຕົ້ນ ຊື້ລົດໃຫ່ຍໄດ້ 1 ຄັນ, ລົດຈັກ 3 ຄັນ, ຊື້ລົດໄຖນາ 1 ຄັນ, ຊື້ຈັກຟາດເຂົ້າ 1 ເຄື່ອງ, ມີເງິນແຮໄວ້ ແລະ ສົ່ງລູກໄປຮຽນຕໍ່ວິຊາສະເພາະ, ເຮັດໃຫ້ຄອບຄົວດີຂື້ນເທື່ອລະກ້າວ.

ຕອນທ້າຍເພີ່ນຍັງໄດ້ຄອບໃຈນຳພັກ-ລັດ ໂດຍສະເພາະແມ່ນຫ້ອງການທີ່ກ່ຽວຂ້ອງທີ່ ໄດ້ສຸກຍູ້ສົ່ງເສີມໃຫ້ຄອບຄົວຂ້າພະເຈົ້າເຮັດໃຫ້ຄອບຄົວມີອາຊີບທີ່ໝັ້ນຄົງ ແລະ ເປັນແບບຢ່າງໃຫ້ຄອບຄົວອື່ນໆ ພາຍໃນບ້ານ ແລະ ພາຍໃນເມືອງຂອງຕົນ.

ບັນນາທິການກວດແກ້: ນ. ພວງວັນ ມີວົງສາ

ພາບ-ບົດ: ທ. ຄຳພະແກ້ວ ອິນທະວົງ

ຕົ້ນເດືອນ ພຶດສະພາ 2022 ການນຳພະແນກໄດ້ລົງຊຸກຍູ້ ແລະ ຕິດຕາມການປູກ-ລ້ຽງ ຄອບຄົວຕົວແບບ ບ້ານ ເມືອງເກົ້າ ແລະ ບ້ານ ລ້ອງງົວປ່າ, ເມືອງຊ່ອນ ນຳໂດຍທ່ານ ພວງສະຫັວດ ພົມມາສີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ວາສະນູນ ສໍອິນໄຊ ຮອງເຈົ້າເມືອງ, ເມືອງຊ່ອນ, ມີຫົວໜ້າຫ້ອງການກະສິກຳ ແລະ ປ່າໄມ້, ວິຊາການທີ່ກ່ຽວຂ້ອງ ແລະ ອຳນາດນາດການປົກຄອງ 2 ບ້ານເຂົ້າຮ່ວມນຳ.

ທ່ານ ສຸລິນໄຊ ພົງສະຫັວດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຊ່ອນ ໄດ້ລາຍງານສະພາບລວມໂດຍຫໍ້ຍ ອິງໃສ່ແຜນພັດທະນາເສດຖະກິດສັງຄົມ 5 ປີ ຂອງເມືອງຊ່ອນ, ໄດ້ກຳນົດເອົາ 5 ທ່າແຮງ ໃນນັ້ນວຽກງານການປູກ-ການລ້ຽງ, ໂດຍລວມແລ້ວ ການພັດທະນາກະສິກຳ ແລະ ປ່າໄມ້ ໄດ້ມີການຂະຫຍາຍຕົວຢ່າງຕໍ່ເນື່ອງ ໃນປະຈຸບັນ ຂະແໜງການກະສິກຳ ພວມຈັດຕັ້ງຜັນຂະຫຍາຍ 2 ວາລະແຫ່ງຊາດ, ໂດຍສະເພາະແມ່ນການແກ້ໄຂທາງດ້ານເສດຖະກິດການເງິນ ແລະ ສຸມໃສ່ການປູກ-ການລ້ຽງເປັນສິນຄ້າ ເພື່ອຄຳ້ປະກັນທາງດ້ານສະບຽງອາຫານ ແລະ ການຜະລິດເປັນສິນຄ້າ, ເຊິ່ງເປັນການຜັນຂະຫຍາຍຂອງວາລະແຫ່ງຊາດ, ກໍ່ຄືແຜນການຂອງຂະແໜງກະສິກຳ ແລະ ປ່າໄມ້, ເປັນຕົ້ນແມ່ນການລ້ຽງສັດໃຫ່ຍການລ້ຽງົວ, ຄວາຍ, ແບ້, ໝູ, ປາ ແລະ ສັດປີກສຳຫຼັບການປູກຝັງແມ່ນເພື່ອແນໃສ່ເປັນສິນຄ້າເປັນຕົ້ນແມ່ນມັນສະຄູ, ກາເຟ, ມັນຕົ້ນ, ຖົ່ວເຫຼືອງ ແລະ ພືດອື່ນໆ. ປີ 2022 ໄດ້ວາງຄາດໝາຍໄວ້ປູກ 3 ພັນກ່ວາເຮັກຕາ, ຜົນຜະລິດຄາດຄະເນໃຫ້ໄດ້ 27 ພັນກ່ວາໂຕນ, ໃນນີ້ໄດ້ແຕ່ງຕັ້ງວິຊາການລົງທ້ອງຖີ່ນບັນດາຈຸດສຸມເຂດຜະລິດແຕ່ລະບ້ານ ເພື່ອນຳພາປະຊາຊົນປູກ, ລ້ຽງ ແນະນຳເຕັກນິກທາງດ້ານວິຊາການ ທັງໝົດນີ້ແມ່ນເພື່ອຄຳ້ປະກັນທາງດ້ານສະບຽງອາຫານ ແລະ ສົ່ງອອກ.ຈາກນັ້ນທາງທີມງານຍັງໄດ້ໄປຍ້ຽມຢາມຄອບຄົວຕົວແບບ 2 ບ້ານ ໃນການລ້ຽງສັດເປັນສິນຄ້າ.

ໂອກາດດັ່ງກ່າວທ່ານ ພວງສະຫັວດ ພົມມາສີ ໄດ້ຍ້ອງຍໍຊົມເຊີຍຕໍ່ພໍ່ແມ່ພີ່ນ້ອງປະຊາຊົນ 2 ບ້ານທີ່ມີຜົນງານ, ມີຜົນສຳເລັດຫຼາຍດ້ານຕາມເປົ້າໝາຍທີ່ວາງໄວ້ ທ່ານຍັງໄດ້ໃຫ້ທິດນຳພາ-ຊີ້ນຳ ສືບຕໍ່ຈັດຕັ້ງປະຕິບັດວຽກງານໃນຕໍ່ໜ້າເພື່ອນຳພາປະຊາຊົນປູກ-ການລ້ຽງຜະລິດໃຫ້ຫຼາຍກາຍເປັນສິນຄ້າສ້າງລາຍຮັບເຂົ້າສູ່ຄອບຄົວສາມາດຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ບັນນາທິການກວດແກ້: ນ ພວງວັນ ມີວົງສາ

ພາບ-ຂ່າວ: ທ ຄຳພະແກ້ວ ອິນທະວົງ

ວັນທີ 19 ພຶດສະພາ 2022 ພະແນກກະສິກຳ ແລະ ປ່າໄມ້ແຂວງ ຈັດກອງປະຊຸມລາຍງານຄວາມຄືບໜ້າກະກຽມການຈັດຕັ້ງປະຕິບັດວຽກງານ ວາງແຜນນຳໃຊ້ທີ່ດິນແບບມີສ່ວນຮ່ວມ ຂອງໂຄງການພັດທະນາພື້ນຖານໂຄງລ່າງຊົນນະບົດ ແລະ ຄຸ້ມຄອງອ່າງໂຕ່ງແບບຍືນຍົງ ໂດຍເປັນປະທານ ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ຄານສະຫັວນ ສີໂສພາ ຫົວໜ້າປະສານງານຂັ້ນສູນກາງ, ມີບັນດາທ່ານ ຮອງເຈົ້າເມືອງ, ເມືອງວຽງໄຊ, ສົບເບົາ ແລະ ເມືອງຊຳເໜືອ, ທ່ານ ຫົວໜ້າຜູ້ປະສານງານຂັ້ນແຂວງ, ຂັ້ນເມືອງ, ຄະນະປະສານງານໂຄງການ ແລະ ພາກສ່ວນທີ່ກ່ຽວຂ້ອງຂອງໂຄງການເຂົ້າຮ່ວມ 39 ທ່ານ, ຍິງ 7 ທ່ານ.

ກອງປະຊຸມຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າກະກຽມການຈັດຕັ້ງປະຕິບັດວຽກງານ, ຂະບວນການ, ບາດກ້າວຂອງວຽກງານການວາງແຜນນຳໃຊ້ທີ່ດິນ, ແຜນການ, ງົບປະມານ, ລະບົບການຕິດຕາມປະເມີນຜົນ ແລະ ຄວາມຄືບໜ້າ, ການວາງແຜນນຳໃຊ້ທີ່ດິນແບບມີສ່ວນຮ່ວມມີ 3 ເມືອງເປົ້າໝາຍຂອງໂຄງການຄື: ເມືອງຊຳເໜືອ 10 ບ້ານ, ເມືອງສົບເບົາ 8 ບ້ານ ແລະ ເມືອງວຽງໄຊ 37 ບ້ານ, ເລີ່ມຈັດຕັ້ງປະຕິບັດເວລາຂອງໂຄງການ 6 ປີ (2021-2026)ໂດຍນຳໃຊ້ງົບປະມານຂອງໂຄງການພັດທະນາພື້ນຖານໂຄງລ່າງຊົນນະບົດ ແລະ ຄຸ້ມຄອງອ່າງໂຕ່ງແບບຍືນຍົງຈຳນວນ 3 ຕື້ 4 ຮ້ອຍ 70 ລ້ານກ່ວາກີບ, ໂອກາດດັ່ງກ່າວຜູ້ແທນທີ່ເຂົ້າຮ່ວມກອງປະຊຸມຍັງໄດ້ປະກອບຄຳຄິດ ຄຳເຫັນຢ່າງກົງໄປກົງມານຳອີກ.

ທ່ານ ໄຈເພັດ ເຮືອງຖາວອນ ໄດ້ຍ້ອງຍໍຊົມເຊີຍຄວາມຄືບໜ້າໃນການກະກຽມຈັດຕ້ັງປະຕິບັດວຽກງານ ວາງແຜນນຳໃຊ້ທີ່ດິນແບບມີສ່ວນຮ່ວມຂອງໂຄງການ, ໂຄງການດັ່ງກ່າວແມ່ນສົ່ງເສີມການປູກພືດລະດູແລ້ງທີ່ມີລາຄາສູງໃຫ້ມີຄວາມຫຼາກຫຼາຍ, ນໍາໃຊ້ເຕັກນິກການຜະລິດເຂົ້ານາປີ ໃຫ້ໄດ້ສະມັດຕະພາບເພີ່ມຂື້ນດ້ວຍການສະໜອງຊົນລະປະທານທີ່ເຊື່ອຖືໄດ້, ການປັບປຸງດິນ ແລະ ການເຂົ້າເຖິງຂໍ້ມູນຂ່າວສານເພື່ອໃຊ້ນໍ້າຊົນລະປະທານ, ປົກປ້ອງລະບົບນິເວດວິທະຍາເຂດໃນເຂດອ່າງໂຕ່ງນໍ້າ, ປັບປຸງໂພຊະນາການຂອງປະຊາຊົນ, ປະກອບສ່ວນເຂົ້າໃນການບັນລຸເປົ້າໝາຍ ແລະ ນະໂຍບາຍຂອງລັດຖະບານໃນດ້ານການຮັບປະກັນຄວາມໝັ້ນຄົງດ້ານສະບຽງອາຫານ, ການຜະລິດເປັນສິນຄ້າ ຊຸກຍູ້ຂະຫຍາຍຕົວຂອງເສດຖະກິດ ແລະ ປົກປັກຮັກສາຊັບພະຍາກອນທຳມະຊາດຕາມທິດສິຂຽວ ແລະ ຍຶນຍົງ.

ບັນນາທິການກວດແກ້: ທ່ານ ນ ພວງວັນ ມີວົງສາ

ຂ່າວ-ພາບ: ຄຳພະແກ້ວ ອິນທະວົງ

ບໍ່ວ່າ ວຽກງານໃດໆ ກໍ່ຕາມຫາກຄອບຄົວມີຄວາມດຸໝັ່ນຂະຫັຍນພຽນ ໃນການເຮັດນາປູກເຂົ້າ, ປູກຝັງ ແລະ ລ້ຽງສັດ, ເປັນອາຊີບທີ່ໝັ້ນຄົງ, ຈະໜ້ອຍ ຫຼື ຫຼາຍກໍ່ຕາມ ແລະ ມີຫຼາຍຄອບຄົວທີ່ກາຍເປັນຄອບຄົວຕົວແບບ ທີ່ໄດ້ຮັບຜົນສຳເລັດໃນການສ້າງຄວາມເຂັ້ມແຂງໃຫ້ຄອບຄົວ ທາງດ້ານອາຊີບ ແລະ ຄວາມໝັ້ນຄົງທາງດ້ານລາຍໄດ້ ເພື່ອຕອບສະໜອງດ້ານສະບຽງອາຫານ, ໃຫ້ສັງຄົມທີ່ມີຄວາມຕ້ອງການຫຼາຍ, ຖືວ່າເປັນຊ່ອງທາງໜື່ງໃນການສ້າງລາຍໄດ້ເຂົ້າສູ່ຄອບຄົວ.  ແລະ ຫຼຸດພົ້ນອອກຈາກຄວາມທຸກຍາກ.

ທ່ານ  ນາງ ມາລີຊົງ ອາຍຸ 32 ປີ. ສະມາຊິກໃນຄອບຄົວມີ 6 ຄົນ, ຜົວ ແລະ ເມຍ, ລູກ 4 ຄົນເປັນເດັກ ປະຈຸບັນຢູ່ບ້ານ ລ້ອງງົວປ່າ, ເມືອງຊ່ອນ, ແຂວງຫົວພັນ. ອາຊີບຕົ້ນຕໍເຮັດນາປູກເຂົ້າ, ຜົນຜະລິດແຕ່ລະປີໄດ້ 1 ໂຕນ 500 ກິໂລ, ອາຊີບສຳຮອງຕົ້ນຕໍແມ່ນລ້ຽງສັດ ແລະ ຮັບຈ້າງທຳການຜະລິດ, ຄອບຄົວໄດ້ລິເລີ່ມການລ້ຽງງົວແຕ່ປີ 2013 ເປັນຕົ້ນມາ, ທຳອິດມີງົວ 5 ໂຕ, ຕໍ່ຈາກນັ້ນມາໄດ້ເຮັດໄຮ່ສາລີ ຂາຍໄດ້ເງີນ 10 ກ່ວາລ້ານ ທຳອິດຊື້ງົວແມ່ລູກດ້ວຍລາຄາ 3 ລ້ານ 5 ແສນກີບ, ຊື້ໄດ້ 3 ແມ່ລູກລວມເປັນເງີນ 10 ລ້ານຫ້າແສນກີບ. ຂາຍງົວຊຸດທຳອິດ 2 ໂຕ, ໄດ້ເງິນ 16 ລ້ານ, ລົງທືນຊື້ງົວຕື່ມ, ຊຸດທີ່ 2 ໄດ້ຂາຍງົວ 4 ໂຕ, ໄດ້ເງີນ 30 ກ່ວາລ້ານ, ຈາກນັ້ນມາຮອດປີ 2017 ໄດ້ຂາຍງົວປົກກະຕິ ແຕ່ລະປີແມ່ນ 10 ໂຕ, ມາຮອດປີ 2022 ມີງົວ 60-70 ໂຕ, ເນື້ອທີ່ປູກຫ້ຍາລ້ຽງງົວ 4 ເຮັກຕາ, ສ່ວນວິທີການລ້ຽງສັດພັກ-ລັດ ເຫັນຄວາມສຳຄັນໄດ້ສົ່ງເສີມໃຫ້ຂ້າພະເຈົ້າໄປຝຶກອົບຮົມດ້ານເຕັກນິກ ນຳຫ້ອງການກະສິກຳເມືອງ ແລະ ພະແນກກະສິກຳ ແລະ ປ່າໄມ້ແຂວງ, ໃນການຮັກສາສຸຂະພາບສັດ, ປະຈຸບັນມີເງິນໃນຄອບຄົວ 5 ຮ້ອຍກ່ວາລ້ານກີບ, ໄດ້ລົງທຶນຊື້ລົດຈົກ 1 ຄັນ, ລົດດ້າມ 1 ຄັນ, ລົດແທັກເຕີ້ 1 ຄັນ ແລະ ລົດຮອນໄດ 1 ຄັນ ລວມທັງໝົດ 4 ຄັນ. ຫຼັງຈາກລາຍຮັບຈາກການຂາຍງົວປີໜື່ງ 100 ກ່ວາລ້ານ, ຜູ້ເປັນຜົວຍັງໄປຮັບຈ້າງບຸກເບີກເນື້ອທີ່ນານຳອີກ. ທ່ານ ຕົ່ງໄມເລົ່າ ແນວໂຮມບ້ານ ລ້ອງົງວປ່າ, ໄດ້ຢັ້ງຢືນວ່າ: ຄອບຄົວ ທ່ານ ມາລີຊົງ ແຕ່ກ່ອນແມ່ນຄອບຄົວທຸກຍາກ ດ້ວຍຄວາມດຸໝັ່ນຂະຫັຍນພຽນ ປີ 2013 ໄດ້ລິເລີ່ມລ້ຽງງົວ, ມາຮອດປີ 2022 ໄດ້ຂາຍ 10 ກ່ວາໂຕ, ເປັນເງິນ 100 ກ່ວາລ້ານ ແລະ ຮັບຈ້າງດ້ວຍລົດຂອງຕົນເອງ 100 ກ່ວາລ້ານ, ເຮັດໃຫ້ຄອບຄົວມີລາຍຮັບ 200 ກ່ວາລ້ານຕໍ່ປີ. ນອກຈາກນີ້ແລ້ວຄອບຄົວຍັງໄດ້ເປັນສະມາຊິກປູກກາເຟ ມາແຕ່ ປີ 2017 ເປັນຕົ້ນມາ. ທ່ານ ເຈີທໍເລົ່າ ອາຍຸ 40 ປີ. ບ້ານ ລ້ອງງົວປ່າ, ເມືອງຊ່ອນ, ແຂວງຫົວພັນ, ປະຈຸບັນເປັນຫົວໜ້າກຸ່ມປູກກາເຟເລົ່າໃຫ້ຟັງວ່າ: ປູກກາເຟໃສ່ບ່ອນເປົ່າຫ່ວາງຕົ້ນໄມ້ໃຫ່ຍ, ມີເນື້ອທີ່ 12 ເຮັກຕາ, ມີຕົ້ນກາເຟ 36 ພັນຕົ້ນ, ໃນປີນີ້ເກັບກ່ຽວຜົນຜະລິດໝາກກາເຟໝາກຂາວໄດ້ 1 ພັນ 7 ຮ້ອຍ 6 ກິໂລກະລາມ, ລວມມູນຄ່າທັງໝົດ 7 ລ້ານກ່ວາກີບ. ຜົນຜະລິດປີຕໍ່ໄປອາດຈະໄດ້ຫຼາຍກ່ວານີ້, ປ່າສະຫງວນແຫ່ງຊາດນຳ້ແອດ-ພູເລີຍ, ເປັນຜູ້ໃຫ້ທຶນສະໜັບສະໜູນ. ໃຫ້ເກັບຜົນຜະລິດກາເຟ, ດ້ານເຕັກນິກ, ການຊີ້ນຳ ແລະ ບໍລິສັດເປັນຜູ້ຕອບສະໜອງແນວພັນ ແລະ ຮັບຊື້. ທັງໝົດນີ້ແມ່ນເພື່ອປົກປັກຮັກສາປ່າໄມ້ໃຫ້ມີລາຍຮັບມາຈາກປ່າດົງເປັນວຽກເສີມຂອງຄອບຄົວເຮັດໃຫ້ຄອບຄົວມີກິນມີຢູ່ສາມາດຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ຕອນທ້າຍເພີ່ນຍັງໄດ້ຄອບໃຈນຳພັກ-ລັດ ໂດຍສະເພາະແມ່ນຫ້ອງການທີ່ກ່ຽວຂ້ອງທີ່ ໄດ້ສຸກຍູ້ສົ່ງເສີມໃຫ້ຄອບຄົວຂ້າພະເຈົ້າເຮັດໃຫ້ຄອບຄົວມີອາຊີບທີ່ໝັ້ນຄົງ ແລະ ເປັນແບບຢ່າງໃຫ້ຄອບຄົວອື່ນໆ ພາຍໃນບ້ານ ແລະ ພາຍໃນເມືອງຂອງຕົນ.

ບັນນາທິການກວດແກ້: ນ. ພວງວັນ ມີວົງສາ

ພາບ-ບົດ: ທ. ຄຳພະແກ້ວ ອິນທະວົງ

ວັນທີ 7 ເມສາ 2022 ທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງ ໄດ້ຈັດກອງປະຊຸມເຊື່ອມຊືມເອກະສານສຳຄັນຕ່າງໆ ໂດຍເປັນປະທານ ທ່ານ ໄຈເພັດ ເຮືອງຖາວອນ ຮັກສາການ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີຫົວໜ້າ, ຮອງຂະແໜງການຕະຫຼອດຮອດພະນັກງານ, ລັດຖະກອນ, ພາຍໃນພະແນກເຂົ້າຮ່ວມຮັບຟັງ 77 ກ່ວາທ່ານ ຍິງ 25 ທ່ານ.

ຈຸດປະສົງຂອງກອງປະຊຸມເພື່ອຮັບຟັງການເຊື່ອມຊຶມ, ເອກະສານສຳຄັນຂອງພັກ-ລັດ, ໂດຍນຳເອົາເອກະສານຕ່າງໆມີຄື:

1. ຜ່ານແຈ້ງການຂອງທ່ານລັດຖະມົນຕີກະຊວງກະສິກຳ ແລະ ປ່າໄມ້ ສະບັບເລກທີ 015/ຄກມດ,ກປ, ລົງວັນທີ 10/11/2020
2. ແຈ້ງການ ສະບັບເລກທີ 782/ກປ, ລົງວັນທີ 18/3/2015 ເພື່ມທະວີຄວາມຮັບຜິດຊອບຕໍ່ວຽກງານ ສົ່ງເສີມຄວາມກ້າວໜ້າແມ່ຍິງ.
3. ຜ່ານດຳລັດຂອງປະທານປະເທດ ສະບັບເລກທີ 029/ປປທ, ລົງວັນທີ 9 ມັງກອນ 2020 ວ່າດ້ວຍຄວາມສະເໝີພາບຍິງ-ຊາຍ.
4. ຜ່ານຂໍ້ຕົກລົງຂອງລັດຖະມົນຕີກະຊວງກະສິກຳ ແລະ ປ່າໄມ້ ສະບັບເລກທີ 0049/ກປ, ລົງວັນທີ 11 ມັງກອນ 2017 ວ່າດ້ວຍການຮັບຮອງ ແລະ ປະກາດໃຊ້ຍຸດທະສາດເພື່ອຄວາມສະເໝີພາບບົດບາດຍິງ-ຊາຍ.
5. ຜ່ານກົດໝາຍຂອງສະພາແຫ່ງຊາດ ສະບັບເລກທີ 77/ສພຊ, ລົງວັນທີ 28 ພະຈິກ 2019 ວ່າດ້ວຍຄວາມສະເໝີພາບຍິງ-ຊາຍ.
6. ເອກະສານສ້າງຄອບຄົວ, ບ້ານ, ເມືອງ, ພັດທະນາທີ່ຕິດພັນກັບການປະຕິບັດ ສິດສະເໝີພາບຍິງ-ຊາຍ ແລະ ປະສະຈາກການໃຊ້ຄວາມຮຸນແຮງໃນຄອບຄົວ ໂດຍສະເພາະແມ່ນຕໍ່ແມ່ຍິງ ແລະ ເດັກນ້ອຍ.
7. ຜ່ານແຈ້ງການແນະນຳຂອງຄະນະໂຄສະນາອົບຮົມແຂວງ ສະບັບເລກທີ 121/ຄອຂຫພ, ລົງວັນທີ 23 ມີນາ 2022.
8. ຜ່ານ ວັນລະນຶກນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດຄົບຮອບ76 ປີ. (21/3/1946-21/3/2022).
9. ຜ່ານຄຳສັ່ງແນະນຳ ສະບັບເລກທີ 17/ຄປຈຂ.ຫພ, ລົງວັນທີ 28 ມີນາ 2022, ວ່າດ້ວຍການສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ 2022.
10. ຜ່ານແຈ້ງການຂອງຄະນະກວດກາພັກ ສະບັບເລກທີ 41/ຄກພຂ.ຫພ, ລົງວັນທີ 25 ກຸມພາ 2022 ກ່ຽວກັບການສະເຫຼີມສະຫຼອງ ແລະ ປາຖະກະຖາມູນເຊື້ອວັນສ້າງອົງການກວດກາພັກ-ລັດ ຄົບຮອບ 40 ປີ. (16/2/1982-16/2/2022).
11. ຜ່ານຂໍ້ຕົກລົງຂອງລັດຖະມົນຕີກະຊວງກະສິກຳ ແລະ ປ່າໄມ້ ສະບັບເລກທີ 0956/ກປ, ລົງວັນທີ 28 ມີນາ 2022 ວ່າດ້ວຍການຈັດຕັ້ງ ແລະ ເຄື່ອນໄຫວຂອງຫ້ອງການກະສິກຳ ແລະ ປ່າໄມ້ເມືອງ, ນະຄອນຫຼວງ.

ນອກຈາກນີ້ຍັງໄດ້ຮັບຟັງການສະຫຼຸບຕີລາຄາການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າແມ່ຍິງ, ແມ່ ແລະ ເດັກ ໃນ 1 ປີຜ່ານມາ ແລະ ວາງທິດທາງແຜນການໃນປີຕໍ່ໄປ, ກົນໄກການຈັດຕັ້ງປະຕິບັດດ້ານບົດບາດຍິງ-ຊາຍ ຂອງຂະແໜງກະສິກຳ,ປ່າໄມ້ ແລະ ພັດທະນາຊົນນະບົດ.

• ຕອນທ້າຍກອງປະຊຸມ ທ່ານ ໄຈເພັດ ເຮືອງຖາວອນ ຍັງໃຫ້ຄຳຄິດ, ຄຳເຫັນຕໍ່ກອງປະຊຸມ, ໃຫ້ພະນັກງານລັດຖະກອນພາຍໃນພະແນກກະສິກຳ ແລະ ປ່າໄມ້,ຈົ່ງຈັດຕັ້ງປະຕິບັດ, ມະຕິ, ຄຳສັ່ງຕ່າງໆໃຫ້ເຂັ້ມງວດ ແລະ ເປັນແບບຢ່າງໃນການພັດທະນາເສດຖະກິດ – ສັງຄົມ ໃຫ້ປະກົດຜົນເປັນຈິງ, ໂດຍສະເພາະເພີ່ນໄດ້ເນັ້ນບາງບັນຫາດັ່ງນີ້:

1. ສະເໜີໃຫ້ບັນດາຂະແໜງການ, ສູນບໍລິການເຕັກນິກຕະຫຼອດຮອດຫ້ອງການກະສິກຳ ແລະ ປ່າໄມ້ເມືອງ 10 ເມືອງ, ເບີ່ງຄືນວ່າ: ກົງຈັກການຈັດຕັ້ງບໍ່ທັນສອດຄ່ອງ ໄປຄູ່ຂະໜານກັບກົງຈັກລວມ ສະເໜີໃຫ້ມີການປັບປຸງຄືນໃໝ່.
2. ສະເໜີໃຫ້ຜູ້ຊີ້ນຳວຽກງານສົ່ງເສີມຄວາມກ້າວໜ້າແມ່ຍິງ, ແມ່-ເດັກ, ຂັ້ນພະແນກລົງຮອດເມືອງສ້າງເງື່ອນໄຂໃຫ້ວິຊາການເພດຍິງ, ໃຫ້ເຂົ້າຮ່ວມກິດຈະກຳຕ່າງໆ ໃຫ້ຫຼາຍຂື້ນ.
3. ໃຫ້ຂະແໜງການເບີ່ງຄືນດ້ານງົບປະມານສະໜັບສະໜູນ, ການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າແມ່ຍິງ, ແມ່-ເດັກ. ໂດຍສະເພາະບັນດາກິດຈະກຳຂອງໂຄງການໃຫ້ແມ່ຍິງມີສ່ວນຮ່ວມ.
4. ສະເໜີໃຫ້ເອື້ອຍນ້ອງແມ່ຍິງ ສືບຕໍ່ຝຶກຝົນຫຼໍ່ລ້ອມຕົນເອງ, ຄຽງບ່າຄຽງໄຫຼ່ກັບເພດຊາຍໃຫ້ກາຍເປັນພະນັກງານຫຼັກແຫຼ່ງນຳພາໃນຂັ້ນຕໍ່ໄປ.
5. ສືບຕໍ່ສ້າງຕົວແບບໃນການຜະລິດກະສິກຳເປັນຕົ້ນປູກຝັງ, ລ້ຽງສັດ ແລະ ອື່ນໆໃຫ້ຫຼາຍຂື້ນເປັນຕົ້ນແມ່ນຢູ່ຮາກຖານທ້ອງຖິ່ນ.

ບັນນາທິການ: ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ ນັກຂ່າວພະແນກກະສິກຳ ແລະ ປ່າໄມ້ແຂວງຫົວພັນ

ວັນທີ 21 ມີນາ 2022 ພະແນກກະສິກຳ ແລະ ປ່າໄມ້, ໄດ້ຈັດກອງປະຊຸມ ປຶກສາຫາລືແລກປ່ຽນຄຳຄິດ-ຄຳເຫັນ, ສານຕໍ່ສາຍພົວພັນລະຫ່ວາງການຮ່ວມມື ລາວ-ຫວຽດນາມ, ຫວຽດນາມ-ລາວ, ຂື້ນທີ່ຫ້ອງປະຊຸມຫໍແກ້ວ ຊັ້ນ 2 ຫ້ອງວ່າການແຂວງຫົວພັນ, ໂດຍເປັນກຽດເຂົ້າຮ່ວມຝ່າຍລາວ ທ່ານ ບຸນຄຳ ສີດາວົງ ຫົວໜ້າກົມຊົນລະປະທານ ພ້ອມດ້ວຍການນຳກົມທີ່ກ່ຽວຂ້ອງ ກະຊວງກະສິກຳ ແລະ ປ່າໄມ້, ຝ່າຍຫວຽດນາມ ທ່ານ ຟ້າມ ດິງວັນ ຫົວໜ້າຄະນະຄຸ້ມຄອງຊົນລະປະທານ ຂັ້ນສູນກາງ ພ້ອມດ້ວຍການນຳກົມທີ່ກ່ຽວຂອງ ກະຊວງກະສິກຳ ແລະ ພັດທະນາຊົນນະບົດ ສສ ຫວຽດນາມ, ທ່ານການນຳພະແນກທີ່ກ່ຽວຂ້ອງຂອງແຂວງ ເຂົ້າຮ່ວມທັງໝົດ 19 ທ່ານ.

ຈຸດປະສົງ: ໃນນາມຕາງໜ້າໃຫ້ແຂວງຫົວພັນ ກໍ່ຄືພະແນກກະສິກຳ ແລະ ປ່າໄມ້, ຂໍສານຕໍ່ ສາຍພົວພັນ ລະຫ່ວາງການຮ່ວມມື ລາວ-ຫວຽດນາມ, ຫວຽດນາມ-ລາວ. ທີ່ພວກເຮົາມີມາແຕ່ດົນນານ, ເພື່ອສຶບຕໍ່ການຊ່ວຍເຫຼືອລ້າ ໂຄງການຊົນລະປະທານໃນຕໍ່ໜ້າ ຂໍສະເໜີ ທ່ານພິຈາລະນາ ນຳເອົາບາງໂຄງການເຂົ້າແຜນ ເພື່ອກໍ່ສ້າງຊ່ວຍແຂວງຫົວພັນ. ແຕ່ນີ້ເຖິງປີ 2025

1. ຊ່ວຍທຶນຝຶກອົບຮົມໃຫ້ແກ່ກຸ່ມຜູ້ຊົມໃຊ້ນ້ຳໃນໂຄງການຊົນລະປະທານນ້ຳລ້ອງ ແລະ ກຸ່ມຜະລິດກະສິກຳ ກາຍເປັນສິນຄ້າ ລວມເຖິງທຶນໄປແລກປ່ຽນບົດຮຽນນຳ ສສ ຫວຽດນາມ ທີ່ມີຜົນສຳເລັດແລ້ວ ເພື່ອຮຽນຮູ້ທັກສະດ້ານຕ່າງໆ ມາໝູນໃຊ້ເຂົ້າໃນໂຄງການນ້ຳລ້ອງໃຫ້ເກີດປະໂຫຍດສູງສຸດ.
2. ຄົ້ນຄ້ວາພິຈະລະນາໂຄງການຊົນລະປະທານນ້ຳຮາງ ເມືອງຮ້ຽມແຂວງຫົວພັນ. ພວກເຮົາບັນຈຸເຂົ້າແຜນກໍ່ສ້າງ ຮ່ວມມື ລາວ-ຫວຽດນາມ, ຫວຽດນາມ-ລາວ ສົກປີ 2022-2025.

ໃນນີ້ຝ່າຍລາວ ຂໍນຳສະເໜີທ່ານຊ່ວຍພິຈາລະນາ ນຳເອົາໂຄງການເຫຼົ່ານີ້ ສະເໜີເຂົ້າແຜນກໍ່ສ້າງຟື້ນຟູ-ສ້ອມແປງເພື່ມອີກເຊັ່ນ:

1. ໂຄງການຊົນລະປະທານນ້ຳຫ້ວຍລາ ບ້ານນາໄກ່, ເມືອງແອດ, ເປັນການກໍ່ສ້າງໃໝ່
2. ຟື້ນຟູ-ສ້ອມແປງ ໂຄງການຊົນລະປະທານເໝືອງມິດຕະພາບ ລາວ-ຫວຽດນາມ, ຫວຽດນາມ-ລາວ, ບ້ານດ່ານ ຊຽງເຂືອງ, ເມືອງແອດ.
3. ຟື້ນຟູ-ສ້ອມແປງ ໂຄງການຊົນລະປະທານນ້ຳຮາວ ບ້ານນາຊາງ, ເມືອງສົບເບົາ.
4. ຟື້ນຟູ-ສ້ອມແປງ ໂຄງການຊົນລະປະທານ ນ້ຳສິມ ບ້ານຊຽງລວງ.

ຝ່າຍຫວຽດນາມໄດ້ສະເໜີໃຫ້ຝ່າຍລາວ ນຳເອົາໂຄງການຊົນລະປະທານດັ່ງກ່າວ ສະເໜີເຂົ້າແຜນປີ 2022 ເພື່ອໃຫ້ຝ່າຍຫວຽດນາມຄົ້ນຄ້ວາພິຈາລະນາຊ່ວຍເຫຼືອໂຄງການດັ່ງກ່າວໃນຂັ້ນຕໍ່ໄປ.

ບັນນາທິການ ນ. ພວງວັນມີວົງສາ

ພາບ-ຂ່າວ: ຄຳພະແກ້ວ ອິນທະວົງ ນັກຂ່າວ ກປຂ

ວັນທີ 19 ມີນາ 2022 ພະແນກກະສິກຳ ແລະ ປ່າໄມ້ແຂວງ ໄດ້ຈັດພິທີມອບ – ຮັບ ໂຄງການກໍ່ສ້າງຟື້ນຟູ ແລະ ສ້ອມແປງຊົນລະປະທານ ນຳ້ລ້ອງ, ບ້ານກ້ອງຄູນ, ເມືອງສົບເບົາ, ພິທີດັ່ງກ່າວໄດ້ຈັດຂື້ນທີ່ຫ້ອງປະຊຸມຫ້ອງວ່າການ ເມືອງສົບເບົາ, ໃຫ້ກຽດເຂົ້າຮ່ວມ ທ່ານ ພອນສຸກ ອິນທະວົງ ຄະນະປະຈຳພັກແຂວງ, ຮອງເຈົ້າແຂວງ, ທ່ານ ບຸນຄຳ ສີດາວົງ ຫົວໜ້າກົມຊົນລະປະທານ ກະຊວງກະສິກຳ ແລະ ປ່າໄມ້, ທ່ານ ຟ້າມ ດິງວັນ ຫົວໜ້າຄະນະຄຸ້ມຄອງຊົນລະປະທານຂັ້ນສູນກາງພ້ອມດ້ວຍກົມກ່ຽວຂ້ອງ ກະຊວງກະສິກຳ ແລະ ພັດທະນາຊົນນະບົດ ສສ ຫວຽດນາມ. ທ່ານ ຫົວໜ້າພະແນກກະສິກຳ ແລະ ປ່າໄມ້ ແລະ ຫົວໜ້າພະແນກການທີ່ກ່ຽວຂ້ອງຂັ້ນແຂວງ, ມີທ່ານ ເຈົ້າເມືອງ 2 ເມືອງ, ເມືອງສົບເບົາ, ເມືອງຊຽງຄໍ້  ແລະ ຂະແໜງການທີ່ກ່ຽວຂ້ອງຂັ້ນແຂວງ, ຂັ້ນເມືອງ, ອຳນາດການປົກຄອງບ້ານ 8 ບ້ານທີ່ໄດ້ຊົມໃຊ້ນ້ຳຊົນລະປະທານ ແລະ ບໍລິສັດຮ່ວມມືເສດຖະກິດຈຳກັດຜູ້ດຽວ ແລະ ບໍລິສັດຫຸ້ນສ່ວນສະຖາປັດກໍ່ສ້າງ-ການຄ້າ 36 ຈຳກັດມະຫາຊົນ ເປັນຜູ້ຮັບເໝົາກໍ່ສ້າງ ເຂົ້າຮ່ວມ 60 ກ່ວາທ່ານ.

ໂຄງການຟື້ນຟູ – ສ້ອມແປງລະບົບຊົນລະປະທານນ້ຳລ້ອງ ຕັ້ງຢູ່ບ້ານ ກ້ອງຄູນ, ເມືອງສົບເບົາ, ໂຄງການດັ່ງກ່າວເປັນຝາຍນ້ຳລົ້ນ ມີຄວາມກ້ວາງ 87 ແມັດ, ຍາວ 40 ແມັດ, ສູງ 5 ແມັດ ແລະ ຄອງເໝືອງຍາວທັງໝົດ  18 ກິໂລແມັດ, ເປັນຄອງເໝືອງຫີນກໍ່ປະທາຍໂບກດ້ານໃນ, ສາມາດຫົດເນື້ອທີ່ນາ 2 ລະດູການ ນາແຊງ ແລະ ນາປີ, ນາທີ່ມີແລ້ວ ແລະ ນາຕີ່ໃໝ່ 220 ກ່ວາເຮັກຕາ, ປະຊາຊົນທີ່ໄດ້ຮັບຜົນປະໂຫຍດມີ 8 ບ້ານ. ກິດຈະກຳຂອງໂຄງການທີ່ກໍ່ສ້າງສຳເລັດລວມມີ: ສ້ອມແປງລະບົບຫົວງານ, ຍົກລະດັບຄອງເໝືອງແມ່ ແລະ ບັນດາອາຄານຕາມຄອງເໝືອງ, ສ້ອມແປງຄອງເໝືອງແມ່, ກໍ່ສ້າງໃໝ່ຄອງເໝືອງຊອຍ ແລະ ທໍ່ຊີຟົງ, ກໍ່ສ້າງເຮືອນນຳໃຊ້ນ້ຳຊົນລະປະທານ 1 ຫຼັງ. ລວມມູນຄ່າການກໍ່ສ້າງທັງໝົດ 35 ຕື້ 4 ຮ້ອຍກ່ວາລ້ານດົງ (ສະກຸນເງິນຫວຽດນາມ) ໂຄງການດັ່ງກ່າວໄດ້ສຳເລັດ 100% ວັນທີ 19 ມີນາ 2022 ພະແນກກະສິກຳ ແລະ ປ່າໄມ້, ຕາງໜ້າໃຫ້ກະຊວງກະສິກຳ ແລະ ປ່າໄມ້ໃນນາມເຈົ້າຂອງໂຄງການ ຈັດພິທີມອບ-ຮັບ ຄະນະຈັດຕັ້ງພິທີ ຜ່ານຂໍ້ຕົກລົງຂອງທ່ານລັດຖະມົນຕີຂອງກະຊວງກະສິກຳ ແລະ ປ່າໄມ້, ຈາກນັ້ນ ຜູ້ຕາງໜ້າກະຊວງກະສິກຳ ແລະ ພັດທະນາຊົນນະບົດ ສສ ຫວຽດນາມ ຂື້ນກ່າວມອບໂຄງການ ທ່ານ ຟ້າມ ດິງວັນ ຫົວໜ້າຄະນະຄຸ້ມຄອງຂັ້ນສູນກາງ ສສ ຫວຽດນາມ ແລະ ກ່າວຮັບ, ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ ແລະ ມອບຕໍ່ໃຫ້ການນຳເມືອງເປັນຜູ້ຄຸ້ມຄອງນຳໃຊ້ ແລະ  ໄດ້ມີພິທີເຊັນບົດບັນທຶກມອບ – ຮັບໂຄງການຢ່າງເປັນທາງການ, ໂດຍ: ທ່ານ ການນຳແຂວງ, ການນຳເມືອງ ແລະ ອຳນາດການປົກຄອງບ້ານເຂົ້າຮ່ວມເປັນສັກຂິພິຍານນຳ.

.ຕອນທ້າຍພິທີ ທ່ານ ພອນສຸກ ອິນທະວົງ ຄະນະປະຈຳພັກແຂວງ ຮອງເຈົ້າແຂວງໆຫົວພັນ, ກ່າວວ່າ: ໃນໄລຍະຜ່ານມາລັດຖະບານຫວຽດນາມ ຍາມໃດກໍ່ໄດ້ເອົາໃຈໃສ່ ແລະ ໃຫ້ການຊ່ວຍເຫຼືອ ລັດຖະບານລາວກໍ່ຄືແຂວງຫົວພັນ, ເຊີ່ງເປັນການສະແດງໃຫ້ເຫັນເຖິງສາຍພົວພັນມິດຕະພາບທີ່ເປັນມູນເຊື້ອອັ່ນດີງາມ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫ່ວາງລາວ-ຫວຽດນາມ. ໂຄງການດັ່ງກ່າວເປັນໂຄງການໜື່ງທີ່ມີຄວາມສຳຄັນໃນການກໍ່ສ້າງພື້ນຖານໂຄງລ່າງທາງດ້ານກະສິກຳ ເພື່ອຕອບສະໜອງໃຫ້ແກ່ການປູກ-ການລ້ຽງ. ຂອງປະຊາຊົນເຂດນ້ຳລ້ອງຈຳນວນ 8 ບ້ານ, ເມືອງສົບເບົາ ແລະ ເປັນໜື່ງໃນເຂດຈຸດສູມພັດທະນາຍຸດທະສາດກະສິກຳ ແລະ ປ່າໄມ້, ທີ່ຈະສ້າງເປັນໂຄງການຊົນລະກະເສດໃນອະນາຄົດ, ໂຄງການດັ່ງກ່າວໂດຍໄດ້ຮັບທຶນຊ່ວຍເຫຼືອລ້າ ຈາກລັດຖະບານຫວຽດນາມ, ໂຄງການແຫ່ງນີ້ຈະກາຍເປັນໂຄງການຊົນລະປະທານທີ່ສົມບຸນແບບ, ມີພື້ນຖານໂຄງລ່າງແໜ້ນໜາ ໄດ້ກາຍເປັນສົມບັດອັ່ນລ້ຳຄ່າ ແລະ ຈະນຳໃຊ້ຊົນລະປະທານແຫ່ງນີ້ໃຫ້ເກີດປະໂຫຍດສູງສຸດ.

ບັນນາທິການກວດແກ້: ນ. ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ ນັກຂ່າວພະແນກກະສິກຳ ແລະ ປ່າໄມ້ແຂວງຫົວພັນ.

ຕອນແລງວັນທີ 4 ມີນາ 2022 ນີ້ ພະແນກກະສິກຳ ແລະ ປ່າໄມ້ແຂວງ ຈັດພິທີ ປະກາດການ ການຈັດຕັ້ງ  ຂຶ້ນທີ່ຫ້ອງປະຊຸມພະແນກກະສິກຳ ແລະ ປ່າໄມ້ ແຂວງ ໂດຍ ການເປັນປະທານ ຂອງທ່ານ ຮິນທອງ  ດວງ ຈັນສຸກ ຄະນະ ປະຈຳພັກແຂວງ   ປະທານກວດກາ ພັກ – ລັດແຂວງ, ບັນດາທ່ານຈາກພາກສ່ວນກ່ຽວຂ້ອງຂອງແຂວງ, ມີການນຳພະແນກ, ຂະແໜງການທີ່ຂຶ້ນກັບພະແນກ  ບັນດາທ່ານ ການນຳ ຫ້ອງການກະສິກຳ ແລະ ປ່າໄມ້ ເມືອງ ຕະຫຼອດຮອດພະນັກງານລັດຖະກອນພາຍໃນພະແນກເຂົ້າຮ່ວມທັງໝົດ 100 ກວ່າທ່ານ.

       ໃນກອງປະຊຸມຜູ້ຕາງໜ້າຄະນະຈັດຕັ້ງແຂວງໄດ້ຜ່ານ ຂໍ້ຕົກລົງ ຂອງທ່ານເຈົ້າແຂວງ ສະບັບເລກ ເລກທີ 177/ ຈຂ ຫພ   ລົງວັນທີ 21 ກຸມພາ 2022 ວ່າດ້ວຍການແຕ່ງຕັ້ງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ໂດຍແຕ່ງຕັ້ງ ທ່ານພວງສະຫວັດ ພົມມາສີ ຫົວໜ້າຂະແໜງ ລ້ຽງສັດ ແລະ ການປະມົງ ເປັນຮອງຫົວໜ້າພະແນກກະສິກຳ ແລະ ປ່າໄມ້ແຂວງ.     ແລະ ຂໍ້ຕົກລົງສະບັບເລກ ທີ 176/ ຈຂ ລົງວັນທີ 21 ກຸມພາ 2022 ວ່າດ້ວຍການແຕ່ງຕັ້ງຫົວໜ້າຂະແໜງ, ຮອງຫົວໜ້າຂະແໜງ, ຮອງຫົວໜ້າສູນສົ່ງເສີມເຕັກນິກກະສິກຳ ສົບຮາວ ທີ່ຂຶ້ນກັບພະແນກກະສິກຳ ແລະ ປ່າໄມ້ຄື: ແຕ່ງຕັ້ງ ທ່ານ ພອນສະຫວັນ  ບຸນທະວົງ ຮອງຫົວໜ້າຂະແໜງຄຸ້ມຄອງ ແລະ ພັດທະນາທີ່ດິນກະສິກຳ ເປັນຫົວໜ້າ ຫ້ອງການບໍລິຫານ ແລະ ຈັດຕັ້ງ, ແຕ່ງຕັ້ງທ່ານ ສຸນີຄຳ ພົມມາສີ ຮອງຫົວໜ້າ ຫ້ອງການບໍລິຫານ ແລະ ຈັດຕັ້ງ ເປັນຫົວໜ້າຂະແໜງ ລ້ຽງສັດ ແລະ ການປະມົງ, ແຕ່ງຕັ້ງ ທ່ານ ສຸລິນພອນ ໄຊສິງຫານ ວິຊາການຂະແໜງແຜນການ ແລະ ການເງິນ ເປັນຮອງຫົວໜ້າຂະແໜງ ແຜນການ ແລະ ການເງິນ, ທ່ານ ບຸນຍອດ ສີບຸນຫວັງ ວິຊາການຂະແໜງຊົນລະປະທານ ເປັນຮອງຫົວໜ້າຂະແໜງຊົນລະປະທານ, ທ່ານ ນາງຈຽງຄຳ ອ້ວນຄຳມີໄຊ ວິຊາການຂະແໜງພັດທະນາຊົນນະບົດ ແລະ ສະຫະກອນ ເປັນຮອງຫົວໜ້າຂະແໜງພັດທະນາຊົນນະບົດ ແລະ ສະຫະກອນ, ທ່ານຫຸມພັນ ພິມປັນຍາ ວິຊາການກອງກວດກາປ່າໄມ້ ເປັນຮອງຫົວໜ້າກອງກວດກາປ່າໄມ້, ທ່ານບຸນມີ ແກ້ວບົວລະພາ  ວິຊາການຂະແໜງລ້ຽງສັດ ແລະ ການປະມົງ ເປັນຮອງຫົວໜ້າສູນສົ່ງເສີມເຕັກນິກກະສິກຳແລະ ປ່າໄມ້ສົບຮາວ ຂຶ້ນກັບພະແນກກະສິກຳ ແລະ ປ່າໄມ້ແຂວງ, ຂໍ້ຕົກລົງສະບັບເລກທີ 1540/ຈຂ ລົງວັນທີ 29 ພະຈິກ 2021 ວ່າດ້ວຍການແຕ່ງຕັ້ງຮອງຫົວໜ້າຂະແໜງກວດກາລັດ ໂດຍແຕ່ງຕັ້ງທ່ານ ສາຍແກ້ວ ຈັນທະລັງສີ ຫົວໜ້າຂະແໜງຊັບສິນທາງປັນຍາ, ມາດຕະການ ແລະ ວັດແທກ ພະແນກວິທະຍາສາດ ແລະ ເຕັກໂນໂລຊີ ເປັນຮອງຫົວໜ້າຂະແໜງກວດກາລັດ ພະແນກກະສິກຳ ແລະ ປ່າໄມ້  .

       ຕອນທ້າຍພິທີ ທ່ານຮິນທອງ ດວງຈັນສຸກ  ປະທານກອງປະຊຸມ ມີຄຳເຫັນໂອ້ລົມ ພະນັກງານ ລັດຖະກອນຫຼາຍບັນຫາ ເປັນຕົ້ນແມ່ນ ໃຫ້ເຂົ້າໃຈວ່າ ການປັບປຸງສັບຊ້ອນການຈັດຕັ້ງ ຖືເປັນວຽກປົກກະຕິຂອງການຈັດຕັ້ງ ໂດຍປະຕິບັດຕາມຫຼັກການລວມສູນປະຊາທິປະໄຕ, ເຮັດຕາມຂັ້ນຕອນ ແລະ ລະບຽບການ; ເພື່ອຜັນຂະຫຍາຍ 2 ວາລະແຫ່ງຊາດ ໃຫ້ຄະນະພັກເອົາໃຈໃສ່ ສຶກສາອົບຮົມການເມືອງແນວຄິດ, ປັບປຸງແບບແຜນວິທີການເຮັດວຽກ, ເຮັດວຽກເປັນໝູ່ຄະນະ, ເປັນແບບຢ່າງໃຫ້ມະຫາຊົນ, ເຮັດວຽກງານໃຫ້ຖືກຕ້ອງລະບຽບຫຼັກການ,   ຖືກຕ້ອງຕາມເຕັກນິກວິຊາການ,  ການສັບຊ້ອນພະນັກງານໃຫ້ເໝາະສົມກັບຕຳແໜ່ງງານ ແລະ ຖືກຕ້ອງຕາມວິຊາສະເພາະທີ່ຕົນເອງໄດ້ຮຽນມາ, ເຮັດວຽກງານໃຫ້ສອດຄ່ອງ ແລະ ມີຄວາມສຳເລັດຕາມແຜນການທີ່ວາງໄວ້ ແລະ ສົ່ງເສີມການປູກ – ການລ້ຽງ  ຜະລິດຫຼາຍໃຫ້ກາຍເປັນສິນຄ້າ  ຜະລິດເປັນຈຸດສຸມ ແນໃສ່ຕອບສະໜອງໃຫ້ພຽງພໍກັບຄວາມຮຽກຮ້ອງຕ້ອງການຂອງທ້ອງຕະຫຼາດ ເພື່ອເປັນການສ້າງລາຍຮັບໃຫ້ປະຊາຊົນ ໃຫ້ຫຼຸດພົ້ນອອກຈາກ ຄວາມທຸກຍາກເທື່ອລະກ້າວ. 

ວັນທີ 28 ກຸມພາ 2022 ພະແນກກະສິກຳ ແລະ ປ່າໄມ້ແຂວງ, ຈັດກອງປະຊຸມປຶກສາຫາລືກ່ຽວກັບການປັບປຸງກົງຈັກການຈັດຕັ້ງ ແລະ ລະດົມແນວຄວາມຄິດໃນການແກ້ໄຂວາລະແຫ່ງຊາດ ໂດຍການເປັນປະທານຂອງທ່ານ ໄຈເພັດ ເຮືອງຖາວອນ ຮັກສາການ ຫົວໜ້າພະແນກກະສິກຳ ແລະ ປ່າໄມ້ແຂວງ ມີບັນດາທ່ານ ຫົວໜ້າຂະແໜງການ, ຮອງຂະແໜງການ, ຫົວໜ້າສູນເຕັກນິກກະສິກຳ, ຮອງສູນ ແລະ ກອງກວດກາເຂົ້າຮ່ວມ 27 ທ່ານ, ຍິງ 3 ທ່ານ.

ຈຸດປະສົງກອງປະຊຸມ ໄດ້ຜ່ານຄຳສັ່ງແນະນຳຂອງກະຊວງກະສິກຳ ແລະ ປ່າໄມ້ ສະບັບເລກທີ 215 ແລະ ຜ່ານແຜນການແກ້ໄຂວາລະແຫ່ງຊາດ ໃນຂົງເຂດວຽກງານກະສິກຳ ແລະ ປ່າໄມ້, ຈາກນັ້ນຜູ້ເຂົ້າຮ່ວມປະກອບຄຳຄິດ ຄຳເຫັນຢ່າງກົງໄປ, ກົງມາ ແລະ ເປັນເອກະພາບຕໍ່ການປັບປຸງກົງຈັກການຈັດຕັ້ງ ແລະ ປະກອບຄຳເຫັນຕໍ່ແຜນການແກ້ໄຂວາລະແຫ່ງຊາດ.

ກອງປະຊຸມດັ່ງກ່າວຍັງໄດ້ຮັບຟັງແນວຄວາມຄິດຂອງທ່ານ ໃຈເພັດ ເຮືອງຖາວອນ ເພີ່ນໄດ້ຊີ້ນຳວ່າ:

1. ຄະນະພັກ, ຄະນະພະແນກ ແລະ ຂະແໜງວິຊາການກະສິກຳ ລົງສົມທົບກັບເມືອງ 10 ເມືອງ, ກວດກາປະເມີນຄືນ ໃນດ້ານການປູກ, ການລ້ຽງ ໃນໄລຍະທີ່ຜ່ານມາ ໂດຍທຽບໃສ່ແຜນຍຸດທະສາດ ແຜນປີຂອງເມືອງ, ຜົນໄດ້ຮັບມີຫັຍງແດ່, ຂໍ້ສະດວກ, ຫຍຸ້ງຍາກ ແລະ ທິດທາງແກ້ໄຂໃນຕໍ່ໜ້າຈະເຮັດແນວໃດ,
2. ກວດກາຄືນບັນດາສຸນເຕັກນິກກະສິກຳ, ຄວາມຕ້ອງການດ້ານຕ່າງໆມີຫັຍງແດ່
3. ກວດກາພື້ນທີ່ຍັງຫ່ວາງທີ່ສາມາດຜະລິດກະສິກຳ, ການປູກການລ້ຽງ ໃນປະຈຸບັນມີຈັກເຮັກຕາ, ເພື່ອຈັດສັນພື້ນທີ່ໃຫ້ນັກທຸລະກິດທັງພາຍໃນ ແລະ ຕ່າງປະເທດເຂົ້າມາລົງທຶນໃນເຂດດັ່ງກ່າວ.
4. ລະດົມແນວຄວາມຄິດເພື່ອເປັນເອກະພາບ ແລະ ໃຫ້ກຳນົດເອົາການຜະລິດ 1 ເມືອງ 3 ຜະລິດຕະພັນ,
5. ລະບົບຊົນລະປະທານພື້ນທີ່ກະສິກຳ ແຕ່ລະໂຄງການສາມາດສະໜອງນ້ຳສະດວກບໍ ຫຼື ບໍສະດວກ, ເພື່ອສະໜອງນ້ຳໃນລະດູແລ້ງ ແລະ ລະດູຝົນ.
6. ສ້າງແຜນພັບດ້ານເຕັກນິກວິທະຍາສາດ, ວິທີປູກ ແລະ ວິທີລ້ຽງ, ການປົກປັກຮັກສາທົດລອງອື່ນໆ ຕາມຄວາມສາມາດ.
7. ລະດົມແນວຄວາມຄິດນັກລົງທຶນຈາກການເກັບເຄື່ອງປ່າຂອງດົງ, ຫັນເຂົ້າສູ່ສົ່ງເສີມການປູກ, ການລ້ຽງ.
8. ການອອກສຳມະໂນໃບຢັ້ງຢືນທີ່ດິນກະສິກຳ, ການຫັນປ່ຽນທີ່ດິນກະສິກຳ ເປັນດິນອຸດສາຫະກຳ.
9. ແຕ່ງຕັ້ງພະນັກງານວິຊາການທີ່ປະສົບການດ້ານການປູກ, ການລ້ຽງການສົ່ງເສີມກະສິກຳລົງສູ່ຮາກຖານ,
10. ແຕ່ງຕັ້ງຫົວໜ້າຄະນະຄົ້ນຄ້ວາວິທະຍາສາດ ແລະ ເຕັກນິກກະສິກຳ ຂອງພະແນກກະສິກຳ ແລະ ປ່າໄມ້. ເພື່ອໃຫ້ວຽກງານກະສິກຳມີການຂະຫຍາຍຕົວເທື່ອລະກ້າວ.

ບັນນາທິການກວດແກ້: ນ ພວງວັນມີວົງສາ

ພາບ-ຂ່າວ: ຄຳພະແກ້ວ ອິນທະວົງ