Khamphakeo Inthavong
ພະແນກກະສິກຳ ແລະ ປ່າໄມ້ ສຳເລັດກອງປະຊຸມສະຫຼຸບກາງສະໄໝ 2016 – 2018 ການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະ ພັດທະນາຊົນນະບົດ 5 ປີ ຄັ້ງທີ 8 2016 – 2020 ແລະ ວາງທິດທາງແຜນການ 2018 – 2020
ວັນທີ 04 ກໍລະກົດ 2019 ພະແນກກະສິກຳ ແລະ ປ່າໄມ້ ຈັດກອງປະຊຸມສະຫຼຸບກາງສະໄໝ 2016 – 2018 ການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະ ພັດທະນາຊົນນະບົດ 5 ປີ ຄັ້ງທີ VIII 2016 – 2020 ແລະ ວາງທິດທາງແຜນການ 2018 – 2020 ທີ່ຫ້ອງປະຊຸມພະແນກແຜນການ ແລະ ການລົງທຶນ, ໃຫ້ກຽດເປັນປະທານ ທ່ານ ນາງ ແພງ ກັນຍາພີມ ຮອງເລຂາພັກແຂວງ ຮອງເຈົ້າແຂວງໆ ຫົວພັນ, ທ່ານ ຄິ່ນ ທຸມມາລາ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ເຈົ້າເມືອງ, ຮອງເຈົ້າເມືອງ 10 ເມືອງ, ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ພະແນກການທີ່ກ່ຽວຂ້ອງ, ນັກທຸລະກິດໜຸ່ມ, ຄອບຄົວຕົວແບບ ແລະ ພະນັກງານລັດຖະກອນພາຍໃນພະແນກເຂົ້າຮ່ວມ 150 ກ່ວາທ່ານ, ຍິງ 51 ທ່ານ.
ກອງປະຊຸມ ທ່ານ ຄິ່ນ ທຸມມາລາ ໄດ້ຜ່ານຮ່າງບົດສະຫຼຸບກາງສະໄໝ ໄລຍະ 2016 – 2018 ແລະ ທິດທາງແຜນການ ໄລຍະ ປີ 2018 – 2020 ຈາກນັ້ນຜູ້ແທນກອງປະຊຸມປະກອບຄຳຄິດຄຳເຫັນໃສ່ຮ່າງບົດລາຍງານ, ການຟື້ນຟູລະບົບຊົນລະປະທານທີ່ໄດ້ຮັບຜົນກະທົບຈາກໄພພິບັດ, ຄວບຄຸມພະຍາດປາກເປື່ອຍລົງເລັບ ແລະ ພະຍາດອະຫິວາໝູ, ປັບປຸງແນວພັນເຂົ້າໄກ່ນ້ອຍ, ການລະບາດ ແລະ ຄວບຄຸມສັດຕູພືດ, ຈັດຕັ້ງປະຕິບັດ ໂຄງການພັດທະນາຊີວະນາໆພັນ ໄລຍະ 2 ປີກ່ວາ, ຜ່ານການຊີ້ນຳ – ນຳພາຂອງພະແນກກະສິກຳ ແລະ ປ່າໄມ້ແຂວງ ແລະ ຫ້ອງການກະສິກຳ ແລະ ປ່າໄມ້ເມືອງສາມາດສ້າງໜໍ່ແໜງຄອບຄົວຕົວແບບດ້ານການປູກການລ້ຽງຫຼາຍຄອບຄົວເຊັ່ນ: ປູກໄມ້ໃຫ້ໝາກ, ການປູກຜັກເຮືອນຮົ່ມ, ລ້ຽງປາ ແລະ ລ້ຽງໝູລາດເປັນສິນຄ້າ, ກອງປະຊຸມຍັງໄດ້ເຫັນດີວ່າດ້ວຍການມອບໃບຍ້ອງຍໍຈາກເຈົ້າແຂວງ, ໃຫ້ແກ່ຄອບຄົວທີ່ມີຜົນງານດີເດັ່ນໃນການສ້າງຄອບຄົວເປັນຄອບຄົວຕົວແບບໃນການຜະລິດກະສິກຳ ແລະ ປ່າໄມ້ ໃນ 10 ເມືອງ ທົ່ວແຂວງ, ຈຳນວນ 54 ໃບ ແລະ ພະແນກກະສິກຳ ແລະ ປ່າໄມ້ແຂວງ, ເຫັນດີມອບໃບຍ້ອງຍໍຈຳນວນ 41 ໃບ, ໃຫ້ແກ່ຄອບຄົວຕົວແບບທີ່ມີຜົນງານດີເດັ່ນໃນການປະກອບສ່ວນເຂົ້າໃນວຽກງານພັດທະນາດ້ານກະສິກຳ ໃນການປູກຝັງ ແລະ ລ້ຽງສັດ.
ຈາກນັ້ນປະທານກອງປະຊຸມ ທ່ານ ນາງແພງ ກັນຍາພິມ ຮອງເລຂາພັກແຂວງ ຮອງເຈົ້າແຂວງ ກໍ່ໄດ້ໂອ້ລົມຍ້ອງຍໍຊົມເຊີຍຈາກຜົນງານທີ່ຍາດມາໄດ້ໃນໄລຍະຜ່ານມາ ເປັນຕົ້ນແມ່ນການປູກຝັງ, ລ້ຽງສັດ ແລະ ຈະໄດ້ສືບຕໍ່ສົ່ງເສີມການປູກ – ການລ້ຽງ, ຫັນໄປສູ່ເຕັກນິກທີ່ທັນສະໄໝ, ເອົາວຽກງານກະສິກຳໃຫ້ເປັນຕົ້ນຕໍໃຫ້ມີຈຸດສຸມ ແລະ ສຶກສາສຳຫຼວດເຮັດນາຂັ້ນໄດບ່ອນທີ່ມີເງື່ອນໄຂ ແລະ ຫັນເອົາພະນັກງານລົງຮາກຖານເພື່ອຊີ້ນຳ – ນຳພາດ້ານເຕັກນິກ, ສຶບຕໍ່ຕິດຕາມການແບ່ງດິນແບ່ງປ່າໃຫ້ປະຊາຊົນນຳໃຊ້, ຖືກຕ້ອງຍາວນານ ແລະ ທຸກພາກສ່ວນຕ້ອງເປັນເຈົ້າການໃນການຊີ້ນຳ – ນຳພາຊຸກຍູ້ການຜະລິດກະສິກຳ – ປ່າໄມ້ໃຫ້ກາຍເປັນສິນຄ້າ.ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ປະຊາຊົນເຂົ້າເຖີງແຫຼ່ງທືນ, ດ້ານເຕັກນິກວິຊາການເພື່ອສຸມໃສ່ການຜະລິດສິນຄ້າໃຫ້ຫຼາຍຂື້ນ, ສາມາດສ້າງລາຍຮັບໃຫ້ແກ່ປະຊາຊົນເພື່ອແກ້ໄຂຄວາມທຸກຍາກລົງເທື່ອລະກ້າວ
ບັນນາທິການ ຜູ້ຂຽນຂ່າວ
ແອຊຳ ວິໄລຈິດ ຄຳພະແກ້ວ ອິນທະວົງ
ກອງທຶນລຸດຜ່ອນຄວາມທຸກຍາກ ໄດ້ລົງກວດກາ ຜົນສຳເລັດ ແລະ ມອບ – ຮັບ, ໂຄງການສ້ອມແປງ ຄອງເໝືອງ ແລະ ລະບົບນ້ຳລິນ, ບ້ານ ນາໜອງ, ບ້ານ ສົບຜ່ອງ, ເມືອງຊຽງຄໍ້.
ວັນທີ 27 ມີຖຸນາ 2019 ທີ່ຜ່ານມາ, ກອງທຶນລຸດຜ່ອນຄວາມທຸກຍາກ ພະແນກກະສິກຳ ແລະ ປ່າໄມ້ແຂວງ ແລະ ບໍລິສັດຜູ້ຮັບເໝົາກໍ່ສ້າງໄດ້ລົງກວດກາຄວາມຄືບໜ້າໂຄງການກໍ່ສ້າງ, ສ້ອມແປງຄອງ
ເໝືອງ ແລະ ສ້ອມແປງລະບົບນ້ຳລິນ, ເມືອງຊຽງຄໍ້, ແຂວງຫົວພັນ.ເຊີ່ງນຳໂດຍທ່ານ ຄຳພັດ ອ່ອນບົວຄຳ ຄະນະປະຈຳພັກເມືອງ, ປະທານແນວລາວສ້າງຊາດເມືອງ, ທ່ານ ໄອຍາໂກ ກັນດາສັກ ຫົວໜ້າ ກອງທຶນລຸດຜ່ອນຄວາມທຸກຍາກ III ຜູ້ຊີ້ນຳໂຄງການຂັ້ນແຂວງ, ມີພາກສ່ວນກ່ຽວຂ້ອງຂັ້ນເມືອງ, ອຳນາດການປົກຄອງບ້ານເຂົ້າຮ່ວມນຳ.
ໂຄງການກໍ່ສ້າງສ້ອມແປງຄອງເໝືອງ, ບ້ານ ນາໜອງ, ໄດ້ເລີ່ມລົງມືກໍ່ສ້າງຕົ້ນເດືອນ ພຶດສະພາ 2019 ສຳເລັດລົງໃນທ້າຍເດືອນ ມີຖຸນາ 2019 ລວມມູນຄ່າທັງໝົດ 52 ລ້ານກ່ວາກີບ, ຊື່ງໄດ້ຮັບທຶນ ຈາກໂຄງການ ກອງທຶນລຸດຜ່ອນຄວາມທຸກຍາກ 50 ລ້ານກ່ວາກີບ, ທຶນປະກອບສ່ວນຂອງປະຊາຊົນ 2 ລ້ານກ່ວາກີບ. ຄອງເໝືອງຂະໜາດກ້ວາງ 50 ຊັງຕີແມັດ, ຍາວ 100 ແມັດ, ລວງສູງ 60 ຊັງຕີແມັດ, ສາມາດເອົານ້ຳຫົດເນື້ອທີ່ນາ 10 ເຮັກຕາ ໂຄງການກໍ່ສ້າງສ້ອມແປງນ້ຳລິນ, ບ້ານ ສົບຜ່ອງ, ໄດ້ເລີ່ມລົງມືຈັດຕັ້ງປະຕິບັດແຕ່ຕົ້ນເດືອນ ພຶດສະພາ 2019 ແລະ ສຳເລັດການກໍ່ສ້າງສ້ອມແປງໃນທ້າຍເດືອນ ມີຖຸນາ 2019 ລວມມູນຄ່າທັງໝົດ 45 ລ້ານກ່ວາກີບ, ທຶນ ຂອງໂຄງການ ກອງທຶນລຸດຜ່ອນຄວາມທຸກຍາກ 43 ລ້ານກ່ວາກີບ ແລະ ທຶນປະກອບສ່ວນຂອງປະຊາຊົນ 2 ລ້ານກ່ວາກີບ, ສາມາດເອົານ້ຳຮັບໃຊ້ປະຊາຊົນໄດ້ 30 ກ່ວາຄອບຄົວ ເຊິ່ງໂຄງການດັ່ງກ່າວແມ່ນບໍລິສັດ ສີ ອິນທາພອນ ເປັນຜູ້ຮັບເໝົາກໍ່ສ້າງ.
ພາຍຫຼັງກວດກາການກໍ່ສ້າງສຳເລັດແລ້ວ, ທ່ານ ໄອຍາໂກ ກັນດາສັກ ຫົວໜ້າກອງທຶນລຸດຜ່ອນຄວາມທຸກຍາກ ໃຫ້ຄຳຄິດເຫັນວ່າ: ການຈັດຕັ້ງປະຕິບັດໂຄງການ ຕ້ອງມີການຕິດຕາມ, ກວດກາ, ປະເມີນຜົນຄວາມຄືບໜ້າຂອງໂຄງການ ແລະ ໃຫ້ແຕ່ລະພາກສ່ວນຕ້ອງເປັນເຈົ້າການໃນການຈັດຕັ້ງປະ
ຕິບັດ, ອຳນາດການປົກຄອງບ້ານ, ຈະຕ້ອງເອົາໃຈໃສ່ນຳພາປະຊາຊົນຊົມໃຊ້ຄອງເໝືອງ ແລະ ນ້ຳລິນ, ໃຫ້ເກີດປະໂຫຍດສຸງສຸດ, ປະກອບສ່ວນເພີ່ມຜົນຜະລິດກະສິກຳ ໃຫ້ເພີ່ມຂື້ນ, ແກ້ໄຂຄວາມທຸກຍາກຂອງປະຊາຊົນໃນເຂດດັ່ງກ່າວ, ໃຫ້ນັບມື້ຫຼຸດລົງເທື່ອລະກ້າວ.
ບັນນາທິການ
ຄຳປານ ສຸວັນພອນ
ຜູ້ຂຽນຂ່າວ
ຄຳພະແກ້ວ ອິນທະວົງ
ພະແນກກະສິກຳ ແລະ ປ່າໄມ້ ໜ່ວຍພັກ ຂະແໜງພັດທະນາຊົນນະບົດ ແລະ ສະຫະກອນ ສຳເລັດພິທີມອບບັດສະມາຊິກພັກສົມບຸນ.
ຕອນເຊົ້າ ເວລາ 8 ໂມງ ຂອງວັນທີ 26 ມີຖຸນາ 2019 ໜ່ວຍພັກຂະແໜງພັດທະນາຊົນນະບົດ ແລະ ສະຫະກອນ ທີ່ຂຶ້ນກັບ ພະແນກກະສິກຳ ແລະ ປ່າໄມ້ ແຂວງຫົວພັນ, ໄດ້ຈັດກອງປະຊຸມມອບບັດສະມາຊິກພັກສົມບຸນ ຂອງຕົນຂື້ນທີ່ຫ້ອງປະຊຸມຂະແໜງ, ກອງປະຊຸມດັ່ງກ່າວໄດ້ດຳເນີນເປັນເວລາ 1 ຕອນ, ໂດຍພາຍໃຕ້ການເປັນປະທານ ຂອງສະຫາຍ ສໍສະຫັວນ ບານຄຳມີ ຄະນະພັກຮາກຖານ ພະແນກກະສິກຳ ແລະ ປ່າໄມ້ແຂວງ, ສະຫາຍ ໄມພຽງ ມາດາຈິດ ເລຂາໜ່ວຍພັກຂະແໜງພັດທະນາຊົນນະບົດ ແລະ ລຶບລ້າງຄວາມທຸກຍາກ, ສະມາຊິກພັກສົມບຸນ, ເຂົ້າຮ່ວມທັງໝົດ 11 ສະຫາຍ, ຍິງ 4 ສະຫາຍ.
ກອງປະຊຸມຄັ້ງນີ້ ໄດ້ຜ່ານມະຕິຕົກລົງໃຫ້ກົມການເມືອງສູນກາງພັກ ສະບັບເລກທີ 020/ກມສພ, ລົງວັນທີ 22 ທັນວາ 2016 ວ່າດ້ວຍການອອກບັດ – ມອບບັດສະມາຊິກພັກສົມບຸນຂອງພັກປະຊາຊົນປະຕິວັດລາວ ແລະ ອິງຕາມແຈ້ງການຂອງຄະນະຈັດຕັ້ງສູນກາງພັກສະບັບເລກທີ 06/ຈຄສພ, ລົງວັນທີ 14 ມັງກອນ 2019 ກ່ຽວກັບການມາຮັບເອົາບັດສະມາຊິກພັກສົມບຸນ, ອິງຕາມໜັງສືສະເໜີຂອງຄະນະຈັດຕັ້ງແຂວງ, ສະບັບເລກທີ 316/ຄຈຂ.ຫພ, ລົງວັນທີ 22 ພຶດສະພາ 2019 ຄະນະປະຈຳພັກແຂວງຕົກລົງມອບບັດໃຫ້ສະມາຊິກພັກສົມບຸນ, ໜ່ວຍພັກຂະແໜງພັດທະນາຊົນນະບົດ ແລະ ສະຫະກອນ, ທີ່ຂື້ນກັບຮາກຖານພັກພະແນກກະສິກຳ ແລະ ປ່າໄມ້ແຂວງຈຳນວນ 11 ສະຫາຍ, ຍິງ 4 ສະຫາຍ
ຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຈາກສະຫາຍ ສໍສະຫັວນ ບານຄຳມີ ຄະນະພັກຮາກຖານຂອງພະແນກ ຊືງສະຫາຍໄດ້ຍ້ອງຍໍຊົມເຊີຍຕໍ່ການຊີ້ນຳ – ນຳພາ ຂອງຄະນະໜ່ວຍພັກ, ເຫັນໄດ້ຄວາມສາມັກຄີເປັນເອກະພາບ, ມີແບບແຜນວິທີເຮັດວຽກແບບລວມສູນປະຊາທິປະໄຕ, ແບ່ງງານໃຫ້ບຸກຄົນຮັບຜິດຊອບຈິ່ງເຮັດໃຫ້ວຽກງານທີ່ໄດ້ຮັບການມອບໝາຍ ໃຫ້ມີຜົນສຳເລັດ, ຊຶ່ງມັນສະແດງໃຫ້ເຫັນເຖິງຄວາມຮັບຜິດຊອບທາງດ້ານການເມືອງຂອງບັນດາສະຫາຍ,ໃນຄະນະໜ່ວຍພັກຈະຍົກສູງຄວາມສາມັກຄີພາຍໃນໃຫ້ດີກ່ວາເກົ່າ, ເປັນຫົວຈັກຫຼັກແຫຼ່ງໃນການຊີ້ນຳ – ນຳພາໜ່ວຍພັກໃຫ້ມີຄວາມເຂັ້ມແຂງ, ປອດໃສ, ໜັກແໜ້ນ ແລະ ເຮັດໃຫ້ບົດບາດການນຳພາຂອງພັກໄດ້ຮັບການເຊີດຊູຍົກສູງຂື້ນເລື້ອຍ.
ບັນນາທິການ ຄຳປານ ສຸວັນພອນ
ຜູ້ຂຽນຂ່າວ ຄຳພະແກ້ວ ອິນທະວົງ
ພິທີມອບ – ຮັບໜ້າທີ່ ຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ ຜູ້ເກົ່າ ແລະ ຜູ້ໃໝ່.
ໃນຕອນບ່າຍວັນທີ 11 ມີຖຸນາ 2019 ນີ້, ພະແນກກະສິກຳ ແລະ ປ່າໄມ້ແຂວງ ໄດ້ຈັດພິທີມອບ-ຮັບໜ້າທີ່ ຮັກສາການຫົວໜ້າພະແນກກະສິກຳ ແລະ ປ່າໄມ້ ໂດຍເປັນກຽດເຂົ້າຮ່ວມຂອງທ່ານ ພັນທອງ ເພັດໄຊສົມພັນ, ຄະນະປະຈຳພັກແຂວງ ຮອງເຈົ້າແຂວງໆ ຫົວພັນ, ທ່ານ ບຸນຄຳ ສີດາວົງ ອາດີດ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີການນຳພະແນກການກ່ຽວຂ້ອງຂອງແຂວງ, ມີການນຳ ພະແນກກະສິກຳ ແລະ ປ່າໄມ້ແຂວງ, ມີທ່ານຫົວໜ້າຫ້ອງການກະສິກຳ ແລະ ປ່າໄມ້ 10 ເມືອງ, ມີພະນັກງານລັດຖະກອນ ແລະ ບັນດາແຂກຖືກເຊີນ, ພາຍໃນພະແນກດັ່ງກ່າວເຂົ້າຮ່ວມ.
ໃນພິທີ ຄະນະຮັບຜິດຊອບກອງປະຊຸມ, ໄດ້ຂຶ້ນຜ່ານຂໍ້ຕົກລົງຂອງເຈົ້າແຂວງໆ ຫົວພັນ. ສະບັບເລກທີ 547/ຈຂ-ຫພ, ລົງວັນທີ 20/05/2019 ເຫັນດີແຕ່ງຕັ້ງ ທ່ານ ຄິ່ນ ທຸມມາລາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ເປັນຮັກສາການ ຫົວໜ້າພະແນກກະສິກຳ ແລະ ປ່າໄມ້ແຂວງ ່ອນໃໝແລະ ຜ່ານຂໍ້ຕົກລົງຂອງເຈົ້າແຂວງສະບັບເລກທີ546/ຈຂ-ຫພ, ຍົກຍ້າຍທ່ານ ບຸນຄຳ ສີດາວົງ ຫົວໜ້າພະແນກກະສິກຳ ແລະ ປ່າໄມ້ແຂວງ ໄປເປັນ ຫົວໜ້າກົມຊົນລະປະທານ ກະຊວງກະສິກຳ ແລະ ປ່າໄມ້ ໃນໂອກາດກຽວກັນທ່ານ ບຸນຄຳ ສີດາວົງ ອະດີດ ຫົວໜ້າພະແນກກະສິກຳ ແລະ ປ່າໄມ້ແຂວງ, ກໍໄດ້ຂຶ້ນກ່າວຄໍາເຫັນ ແລະ ມອບໜ້າທີ່ໃຫ້ ທ່ານຜູ້ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ຜູ້ໃໝ່ວ່າ: ຕະຫຼອດໄລຍະເວລາທີ່ໄດ້ເຮັດໜ້າທີ່ ໃນການບໍລິຫານງານ ຢູ່ພະແນກກະສິກຳ ແລະ ປ່າໄມ້ແຂວງ ທີ່ຜ່ານມາແມ່ນໄດ້ສືບຕໍ່ຈັດຕັ້ງປະຕິບັດໃນຫຼາຍໆ ວຽກງານທີ່ຂັ້ນເທິ່ງມອບໝາຍໃຫ້ສຳເລັດໄປດ້ວຍດີ, ພ້ອມນັ້ນ ພະແນກກະສິກຳ ແລະ ປ່າໄມ້ແຂວງ ກໍມີການຂະຫຍາຍຕົວ ຢ່າງຕໍ່ເນື່ອງສາມາດຄ້ຳປະກັນດ້ານສະບຽງອາຫານ, ແກ້ໄຂຊີວິດການເປັນຢູ່ ແລະ ມີເຂົ້າກຸ້ມກິນໂດຍພື້ນຖານ, ການຜະລິດເປັນສິນຄ້າເລີ່ມມີໜໍ່ແໜງເກີດຂື້ນຢູ່ບັນດາເມືອງ, ເປັນຕົ້ນແມ່ນຟາມລ້ຽງໄກ່, ການລ້ຽງງົວ ແລະ ການປູກພືດຕ່າງໆ ສາມາດສະໜອງຄວາມຕ້ອງການຂອງຕະຫຼາດພາຍໃນໄດ້ ແລະ ສົ່ງອອກຈຳນວນໜື່ງ ແລະ ຫວັງຢ່າງຍິ່ງວ່າ ຄະນະ ພະແນກກະສິກຳ ແລະ ປ່າໄມ້ແຂວງ, ຍັງຈະສືບຕໍ່ນຳພາການເມືອງ-ແນວຄິດ ໃຫ້ສະມາຊິກພັກ, ພະນັກງານ, ລັດຖະກອນ, ຢ່າງຕໍ່ເນື່ອງ, ເຜີຍແຜ່ນະໂຍບາຍຂອງພັກ, ລະບຽບກົດໝາຍຂອງລັດ, ໃຫ້ລົງເຖິງທ້ອງຖິ່ນຮາກຖານເປັນປົກກະຕິ, ປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ, ບັນຈຸຊັບຊ້ອນພະນັກງານຕາມຄວາມຮູ້, ຄວາມສາມາດ ແລະ ຄວາມຕ້ອງການໃນຂົງເຂດວຽກງານ, ນຳພາວຽກງານວິຊາສະເພາະຂອງບັນດາຂະແໜງການ, ໂຄງການ, ສູນ, ສະຖານີ ແລະ ຫ້ອງການກະສິກຳປ່າໄມ້ເມືອງຮອບດ້ານ, ຜັນຂະຫຍາຍຍຸດທະສາດພັດທະນາກະສິກຳ ແລະ ປ່າໄມ້ ຮອດປີ 2025 ແລະ ວິໄສທັດປີ 2030 ແລະ ແຜນພັດທະນາກະສິກຳ ແລະ ປ່າໄມ້ 5 ປີ ຄັ້ງທີ 8 ໂດຍການຫັນເປັນໂຄງການ ແລະ ແຜນງານ ແລະ ກິດຈະກຳອັ່ນລະອຽດຂອງແຕ່ລະຂະແໜງການ, ແບ່ງຄວາມຮັບຜິດຊອບໃຫ້ບັນດາສະຫາຍຄະນະພັກ, ຄະນະພະແນກໃຫ້ສອດຄ່ອງກັບສະພາບຕົວຈິງ, ປະຕິບັດໜ້າທີ່ຕາມການແຕ່ງຕັ້ງຂອງຂັ້ນເທິງເປັນຕົ້ນ ຄະນະຄຸ້ມຄອງໂຄງການ, ຄະນະປະສານງານ ແລະ ຄະນະຮັບຜິດຊອບອື່ນຢ່າງເຂັ້ມງວດ.
ຫຼັງຈາກນັ້ນ ໃນທີ່ປະຊຸມ ກໍໄດ້ມີການລົງນາມເຊັນບົດບັນທຶກ ການມອບ-ຮັບໜ້າທີ່ ວ່າການຫົວໜ້າພະແນກກະສິກຳ ແລະ ປ່າໄມ້ແຂວງ ລະຫວ່າງ ທ່ານ ບຸນຄຳສີດາວົງ ອະດີດ ຫົວໜ້າພະແນກກະສິກຳ ແລະ ປ່າໄມ້ແຂວງ, ແລະ ທ່ານ ຄິ່ນ ທຸມມາລາ, ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ໂດຍຊ້ອງໜ້າ ທ່ານ ພັນທອງ ເພັດໄຊສົມພັນ ຄະນະປະຈຳພັກແຂວງ ຮອງເຈົ້າແຂວງໆ ຫົວພັນ.ພ້ອມດ້ວຍພະນັກງານພາຍໃນພະແນກຮ່ວມເປັນສັກຂີພິຍານອີດ້ວຍ.
ບັນນາທິການ
ແອຊຳ ວິໄລຈິດ
ຜູ້ຂຽນຂ່າວ.
ຄຳພະແກ້ວ ອິນທະວົງ
ພະແນກກະສິກຳ ແລະ ປ່າໄມ້ ມອບປື້ມບົດລາຍງານ, ແຜນທີ່ການວາງແຜນຈັດສັນນຳໃຊ້ທີ່ດິນກະສິກຳ ແລະ ປ່າໄມ້ ແບບມີສ່ວນຮ່ວມຂັ້ນບ້ານໃຫ້ 3 ບ້ານ, ເມືອງສົບເບົາ, ແຂວງຫົວພັນ.
ວັນທີ 21 ພຶດສະພາ 2019 ທີ່ຜ່ານມາ ພະແນກກະສິກຳ ແລະ ປ່າໄມ້ແຂວງໄດ້ຈັດກອງປະຊຸມມອບປື້ມບົດລາຍງານ, ແຜນທີ່ການວາງແຜນຈັດສັນນຳໃຊ້ທີ່ດິນກະສິກຳ ແລະ ປ່າໄມ້ແບບມີສ່ວນຮ່ວມຂັ້ນບ້ານໃຫ້ 3 ບ້ານ ໂດຍເປັນປະທານຮ່ວມຂອງທ່ານ ຄຳພອນ ຣາຊາຈັກ, ຫົວໜ້າກົມຄຸ້ມຄອງທີ່ດິນກະສິກຳ ກະຊວງກະສິກຳ ແລະ ປ່າໄມ້, ທ່ານ ຄິ່ນ ທຸມມາລາ ຮອງຫົວນ້າພະແນກກະສິກຳ ແລະ ປ່າໄມ້ແຂວງ, ມີພາກສ່ວນທີ່ກ່ຽວຂ້ອງຂັ້ນກະຊວງ, ແຂວງ, ເມືອງ ແລະ ປະຊາຊົນເຂົ້າຮ່ວມນຳ.
ເພື່ອເຮັດໃຫ້ຊາວບ້ານເປັນເຈົ້າການໃນການຄຸ້ມຄອງ, ການວາງແຜນການນຳໃຊ້ທີ່ດິນກະສິກຳ ແລະ ປ່າໄມ້ແບບມີສ່ວນຮ່ວມມີຄວາມຮັບປະກັນທາງດ້ານແບບແຜນການຜະລິດກະສິກຳ ແລະ ປ່າໄມ້ໃຫ້ມີຄວາມຍືນຍົງ, ອິງຕາມກົດໝາຍປົກຄອງທ້ອງຖິ່ນ ສະບັບເລກທີ 68/ສພຊ ລົງວັນທີ 4 ທັນວາ, ພາກທິ 4 ໝວດ 4 ມາດຕາ 39, 40 ວ່າດ້ວຍພາລະບົດບາດສິດ – ໜ້າທີຂອງເຈົ້າເມຶອງ. ອີງຕາມແຜນພັດທະນາທີ່ດິນກະສິກຳ ແລະ ປ່າໄມ້ນັບແຕ່ນີ້ຮອດປີ 2020 ເພຶ່ອໃຫ້ມີຄວາມຍືນຍົງ ແລະ ຈັດສັນທຳການຜະລິດແບບຄົງທີ. ອີງຕາມໃບສະເໜີຂອງຫ້ອງການກະສິກຳ ແລະ ປ່າໄມ້ເມືອງສະບັບເລກທີ 56 /ກປມ ລົງວັນທີ 18 ມັງກອນ 2019 ອີງຕາມການຄົ້ນຄ້ວາເຫັນດີເປັນເອກະພາບຂອງການນຳເມືອງຄັ້ງວັນທີ 22 ກຸມພາ 2019. ເຈົ້າເມືອງ, ເມືອງສົບເບົາຕົກລົງມອບປື້ມບົດລາຍງານ, ແຜນທີ່ການວາງແຜນຈັດສັນນຳໃຊ້ທີ່ດິນກະສິກຳ ແລະ ປ່າໄມ້ ແບບມີສ່ວນຮ່ວມຂັ້ນບ້ານໃຫ້ 3 ບ້ານຄື: ບ້ານໂພນຊາຍ, ມີເນື້ອທີ່ທັງໝົດ 2 ພັນ 3 ຮ້ອຍກ່ວາເຮັກຕາ, ດິນກະສິກຳ 7 ຮ້ອຍ 60 ກ່ວເຮັກຕາ, ດິນປ່າໄມ້ມີເນື້ອທີ່ 1 ພັນ 500 ກ່ວາເຮັກຕາ ແລະ ດິນອື່ນ 60 ກ່ວາແຮັກຕາ, ບ້ານນ້ຳແຫ້ງ ມີເນື້ອທີ່ທັງໝົດ 2 ພັນ 8 ຮ້ອຍກ່ວາເຮັກຕາ, ດິນກະສິກຳ 8 ຮ້ອຍ 80 ກ່ວາເຮັກຕາ, ດິນປ່າໄມ້ມີເນື້ອທີ່ 1 ພັນ 800 ກ່ວາເຮັກຕາ ແລະ ດິນອື່ນ 25 ກ່ວາແຮັກຕາ ແລະ ບ້ານຫ້ວຍຕຸງ. ມີເນື້ອທີ່ທັງໝົດ 2 ພັນ 5 ຮ້ອຍກ່ວາເຮັກຕາ, ດິນກະສິກຳ 1 ພັນກ່ວາເຮັກຕາ, ດິນປ່າໄມ້ມີເນື້ອທີ່ 1 ພັນ 400 ກ່ວາເຮັກຕາ ແລະ ດິນອື່ນ 50 ກ່ວາແຮັກຕາ. ນອກຈາກນີ້ຍັງໄດ້ມອບໃບຍ້ອງຍໍໃຫ້ບຸກຄົນ ແລະ ກົມກອງທີ່ມີຜົນງານດີເດັ່ນອີກດ້ວຍ.
ຕອນທ້າຍກອງປະຊຸມ ທ່ານປະທານຍັງໄດ້ໂອ້ລົມແລກປ່ຽນຄຳຄິດຄຳເຫັນແຕ່ລະບ້ານທີ່ໄດ້ຮັບປື້ມແຜນທີ່ການວາງແຜນຈັດສັນນຳໃຊ້ທີ່ດິນແບບມີສ່ວນຮ່ວມຂອງບ້ານ, ເພື່ອນຳໄປຈັດຕັ້ງປະຕິບັດໃຫ້ໄດ້ຮັບປະໂຫຍດສຸງ ແລະ ປະຊາຊົນຈົ່ງເປັນເຈົ້າການໃນການນຳໃຊ້ທີ່ດິນຢ່າງຖືກຕ້ອງຕາມລະບຽບການ.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ.
ຄຳພະແກ້ວ ອິນທະວົງ
ພິທີກວດກາ 100% ໂຄງການສ້ອມແປງ – ຮາງລິນຄອງເໝືອງ ແລະ ໂຄງການກໍ່ສ້າງຂົວອູ່ໄປເຂດທຳການຜະລິດໂຄງການກະສິກຳ ເພື່ອໂພສະນາການ, ເມືອງຊ່ອນ, ແຂວງຫົວພັນ.
ວັນທີ 13 ພຶດສະພາ 2019 ທີ່ຜ່ານມາ, ເຈົ້າຂອງໂຄງການ ແລະ ບໍລິສັດຜູ້ຮັບເໝົາກໍ່ສ້າງໄດ້ລົງກວດກາຄວາມຄືບໜ້າໂຄງການກໍ່ສ້າງຂົວອູ່ໄປເຂດທຳການຜະລິດ ແລະ ໂຄງການກໍ່ສ້າງຮາງລິນຄອງເໝືອງ, ເຊີ່ງນຳໂດຍ ທ່ານ ຄຳພຽນ ໄຊສົມພັນ ຮອງເຈົ້າເມືອງ, ຜູ້ຊີ້ນຳວຽກງານຂົງເຂດເສດຖະກິດ, ເປັນຜູ້ຊີ້ນຳໂຄງການຂັ້ນເມືອງ, ມີພາກສ່ວນທີ່ກ່ຽວຂ້ອງຂັ້ນເມືອງ, ອຳນາດການປົກຄອງບ້ານເຂົ້າຮ່ວມນຳ.
ໂຄງການກໍ່ສ້າງຂົວອູ່ໄປເຂດທຳການຜະລິດ, ບ້ານ ວັດ, ໄດ້ເລີ່ມລົງມືກໍ່ສ້າງຕົ້ນເດືອນ ກຸມພາ 2019 ສຳເລັດລົງໃນທ້າຍເດືອນ ເມສາ 2019 ລວມມູນຄ່າທັງໝົດ 456 ລ້ານກ່ວາກີບ, ຊື່ງໄດ້ຮັບທຶນ ຈາກໂຄງການ ກະສິກຳ ເພື່ອໂພສະນາການ 319 ລ້ານກ່ວາກີບ, ທຶນປະກອບສ່ວນຂອງປະຊາຊົນ 68 ລ້ານກ່ວາກີບ. ຂົວອູ່ມີຂະໜາດກ້ວາງ 1 ແມັດ 80 ຊັງຕີແມັດ, ຍາວ 70 ແມັດ, ລວງສູງ 8 ແມັດ, ສາມາດຮັບໃຊ້ປະຊາຊົນພາຍໃນບ້ານໄດ້ 121 ຄອບຄົວ, ໂຄງການກໍ່ສ້າງຮາງລິນຄອງເໝືອງນ້ຳຈັກ, ບ້ານ ນາຈັກ, ໄດ້ເລີ່ມລົງມືຈັດຕັ້ງປະຕິບັດແຕ່ຕົ້ນເດືອນ ມີນາ 2019 ແລະ ສຳເລັດການກໍ່ສ້າງສ້ອມແປງໃນທ້າຍເດືອນ ເມສາ 2019 ລວມມູນຄ່າທັງໝົດ 140 ລ້ານກ່ວາກີບ, ທຶນ ຂອງໂຄງການ ກະສິກຳ ເພື່ອໂພສະນາການ 98 ລ້ານກ່ວາກີບ ແລະ ທຶນປະກອບສ່ວນຂອງປະຊາຊົນ 25 ລ້ານກ່ວາກີບ, ສາມາດເອົານ້ຳເຂົ້າຫົດເນື້ອທີ່ນາໄດ້ 30 ເຮັກຕາ, ເຊິ່ງທັງ 2 ໂຄງການດັ່ງກ່າວແມ່ນບໍລິສັດ ທີເຮົ້າ ກໍ່ສ້າງຈຳກັດ, ເປັນຜູ້ຮັບເໝົາກໍ່ສ້າງ.
ພາຍຫຼັງກວດກາການກໍ່ສ້າງສຳເລັດແລ້ວ, ທ່ານຮອງເຈົ້າເມືອງ ໃຫ້ຄຳຄິດເຫັນວ່າ: ການຈັດຕັ້ງປະຕິບັດໂຄງການ ຕ້ອງມີການຕິດຕາມ, ກວດກາ, ປະເມີນຜົນຄວາມຄືບໜ້າຂອງໂຄງການ ແລະ ໃຫ້ແຕ່ລະພາກສ່ວນຕ້ອງເປັນເຈົ້າການໃນການຈັດຕັ້ງປະຕິບັດ, ອຳນາດການປົກຄອງບ້ານ, ແມ່ນໝາກຫົວໃຈຫຼັກທີ່ນຳພາປະຊາຊົນຊົມໃຊ້ຂົວ ແລະ ຮາງລິນຄອງເໝືອງ, ໃຫ້ເກີດປະໂຫຍດສຸງສຸດ, ປະກອບສ່ວນເພີ່ມຜົນຜະລິດກະສິກຳ ໃຫ້ເພີ່ມຂື້ນ, ແກ້ໄຂການຂາດດ້ານໂພສະນາການ, ແນໃສ່ແກ້ໄຂຄວາມທຸກຍາກຂອງປະຊາຊົນໃນເຂດດັ່ງກ່າວ, ໃຫ້ນັບມື້ຫຼຸດລົງເທື່ອລະກ້າວ.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ
ຄຳພະແກ້ວ ອິນທະວົງ
ໂຄງການກະສິກຳເພື່ອໂພສະນາການ ສຳເລັດຝືກອົບຮົມເຕັກນີກການປູກ,ການລ້ຽງ ໃຫ້ບັນດາເມືອງເປົ້າໝາຍຂອງໂຄງການ
ວັນທີ່ 7-10 ພຶດສະພາ 2019 ນີ້ ໂຄງການກະສິກຳ ເພື່ອໂພສະນາການ ໄດ້ຈັດກອງປະຊຸມຝືກອົບຮົບ ສົ່ງເສີມການປູກ, ການລ້ຽງ ໃຫ້ບັນດາ ເມືອງເປົ້າໝາຍຂອງໂຄງການຄື: ເມືອງຫົວເມືອງ, ເມືອງຊຳໃຕ້, ເມືອງກັວນ ແລະ ເມືອງຊ່ອນ, ກອງປະຊຸມໄດ້ຈັດຂື້ນ ຢູ່ຫ້ອງປະຊຸມຫ້ອງການກະສິກຳ ແລະ ປ່າໄມ້ເມືອງຊ່ອນ ພາຍໃຕ້ການເປັນປະທານ ຂອງ ທ່ານ ສະຫັວນທອງ ຄຳມີສຸລິວົງ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງຊ່ອນ ເປັນກຽດເຂົ້າຮ່ວມຂອງ ທ່ານ ບຸນສີ ບັນດາສັກ ຮອງຫົວໜ້າພະແນກສົ່ງເສີມເຕັກນີກ ແລະ ປຸງແຕ່ງກະສິກຳ ມີບັນດາຜູ້ປະສານງານໂຄງການຂັ້ນສູນກາງ, ຂັ້ນແຂວງ ແລະ ຂັ້ນເມືອງ ພ້ອມດ້ວຍພະນັກງານວິຊາ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມທັງໝົດ 20 ກວ່າທ່ານ.
ການຝືກອົບຮົບໃນຄັ້ງນີ້ ທ່ານ ມະນີລັດ ຊາສີດາວົງ ຮອງຫົວໜ້າພະແນກແນວພັນ ໄດ້ນຳສະເໜີ ໃຫ້ນັກສຳມະນາກອນໄດ້ ຮຽນຮູ້ການສົ່ງເສີມເຕັກນີກການປູກ ແລະ ການລ້ຽງ, ເຊີ່ງໄດ້ແບ່ງເປັນ 2 ພາກ ໄດ້ແກ່: ພາກທິດສະດີ ແລະ ພາກສະໝາມ, ໃນນີ້ຄູ່ຝືກຍັງໄດ້ຈັດແບ່ງໃຫ້ນັກສຳມະນາກອນຂອງແຕ່ລະເມືອງ ແລະ ແຂວງ, ຂຽນປື້ມຄູ່ມື ເຕັກນີກການປູກຝັງ ແລະ ລ້ຽງສັດ ສົ່ງເສີມການຜະລິດກະສິກຳເປັນສີ້ນຄ້າ ແລະ ໄດ້ລົງປະຕິບັດຕົວຈີງ ສ້າງສວນປູກຜັກໃນເຮືອນຫົ່ມ ຈຳນວນ 1 ຫຼັງ, ມີຂະໜາດ 6 x 10 ແມັດ,ຢູ່ທີສະຖານີກະສິກຳ ແລະ ປ່າໄມ້ເມືອງຊ່ອນ, ເພື່ອເປັນບ່ອນສາທິດ ແລະ ສືກສາ, ແລກປ່ຽນບົດຮຽນນຳກັນ ແລະ ເນັ້ນໜັກ ໃນການສົ່ງເສີມຜະລິດກະສິກໍາເປັນສີ້ນຄ້າ ຢູ່ແຂວງຫົວພັນ, ໃຫ້ບັນດາສູນ ແລະ ສະຖານີອ້ອມຂ້າງ ຢູ່ບັນດາເມືອງຕ່າໆ, ເປັນບ່ອນສືກສາຮຽນຮູ້ ແລະ ເປັນບ່ອນຊຸກຍູ້ສົ່ງເສີມຊາວກະສິກອນ ຜູ້ທີມີຄວາມສົນໃຈຮຽນຮູ້ ທາງດ້ານເຕັກນີກການປູກຝັງ, ລ້ຽງສັດ ໃນການຜະລິດກະສິກຳຂະໜາດນ້ອຍ, ປະກອບສ່ວນເຂົ້າໃນການພັດທະນາເສດຖະກິດ – ສັງຄົມຂອງຊາດ, ເພື່ອເປັນທ່າແຮງ, ແລະ ຊ່ວຍເຫຼືອ,ໃນການສົ່ງເສີມການຜະລິດກະສິກໍາເປັນສີ້ນຄ້າ ສ້າງລາຍຮັບເຂົ້າສູຄອບຄົວ, ແກ້ໄຂຄວາມທຸກຍາກ ແລະ ຍົກລະດັບ ຊີວິດການເປັນຢູ່ ຂອງ ປະຊາຊົນບັນດາເຜົ່າໃຫ້ນັບມື້ດີຂື້ນ
ໃນຕອນທ້າຍ ທ່ານ ບຸນສີ ບັນດາສັກ ຮອງຫົວໜ້າພະແນກສົ່ງເສີມເຕັກນີກ ແລະ ປຸງແຕ່ງກະສິກຳ ໄດ້ມອບໃບຢັ້ງຢືນ ໃຫ້ແກ່ນັກສຳມະນາກອນ ແລະ ມອບກິດຈະກຳສາທິດ ສວນປູກຜັກເຮືອນຫົ່ມ ໃຫ້ແກ່ສະຖານີບໍລິການເຕັກນີກກະສິກຳ ແລະ ປ່າໄມ້ ເມືອງຊ່ອນ ອີກດ້ວຍ.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ
ຄຳພະແກ້ວ ອິນທະວົງ
ພິທີກວດກາ 100% ໂຄງການສ້ອມແປງ – ຕໍ່ເຕີມຄອງເໝືອງ ແລະ ໂຄງການສ້ອມແປງຕໍ່ເຕີມນ້ຳລິນ, ຂອງໂຄງການກະສິກຳ ເພື່ອໂພສະນາການ, ເມືອງຊ່ອນ, ແຂວງຫົວພັນ.
ວັນທີ 7 ພຶດສະພາ 2019 ທີ່ຜ່ານມາ, ເຈົ້າຂອງໂຄງການ ແລະ ບໍລິສັດຜູ້ຮັບເໝົາກໍ່ສ້າງໄດ້ລົງກວດກາຄວາມຄືບໜ້າໂຄງການກໍ່ສ້າງຊົນລະປະທານ ຕໍ່ເຕີມຄອງເໝືອງ ແລະ ໂຄງການສ້ອມແປງຕໍ່ເຕີມນ້ຳລິນ, ເຊີ່ງນຳໂດຍ ທ່ານ ຄຳພຽນ ໄຊສົມພັນ ຮອງເຈົ້າເມືອງ, ຜູ້ຊີ້ນຳວຽກງານຂົງເຂດເສດຖະກິດ, ມີພາກສ່ວນທີ່ກ່ຽວຂ້ອງຂັ້ນເມືອງ, ອຳນາດການປົກຄອງບ້ານເຂົ້າຮ່ວມນຳ.
ໂຄງການຕໍ່ເຕີມຄອງເໝືອງ, ບ້ານ ບົງ ແລະ ບ້ານ ສົບຕິ້ວ, ໄດ້ເລີ່ມລົງມືກໍ່ສ້າງຕົ້ນເດືອນ ເມສາ 2019 ສຳເລັດລົງໃນທ້າຍເດືອນເມສາ 2019 ລວມມູນຄ່າທັງໝົດ 313 ລ້ານກ່ວາກີບ, ທຶນ ຂອງໂຄງການ ກະສິກຳ ເພື່ອໂພສະນາການ 218 ລ້ານກ່ວາກີບ, ທຶນປະກອບສ່ວນຂອງປະຊາຊົນ 46 ລ້ານກ່ວາກີບ. ຄອງເໝືອງມີຂະໜາດກ້ວາງ 1 ແມັດ, ສູງ 80 ຊັງຕີແມັດ ແລະ ລວງຍາວ 315 ແມັດ, ສາມາດເອົານ້ຳເຂົ້າຫົດເນື້ອທີ່ນາໄດ້ 20 ເຮັກຕາ, ໂຄງການສ້ອມແປງ ແລະ ຕໍ່ເຕີມນ້ຳລິນ, ບ້ານ ວັງຄ້ວາງ, ໄດ້ເລີ່ມລົງມືຈັດຕັ້ງປະຕິບັດແຕ່ຕົ້ນເດືອນ ເມສາ 2019 ແລະ ສຳເລັດການສ້ອມແປງໃນທ້າຍເດືອນ ເມສາ 2019 ລວມມູນຄ່າທັງໝົດ 112 ລ້ານ
ກ່ວາກີບ, ທຶນ ຂອງໂຄງການ ກະສິກຳ ເພື່ອໂພສະນາການ 78 ລ້ານກ່ວາກີບ ແລະ ທຶນປະກອບສ່ວນຂອງປະຊາຊົນ 16 ລ້ານກ່ວາກີບ, ສາມາດສະໜອງນ້ຳຮັບໃຊ້ປະຊາຊົນໄດ້ 60 ຄອບຄົວ, ເຊິ່ງທັງ 3 ໂຄງການດັ່ງກ່າວແມ່ນບໍລິສັດ ທີເຮົ້າ ກໍ່ສ້າງຈຳກັດ, ເປັນຜູ້ຮັບເໝົາກໍ່ສ້າງ.
ພາຍຫຼັງກວດກາການກໍ່ສ້າງສຳເລັດແລ້ວ, ທ່ານຮອງເຈົ້າເມືອງ ໃຫ້ຄຳຄິດເຫັນວ່າ: ການຈັດຕັ້ງປະຕິບັດໂຄງການ ຕ້ອງມີການຕິດຕາມ, ກວດກາ, ປະເມີນຜົນຄວາມຄືບໜ້າຂອງໂຄງການ ແລະ ໃຫ້ແຕ່ລະພາກສ່ວນຕ້ອງເປັນເຈົ້າການໃນການຈັດຕັ້ງປະຕິບັດ, ອຳນາດການປົກຄອງບ້ານ, ແມ່ນໝາກຫົວໃຈຫຼັກທີ່ນຳພາປະຊາຊົນໃຊ້ນ້ຳຊົນລະປະທານ, ໃຫ້ເກີດປະໂຫຍດສຸງສຸດ ແລະ ນຳໃຊ້ນ້ຳລິນໄດ້ຢ່າງຍາວນານ. ປະກອບສ່ວນເພີ່ມຜົນຜະລິດກະສິກຳ ໃຫ້ເພີ່ມຂື້ນ, ແກ້ໄຂການຂາດດ້ານໂພສະນາການ, ແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫຼຸດລົງເທື່ອລະກ້າວ.
ບັນນາທິການ ຜູ້ຂຽນຂ່າວ
ສຸນີຄຳ ພົມມາສີ ຄຳພະແກ້ວ ອິນທະວົງ
ລ້ຽງງົວ ແລະ ປູກຫ້ຍາ ສ້າງລາຍໄດ້ໃຫ້ຄອບຄົວຮ້ອຍລ້ານກີບຕໍ່ປີ.
ເພື່ອປະຕິບັດຕາມແຜນການພັດທະນາເສດຖະກິດ – ສັງຄົມແຫ່ງຊາດ 5 ປີ ຄັ້ງທີ VIII (2016 – 2020) ແລະ ຂະຫຍາຍມະຕິກອງປະຊຸມໃຫ່ຍຄັ້ງທີ X ຂອງພັກ, ໂດຍສະເພາະບຸກທະລຸທັງສີ່ດ້ານເພື່ອສ້າງພື້ນຖານ ແລະ ເງື່ອນໄຂອັນຈຳເປັນສຳລັບການນຳເອົາປະເທດຊາດຫຼຸດພົ້ນອອກຈາກຄວາມດ້ອຍພັດທະນາໃນປີ 2020 ເພື່ອປະຕິບັດຕາມແນວທາງຂອງພັກ – ລັດກ່ຽວກັບການຫຼຸດຜ່ອນຄວາມທຸກຍາກຢູ່ເຂດຊົນນະບົດ ແມ່ນໜ້າທີ່ຂອງພົນລະເມືອງທຸກຄົນທີ່ຈະຕອງເອົາໃຈໃສ່ສ້າງເສດຖະກິດຄອບຄົວໃຫ້ມີຢູ່ມີກິນ, ໂດຍສຸມໃສ່ການຜະລິດກະສິກຳໃຫ້ກາຍເປັນສິນຄ້າ. ພ້ອມດຽວກັນນັ້ນ, ພັກ – ລັດໄດ້ມີນະໂຍບາຍຊຸກຍູ້ສົ່ງເສີມໃຫ້ປະຊາຊົນຫັນມາທຳການຜະລິດກະສິກຳໃຫ້ເປັນສິນຄ້າ, ປູກຝັງ – ລ້ຽງສັດ ໃຫ້ຫຼາຍຂື້ນ, ໂດຍນຳໃຊ້ເຕັກນິກວິຊາການອັ່ນໃໝ່ທີ່ເໝາະສົມເຂົ້າໃນການຜະລິດ ເພື່ອສ້າງລາຍຮັບໃຫ້ແກ່ຄອບຄົວດີຂື້ນ.
ດັ່ງທ່ານ ເຊຍຈາ ອາຍຸ 41 ປີ, ປະຊາຊົນ ບ້ານ ຫ້ວຍເລົາ, ເມືອງຊ່ອນ, ແຂວງຫົວພັນ. ໃນອາດີດແຕ່ກ່ອນແມ່ນຖາງປ່າ ເຮັດໄຮ່ເຂົ້າແບບເລື່ອນລອຍແມ່ນບໍ່ກຸ້ມກິນຮອດປີ, ປະຈຸບັນອາຊີບຕົ້ນຕໍ ແມ່ນຖືເອົາການລ້ຽງສັດໃຫ່ຍ ແລະ ປູກຝັງ, ຈຳນວນສະມາຊິກໃນຄອບຄົວ 11 ຄົນ, ແຮງງານຕົ້ນຕໍ 4 ຄົນ, ຄອບຄົວມີທີ່ດິນ 12 ກ່ວາເຮັກຕາ, ໃນນີ້ໄດ້ແບ່ງອອກປູກໝາກແໜ່ງ 2 ເຮັກຕາ, ປູກຫ້ຍາອາຫານສັດ 10 ກ່ວາເຮັກຕາ, ຄອບຄອບຄົວ ທ່ານ ເຊຍຈາ ເປັນຄອບຄົວໜຶ່ງ ເປັນຊົນເຜົ່າມົ້ງ, ລາວມີມູນເຊື້ອດຸໝັ່ນຂະຫຍັນພຽນ ຕື່ນຕົວໃນການພັດທະນາຄອບຄົວ, ພາຍໃຕ້ແນວທາງນະໂຍບາຍຂອງພັກ – ລັດ. ໄດ້ລິເລີ່ມປູກພືດອາຫານສັດ ມາແຕ່ປີ 2008, ໃນເບື້ອງຕົ້ນໄດ້ທົດລອງປູກຫຍ້າອາຫານສັດປະເພດຫຍ້າ ຣູຊີ, ກີນີ, ໃນເນື້ອທີ່ ເຄີ່ງ ຮຕ ແລະ ນຳງົວທີ່ມີໃນຝູງຂອງຕົນເອງມາທົດລອງລ້ຽງຈຳນວນ 2 ໂຕ, ໂດຍການຕັດຫຍ້າທີ່ປູກໃຫ້ກິນ ແລະ ລ້ຽງປ່ອຍໃນສ່ວນຫຍ້າເປັນບາງມື້. ຜ່ານການລ້ຽງຕົວຈິງເຫັນວ່າມີຜົນໄດ້ຮັບທີ່ດີ ການເບິ່ງແຍງດູແລງົວກໍ່ສະດວກ, ງົວກໍ່ຕຸ້ຍພີໄວ, ບໍ່ເປັນພະຍາດ ແລະ ຂາຍກໍ່ໄດ້ລາຄາສູງ ລາວແປກໃຈ ແລະ ພູມໃຈຫຼາຍ. ມາຮອດປີ 2017 – 2018 ຈິ່ງໄດ້ຂະຫຍາຍສວນຫຍ້າລ້ຽງງົວອອກຕື່ມອີກເປັນ 8 ເຮັກຕາ ແລະ ຊື້ງົວມາລ້ຽງເປັນ 12 ໂຕ/ຊຸດ. ປະຈຸບັນມີສັດລ້ຽງທັງໝົດ: ງົວ 73 ໂຕ, ແບ້ 6 ໂຕ, , ສັດປີກ 250 ໂຕ ແລະ ໜອງປາ 5 ໜອງ.
ຮູບແບບການລ້ຽງງົວຂອງ ທ່ານ ເຊຍຈາ ແມ່ນການລ້ຽງແບບທອມຂຸນ, ໂດຍລາວໄດ້ນຳໃຊ້ງົວທີ່ມີໃນຝູງເປັນຕົ້ນທຶນ. ເບື້ອງຕົ້ນແມ່ນລາວໄດ້ຄັດເລືອກເອົາງົວໜຸ່ມ, ງົວທີ່ຈ່ອຍຜອມ, ມາລ້ຽງໃນຄອກ ຕັດຫຍ້າໃຫ້ກິນມື້ລະ 3 – 4 ຄັ້ງ, ສະລັບກັບການປ່ອຍໃຫ້ກິນໃນສວນຫຍ້າ ແລະ ໄດ້ໃຫ້ນ້ຳທີ່ສະອາດ, ສັກຢາປ້ອງກັນພະຍາດ ແລະ ຖ່າຍພະຍາດກາຝາກໃຫ້ງົວ. ລ້ຽງໄດ້ 2 – 4 ເດືອນ ແລ້ວຂາຍອອກເປັນຊຸດ ຈາກນັ້ນ ກໍ່ນຳເອົາເງິນທີ່ໄດ້ຊື້ງົວຊຸດໃໝ່ເຂົ້າມາລ້ຽງອີກ ປະຕິບັດໝູນວຽນແບບນີ້ຕະຫຼອດມາ ສະເລ່ຍລາຍຮັບຈາກການຂາຍງົວ 1 ປີ ໄດ້ 96 ລ້ານກີບ, ສ່ວນດ້ານການຕະຫຼາດ ການຂາຍກໍ່ບໍ່ຫຍຸ້ງຍາກເພາະມີພໍ່ຄ້າມາຊື້ກັບທີ່ ແລະ ຕະຫຼາດຕ້ອງການຊື້ທຸກເວລາ.
ນອກຈາກລາຍຮັບຈາກການຂາຍງົວທອມແລ້ວ ທ່ານເຊຍຈາ ຍັງປູກຫຍ້າຮັກສາເປັນສ່ວນແນວພັນ ແລະ ເກັບແກ່ນຫຍ້າຂາຍພາຍໃນເມືອງອີກ. ປີ 2018 – 2019 ນີ້ ລາວເກັບແກ່ນຫຍ້າໄດ້ທັງໝົດ 640 ກ່ວາກິໂລ ຫຼື ເທົ່າກັບ 16 ເປົາ, ຂາຍກິໂລລະ 17 ພັນກີບ ໄດ້ເງິນທັງໝົດ 10 ລ້ານ 8 ແສນກ່ວາກີບ. ນອກຈາກລາຍຮັບການຂາຍງົວ ແລະ ການຂາຍແກ່ນຫຍ້າແລ້ວ, ລາວຍັງໄດ້ລາຍຮັບຈາການລ້ຽງສັດປະເພດອື່ນໆ ເຊັ່ນ: ແບ້, ປາ ສະເລ່ຍແລ້ວໄດ້ 6 ລ້ານກີບ/ປີ, ໄດ້ລາຍຮັບຈາກການປູກຝັງອື່ນໆ 13 ລ້ານກີບ/ປີ. ຄິດສະເລ່ຍລວມລາຍຮັບການປູກ – ການລ້ຽງໄດ້ 125 ລ້ານກີບ/ປີ.
ຈາກຄວາມຕັດສິນໃຈຂອງຕົນເອງ ບວກກັບການຊີ້ນຳ – ນຳພາ ຂອງວິຊາການທີ່ກ່ຽວຂ້ອງຂັ້ນແຂວງ, ຂັ້ນເມືອງ,ໄດ້ເອົາໃຈໃສ່ຕິດຕາມ ແລະ ຮຽນວິຊາການເຕັກນິກການປູກ – ການລ້ຽງ, ຫຼັງຈາກມີວິຊາແລ້ວ, ປະຈຸບັນຊີວິດການເປັນຢູ່ຂອງ ທ່ານ ເຊຍຈາ ປ່ຽນແປງຈາກແຕ່ເກົ່າຫຼາຍ ລາວສາມາດນຳລາຍຮັບທັງໝົດຈາກການປູກຝັງ – ລ້ຽງສັດ ມາພັດທະນາຄອບຄົວ, ຊື້ພາຫະນະລົດຮຸ່ນໄດ 1 ຄັນ, ປັບປຸງເຮືອນ 1 ຫຼັງ, ຊື້ເຂົ້າກິນກຸ້ມປີ, ສົ່ງລູກຮ່ຳຮຽນ ແລະ ຍັງມີສ່ວນເກັບແຮ່ໄວ້ໃຊ້ຈ່າຍຍາມຈຳເປັນຂອງຄອບຄົວ, ສະເລ່ຍລາຍຮັບ 11 ລ້ານກີບ/ຄົນ, ສາມາດຫຼຸດພົ້ນອອກຈາກຄວາມທຸກຍາກໄດ້ເປັນກ້າວໆມາ.
ບັນນາທິການ ຜູ້ຂຽນຂ່າວ
ສຸນີຄຳ ພົມມາສີ ຄຳພະແກ້ວ ອິນທະວົງ
ເບີໂທຜູ້ກ່ຽວທີ່ສາມາດຕິດຕໍ່ໄດ້ 030 9475376
ຫ້າໜ່ວຍພັກ ອອກແຮງງານເພື່ອຄຳ່ນັບຮັບຕ້ອນ ກອງປະຊຸມໃຫ່ຍ ບັນດາໜ່ວຍພັກ ແລະ ຮາກຖານພັກພະແນກກະສິກຳ ແລະ ປ່າໄມ້ແຂວງ.
ວັນທີ 27 ເມສາ 2019 ທີ່ຜ່ານມາ ຫ້າໜ່ວຍພັກ, ອອກແຮງງານ ເພື່ອຄຳ່ນັບຮັບຕ້ອນກອງປະຊຸມໃຫ່ຍ ຄັ້ງທີ 9 ຂອງບັນດາໜ່ວຍພັກ ແລະ ຮາກຖານພັກພະແນກກະ
ສິກຳ ແລະ ປ່າໄມ້ແຂວງ, ມີພະນັກງານ, ລັດທະກອນພາຍໃນພະແນກເຂົ້າຮ່ວມ 160 ກ່ວາສະຫາຍ.
ໂດຍປະຕິບັດຕາມທິດຊີ້ນຳຂອງຄະນະພັກຮາກຖານ, ພະແນກກະສິກຳ ແລະ ປ່າໄມ້, ໃນການສ້າງຂະບວນການກະກຽມກອງປະຊຸມໃຫ່ຍຄັ້ງທີ 9 ຂອງບັນດາໜ່ວຍພັກ ແລະ ຮາກຖານພັກຈະເປີດຂື້ນໃນມໍ່ໆ. ນີ້, ຈຸດປະສົງຂອງການອອກແຮງງານຄັ້ງນີ້ລວມມີ 3 ຈຸດປະສົງໃຫ່ຍຄື: ເພື່ອເປັນການສ້າງຂະບວນການອອກແຮງງານລວມ, ເພື່ອຄຳ່ນັບຮັບຕ້ອນວັນປູກຕົ້ນໄມ້ແຫ່ງຊາດ, ເພື່ອສ້າງຂະບວນການສ້າງສາພັດທະນາສູນບໍລິການເຕັກນິກກະສິກຳຮ່ວມມືລາວ – ຫວຽດນາມ, ບ້ານອົ້ງ, ເພື່ອຖາງໄຮ່ອະນາໄມ, ກະກຽມປູກຫ້ຍາລ້ຽງສັດໃນອະນາຄົດເຊີ່ງມີເນື້ອທີ່ 5 ກ່ວາເຮັກຕາ.
ບັນນາທິການ
ສຸນີຄຳ ພົມມາສີ
ຜູ້ຂຽນຂ່າວ.
ຄຳພະແກ້ວ ອິນທະວົງ
