ພະແນກກະສິກຳ ແລະ ປ່າໄມ້ແຂວງຫົວພັນ ສົມທົບກັບ ຫ້ອງການກະສິກຳ ແລະ ປ່າໄມ້ເມືອງຮ້ຽມ ແລະ ກຸ່ມປູກຜັກປອດສານພິດບ້ານນາວຽງ ເມືອງຮ້ຽມຮ່ວມກັນຈັດພິທີເປີດຕະຫຼາດຈໍາໜ່າຍພືດຜັກຢ່າງເປັນທາງການໃນວັນທີ 25 ຕຸລາ 2017 ທີ່ຕະຫຼາດເທດສະບານເມືອງຊໍາເໜືອ ໂດຍໃຫ້ກຽດເຂົ້າຮ່ວມເປັນປະທານເປີດຂອງທ່ານ ຄິ່ນ ທຸມມາລາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີການນຳພະແນກການກ່ຽວຂ້ອງຂັ້ນແຂວງ, ເມືອງຮ້ຽມ, ເມືອງຊໍາເໜືອ ແລະ ພາກສ່ວນກ່ຽວຂ້ອງເຂົ້າຮ່ວມໃນພິທີດັ່ງກ່າວຢ່າວພ້ອມພຽງ

ໃນວັນທີ 28 ເມສາ 2016 ຜ່ານມາ ທ່ານ ຄີນ ທຸມມາລາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ ພ້ອມດ້ວຍຫົວໜ້າຂະແໜງການທີ່ກ່ຽວຂ້ອງຂັ້ນແຂວງ-ຂັ້ນເມືອງ ແລະ ວິຊາການ ພ້ອມດ້ວຍອຳນາດການປົກຄອງ ພໍ່ແມ່ປະຊາຊົນໄດ້ເຂົ້າຮ່ວມໃນການປູກກ້ວຍທະນີອອງ (ກ້ວຍນ້ຳ ) ພື້ນເມືອງຢູ່ບ້ານບວມໂພ ກຸ່ມບ້ານລ້ອງຫອຍ ເມືອງແອດ ແຂວງຫົວພັນ ເຊິ່ງມີຈຳນວນ 24 ຄອບຄົວ ໃນເນື້ອທີ່ທັງໝົດ 5,3 ເຮັກຕາ ດ້ວຍການປູກເຫງົ້າ ແລະ ຕົ້ນ ຈໍານວນ 2.100 ຕົ້ນ ໂຄງການນີ້ ແມ່ນໄດ້ຮັບການສະໜັບສະໜູນຈາກໂຄງການພັດທະນາລະບົບນິເວດຊີວະນາໆພັນກະສິກຳຢູ່ເຂດພູດອຍ ຈາກປະເທດສະວິດ.
ຈຸດປະສົງຂອງການດໍາເນີນໂຄງການ ແມ່ນເພື່ອເປັນການອະນຸຮັກ ແລະ ສົ່ງເສີມການປູກກ້ວຍທະນີອອງພື້ນເມືອງ ເພື່ອປົກປັກຮັກສາລະບົບນິເວດ ຊີວະນາໆພັນກະສິກຳ ຄຽງຄູ່ກັບການປັບປຸງຊີວິດການເປັນຢູ່ຂອງກະສິກອນ ສ້າງແຫຼ່ງລາຍຮັບທີ່ໝັ້ນຄົງເພື່ອຫຼຸດຜ່ອນຄວາມທຸກຍາກຂອງກະສິກອນລົງເທື່ອລະກ້າວ

ຕາມການລາຍງານຈາກຫ້ອງການກະສິກຳ ແລະ ປ່າໄມ້ ເມືອງວຽງໄຊ ແຂວງຫົວພັນ ໃຫ້ຮູ້ວ່າ: ພະຍາດປາກເປື່ອຍລົງເລັບງົວ-ຄວາຍ ໄດ້ແຜ່ລະບາດຢູ່ 9 ກຸ່ມບ້ານ ເມືອງວຽງໄຊ ນັບແຕ່ຕົ້ນ ເດືອນພະຈິກ 2017 ເປັນຕົ້ນມາ ແລະ ມີງົວ-ຄວາຍຕິດເຊື້ອທັງໝົດ 3.600 ກວ່າໂຕ. ໃນນັ້ນ ມີງົວ 2.994 ໂຕ, ຄວາຍ 729 ໂຕ ແລະ ຕາຍແລ້ວ 112 ໂຕລວມມູນຄ່າເສຍຫາຍ 290 ລ້ານກວ່າກີບ.

ທ່ານ ອຳໄພ ພູນມະໂນລາດ ຮອງຫົວໜ້າຫ້ອງການກະສິກຳ-ປ່າໄມ້ ເມືອງວຽງໄຊ ຮັບຜິດຊອບວຽກງານລ້ຽງສັດ ແລະ ການປະມົງ ໄດ້ໃຫ້ຮູ້ວ່າ: ຕໍ່ສະພາບດັ່ງກ່າວເຈົ້າເມືອງວຽງໄຊ ໄດ້ອອກແຈ້ງການດ່ວນ ເຖິງບັນດາກຸ່ມບ້ານ ແລະ ບ້ານໃນທົ່ວເມືອງ ຫ້າມເຄື່ອນຍ້າຍສັດ, ຂ້າສັດ ແລະ ໂຮງຂ້າສັດໃຫ້ປິດບໍລິການຊົ່ວຄາວ, ສ່ວນຫ້ອງການກະສິກຳ-ປ່າໄມ້ເມືອງວຽງໄຊ ໄດ້ສົ່ງພະນັກງານວິຊາການກ່ຽວຂ້ອງ ລົງສົມທົບກັບກັບອຳນາດ ການປົກຄອງບ້ານ, ສັດຕະວະແພດບ້ານ ໃຫ້ຄຳແນະນຳ ແລະ ສາທິດວິທີການປິ່ນປົວຕົວຈິງ ດ້ວຍວິທີປິ່ນປົວດ້ວຍຢາຫລວງ ແລະ ຢາພື້ນເມືອງ. ເພື່ອປ້ອງກັນບໍ່ໃຫ້ພະຍາດ ດັ່ງກ່າວ ຂະຫຍາຍເປັນບໍລິເວນກວ້າງ ຫ້ອງການກະສິກຳ-ປ່າໄມ້ເມືອງ ໄດ້ມີແຜນປ້ອງກັນສະເພາະໜ້າ ແລະ ຍາວນານ ເປັນຕົ້ນ ມີແຜນສັກຢາປ້ອງກັນພະຍາດສັດ ໃຫ້ຄົບຕາມຮອບວຽນປີລະ 2 ເທື່ອ, ຫ້າມເຄື່ອນຍ້າຍສັດ, ຫ້າມບໍລິໂພກສັດທີ່ຕາຍ ພ້ອມນີ້ ຍັງຮຽກຮ້ອງເຖິງຜູ້ ປະກອບການລ້ຽງສັດ ຈົ່ງເອົາໃຈໃສ່ເບິ່ງແຍ່ງສຸຂະພາບສັດລ້ຽງ ໂດຍສະເພາະ ຕ້ອງໄດ້ສັກຢາວັກຊິນປ້ອງກັນ, ໃນຍາມໜາວ ຕ້ອງເຮັດຄອກ ແລະ ໃຫ້ອາຫານສັດໃຫ້ພຽງພໍ.

ພະຍາດປາກເປື່ອຍລົງເລັບງົວ-ຄວາຍ ເກີດຂຶ້ນຄັ້ງນີ້ເປັນຄັ້ງທີສອງ, ເຊິ່ງຄັ້ງທຳອິດແມ່ນເກີດຂຶ້ນໃນປີ 2010 ແຕ່ບໍ່ຮ້າຍແຮງຄືຄັ້ງນີ້. ສະເພາະຢູ່ບ້ານຊຽງລວງ ມີງົວທັງໝົດ 212 ໂຕ, ຄວາຍ 98 ໂຕໄດ້ ຕິດເຊື້ອພະຍາດນີ້ 100% ໃນນີ້ມີງົວຕາຍ 15 ໂຕ, ຄວາຍ 2 ໂຕ, ປັດຈຸບັນນີ້ທົ່ວບ້ານສາມາດຄວບຄຸມ ແລະ ປິ່ນປົ່ວດີແລ້ວ 70%, ສ່ວນຈຳນວນທີ່ເຫລືອ ແມ່ນກຳລັງສືບຕໍ່ປິ່ນປົວ.

ໂຄງການປ້ອງກັນດິນຟ້າອາກາດ ໂດຍການຫຼີ້ກລ້ຽງການທຳລາຍປ່າໄມ້(CliPAD), ພະແນກຫຼຸດຜ່ອນອາຍພິດເຮືອນແກ້ວ ຈາກການທໍາລາຍປ່າໄມ້, ກົມປ່າໄມ້ ພ້ອມດ້ວຍພະແນກ ກະສິກຳ ແລະ ປ່າໄມ້ແຂວງ ຫົວພັນ ໄດ້ມີການເຊັນບົດບັນທຶກ ມອບ-ຮັບ ອາຄານກໍ່ສ້າງ ແລະ ສ້ອມແປງ ບັນດາຫ້ອງການ, ຫໍພັກພະນັກງານ, ຈຸດກວດກາຊັບພະຍາກອນປ່າໄມ້ ແລະ ຫ້ອງການກຸ່ມບ້ານ ລວມທັງໝົດ 17 ແຫ່ງ ຢູ່ໃນ 5 ເມືອງ ເປົ້າໝາຍຂອງໂຄງການ ໂດຍແມ່ນ ທ່ານ ບຸນໂຮມ ສີລິໂພຄ່າ ຫົວໜ້າບໍລິສັດ ຄຳປະສົງ ກໍ່ສ້າງຈຳກັດ ເປັນຜູ້ກ່າວມອບ ແລະ ທ່ານ ຄິນ ທຸມມະລາ ຮອງຫົວໜ້າພະແນກ ກະສິກໍາ ແລະ ປ່າໄມ້ແຂວງຫົວພັນ ເປັນຜູ່ກ່າວຮັບ, ພິທີໄດ້ຈັດຂື້ນ ໃນວັນທີ 13 ທັນວາ 2017, ໃນການມອບຮັບອາຄານໃນຄັ້ງນີ້ແມ່ນເພື່ອຈຸດປະສົງໃຫ້ ພະນັກງານວິຊາການ ແລະ ພະນັກງານກຸ່ມບ້ານໄດ້ນຳໃຊ້ເຂົ້າໃນວຽກງານຕ່າງໆ ຂອງໂຄງການປ້ອງກັນດິນຟ້າອາກາດ ໂດຍການຫຼີ້ກລ້ຽງການທຳລາຍປ່າໄມ້(CliPAD) ໃນ 5 ເມືອງຄື: ເມືອງ ຊໍາເໜືອ ຈໍານວນ 07 ແຫ່ງ (ກໍ່ສ້າງຫ້ອງການກຸ່ມບ້ານ 03 ແຫ່ງ; ກໍ່ສ້າງຫ້ອງການ ກອງກວດກາ ປ່າໄມ້ ແລະ ຂະແໜງປ່າໄມ້ ເປັນອາຄານ 02 ຊັ້ນ 1 ແຫ່ງ; ຕໍ່ເຕີມ ແລະ ປັບປຸງຫ້ອງການກະສິກໍາ ແລະ ປ່າໄມ້ເມືອງ 1 ແຫ່ງ; ຫ້ອງການ ຂະແໜງ ຄຸ້ມຄອງຊັບພະຍາກອນປ່າໄມ້ 1 ແຫ່ງ ແລະ ຈຸດກວດກາຊັບພະຍາກອນປ່າໄມ້ 1 ແຫ່ງ), ເມືອງ ຫົວເມືອງ ຈໍານວນ 05 ແຫ່ງ ກໍ່ສ້າງຫ້ອງການກຸ່ມບ້ານ 03 ແຫ່ງ, ຫ້ອງການຊັບພະຍາກອນປ່າໄມ້ 01 ແຫ່ງ ແລະ ຫ້ອງການກະສິກໍາ ແລະ ປ່າໄມ້ 01 ແຫ່ງ, ເມືອງ ຮ້ຽມ ຈໍານວນ 02 ແຫ່ງ ກໍ່ສ້າງຫໍພັກພະນັກງານໃໝ່ ແລະ ຕໍ່ເຕີມຫ້ອງການ, ເມືອງ ຊ້ອນ ຈໍານວນ 02 ແຫ່ງ ຈຸດກວດກາຊັບພະຍາກອນປ່າໄມ້ 02 ແຫ່ງ ແລະ ເມືອງ ວຽງໄຊ ຈໍານວນ 01 ແຫ່ງ ຈຸດກວດກາຊັບພະຍາກອນປ່າໄມ້ 01 ແຫ່ງ.

ທ່ານ ພວງສະຫວັດ ພົມມະສີ ຫົວໜ້າ ຂະແໜງລ້ຽງສັດ ແລະ ການປະມົງ ພະແນກກະສິກຳ-ປ່າໄມ້ແຂວງຫົວພັນໄດ້ໃຫ້ຮູ້​​ເມື່ອບໍ່ດົນ​ມານີ້ວ່າ: ການລະບາດຂອງພະຍາດປາກເປື່ອຍລົງເລັບໃນງົວ, ຄວາຍ ແລະ ແບ້ ໄດ້ເລີມຕົ້ນລະບາດ ມາແຕ່ຕົ້ນເດືອນພະຈິກ 2017, ເຊິ່ງຈຸດເລີ່ມຕົ້ນ ແມ່ນເມືອງສົບເບົາ ແລະ ​ໄດ້ແຜ່ລາມຫາ​ເມືອງ​ອື່ນໆ.

ພະຍາດປາກເປື່ອຍລົງເລັບໃນງົວ, ຄວາຍ, ໝູ ແລະ ແບ້ ​ໄດ້​ລະບາດ​ຢູ່ 6 ເມືອງ ຂອງແຂວງຫົວພັນ ມີ ເມືອງສົບເບົາ, ວຽງໄຊ, ຊຳໃຕ້, ເມືອງແອດ, ຊຽງຄໍ້ ແລະ ເມືອງຊຳເໜືອ. ​ໃນ​ນັ້ນ, ໄດ້ຮັບຜົນກະທົບທັງໝົດ 151 ບ້ານ, ມີ ງົວ-ຄວາຍ ຕິດເຊື້ອພະຍາດ 10.413 ໂຕ, ມີ ງົວ-ຄວາຍນ້ອຍ ຕາຍຍ້ອນພະຍາດນີ້ແລ້ວ 349 ໂຕ, ໝູ 262 ໂຕ ແລະ ແບ້ 119 ໂຕ, ຄິດເປັນມູນຄ່າ ຄວາມເສຍຫາຍທັງໝົດ 1,30 ຕື້ກີບ.

ຈາກຜົນການສຳຫລວດ​ໃຫ້ຮູ້ວ່າ ເຂດທີ່ໄດ້ຮັບຜົນກະທົບຫລາຍກວ່າໝູ່ ແມ່ນເມືອງຊຳເໜືອ ແລະ ເມືອງຊຽງຄໍ້, ເຊິ່ງເມືອງຊຳເໜືອ ກວມເອົາ 82 ບ້ານ, 7 ກຸ່ມບ້ານ, 2 ເຂດ ແລະ ເມືອງຊຽງຄໍ້ອີກ 7 ບ້ານ ແລະ ອັດຕາການລະບາດ ຂອງພະຍາດປາກເປື່ອຍລົງເລັບງົວ -ຄວາຍຢູ່ສອງເມືອງນີ້, ຍັງມີທ່າອ່ຽງເພີ່ມຂຶ້ນ. ສ່ວນອີກ 4 ເມືອງ ຄື: ເມືອງວຽງໄຊ, ສົບເບົາ, ຊຳໃຕ້ ແລະ ເມືອງແອດ ມາຮອດປັດຈຸບັນແມ່ນ ສາມາດຄວບຄຸມໄດ້ແລ້ວ. ສ່ວນສາເຫດທີ່ພາໃຫ້ ພະຍາດດັ່ງກ່າວ​, ແມ່ນເລີ່ມຈາກສັດ ທີ່ບໍ່ໄດ້ຮັບການສັກຢາກັນພະຍາດ, ຮ້າຍແຮງກວ່ານັ້ນ ຈຳນວນສັດ ທີ່ສັກຢາແລ້ວນັ້ນ ກໍປະກົດຕິດພະຍາດນີ້ ຢ່າງຫລວງຫລາຍ, ອີກຢ່າງໜຶ່ງ ຍ້ອນການລ້ຽງສັດ ຂອງປະຊາຊົນພາຍໃນບ້ານ ຍັງລ້ຽງແບບຊະຊາຍ, ບໍ່ມີການແຍກບ່ອນຢູ່ ລະຫວ່າງ ສັດທີ່ເປັນພະຍາດ ກັບສັດທີ່ຍັງບໍ່ທັນເປັນຕິດ​ເຊື້ອ. ສະນັ້ນ, ຈຶ່ງເຮັດໃຫ້ພະຍາດນີ້ ຂະຫຍາຍອອກເປັນວົງກວ້າງ.

ທ່ານ ພວງສະຫວັດ ພົມມະສີ ຍັງ​ໃຫ້​ຮູ້​ຕື່ມວ່າ: ພາຍຫລັງທີ່ເກີດພະຍາດດັ່ງກ່າວ ແລ້ວ ພາກສ່ວນກ່ຽວຂ້ອງ ກໍໄດ້ລົງເກັບກຳຂໍ້ມູນ, ຈັດສົ່ງ ພະນັກງານວິຊາການລົງໄປປະຈຳ ຢູ່ແຕ່ລະກຸ່ມບ້ານ ເພື່ອແນະນຳ ວິທີການປິ່ນປົ່ວພະຍາດ ປາກເປື່ອຍລົງເລັບງົວ-ຄວາຍ ໃຫ້ປະຊາຊົນ ແຕ່ລະບ້ານຢ່າງຖືກຕ້ອງ ຕາມຫລັກວິຊາການ, ມອບ​ຢາໃຫ້ປະຊາຊົນນຳໄປປິ່ນປົ່ວ ແລະ ສັກໃຫ້ສັດດ້ວຍຕົນເອງ, ຕັ້ງດ່ານກັກສັດ ແລະ ສີດພົ່ນຢາຂ້າເຊື້ອຊົ່ວຄາວ 2 ຈຸດ ຢູ່ເຂດຄຸ້ມຄອງ ລະຫວ່າງ ເມືອງສົບເບົາ-ເມືອງຊຽງຄໍ້, ເມືອງວຽງໄຊ ແລະ ເມືອງຊຳເໜືອ. ພ້ອມນີ້, ແຕ່ລະເມືອງຍັງໄດ້ອອກແຈ້ງການ ຫ້າມຂາຍສັດ, ຂ້າສັດເພື່ອບໍລິໂພກ, ຫ້າມເຄື່ອນຍ້າຍສັດ ໃນເຂດ ທີ່ມີພະຍາດລະບາດ, ອອກແຈ້ງການໃຫ້ແຕ່ລະບ້ານ ຕິດຕາມເຝົ້າລະວັງ ໃນຂອບເຂດຕົນຮັບຜິດຊອບ ທີ່ເຫັນວ່າມີຄວາມສ່ຽງສູງ ແລະ ເປີດການສີດພົ່ນຢາຂ້າເຊື້ອ ພະຍາດຕາມດ່ານ ສາຍແດນເປັນປົກກະຕິ ຈຳກັດບໍ່ໃຫ້ພະຍາດນີ້ ຂະຫຍາຍວົງກວ້າງອອກສູ່ເຂດອື່ນ.

ພິທີເປີດຂະບວນການສີດພົ່ນຢາກຳຈັດຕັກແຕນຝູງໄມ້ປ່ອງໄດ້ຈັດຂື້ນ ໃນວັນທີ່ 6 ມີຖຸນາ 2017 ຜ່ານມານີ້ ຢູ່ຫ້ວຍໄຊ, ເຂດທຳການຜະລິດຂອງປະຊາຊົນ ບ້ານນາປຸງ ເມືອງວຽງໄຊ, ແຂວງຫົວພັນ ໂດຍການເຂົ້າຮ່ວມຂອງ ທ່ານ ສໍສະຫວັນ ບານຄຳມີ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ ມີບັນດາທ່ານຈາກພາກສ່ວນກ່ຽວຂ້ອງຂັ້ນແຂວງ, ເມືອງວຽງໄຊ, ພະນັກງານວິຊາການ ແລະ ຄະນະພັກອຳນາດການປົກຄອງກຸ່ມບ້ານເຂົ້າຮ່ວມຢ່າງພ້ອມພຽງ.ໃນພິທີ ທ່ານ ບົວວັນ ບຸນມີໄຊ ຮອງເຈົ້າເມືອງໆວຽງໄຊ ໄດ້ໃຫ້ຮູ້ວ່າ: ການລະບາດ ຕັກແຕນຝຸງໄມ້ປ່ອງ ຖືວ່າເປັນຜົນກະທົບທີ່ຮ້າຍແຮງ ຕໍ່ການພັດທະນາເສດຖະກິດ-ສັງຄົມແຫ່ງຊາດ, ຕໍ່ຄວາມໝັ້ນຄົງທາງດ້ານສະບຽງອາຫານຂອງພົນລະເມືອງລາວ, ຕໍ່ພືນທີ່ກະສິກຳຂອງປະຊາຊົນລາວບັນດາເຜົ່າ. ຈຸດປະສົງ ກໍ່ເພື່ອແນ່ໃສ່ຈັດຕັ້ງຜັນຂະຫຍາຍຄຳສັ່ງຂອງນາຍົກລັດຖະມົນຕີ ສະບັບເລກທີ 28 ແລະ ຄຳສັ່ງຂອງກະຊວງກະສິກຳ ແລະ ປ່າໄມ້ສະບັບເລກທີ 3349 ວ່າດ້ວຍການເພີ່ມທະວີຄວາມຮັບຜິດຊອບຕໍ່ການປ້ອງກັນ ແລະ ກຳຈັດຕັກແຕນຝູງໄມ້ປ່ອງຢູ່ບັນດາແຂວງພາກເໜືອ ຢ່າງເຂັ້ມງວດ, ອີກອັນໜື່ງກໍ່ເພື່ອບໍ່ໃຫ້ຕັກແຕນຝູງໄມ້ປ່ອງ ສືບຕໍ່ຂະຫຍາຍພັນໄປໃນພື້ນທີ່ບ້ານ, ເມືອງອື່ນໆ ທີ່ໃກ້ຄຽງ; ເນື່ອງຈາກລະບົບນິເວດແຂວງພາກເໜືອມີຄວາມເໝາະສົມເຊັ່ນ: ພື້ນທີ່ປ່າໄມ້ປ່ອງ, ເຂົ້າໄຮ່-ນາ, ສາລີ ແລະ ພືດອື່ນໆຂອງປະຊາຊົນ ທີ່ເປັນແຫຼ່ງອາຫານ ແລະ ເປັນເງື່ອນໄຂເອື້ອອຳນວຍແກ່ການຂະຫຍາຍ ຕົວຂອງຕັກແຕນ. ສະນັ້ນ, ຈື່ງມີຄວາມຈຳເປັນຕ້ອງປຸກລະດົມກຳລັງແຮງງານທ້ອງຖີ່ນ, ດ້ານງົບປະມານຈາກພາກລັດ, ກຳລັງພົນ, ເຄື່ອງມືອຸປະກອນຮັບໃຊ້ເຂົ້າໃນການປ້ອງກັນ ແລະ ຄວບຄຸມຕັກແຕນຝູງໄມ້ປ່ອງໃຫ້ເກີດປະໂຫຍດສູງສຸດ, ແນໃສ່ເຮັດໃຫ້ຈຳນວນຕັກແຕນຝຸງໄມ້ປ່ອງນັບມື້ຫຼຸດລົງ ແລະ ກ້າວໄປເຖິງດັບສູນຢ່າງສີ້ນເຊີງ. ໂອກາດນີ້ ທ່ານ ສີວຽງຊຳ ແພງພົມມາ ຫົວໜ້າຂະແໜງປູກຝັງ ພະແນກກະສິກຳ ແລະ ປ່າໄມ້ແຂວງ ທັງເປັນຜູ້ຮັບຜິດຊອບການປ້ອງກັນ ແລະ ຄວບຄຸມການລະບາດຕັກແຕນຝູງໄມ້ປ່ອງຍັງໃຫ້ສຳພາດວ່າ: ການລະບາດຕັກແຕນຝຸງໄມ້ປ່ອງຢູ່ແຂວງຫົວພັນໄດ້ສືບເນື່ອງມາແຕ່ປີ 2014, ປະຈຸບັນທົ່ວແຂວງຫົວພັນຕັກແຕນຝູງໄມ້ປ່ອງໄດ້ລະບາດແລ້ວຈຳນວນ 8 ເມືອງ, ມີ 73 ໝູ່ບ້ານ ແລະ ສຳຫຼວດພົບເຫັນ 178 ຈຸດ ໃນນີ້ສາມາດຄວບຄຸມໄດ້ແລ້ວ 80 ຈຸດ ກວມພື້ນທີ່ 200 ກວ່າເຮັກຕາ, ທ່ານ ສີວຽງຊຳ ແພງພົມມາ ຍັງໃຫ້ຮູ້ຕື່ມອີກວ່າພາຍຫຼັງເປີດພິທີເປັນທາງການແລ້ວ ຂະແໜງປູກຝັງຈະສົມທົບກັບຫ້ອງການກະສິກຳ ແລະ ປ່າໄມ້ເມືອງ ແລະ ອຳນາດການປົກຄອງບັນດາບ້ານທີ່ຖືກຜົນກະທົບສືບຕໍ່ລົງສີດພົ່ນຢາປ້ອງກັນ ແລະ ຄວບຄຸມຢູ່ພື້ນທີ່ຕ່າງໆໃນທົ່ວແຂວງຕາມແຜນທີ່ໄດ້ຄາດກະໄວ້