ກອງປະຊຸມໃຫ່ຍ ສະໄໝສາມັນ ຂອງສະຫະກອນກາເຟວັນໃໝ່ ສົກປີ 2021-2022, ເປີດຂື້ນໃນວັນທີ 3 ພະຈິກ 2022, ທີ່ຫໍວັດທະນະທຳ ແຂວງຫົວພັນ, ໂດຍການເປັນປະທານຮ່ວມ ທ່ານພອນສຸກ ອິນທະວົງ ຮອງເຈົ້າແຂວງຫົວພັນ, ທ່ານ ພອ ອິນປົງ ຈັນທະວົງສາ ຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ກົມໃຫ່ຍຕຳ່ຫຼວດ ແລະ ປ້ອງກັນຄວາມສະຫົງບ, ທ່ານ ເອີ ເຫຼີນ ຫົວໜ້າອົງການສະຫະປະຊາຊາດຕ້ານຢາເສບຕິດ ແລະ ການຄ້າເປັນທຳ ປະຈຳລາວ, ມີທ່ານ ຮອງເຈົ້າເມືອງ 4 ເມືອງ; ເມືອງກັວນ, ຊຳໃຕ້, ເມືອງກັວນ ແລະ ເມືອງຊ່ອນ, ມີພາກສ່ວນທີ່ກ່ຽວຂ້ອງພະແນກກະສິກຳ ແລະ ປ່າໄມ້ແຂວງ, ມີຫົວໜ້າຫ້ອງການກະສິກຳ 4 ເມືອງ, ກົມສົ່ງເສີມກະສິກຳ ແລະ ສະຫະກອນ, ສະຫະພັນສະຫະກອນປະເທດເຢຍລະມັນ, ພະແນກກວດກາ ແລະ ຄວບຄຸມຢາເສບຕິດ, ອົງການສະຫະປະຊາຊາດເພື່ອຕ້ານຢາເສບຕິດ ແລະ ອາດສະຍາກຳ, ສະມາຊິກສະຫະກອນກາເຟວັນໃໝ່ 12 ບ້ານຂອງ 4 ເມືອງ, ຕົວແທນຈາກພະແນກແຜນການ ແລະ ການລົງທຶນ ແລະ ຫ້ອງວ່າການແຂວງເຂົ້າຮ່ວມທັງໝົດ 150 ຄົນ, ຍິງ 30 ຄົນ.

ໃນວາລະກອງປະຊຸມ ທ່ານປະທານສະຫະກອນກາເຟວັນໃໝ່, ຂື້ນຜ່ານບົດສະຫຼຸບປະຈຳປີ 2021-2022 ແລະ ທິດທາງແຜນການ 2023, ຜ່ານບົດການຄ້າຢ່າງເປັນທຳ ແລະ ຮ່າງກົດລະບຽບພາຍໃນຂອງສະຫະກອນ, ນະໂຍບາຍຕໍ່ພະນັກງານ ແລະ ສະມາຊິກສະຫະກອນ, ນະໂຍບາຍບົດບາດຍິງ – ຊາຍ ແລະ ສິ່ງແວດລ້ອມ, ແຜນທຸລະກິດຂອງສະຫະກອນ, ໃນນັ້ນຜູ້ແທນເຂົ້າຮ່ວມໄດ້ປະກອບຄຳຄິດ-ຄຳເຫັນຕໍ່ບົດສະຫຼຸບ, ແຜນການ ແລະ ຂໍ້ກຳນົດນະໂຍບາຍຕ່າງໆ ຢ່າງກົງໄປກົງມາ, ຈາກນັ້ນຄະນະສະຫະກອນຊຸດເກົ່າລາໜ້າທີ່, ຄະນະຮັບຜິດຊອບປ່ອນບັດຂື້ນຜ່ານຂໍ້ຕົກລົງແຕ່ງຕັ້ງປ່ອນບັດຄັດເລືອກຄະນະບໍລິຫານງານສະຫະກອນຊຸດໃໝ່, ຄັດເລືອກປະທານ, ຮອງປະທານ ແລະ ຄະນະກວດສອບ ແລະ ປະກາດຜົນຄະນະສະຫະກອນຊຸດໃໝ່ຂື້ນຮັບໜ້າທີ່, ຜ່ານຂໍ້ຕົກລົງມອບໃບຍ້ອງຍໍຂອງທ່ານເຈົ້າແຂວງ, ພະແນກກະສິກຳ ແລະ ປ່າໄມ້ແຂວງ ມອບໃຫ້ຜູ້ທີ່ມີຜົນງານ, ມອບຂອງຂັວນໃຫ້ພາກສ່ວນທີ່ກ່ຽວຂ້ອງ, ມອບລາງວັນໃຫ້ບ້ານທີ່ໄດ້ຮັບລັອດພິເສດຈາກບໍລິສັດ ມ່າລ່ອງໂກ່ ທີ່ປະເທດຝັ່ງ ປີ 2021 ແລະ ປີ 2022, ມອບລາງວັນໃຫ້ບ້ານ ແລະ ໃຫ້ຄອບຄົວທີ່ມີຜົນຜະລິດຫຼາຍ, ມອບລາງວັນໃຫ້ຄະນະບໍລິຫານງານ 12 ບ້ານ.

ທ່ານ ພອນສຸກ ອິນທະວົງ ຮອງເຈົ້າແຂວງ ກ່າວສະແດງຄວາມຊົມເຊີຍ ບັນດາທ່ານ ອົງການຈັດຕັ້ງສາກົນ, ຄະນະຮັບຜິດຊອບຂັ້ນສູນກາງ, ແຂວງ, ເມືອງ, ຄະນະຮັບຜິດຊອບສະຫະກອນກາເຟວັນໃໝ່, ບັນດາທ່ານທີ່ປະກອບສ່ວນສ້າງໃຫ້ສະຫະກອນກາເຟວັນໃໝ່ມີຜົນສຳເລັດຢ່າງຈົບງາມ ແລະ ມີຄຳເຫັນຊີ້ທິດຂັ້ນຕອນຕໍ່ໄປ: 1/ ສະໜັບສະໜູນທີ່ດິນສ້າງສາງເກັບມ້ຽນກາເຟ ແລະ ອະນຸຍາດສຳປະທານ 20 ປີ 2/. ພາຍຫຼັງສຳເລັດໂຄງການແລ້ວ, ຕະຫຼາດຍັງສືບຕໍ່ພົວພັນສະຫະກອນໄດ້ບໍ 3/. ການນຳໃຊ້ງົບປະມານຂອງສະຫະກອນ ຈະເຮັດໃຫ້ພະນັກງານວິຊາການແຂວງ, ເມືອງ, ສືບຕໍ່ພົວພັນໄດ້ບໍ ແລະ ສະເໜີໃຫ້ທີ່ປະຊຸມສືບຕໍ່ຄົ້ນຄ້ວາ.

ບັນນາທິການ; ພວງວັນ ມີວົງສາ.

ຂ່າວ-ພາບ; ຄຳພະແກ້ວ ອິນທະວົງ.

ວັນທີ 27 – 31 ຕຸລາ 2022 ພະແນກກະສິກຳ ແລະ ປ່າໄມ້ແຂວງຫົວພັນ ສຳເລັດຝຶກອົບຮົມ ກ່ຽວກັບວຽກງານການມີສ່ວນຮ່ວມຂອງຊຸມຊົນ ແລະ ວຽກງານພັດທະນາຊີວິດການເປັນຢູ່ຂອງ ໂຄງການ ພູມີທັດ ແລະ ຊີວິດການເປັນຢູ່ຂອງປະຊາຊົນລາວ, ໂດຍ ເປັນປະທານຂອງທ່ານ ສຸນິລັກ ຄຳວົງສາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີຜູ້ຕາງໜ້າຈາກກົມປ່າໄມ້, ກົມສົ່ງເສີມກະສິກຳ ແລະ ສະຫະກອນ, ຜູ້ປະສານງານຂັ້ນແຂວງ, ເມືອງ, ຕາງໜ້າສະຫະພັນແມ່ຍິງເມືອງ, ແນວໂຮມເມືອງ, ຊາວໜຸ່ມເມືອງ, ຜູ້ຮັບຜິດຊອບວຽກງານສິ່ງແວດລ້ອມແຂວງ ແລະ ເມືອງ, ຊ່ຽວຊານພາຍໃນ ແລະ ວິຊາການເຂົ້າຮ່ວມ 24 ຄົນ, ຍິງ 8 ຄົນ.

ຈຸດປະສົງຝຶກອົບຮົມແມ່ນເພື່ອສ້າງຄວາມອາດສາມາດໃຫ້ພະນັກງານຮັບຜິດຊອບວຽກງານສິ່ງແວດລ້ອມ ແລະ ສັງຄົມ, ພັດທະນາຊີວິດການເປັນຢູ່ຂອງໂຄງການຂັ້ນເມືອງ, ເພື່ອເປັນການເກັບກຳຂໍ້ມູນເພີ່ມເຕີມ ແລະ ປະຕິບັດຕາມຄຳແນະນຳຂອງຄະນະປະສານງານ ຂອງທະນາຄານໂລກໃນການສ້າງແຜນດຳເນີນງານຂອງຊຸມຊົນ, ແຜນສິ່ງແວດລ້ອມ ແລະ ສັງຄົມ ຂອງໂຄງການພູມີທັດ ແລະ ຊີວິດການເປັນຢູ່ຂອງປະຊາຊົນລາວ. ນັກສຳມະນາກອນໄດ້ຮຽນຮູ້ການຝຶກອົບຮົມຂອງຊຸມຊົນ, ແນະນຳກ່ຽວກັບການເຜີຍແຜ່ຂໍ້ມູນຂັ້ນບ້ານ, ຮູບແບບ ແລະ ວິທີການຈັດຕັ້ງປະຕິບັດວຽກງານປັບປຸງຊີວິດການເປັນຢູ່ຂອງຊາວບ້ານ ແລະ ການຮ່ວມມືກັບໂຄງການພູມີທັດ ແລະ ຊີວິດການເປັນຢູ່ຂອງປະຊາຊົນ, ການຄັດເລືອກເອົາ 10 ຄົວເຮືອນທີ່ທຸກຍາກທີ່ສຸດເພື່ອກອງທຶນຊີວິດການເປັນຢູ່, ຮູບແບບການສົ່ງເສີມຂອງໂຄງການຕໍ່ຊາວກະສິກອນທີ່ຫ້າວຫັນ ແລະ ສົນໃຈເຕັກນິກໃໝ່, ການສຳຫຼວດຂໍ້ມູນຊັບພະຍາກອນ ແລະ ເສດຖະກິດສັງຄົມ.

ທ່ານ ສຸນິລັກ ຄຳວົງສາ ໄດ້ສະແດງຄວາມຊົມເຊີຍມາຍັງນັກສຳມະນາກອນ ທີ່ມີຄວາມເຂົ້າໃຈກ່ຽວກັບການມີສ່ວນຮ່ວມຂອງຊຸມຊົນ, ວຽກງານພັດທະນາຊີວິດການເປັນຢູ່ ແລະ ໜ້າວຽກຄຸ້ມຄອງສິ່ງແວດລ້ອມສັງຄົມ, ການເກັບກຳຂໍ້ມູນຄົວເຮືອນທີ່ທຸກຍາກ, ເຊີ່ງຈະໄດ້ຮັບເງີນຊ່ວຍເຫຼືອລ້າຄອບຄົວ 2 ຮ້ອຍໂດລາສະຫະລັດ, ທັງໝົດທີ່ກ່າວມາແມ່ນເພື່ອພັດທະນາປະຊາຊົນທີ່ທຸກຍາກ ໃຫ້ດີຂື້ນເທື່ອລະກ້າວ, ເພື່ອກ້າວເຂົ້າສູ່ຄອບຄົວທີ່ມີຄວາມອຸດົມສົມບຸນຮັ່ງມີຍີ່ງຂື້ນ.

ບັນນາທິການ: ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

ວັນ​ທີ 21 ຕຸລາ 2022 ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ, ພ້ອມດ້ວຍຄະນະ, ໄດ້ລົງຊຸກຍູ້, ຕິດຕາມການຜະລິດໂດຍສະເພາະແມ່ນຕິດຕາມການລະບາດຂອງພະຍາດເພ້ຍຈັກຈັ່ນທຳລາຍເຂົ້ານາຢູ່ບ້ານ ຫ້ວຍຫ້ອມ, ເມືອງຊຳເໜືອ ແລະ ເຂົ້າພົບປະໂອ້ລົມພະນັກງານວິຊາການຂະແໜງປູກຝັງ, ໂດຍມີ ທ່ານໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ສີວຽງຊຳ ແພງພົມມາ ຫົວໜ້າຂະແໜງປູກຝັງ ແລະ ມີວິຊາການທີ່ກ່ຽວຂ້ອງຂອງຂະແໜງເຂົ້າຮ່ວມນຳ.

ໂດຍໄດ້ຮັບການລາຍງານຈາກຂະແໜງປູກຝັງ, ກ່ຽວກັບການຜະລິດລະດູຝົນ ແລະ ນາ ທີ່ຖືກຜົນກະທົບຈາກແມງໄມ້ ຈຳພວກເພ້ຍຈັກຈັ່ນ ຢູ່ບ້ານ ຫ້ວຍຫ້ອມ, ເມືອງຊຳເໜືອ, ແຂວງຫົວພັນ.   ມື້ວັນທີ 11 ຕຸລາ 2022 ຂະແໜງປູກຝັງພະແນກກະສິກຳ ແລະ ປ່າໄມ້ແຂວງ ໄດ້ລົງສົມທົບກັບອຳນາດການປົກຄອງບ້ານ ຫ້ວຍຫ້ອມ ລົງກວດກາຕົວຈິງ ກ່ຽວກັບເຂົ້ານາ ທີ່ຖືກຜົນກະທົບຈາກແມງໄມ້ ຈຳພວກເພ້ຍຈັກຈັ່ນ ສີນຳ້ຕານ ແລະ ສີຂຽວ, ເຂົ້ານາທີ່ຖືກຜົນກະທົບ ມີເນື້ອທີ່ 9 ກ່ວາເຮັກຕາ, ມີຈຳນວນ 20 ຄອບຄົວ, ເສຍຫາຍທີ່ບໍ່ສາມາດກອບກູ້ຄືນ ຈຳນວນ 7 ຄອບຄົວ ມີເນື້ອທີ່ 2 ກ່ວາເຮັກຕາ  ຜົນຜະລິດເສຍຫາຍ 9 ໂຕນ, ຄິດເປັນເງີນເກືອບ 54 ລ້ານກີບ.

ໂອກາດດັ່ງກ່າວ ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ, ເພີ່ນໄດ້ເໜັ້ນໜັກໃຫ້ອ້າຍນ້ອງ 1/. ເພີ່ມທະວີເອົາໃຈໃສ່ເຝົ້າລະວັງ ແລະ ຄວບຄຸມການລະບາດຂອງສັດຕູພືດ 2/. ຊຸກຍູ້ ແລະ ບົວລະບັດຮັກສາ ແລະ ການເກັບກູ້ພືດເຂົ້ານາປີໃຫ້ໄດ້ຮັບຜົນດີ 3/. ເອົາໃຈໃສ່ວາງແຜນການຜະລິດລະດູແລ້ງໃຫ້ຫຼາຍຂື້ນເພື່ອທົດແທນຜົນເສຍຫາຍຈາກທຳມະຊາດ 4/.ເກັບກຳຂໍ້ມູນໃຫ້ລະອຽດກ່ຽວກັບໂຮງງານປຸງແຕ່ງຜົນຜະລິດພືດ ແລະການປຸງແຕ່ງພືດ. ນອກຈາກນີ້ທ່ານ ຍັງໄດ້ມອບແນວພັນພືດມີ 1/.ແນວພັນຖົ່ວເຫຼືອງ 200 ກິໂລ, ສາລີ 100 ກິໂລ, ເຂົ້າໂອດ 50 ກິໂລ, ຫຍ້າອາຫານສັດ 30 ກິໂລ ແລະ ຢາປາບສັດຕູພືດຈຳນວນໜື່ງ, ພ້ອມນັ້ນທ່ານ ຫົວໜ້າກົມ, ຫົວໜ້າພະແນກ, ຫົວໜ້າຂະແໜງ ແລະ ວິຊາການໄດ້ລົງກວດກາການລະບາດຜົນເສຍຫາຍເພ້ຍຈັກຈັ່ນທຳລາຍເຂົ້ານາ ຂອງປະຊາຊົນບ້ານ ຫ້ວຍຫ້ອມ, ເມືອງຊຳເໜືອ, ແຂວງຫົວພັນນຳອີກ.

ບັນນາທິການ: ນາງ ພວງວັນ ມີວົງສາ

ຂໍ້ມູນຈາກ: ຂະແໜງປູກຝັງ ພະແນກກະສິກຳ ແລະ ປ່າໄມ້ແຂວງຫົວພັນ.

ຂຽນໂດຍ:  ຄຳພະແກ້ວ ອິນທະວົງ

  ວັນ​ທີ 12 ຕຸລາ 2022 ຂະແໜງປູກຝັງ ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ໄດ້ໄປກວດກາຕົວຈິງ ກ່ຽວກັບນາ ທີ່ຖືກຜົນກະທົບຈາກແມງໄມ້ ຈຳພວກເພ້ຍຈັກຈັ່ນ ຢູ່ບ້ານ ຫ້ວຍຫ້ອມ, ເມືອງຊຳເໜືອ, ແຂວງຫົວພັນ. ນຳ​ໂດຍ​ທ່ານ, ທ່ານ ສີວຽງຊຳ ແພງພົມມາ ຫົວໜ້າຂະແໜງປູກຝັງ, ທ່ານ ລິດທະສອນ ໄບຈະລີນ ຮອງຫົວໜ້າຂະແໜງ, ທ່ານ ແສງຈັນ ປະທານ ບ້ານ ຫ້ວຍຫ້ອມ,  ມີ​ວິ​ຊາ​ການ​ທີ່​ກ່ຽວ​ຂ້ອງ​ຂອງຂະແໜງ ແລະ ປະຊາຊົນພາຍໃນ​ບ້ານ ເຂົ້າຮ່ວມນຳ 20 ທ່ານ

.

ໂດຍ​ໄດ້​ຮັບ​ການ​ລາຍ​ງານ​ຈາກ​ທ່ານ ແສງຈັນ ປະທານບ້ານ ຫ້ວຍຫ້ອມ ມື້ວັນທີ 11 ຕຸລາ 2022ຂະແໜງປູກຝັງພະແນກກະສິກຳ ແລະ ປ່າໄມ້ແຂວງ ໄດ້ລົງສົມທົບກັບອຳນາດການປົກຄອງບ້ານ ຫ້ວຍຫ້ອມ ລົງກວດກາຕົວຈິງ ກ່ຽວກັບເຂົ້ານາ ທີ່ຖືກຜົນກະທົບຈາກແມງໄມ້ ຈຳພວກເພ້ຍຈັກຈັ່ນ ສີນຳ້ຕານ ແລະ ສີຂຽວ, ຈາກນັ້ນວິຊາການຂະແໜງປູກຝັງໄດ້ລົງແນະນຳວິທີປາບປາມ ແລະ ຊ່ວຍປະຊາຊົນປາບເພ້ຍຈັກຈັ່ນທຳລາຍເຂົ້ານາຢູ່ບ້ານດັ່ງກ່າວ. ເຂົ້ານາທີ່ຖືກຜົນກະທົບ ມີເນື້ອທີ່ 9 ກ່ວາເຮັກຕາ, ມີຈຳນວນ 20 ຄອບຄົວ, ເສຍຫາຍທີ່ບໍ່ສາມາດກອບກູ້ຄືນ ຈຳນວນ 7 ຄອບຄົວ ມີເນື້ອທີ່ 2 ກ່ວາເຮັກຕາ  ຜົນຜະລິດເສຍຫາຍ 9 ໂຕນ, ຄິດເປັນເງີນເກືອບ 50 ລ້ານກີບ.

ໃນນີ້ຂະແໜງປູກຝັງ ພະແນກກະສິກຳ ແລະ ປ່າໄມ້ແຂວງ ໄດ້ນຳເອົາອຸປະກອນ ແລະ ຢາປາບແມງໄມ້ເປັນຕົ້ນແມ່ນ ຖັງສີດຢາ, ເຄື່ອງນຸ່ງປ້ອງກັນ, ຢາປາບແມງໄມ້ ແລະ ຢາປາບເພ້ຍ, ບົ້ງ, ລວມມູນຄ່າເກືອບ 4 ລ້ານກີບ.

ບັນນາທິການ; ນ ພວງວັນ ມີວົງສາ

ພາບ-ຂ່າວ; ຄຳພະແກ້ວ ອິນທະວົງ

ພະແນກກະສິກຳ ແລະ ປ່າໄມ້ແຂວງຫົວພັນ ສຳເລັດ ຝຶກອົບຮົມເຕັກນິກການນຳໃຊ້ໂປແກມ (ຄີວຈີໄອເອັດ) ເຂົ້າໃນການຈັດຕັ້ງປະຕິບັດວຽກງານການວາງແຜນນຳໃຊ້ທີ່ດິນໃຫ້ທີມງານພາກສະໜາມຂອງໂຄງການ ພັດທະນາ ພື້ນຖານໂຄງລ່າງຊົນນະບົດ ແລະ ຄຸ້ມຄອງອ່າງໂຕ່ງແບບ ຍືນຍົງ ເຂົ້າຮ່ວມເປັນປະທານໂດຍ ທ່ານໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ວິໄລຈິດ ສຸກຈະເລີນ ຫົວໜ້າຫ້ອງການປະສານງານໂຄງການ, ທ່ານ ຊານໄຊ ສຸລິຍະການ ທີ່ປຶກສາວຽກວາງແຜນນຳໃຊ້ທີ່ດິນ, ມີບັນດາຄູຝຶກຈາກໂຄງການປັບປຸງພູມີທັດ ແລະ ປັບປຸງຊີວິດການເປັນຢູ່ ແລະ ທີມງານພາກສະໜາມຂັ້ນແຂວງ, ທີມງານຂັ້ນເມືອງ 3 ເມືອງເປົ້າໝາຍຂອງໂຄງການ, ເມືອງຊຳເໜືອ, ເມືອງວຽງໄຊ ແລະ ເມືອງສົບເບົາ ເຂົ້າຮ່ວມທັງໝົດ 30 ທ່ານ ຍິງ 5 ທ່ານ.

ເພື່ອຮັບປະກັນໃຫ້ການຈັດຕັ້ງປະຕິບັດໜ້າວຽກພາກສະໜາມ ວຽກວາງແຜນນຳໃຊ້ທີ່ດິນ ຂອງໂຄງການ ໄດ້ຮັບປະສິດທິຜົນສູງ ຖືກຕ້ອງຕາມແນວທາງນະໂຍບາຍ, ຕາມເຕັກນິກ, ບາດກ້າວ, ຂັ້ນຕອນກ່ຽວກັບວຽກງານດັ່ງກ່າວຂອງສູນກາງ ກໍ່ຄືທ້ອງຖີ່ນ ແລະ ຖືກຕ້ອງຕາມແຜນການ ແລະ ງົບປະມານຂອງໂຄງການ ທີ່ໄດ້ກຳນົດ ແລະ ອະນຸມັດ, ທີມງານວິຊາການພາກສະໜາມທີ່ຈະລົງຈັດຕັ້ງປະຕິບັດວຽກວາງແຜນນຳໃຊ້ທີ່ດິນຈຳນວນ 3 ທີມທີ່ໄດ້ຮັບການສ້າງຕັ້ງຂື້ນ, ໄດ້ຮັບການຝຶກການນຳໃຊ້ໂປແກມ QGIS (ຄີວຈີໄອເອັດ) ເຊີ່ງເປັນໂປແກມສຳຄັນທີ່ນຳໃຊ້ເຂົ້າໃນການເກັບກຳຂໍ້ມູນ, ສ້າງແຜນທີ່ ການນຳໃຊ້ທີ່ດິນໃນລະດັບບ້ານ, ແຜນທີ່ປະເພດທີ່ດິນ, ແຜນທີ່ປະເພດປ່າໄມ້ ແລະ ແຜນທີ່ຂອບເຂດບ້ານໃນບ້ານເປົ້າໝາຍຂອງໂຄງການ, ທີ່ຈະຈັດຈະປະຕິບັດວຽກວາງແຜນນຳໃຊ້ທີ່ດິນໃນລະດັບບ້ານ, ໃນແຜນການໄຕມາດທີ່ 4 ຂອງສົກປີ 2022. ການຝຶກອົບຮົມຄັ້ງນີ້ ທີມງານວິຊາການມີຄວາມເຂົ້າໃຈເຕັກນິກ ໃນການນຳໃຊ້ໂປແກມ, ທີ່ນຳໃຊ້ເຂົ້າໃນວຽກງານວາງແຜນນຳໃຊ້ທີ່ດິນເຊັ່ນ: ການນຳໃຊ້ໂປແກມໃນການສ້າງແຜນທີ່, ແບບຟອມເກັບກຳຂໍ້ມູນ, ການສ້າງຖານຂໍ້ມູນ ແລະ ການຂຽນບົດລາຍງາຍງານ.ໃນພິທີນັກສຳມະນາກອນຍັງໄດ້ຮັບໃບຢັ້ງຢືນການນຳໃຊ້ໂປແກມນຳອີກ.

ທ່ານ ບຸນພອນ ບຸດພະຈັນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ກ່ອນອື່ນເພີ່ນໄດ້ສະແດງຄວາມຊົມເຊີຍມາຍັງທີມງານຈາກແຂວງ ແລະ ເມືອງເຂົ້າຮ່ວມຝຶກອົບກ່ຽວກັບວຽກງານວາງແຜນນຳໃຊ້ທີ່ດິນໄດ້ສຳເລັດໄປໂດຍດີ. ຫຼັງຈາກສຳເລັດຝຶກອົບແລ້ວ, ຮຽນຮູ້ພາກທິດສະດີ ແລະ ຈັດຕັ້ງປະຕິບັດຕົວຈິງ ຂໍໃຫ້ບັນດາສະຫາຍນຳເອົາບົດຮຽນນັ້ນນຳໄປໃຊ້ເຂົ້າໃນວຽກງານຕົວຈິງຢູ່ໃນພາກສະໜາມໃຫ້ໄດ້ຮັບຜົນ, ຢູ່ໃນແຜນພັດທະນາກະສິກຳແຕ່ລະເມືອງເປົ້າໝາຍໂຄງການຈະໄດ້ເຊື່ອມໂຍງເຂົ້າກັນ ແລະ ເຊື່ອໝັ້ນວ່າການຈັດຕັ້ງປະຕິບັດວຽກງານວາງແຜນນຳໃຊ້ທີ່ດິນຈະໄດ້ຕິດພັນກັບການປະຕິບັດວຽກງານໃນຕົວຈິງ, ເອົາໃຈໃສ່ນຳໃຊ້ບົດຮຽນທີ່ໄດ້ຮຽນມາ ໄປຈັດຕັ້ງປະຕິບັດເຂົ້າໃນວຽກງານຕົວຈິງຂອງໂຄງການ ກໍ່ຄືຂອງເມືອງ, ພະແນກ ແລະ ຂອງແຂວງ. ການຝຶກອົບຮົມໄດ້ດຳເນີນແຕ່ວັນທີ 3 ຕຸລາ 2022 ແລະ ໄດ້ສຳເລັດລົງ ໃນຕອນແລງຂອງວັນທີ 7 ຕຸລາ 2022

ບັນນາທິການ; ນ ພວງວັນ ມີວົງສາ

ຂ່າວ-ພາບ; ຄຳພະແກ້ວ ອິນທະວົງ

    ພະແນກກະສິກຳ ແລະ ປ່າໄມ້ ແຂວງ ຈັດກອງປະຊຸມ ປະເມີນແຜນກຳນົດພະນັກງານນຳພາ-ຄຸ້ມຄອງ ປະຈຳປີ 2021 ທີ່ຫ້ອງປະຊຸມ ຊັ້ນ 2 ຫໍວັດທະນະທຳ ໂດຍການເປັນປະທານຂອງສະຫາຍ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ມີບັນດາສະຫາຍ ຄະນະພັກຮາກຖານ ເລຂາ, ຮອງເລຂາ, ຄະນະໜ່ວຍພັກ, ຫົວໜ້າຂະແໜງ, ຮອງຂະແໜງ ແລະ ມີບັນດາສະຫາຍຈາກພາກສ່ວນທີ່ກ່ຽວຂ້ອງຂອງແຂວງເຂົ້າຮ່ວມທັງໝົດ 35 ທ່ານ, ຍິງ 7 ທ່ານ.

ສະຫາຍ ພອນສະຫັວນ ບຸນທະວົງ ຫົວໜ້າຫ້ອງການບໍລິຫານ ແລະ ຈັດຕັ້ງ ຂື້ນຜ່ານບົດສະຫຼຸບ ການຂື້ນແຜນກຳນົດພະນັກງານນຳພາ-ຄຸ້ມຄອງໃນໄລຍະ 1 ປີຜ່ານມາ ທີ່ໄດ້ຈັດຕັ້ງປະຕິບັດການສ້າງບຸກຄະລາກອນໃນຂົງເຂດກະສິກຳ ແລະ ວາງແຜນສ້າງບຸກຄະລາກອນໃນປີຕໍ່ໄປ

ໃນນີ້; ສະຫາຍ ນ ວຽງພຸດ ຈັນວິໄຊ ຮອງຫົວໜ້າຂະແໜງພະນັກງານ, ຄະນະຈັດຕັ້ງແຂວງ, ຂື້ນຜ່ານເອກະສານທີ່ກ່ຽວຂ້ອງ ແລະ ແນະນຳ ວິທີປະເມີນແຜນກຳນົດພະນັກງານນຳພາ-ຄຸ້ມຄອງ ແລະ ຄະນະຮັບຜິດຊອບໄດ້ແຈກຢາຍບັດໃຫ້ ບັນດາສະຫາຍຜູ້ມີສິດໄດ້ເລືອກເອົາພະນັກງານນຳພາ-ຄຸ້ມຄອງ. ກອງປະຊຸມໄດ້ສຳເລັດລົງເປັນເວລາ 1 ຕອນຂອງວັນທີ 7 ຕຸລາ 2022

ບັນນາທິການ; ນ ພວງວັນ ມີວົງສາ

ພາບ-ຂ່າວ; ຄຳພະແກ້ວ ອິນທະວົງ

ພະແນກກະສິກຳ ແລະ ປ່າໄມ້ ແຂວງຫົວພັນ ໄດ້ສຳເລັດ ກອງປະຊຸມ ເພື່ອສືບຕໍ່ຈັດຕັ້ງຜັນຂະຫຍາຍ ເນື້ອໃນບົດບັນທຶກຮ່ວມມື ລະຫ່ວາງ ແຂວງຫົວພັນ ສປປ ລາວ ແລະ ແຂວງເຊີນລາ ສສ ຫວຽດນາມ ໂດຍເປັນກຽດເຂົ້າຮ່ວມຝ່າຍລາວ ນຳໂດຍທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ, ພ້ອມດ້ວຍຫົວໜ້າຂະແໜງການທີ່ກ່ຽວຂ້ອງ. ຝ່າຍຫວຽດນາມ ນຳໂດຍທ່ານ ຮ່າຍືເຫວ້ ຫົວໜ້າພະແນກກະສິກຳ ແລະ ພັດທະນາຊົນນະບົດແຂວງເຊີນລາ ພ້ອມດ້ວຍຄະນະທີມງານເຂົ້າຮ່ວມທັງໝົດ 20 ກ່ວາທ່ານ.

.
ເພື່ອຜັນຂະຫຍາຍການຮ່ວມມື ລະຫ່ວາງ ສປປລາວ – ສສຫວຽດນາມ, ຫົວພັນ – ເຊີນລາ ເວົ້າລວມ, ເວົ້າສະເພາະແມ່ນຂົງເຂດກະສິກຳ ແລະ ປ່າໄມ້ ໃຫ້ເຂົ້າສູ່ວົງກ້ວາງ ແລະ ປະກົດຜົນເປັນຈິງ ຈິ່ງສະເໜີແຜນການຮ່ວມມື ລະຫ່ວາງ ພະແນກກະສິກຳ ແລະ ປ່າໄມ້ແຂວງຫົວພັນ ກັບ ພະແນກກະສິກຳ ແລະ ພັດທະນາຊົນນະບົດແຂວງເຊີນລາ, ໃນໄລຍະປີ 2022-2025 ຄາດໝາຍແຕ່ລະດ້ານຄື: ວຽກງານປູກຝັງ ສ້າງຄວາມເຂັ້ມແຂງ ໃຫ້ພະນັກງານວິຊາການກ່ຽວກັບເຕັກນິກໃນເຂດເນີນສູງ ວຽກງານລ້ຽງສັດ ແລະ ການປະມົງ ເຕັກນິກການຄຸ້ມຄອງ ແລະ ພັດທະນາພືດອາຫານສັດ ( ການປູກ, ການບົວລະບັດຮັກສາ, ການເກັບກ່ຽວ ແລະ ການເກັບຮັກສາ). ວຽກງານພັດທະນາຊົນນະບົດ ຈັດສັນອາຊີບຄົງທີ່ ແລະ ພັດທະນາບ້ານ ທີ່ໄດ້ຮັບຜົນກະທົບຈາກການພັດທະນາພື້ນຖານໂຄງລ່າງ. ວຽກງານແຜນການ ສ້າງຄວາມເຂັ້ມແຂງໃຫ້ວິຊາການ ກ່ຽວກັບການວາງແຜນພັດທະນາ ກະສິກຳ ແລະ ປ່າໄມ້. ວຽກງານຄຸ້ມຄອງ ແລະ ພັດທະນາທີ່ດິນ ເຕັກນິກການຄຸ້ມຄອງ, ພັດທະນາ ແລະ ປັບປຸງທີ່ດິນກະສິກຳເຂດເນີນສູງ. ສູນບໍລິການເຕັກນິກ ກະສິກຳ ແລະ ປ່າໄມ້ ຮ່ວມມືລາວ-ຫວຽດ. ສ້າງສວນໝາກໄມ້ ພ້ອມດ້ວຍອຸປະກອນ ແລະ ເຕັກນິກການປູກການບົວລະບັດຮັກສາ, ວຽກງານຊົນລະປະທານ ສ້າງຄວາມເຂັ້ມແຂງໃຫ້ພະນັກງານວິຊາການ, ການສຳຫຼວດອອກແບບລະບົບຊົນລະປະທານຢູ່ເຂດພູດອຍ.

ຝ່າຍຫວຽດນາມ ຮັບຮອງ ແລະ ຈັດຕັ້ງປະຕິບັດແຜນການຮ່ວມມີ: ສ້າງຄວາມເຂັ້ມແຂງດ້ານພາສາຫວຽດນາມ ໃຫ້ພະນັກງານວິຊາການ, ສົ່ງເສີມອຳນວຍຄວາມສະດວກໃຫ້ຜູ້ປະກອບການ, ນັກທຸລະກິດ ຈາກແຂວງເຊີນລາ ໄປລົງທືນຢູ່ແຂວງຫົວພັນໃຫ້ຫຼາຍຂື້ນ. ກຳນົດຫຼັກການໃນການຈັດປະຊຸມຮ່ວມ ລະຫ່ວາງ 2 ຝ່າຍ ເພື່ອສະຫຼຸບຕີລາຄາວຽກງານຮອບດ້ານໂດຍການພັດປ່ຽນເປັນເຈົ້າພາບປີລະຄັ້ງ, ເຊື່ອມໂຍງແຜນການຮ່ວມມື ເຂົ້າກັບແຜນພັດທະນາກະສິກຳ ແລະ ປ່າໄມ້ ແຕ່ລະໄລຍະໃຫ້ສັດເຈນເພື່ອເຮັດໃຫ້ການຈັດຕັ້ງປະຕິບັດໃຫ້ໄດ້ຮັບຜົນດີ. ກອງປະຊຸມໄດ້ດຳເນີນເປັນເວລາ 1 ຕອນ ແລະ ສຳເລັດລົງໃນຕອນເຊົ້າ ຂອງວັນທີ 28 ກັນຍາ 2022.

ບັນນາທິການ: ນາງ ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

ກອງກວດກາພະແນກກະສິກຳ ແລະ ປ່າໄມ້, ໄດ້ຈັດກອງປະຊຸມປຶກຫາລືແລກປ່ຽນຄຳຄິດ-ຄຳເຫັນ, ສານຕໍ່ສາຍພົວພັນລະຫ່ວາງການຮ່ວມມື ລາວ-ຫວຽດນາມ, ຫວຽດນາມ-ລາວ, ຂື້ນທີ່ຫ້ອງປະຊຸມຫໍວັດວັດທະນາທຳ ຊັ້ນ 2 ໂດຍເປັນກຽດເຂົ້າຮ່ວມຝ່າຍລາວ ແມ່ນທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ, ພ້ອມດ້ວຍຄະນະ. ຝ່າຍຫວຽດນາມ ນຳໂດຍທ່ານ ຮ່າຍືເຫວ້ ຫົວໜ້າພະແນກກະສິກຳ ແລະ ພັດທະນາຊົນນະບົດແຂວງເຊີນລາ ພ້ອມດ້ວຍຫົວໜ້າກອງກວດກາປ່າໄມ້ເມືອງ 3 ເມືອງ, ເມືອງມາຍເຊີນ, ເມືອງຊົ່ງມ່າ ແລະ ເມືອງສົບກົບ, ຝ່າຍລາວ, ມີຫົວໜ້າຫ້ອງການກະສິກຳ ແລະ ປ່າໄມ້ເມືອງ 4 ເມືອງ, ເມືອງສົບເບົາ, ເມືອງຊຽງຄໍ້, ເມືອງແອດ ແລະ ເມືອງຊ່ອນ ພ້ອມດ້ວຍພະນັກງານວິຊາການກອງກວດກາປ່າໄມ້ເຂົ້າຮ່ວມ ທັງໝົດ 20 ກ່ວາທ່ານ.
ສອງແຂວງໄດ້ຂື້ນຜ່ານບົດລາຍງານເພື່ອສືບຕໍ່ຈັດຕັ້ງປະຕິບັດແຜນການປະສານສົມທົບວຽກງານການປົກປັກຮັກສາຊັບພະຍາກອນປ່າໄມ້, ການປ້ອງກັນ ແລະ ສະກັດກັ້ນໄຟໄໝ້ລາມປ່າຢູ່ເຂດຊາຍແດນ 2 ແຂວງ (ຫົວພັນ-ເຊີນລາ) ແລະ ວາງທິດທາງແຜນການຮ່ວມມື ປີ 2023 ເພື່ອຮັບປະກັນຄວາມປອດໄພຂອງຊັບພະຍາກອນປ່າໄມ້ ແລະ ເສີມຂະຫຍາຍເສດຖະກິດດ້ານຊັບພະຍາກອນປ່າໄມ້ ປະກອບສ່ວນເຂົ້າໃນການພັດທະນາບ້ານໃນເຂດຊົນນະບົດ, ຮັບປະກັນເຮັດໃຫ້ 2 ແຂວງມີຄວາມສະຫງົບ ເສີມຂະຫຍາຍຄວາມສາມັກຄີໄມຕີຈິດ, ສັນຕິພາບ ແລະ ການຮ່ວມມືຮອບດ້ານ ລະຫ່ວາງ 2 ແຂວງ, 2 ພະແນກການ, ບັນດາເມືອງ ແລະ ບ້ານ, ໃນນີ້ວຽກງານຈັດຕັ້ງປະຕິບັດຮ່ວມກັນມີ 4 ໜ້າວຽກຕົ້ນຕໍ: 1/. ວຽກງານປະສານສົມທົບແລກປ່ຽນຂໍ້ມູນຂ່າວສານ. 2/. ວຽກງານປົກປັກຮັກສາຊັບພະຍາກອນປ່າໄມ້. 3/. ວຽກງານປ້ອງກັນ ແລະ ດັບມອດໄຟໄໝ້ລາມປ່າ. 4/. ການຝຶກອົບຮົມ ການປ້ອງກັນ, ສະກັດກັ້ນ ແລະ ດັບມອດໄຟໄໝ້ລາມປ່າ. ຈາກນັ້ນຝ່າຍລາວ ແລະ ຝ່າຍຫວຽດນາມພ້ອມກັນປະກອບຄຳຄິດ-ຄຳເຫັນຢ່າງກົງໄປກົງມາ ເພື່ອເຮັດໃຫ້ຮັບປະກັນຜົນປະໂຫຍດໃນໄລຍະຍາວ ປະຕິບັດໃຫ້ຖືກຕ້ອງຕາມກົດໝາຍ ສປປ ລາວ ແລະ ກົດໝາຍ ສສ ຫວຽດນາມໃນຂົງເຂດປົກປັກຮັກສາ ແລະ ພັດທະນາປ່າໄມ້ໃຫ້ມີຄວາມຍືນຍົງ. ໃນພິທີຍັງໄດ້ເຊັນບົດບັນທຶກຄວາມຮ່ວມມືລະຫ່ວາງພະແນກກະສິກຳ ແລະ ປ່າໄມ້ ແຂວງຫົວພັນ ແລະ ພະແນກກະສິກຳ ແລະ ພັດທະນາຊົນນະບົດເເຂວງເຊີນລາ.

ທ່ານ ໄຈເພັດ ເຮືອງຖາວອນ ໄດ້ສະແດງຄວາມຊົມເຊີຍ ແລະ ອ່ວຍໄຊໃຫ້ພອນອັ່ນປະເສີດສາຍພົວພັນຮ່ວມມືລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະພະແນກກະສິກຳ ແລະ ປ່າໄມ້ແຂວງຫົວພັນ ແລະ ພະແນກກະສິກຳ ແລະ ພັດທະນາຊົນນະບົດແຂວງເຊີນລາ. ຈົ່ງໝັ້ນຄົງນົງແກ່ນ ມີຄວາມຈະເລີນງອກງາມ  ພັດທະນາຢ່າງບໍ່ຢຸດຢັ້ງ.  ເພື່ອຢາກເຮັດໄດ້ ແລະ ແກ້ໄຂບັນຫາຂໍ້ຄົງຄ້າງໂດຍອິງຕາມທິດທາງແຜນການຂອງກອງກວດກາ 2 ແຂວງທີ່ໄດ້ວາງໄວ້ໃນໄລຍະຜ່ານມາ: 1/. ບັນຫາຂອດປະສານງານລະຫ່ວາງພະແນກກະສິກຳ ແລະ ປ່າໄມ້ 2 ແຂວງເວົ້າລວມ, ເວົ້າສະເພາະແມ່ນ 2 ກອງກວດກາ ໃຫ້ໜັກແໜ້ນ ແລະ ແໜ້ນແຟ້ນຂື້ນກ່ວາເກົ່າ 2/. ວຽກງານໂຄສະນາ ແລະ ແລກປ່ຽນຂໍ້ມູນຂ່າວສານ ຕໍ່ກັບການປະກອບຄຳຄິດ-ຄຳເຫັນ ເພື່ອປັບປຸງແກ້ໄຂໃນຕໍ່ໜ້າ, 3/. ການລາດຕາເວນ ແລະ ການປົກປັກຮັກສາຊັບພະຍາກອນປ່າໄມ້ ໄດ້ຖືຄວາມສຳຄັນກ່ຽວກັບການລາດຕາເວນລຽບຕາມຊາຍແດນ 4/. ວຽກງານປ້ອງກັນສະກັດກັ້ນ ແລະ ດັບມອດໄຟໄໝ້ລາມປ່າ, ຕິດຕາມຢ່າງໃກ້ສິດກັບປະຊາຊົນທີ່ມີການບຸກລຸກຖາງປ່າເຮັດໄຮ່, ຈູດປ່າ, ລຽບຕາມຊາຍແດນ, ໃຫ້ມີມາດຕາການລົງເຜີຍແຜ່ຂໍ້ມູນຂ່າວສານໃຫ້ປະຊາຊົນເຂົ້າໃຈຢ່າງຈະແຈ້ງ. 5/. ຄວາມສາມັກຄີປະຊາຊົນລາວ ແລະ ປະຊາຊົນຫວຽດນາມ ຢູ່ຕາມລຽບຊາຍແດນໃຫ້ມີຄວາມສາມັກຄີຢ່າງໜັກແໜ້ນ, ມີການແລກປ່ຽນບົດຮຽນໄປມາຫາສູ່ເຊີ່ງກັນ ແລະ ກັນ. ກອງປະຊຸມໄດ້ດຳເນີນເປັນເວລາ 1 ຕອນ ແລະ ສຳເລັດລົງຕອນແລງຂອງວັນທີ 28 ກັນຍາ 2022.

.

ບັນນາທິການ: ນ. ພວງວັນ ມີວົງສາ
ພາບ-ຂ່າວ: ຄຳພະແກ້ວ ອິນທະວົງ ນັກຂ່າວພະແນກກະສິກຳ ແລະ ປ່າໄມ້ແຂວງຫົວພັນ.

ທີ່ຫ້ອງປະຊຸມ ສູນສົ່ງເສີມບໍລິການເຕັກນິກກຮ່ວມມືລາວ-ຫວຽດ ບ້ານອົ້ງ ໄດ້ຈັດພິທີຕ້ອນຮັບທີມງານຈາກຄະນະເລຂາທິການສະພາປະຊາຊົນແຂວງຫົວພັນ. ເຂົ້າຢ້ຽມຢາມ ແລະ ຊຸກຍູ້ວຽກງານການຜະລິດ ນຳໂດຍທ່ານ ຄອນປະພັນ ເລືອງສີຈັນທອງ ຮອງປະທານສະພາປະຊາຊົນແຂວງ, ທ່ານໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ແອຊຳ ວິໄລຈິດ ຫົວໜ້າສູນສົ່ງເສີມບໍລິການເຕັກນິກຮ່ວມມືລາວ-ຫວຽດ, ຫົວໜ້າ, ຮອງຫົວໜ້າຂະແໜງການທີ່ກ່ຽວຂ້ອງທັງສອງພາກສ່ວນເຂົ້າຮ່ວມຢ່າງພ້ອມພຽງ.

.

ໃນພິທີ ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງຫົວພັນ. ໄດ້ລາຍງານກ່ຽວກັບສະພາບຄວາມເປັນມາຂອງສູນທີ່ຂື້ນກັບພະແນກກະສິກຳ ແລະ ປ່າໄມ້ແຂວງ, ພະແນກກະສິກຳ ແລະ ປ່າໄມ້ ຮູ້ສຶກເປັນກຽດຢ່າງຍິ່ງທີ່ໄດ້ພົບປະປຶກສາຫາລື  ແລະ ແລກປ່ຽນບົດຮຽນໃນການຊຸກຍູ້ຕິດຕາມຂອງທີມງານ ສະພາປະຊາຊົນແຂວງ. ຕໍ່ກັບການລາຍງານຂອງສູນ ແລະ  ປະກອບຄຳຄິດເຫັນຢ່າງກົງໄປ-ກົງມາ, ໂດຍສະເພາະບົດສະຫຼຸບ ແລະ ທິດທາງແຜນການ ຈະນຳໄປຄົ້ນຄ້ວາປຶກສາຫາລື ຫາວິທີທາງແກ້ໄຂ, ວຽກງານໃດມີຄວາມກ້າວໜ້າຈະໄດ້ສືບຕໍ່ພັດທະນາໃຫ້ພົ້ນເດັ່ນ ແລະ ມີບາດກ້າວຂະຫຍາຍຕົວ. ໃນນີ້ ທ່ານ ບຸນພອນ ບຸດພະຈັນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ໄດ້ຜ່ານ ຂໍ້ຕົກລົງ ສະບັບເລກທີ 3039/ກປຂ, ລົງວັນທີ 23 ສິງຫາ 2022. ວ່າດ້ວຍການມອບລົດກະບະໃຫ້ແກ່ຄະນະເລຂາທິການສະພາປະຊາຊົນແຂວງ, ເພື່ອຄຸ້ມຄອງ ແລະ ນຳໃຊ້.

ໂອກາດດັ່ງກ່າວ ທ່ານ ຄອນປະພັນ ເລືອງສີຈັນທອງ ສະແດງຄວາມຮູ້ສຶກດີໃຈ ແລະ ເປັນກຽດຢ່າງຍິ່ງ ທີ່ພະແນກກະສິກຳໄດ້ຕ້ອນຮັບຢ່າງອົບອຸ່ນໃນການຢ້ຽມຢາມຄັ້ງນີ້ ແລະ ພວກເຮົາຄວນຈັດຕັ້ງປະຕິບັດວາລະແຫ່ງຊາດກ່ຽວກັບການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ: 1/. ສົ່ງເສີມການຜະລິດພາຍໃນ ເພື່ອທົດແທນການນຳເຂົ້າ ແລະ ສົ່ງອອກ. 2/. ສູນສົ່ງເສີມບໍລິການເຕັກນິກ, ໃຫ້ຢຸດເຊົາການບໍລິຫານແບບເກື້ອກຸນ ໃຫ້ຫັນມາບໍລິຫານສ້າງຄວາມເຂັ້ມແຂງດ້ວຍຕົນເອງ, ເພີ່ງຕົນເອງ, ກຸ້ມຕົນເອງ 3/. ໃຫ້ມີການປະສານງານກັບພາກສ່ວນ, ພະແນກການທີ່ກ່ຽວຂ້ອງ ເພື່ອແລກປ່ຽນບົດຮຽນ ແນວຄວາມຄິດ-ຄຳເຫັນ, ແລກປ໋ຽນປະສົບການກ່ຽວກັບການຜະລິດເປັນສິນຄ້ານຳເຂົ້າ ແລະ ສົ່ງອອກ ໃຫ້ແທດເໝາະກັບສະພາບຄວາມເປັນຈິງໃນແຕ່ລະທ້ອງຖິ່ນ. ການພົບປະໄດ້ດຳເນີນເປັນເວລາ 1 ຕອນຂອງແລງວັນທີ 23 ກັນຍາ 2022.

ບັນນາທິການ: ນາງ ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

 ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງ ຮ່ວມກັບພາກສ່ວນທີ່ກ່ຽວຂ້ອງຂອງແຂວງ, ເມືອງ, ໄດ້ຈັດພິທີທຳລາຍສັດປ່າທີ່ຍຶດໄດ້ຈາກການຈັດຕັ້ງປະຕິບັດວຽກງານ, ການກວດກາລາດຕາເວນ ແລະ ສະກັດກັ້ນຜູ້ທີ່ລັກລອບລະເມີດລ່າ, ຊື້-ຂາຍ ສັດນຳ້-ສັດປ່າ ຢູ່ຕາມທ້ອງຕະຫຼາດ ເທດສະບານຕົວເມືອງຊຳເໜືອ, ຕາມສາຍທາງ, ຈຸດຫຼໍ່ແຫຼມຕ່າງໆ ທີ່ມີຄວາມສ່ຽງ ຈຳນວນສັດທີ່ຍຶດໄດ້ມີ: 1/. ເສືອແມວລາຍ ປະເພດຫວງຫ້າມບັນຊີ 1 ຈຳນວນ 1 ໂຕ, ນຳ້ໜັກ 2 ກິໂລ. 2/. ໂຕແຫຼວ ປະເພດຫວງຫ້າມບັນຊີ 1 ນຳ້ໜັກ 1 ໂລເຄີ່ງ, ຍັງແຮງປ່ອຍຄືນສູ່ທຳມະຊາດ. 3/. ໂຕງູຈົງອາງ ສັດຫວງຫ້າມປະເພດບັຊີ 1 ຈຳນວນ 1 ໂຕ, ນຳ້ໜັກ 2 ກິໂລ, 4/. ສັດປ່າປະເພດທົ່ວໄປບັນຊີ 3 ໂຕນົກຈຳນວນ 105 ໂຕ, ນຳ້ໜັກ 1 ກິໂລ, 5/. ຊີ້ນສ່ວນໂຕເຫັງນສັດຄຸ້ມຄອງບັນຊີ 2 ນຳ້ໜັກ 11 ກິໂລ, 6/. ຊີ້ນສ່ວນໂຕຟານສັດຄຸ້ມຄອງບັນຊີ 2 ນຳ້ໜັກ 25 ກິໂລ, 7/. ຊີ້ນສ່ວນໂຕໝູປ່າສັດຄຸ້ມຄອງບັນຊີ 2 ນຳ້ໜັກ 21 ກິໂລ, 8/. ຊີ້ນສ່ວນໂຕອົ້ນປະເພດບັນຊີ 2 ນຳ້ໜັກ 7 ກ່ວາກິໂລ. ລວມຊີ້ນສ່ວນສັດປ່າທີ່ຍຶດໄດ້ມາທຳລາຍຖີ້ມໃນຄັ້ງນີ້ມີນຳ້ໜັກ ເກືອບ 70 ກິໂລ. ການທຳລາຍສັດດັ່ງກ່າວເນື່ອງຈາກວ່າມີບຸກຄົນຈຳນວນໜື່ງມີການລັກລອບລະເມີດລ່າ ແລະ ຄ້າຂາຍສັດນຳ້-ສັດປ່າ, ທີ່ບໍ່ຖືກຕ້ອງຕາມລະບຽບການບໍ່ເຂົ້າໃຈ ແລະ ບໍ່ໄດ້ເຊື່ອມຊືມຕໍ່ລະບຽບກົດໝາຍ, ເຈົ້າໜ້າທີ່ໄດ້ນຳມາສຶກສາອົບຮົມ ຕາມແຕ່ລະກໍລະນີໜັກ ຫຼື ເບົາ, ການກະທຳດັ່ງກ່າວເຫັນວ່າຜິດຕໍ່ກົດໝາຍວ່າດ້ວຍສັດນຳ້-ສັດປ່າ ສະບັບເລກທີ່ 07/ສພຊ; ລົງວັນທີ 24 ທັນວາ 2007, ສັດທີ່ຍຶດໄດ້ຈຳນວນດັ່ງກ່າວໄດ້ທຳລາຍຖີ້ມໃນເວລາ 2 ໂມງ ຂອງວັນທີ 21 ກັນຍາ 2022 ສະຖານທີ່ຫ້ອງການກະສິກຳ ແລະ ປ່າໄມ້ເມືອງຊຳເໜືອ.

ບັນນາທິການ ນາງ ພວງວັນ ມີວົງສາ

ພາບ-ຂ່າວ ທ່ານ ຄຳພະແກ້ວ ອິນທະວົງ