ວັນ​ທີ 20 ກັນຍາ 2022 ການ​ນຳ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ນຳ​ໂດຍ​ທ່ານ ໄຈເພັດ ເຮືອງຖາວອນ ຮັກສາການຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ທ່ານ ທອງຮັກ ບົວລະພາ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງຫົວເມືອງ, ທ່ານ ພອນສະຫັວນ ບຸນທະວົງ ຫົວໜ້າຫ້ອງການບໍລິຫານ ແລະ ຈັດຕັ້ງ ແລະ ມີ​ວິ​ຊາ​ການ​ທີ່​ກ່ຽວ​ຂ້ອງ​ຂັ້ນ​ແຂວງ, ເມືອງ, ອຳ​ນາດ​ການ​ປົກ​ຄອງ​ບ້ານ ເຂົ້າຮ່ວມນຳ.

ໂດຍ​ໄດ້​ຮັບ​ການ​ລາຍ​ງານ​ຈາກ​ທ່ານ ທອງຮັກ ບົວລະພາ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງຫົວເມືອງ, ໄດ້ສະຫຼຸບການຈັດຕັ້ງປະຕິບັດແຜນພັດທະນາກະສິກຳ ແລະ ປ່າໄມ້, ໃນ 9 ເດືອນທີ່ຜ່ານມາ ແລະ ວາງທິດທາງ 3 ເດືອນທ້າຍປີ 2022, ໃນນີ້ເພີ່ນຍັງໄດ້ລາຍງານກ່ຽວກັບການເກັບກຳຂໍ້ມູນໄພພິບັດທາງທຳມະຊາດທີ່ເກີດຂື້ນໃນໃນຄືນວັນທີ 15 ກັນຍາ 2022 ເຮັດໃຫ້ນາຂອງປະຊາຊົນບ້ານ. ນຳ້ປ້ອງ, ເມືອງຫົວເມືອງ, ຖືກເສຍຫາຍໃນເນື້ອທີ່ 10 ກ່ວາເຮັກຕາ ແລະ ເສຍຫາຍໜັກໜ່ວງບໍ່ສາມາດກອບກູ້ກັບຄືນໄດ້ 9 ກ່ວາເຮັກຕາ.

ຈາກນັ້ນ​ການ​ນຳພະແນກ​ສົມ​ທົບ​ກັບ​ ພາກ​ສ່ວນ​ທີ່​ກ່ຽວ​ຂ້ອງ​ຂອງ​ເ​ມືອງ, ໄດ້ລົງກວດກາຕົວຈິງເຫັນວ່າຄວາມເສຍຫາຍດັ່ງກ່າວມີຜົນກະທົບຫຼາຍສົມຄວນ, ສະນັ້ນ ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ ຈິ່ງໄດ້ລົງກວດກາ ກັບພາກສ່ວນທີ່ກ່ຽວຂ້ອງຂອງເມືອງ, ເພື່ອເຮັດໃຫ້ຜົນກະທົບທີ່ຖືກເສຍຫາຍທັງໝົດ, ເພີ່ນໄດ້ມອບແນວພັນພືດສວນຄົວຈຳນວນ 700 ຊອງ, ເພື່ອນຳໄປປູກພືດທົດແທນເຂົ້ານາທີ່ຖືກເສຍຫາຍດິນເຊາະເຈື່ອນຈາກໄພທຳມະຊາດຝົນຕົກໜັກ ແລະ ຕອນທ້າຍເພື່ນຍັງໄດ້ໂອ້ລົມພະນັກງານພາຍໃນຫ້ອງການກະສິກຳ ແລະ ປ່າໄມ້ເມືອງຫົວເມືອງນຳອີກ.

ບັນນາທິການ: ນາງ ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

ໃນວັນ ທີ 12 – 13 ກັນຍາ 2022 ການ​ນຳ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ນຳ​ໂດຍ​ທ່ານ ພວງສະຫັວດ ພົມມາສີ ຮອງຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ທ່ານ ວົງສຸກ ໄຊສິນທອງ ຮອງເຈົ້າເມືອງຊຽງຄໍ້, ມີ​ວິ​ຊາ​ການ​ທີ່​ກ່ຽວ​ຂ້ອງ​ຂັ້ນ​ແຂວງ, ເມືອງ ແລະ ຄອບຄົວຕົວແບບໃນການລ້ຽງໝູພັນຊີ້ນ ບ້ານ ສົບສານ, ເມືອງຊຽງຄໍ້ເຂົ້າຮ່ວມນຳ.

ໂດຍ​ໄດ້​ຮັບ​ການ​ລາຍ​ງານ​ຈາກ​ທ່ານ ທອງປະເສີດ ວິໄລພວງ ເຈົ້າຂອງຟາມໝູພັນຊີ້ນ, ບ້ານ ສົບສານ, ເມືອງຊຽງຄໍ້ ແລະ ທ່ານ ຄຳນິ່ງ ບຸນພະໄຊ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຊຽງຄໍ້, ໃຫ້ຮູ້ວ່າ: ຄຳ່ຄືນຂອງວັນທີ 12 ກັນຍາ 2022 ຝົນຕົກຢ່າໜັກໜ່ວງ, ນຳ້ປ່າໄຫຼສຸເຮັດໃຫ້ຟາມໝູເສຍຫາຍຢ່າງຫຼວງຫຼາຍ, ເປັນຕົ້ນແມ່ນຫົວອາຫານໝູ, ຈຳນວນ 8 ພັນກ່ວາກິໂລ, ຮົ້ວອ້ອມຟາມໝູ, ໄດໄຟຟ້າ, ຈັກບົດຫ້ຍາ, ຈັກຊອຍຜັກ, ຈັກຕັດຫ້ຍາ, ຢາປົວພະຍາດສັດ, ເຂົ້າກິນ, ເຂົ້າເຮັດເຫຼົ້າ, ສາງເກັບມ້ຽນອາຫານ ແລະ ອຸປະກອນຮັບໃຊ້, ໃນນີ້ມີໜອງປາ 1 ໜອງ, ປ່ອຍປາຈຳນວນ 8 ຮ້ອຍກິໂລ, ທີ່ກ່າວມາແມ່ນເສຍຫາຍທັງໝົດ, ສະຫຼຸບຕີລາຄາຜົນເສຍຫາຍທັງໝົດຄິດເປັນມູນຄ່າ 185 ລ້ານກ່ວາກີບ. ສ່ວນໝູທີ່ລ້ຽງແມ່ນບໍ່ໄດ້ຮັບຜົນເສຍຫາຍ. ໝູທີ່ຍັງເຫຼືອແມ່ພັນຈຳນວນ 30 ໂຕ, ພໍ່ພັນຈຳນວນ 3 ໂຕ, ໝູຊີ້ນໝູນ້ອຍຍັງເຫຼືອທັງໝົດ 267 ໂຕ, ໃນຕໍ່ໜ້ານີ້ຈະໄດ້ປັບປຸງຄືນສະຖານທີ່ໆ ຖືກຜົນກະທົບ, ໃຫ້ດີຂື້ນກັບມາເປັນສະພາບເດີມ ແລະ ສືບຕໍ່ລ້ຽງໝູຕໍ່ໄປ. ເພື່ອສະໜອງຊີ້ນພາຍໃນເມືອງ, ແຂວງ ແລະ ສົ່ງອອກຕ່າງປະເທດ.

ຈາກນັ້ນ​ ທ່ານ ພວງສະຫັວດ ພົມມາສີ ຮອງຫົວໜ້າພະແນກ ກະສິກຳ ແລະ ປ່າໄມ້ແຂວງ ໄດ້ສະແດງຄວາມຊົມເຊີຍຕໍ່ ທ່ານ ທອງປະເສີດ ວິໄລພວງ ຄອບຄົວຕົວແບບໃນການລ້ຽງໝູພັນຊີ້ນ, ທີ່ມີຄວາມດຸໝັ່ນສ້າງອາຊີບເສີມປູກຝັງ ແລະ ລ້ຽງສັດ, ສ້າງລາຍໄດ້ໃຫ້ຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ ແລະ ໃຫ້ສືບຕໍ່ປັບປຸງຟາມລ້ຽງໝູກັບຄືນສູ່ສະພາບເດີມ. ຕອນທ້າຍເພີ່ນຍັງໄດ້ມອບເງີນຈຳນວນ 2 ລ້ານກີບ, ໃຫ້ຄອບຄົວດັ່ງກ່າວ, ເພື່ອນຳໄປ ຊື້ຫົວອາຫານ ແລະ ຢາປົວພະຍາດໝູ ນຳອີກ.

ບັນນາທິການ: ນາງ ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

ໃນວັນ ທີ 9 – 10 ກັນຍາ 2022 ການ​ນຳ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ນຳ​ໂດຍ​ທ່ານ ໄຈເພັດ ເຮືອງຖາວອນ ຮັກສາການຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ທ່ານ ວົງສຸກ ໄຊສິນທອງ ຮອງເຈົ້າເມືອງຊຽງຄໍ້, ທ່ານ ສີວຽງຊຳ ແພງພົມມາ ຫົວ​ໜ້າ​ຂະ​ແໜງ​ປູກຝັງ ແລະ ມີ​ວິ​ຊາ​ການ​ທີ່​ກ່ຽວ​ຂ້ອງ​ຂັ້ນ​ແຂວງ, ເມືອງ, ອຳ​ນາດ​ການ​ປົກ​ຄອງ​ບ້ານ ເຂົ້າຮ່ວມນຳ.

ໂດຍ​ໄດ້​ຮັບ​ການ​ລາຍ​ງານ​ຈາກ​ທ່ານ ຄຳນິ່ງ ບຸນພະໄຊ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຊຽງຄໍ້ ໃຫ້ຮູ້ວ່າ: 4 ບ້ານ ປູກອ້ອຍ ແລະ 32 ບ້ານ ປູກມັນຕົ້ນ, ຈະເກັບກູ້ຜົນຜະລິດ ແລະ ຂາຍອອກໃນທ້າຍລະດູຝົນນີ້. ສະເພາະປູກອ້ອຍມີ: ບ້ານຮັບ, ບ້ານບາວ, ພຽງຍຳ ແລະ ບ້ານນາຂາມ. ປູກໃນເນື້ອທີ່ 10 ກ່ວາເຮັກຕາ, ຜົນຜະລິດ 1 ເຮັກຕາ/90ໂຕນກ່ວາ. ຄາດວ່າ 4 ບ້ານຈະໄດ້ຜົນຜະລິດອ້ອຍ 900 ກ່ວາໂຕນ. ທັງໝົດນີ້ແມ່ນພໍ່ຄ້າຈາກປະເທດຈີນເປັນຜູ້ລົງທຶນ ແລະ ເກັບຊື້ນຳປະຊາຊົນໃນລາຄາ 1 ໂຕນ/ 1 ແສນ 95 ພັນກີບ. ສ່ວນມັນຕົ້ນ: ມີ 32 ບ້ານຂອງເມືອງ, ປູກໃນເນື້ອທີ່ 3 ຮ້ອຍ 43 ເຮັກຕາ 1 ເຮັກຕາ/ 20 ໂຕນ, ນັກທຸລະກິດຈາກປະເທດຫວຽດນາມເປັນຜູ້ລົງທຶນແນວພັນ ແລະ ເກັບຊື້ໃນລາຄາ 500 ກີບ/1ກິໂລ.

ຈາກນັ້ນ​ ທ່ານໄຈເພັດ ເຮືອງຖາວອນ ຮັກສາການຫົວໜ້າພະແນກ ກະສິກຳ ແລະ ປ່າໄມ້ແຂວງ ໄດ້ສະແດງຄວາມຊົມເຊີຍຕໍ່ອຳນາດການປົກຄອງທ້ອງຖີ່ນ ທີ່ໄດ້ຊຸກຍູ້ ແລະ ສົ່ງເສີມໃຫ້ຊາວກະສິກອນທີ່ມີຄວາມດຸໝັ່ນສ້າງອາຊີບເສີມປູກຝັງ ແລະ ລ້ຽງສັດ, ສ້າງລາຍໄດ້ໃຫ້ຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ, ຕອນທ້າຍເພີ່ນຍັງໄດ້ມອບແນວພັນພືດສວນຄົວຈຳນວນ 500 ຊອງ ແລະ ເງີນຈຳນວນ 3 ລ້ານກີບໃຫ້ຫ້ອງການກະສິກຳ ແລະ ປ່າໄມ້ເມືອງຊຽງຄໍ້, ເພື່ອນຳໄປ ປູກທົດແທນ ເຂົ້ານາທີ່ຖືກເສຍຫາຍດິນເຊາະເຈື່ອນຈາກໄພທຳມະຊາດຝົນຕົກໜັກໃນລະຫ່ວາງວັນທີ 26-28 ສິງຫາ 2022 ນຳອີກ.

ບັນນາທິການ: ນາງ ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

ໃນ​ລະ​ຫ່​ວາງວັນ​ທີ 9 – 10 ກັນຍາ 2022 ການ​ນຳ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ​ຫົວ​ພັນ, ນຳ​ໂດຍ​ທ່ານ ໄຈເພັດ ເຮືອງຖາວອນ ຮັກສາການຫົວ​ໜ້າ​ພະ​ແນກ​ກະ​ສິ​ກຳ ແລະ ປ່າ​ໄມ້​ແຂວງ, ທ່ານ ວົງສຸກ ໄຊສິນທອງ ຮອງເຈົ້າເມືອງຊຽງຄໍ້, ທ່ານ ສີວຽງຊຳ ແພງພົມມາ ຫົວ​ໜ້າ​ຂະ​ແໜງ​ປູກຝັງ ແລະ ມີ​ວິ​ຊາ​ການ​ທີ່​ກ່ຽວ​ຂ້ອງ​ຂັ້ນ​ແຂວງ, ເມືອງ, ອຳ​ນາດ​ການ​ປົກ​ຄອງ​ບ້ານ ເຂົ້າຮ່ວມນຳ.

ໂດຍ​ໄດ້​ຮັບ​ການ​ລາຍ​ງານ​ຈາກ​ທ່ານ ຄຳນິ່ງ ບຸນພະໄຊ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຊຽງຄໍ້ ມີ 3 ໜ້າວຽກໃຫ່ຍຄື:: 1/ວຽກງານປູກຝັງ. ເນື່ອງຈາກຝົນຕົກໜັກ ໃນລະຫ່ວາງວັນທີ 26-28 ສິງຫາ 2022 ເຮັດໃຫ້ເກີດນຳ້ປ່າໄຫຼຊຸ ໃສ່ພື້ນທີ່ທຳການຜະລິດຂອງຊາວກະສິກອນ ໃນຂອບເຂດເມືອງຊຽງຄໍ້ ເຊີ່ງໄດ້ຮັບຜົນກະທົບທັງໝົດ 31 ບ້ານ, ເນື້້ອທີ່ນາ 73 ກ່ວາເຮັກຕາ, ເຂົ້າໄຮ່ 8 ກ່ວາເຮັກຕາ, ໄຮ່ສາລີ 21 ກ່ວາເຮັກຕາ 2/ ວຽກງານລ້ຽງສັດ. ເຊີ່ງໄດ້ຮັບຜົນກະທົບ 14 ບ້ານ, ໃນນີ້ໜອງປາຖືກຜົນກະທົບ 117 ໜອງ, ຈຳນວນປາປ່ອຍ 818 ກິໂລ, ງົວຄວາຍເສຍຫາຍຈຳນວນ 4 ໂຕ. 3/ ວຽກງານຊົນລະປະທານ. ໄດ້ຮັບຜົນກະທົບທັງໝົດ 7 ບ້ານ, ໃນນັ້ນຄອງເໝືອງເປ່ເພຖືກຜົນກະທົບຈຳນວນ 31 ຈຸດ, ຄວາມຍາວຄອງເໝືອງ 1 ພັນ 831 ເເມັດ, ທັງໝົດນີ້ ແມ່ນເວົ້າລວມທົ່ວເມືອງຊຽງຄໍ້, ເວົ້າສະເພາະ ແມ່ນໂຄງການຊົນລະປະທານ ຫ້ວຍສານ-ບ້ານບາວ, ເຊີ່ງໄດ້ຮັບຜົນກະທົບຈຳນວນ 5 ບ້ານຄື: ບ້ານພຸກ, ບ້ານລູບ, ສົບສານ, ບ້ານແສ້ ແລະ ບ້ານບາວ. ບໍ່ມີນຳ້ເຂົ້າໃສ່ນາໃນເນື້ອທີ່ 54 ເຮັກຕາ.

ຈາກນັ້ນ​ການ​ນຳພະແນກ​ສົມ​ທົບ​ກັບ​ ພາກ​ສ່ວນ​ທີ່​ກ່ຽວ​ຂ້ອງ​ຂອງ​ເ​ມືອງ, ໄດ້ລົງກວດກາຕົວຈິງເຫັນວ່າຄວາມເສຍຫາຍດັ່ງກ່າວມີຜົນກະທົບຫຼາຍສົມຄວນ, ສະນັ້ນ ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ ຈິ່ງໄດ້ລົງກວດກາ ກັບພາກສ່ວນທີ່ກ່ຽວຂ້ອງ ຂອງເມືອງ ເພື່ອເຮັດໃຫ້ຜົນກະທົບທີ່ຖືກເສຍຫາຍໄດ້ພື້ນຟູ ສ້ອມແປງຄືນ ອັ່ນຮີບດ່ວນເພື່ອຈະໄດ້ຂື້ນແຜນງົບປະມານແກ້ໄຂສຸກເສີນ ແລະ ຟື້ນຟູສ້ອມແປງຫຼັງຝົນ. ໃຫ້ທ່ວງທັນກັບລະດູການ ໃນປີ 2022ນີ້.

ບັນນາທິການ: ນາງ ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ

ຕອນເຊົ້າວັນທີ 2 ກັນຍາ 2022  ພະແນກກະສິກຳ ແລະ ປ່າໄມ້ແຂວງ ຈັດພິທີ ປະກາດການ ການຈັດຕັ້ງ ຂຶ້ນທີ່ຫ້ອງປະຊຸມພະແນກກະສິກຳ ແລະ ປ່າໄມ້ ແຂວງ ໂດຍ ການເປັນປະທານ ຂອງທ່ານ ຮິນທອງ ດວງຈັນສຸກ ຄະນະ ປະຈຳພັກແຂວງ ປະທານກວດກາ ພັກ – ລັດແຂວງ, ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ບັນດາທ່ານຈາກພາກສ່ວນກ່ຽວຂ້ອງຂອງແຂວງ, ມີການນຳພະແນກ, ຂະແໜງການທີ່ຂຶ້ນກັບພະແນກ ບັນດາທ່ານ ການນຳ ຫ້ອງການກະສິກຳ ແລະ ປ່າໄມ້ ເມືອງ ຕະຫຼອດຮອດພະນັກງານລັດຖະກອນພາຍໃນພະແນກເຂົ້າຮ່ວມທັງໝົດ 100 ກວ່າທ່ານ.

ໃນກອງປະຊຸມຜູ້ຕາງໜ້າຄະນະຈັດຕັ້ງແຂວງທ່ານ ນາງ ແພງພາສຸກ ແກ້ວບົວສະໄໝ ຮອງຄະນະຈັດຕັ້ງແຂວງ, ໄດ້ຜ່ານ ຂໍ້ຕົກລົງ ຂອງທ່ານເຈົ້າແຂວງ ສະບັບ ເລກທີ 1058/ ຈຂ ຫພ ລົງວັນທີ 22 ສິງຫາ 2022 ວ່າດ້ວຍການແຕ່ງຕັ້ງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ໂດຍແຕ່ງຕັ້ງ ທ່ານ ບຸນພອນ ບຸດພະຈັນ ຫົວໜ້າຂະແໜງແຜນການ ແລະ ການເງີນ, ເປັນຮອງຫົວໜ້າພະແນກກະສິກຳ ແລະ ປ່າໄມ້ (ຈັດເຂົ້າຕຳ່ແໜ່ງບໍລິຫານປະເພດ 4 ຕາມດຳລັດ 203/ລບ).

ຕອນທ້າຍພິທີ ທ່ານຮິນທອງ ດວງຈັນສຸກ ປະທານກອງປະຊຸມ ມີຄຳເຫັນໂອ້ລົມ ພະນັກງານ ລັດຖະກອນຫຼາຍບັນຫາ ເປັນຕົ້ນແມ່ນ ໃຫ້ເຂົ້າໃຈວ່າ ການປັບປຸງສັບຊ້ອນການຈັດຕັ້ງ ຖືເປັນວຽກປົກກະຕິຂອງການຈັດຕັ້ງ ໂດຍປະຕິບັດຕາມຫຼັກການລວມສູນປະຊາທິປະໄຕ, ເຮັດຕາມຂັ້ນຕອນ ແລະ ລະບຽບການ; ເພື່ອຜັນຂະຫຍາຍ 2 ວາລະແຫ່ງຊາດ ໃຫ້ຄະນະພັກເອົາໃຈໃສ່ ສຶກສາອົບຮົມການເມືອງແນວຄິດ, ປັບປຸງແບບແຜນວິທີການເຮັດວຽກ, ເຮັດວຽກເປັນໝູ່ຄະນະ, ເປັນແບບຢ່າງໃຫ້ມະຫາຊົນ, ເຮັດວຽກງານໃຫ້ຖືກຕ້ອງລະບຽບຫຼັກການ, ຖືກຕ້ອງຕາມເຕັກນິກວິຊາການ, ການສັບຊ້ອນພະນັກງານໃຫ້ເໝາະສົມກັບຕຳແໜ່ງງານ ແລະ ຖືກຕ້ອງຕາມວິຊາສະເພາະທີ່ຕົນເອງໄດ້ຮຽນມາ, ເຮັດວຽກງານໃຫ້ສອດຄ່ອງ ແລະ ມີຄວາມສຳເລັດຕາມແຜນການທີ່ວາງໄວ້ ແລະ ສົ່ງເສີມການປູກ – ການລ້ຽງ ຜະລິດຫຼາຍໃຫ້ກາຍເປັນສິນຄ້າ ຜະລິດເປັນຈຸດສຸມ ແນໃສ່ຕອບສະໜອງໃຫ້ພຽງພໍກັບຄວາມຮຽກຮ້ອງຕ້ອງການຂອງທ້ອງຕະຫຼາດ ເພື່ອເປັນການສ້າງລາຍຮັບໃຫ້ປະຊາຊົນ ໃຫ້ຫຼຸດພົ້ນອອກຈາກ ຄວາມທຸກຍາກເທື່ອລະກ້າວ.

ພາບ-ຂ່າວ: ຄຳພະແກ້ວ ອິນທະວົງ

ທີ່ຫ້ອງປະຊຸມ ຕຶກສຳນັກງານ ຫ້ອງວ່າການຫຼັງເກົ່າແຂວງຫົວພັນ, ພະແນກກະສິກຳ ແລະ ປ່າໄມ້ ໄດ້ສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ການລົງທຶນພາກເອກະຊົນ ພາຍໃນ ແລະ ຕ່າງປະເທດໄລຍະຜ່າມມາ ແລະ ວາງທິດທາງແຜນການ 6 ເດືອນທ້າຍປີ 2022 ໂດຍການເປັນປະທານ ຂອງທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ, ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ມີທ່ານ ການນຳເມືອງ 10 ເມືອງ, ການນຳຫ້ອງການກະສິກຳ ແລະ ປ່າໄມ້ເມືອງ ແລະ ນັກທຸລະກິດພາຍໃນ ແລະ ຕ່າງປະເທດ, ຂະແໜງການທີ່ກ່ຽວຂ້ອງ ເຂົ້າຮ່ວມ 80 ກ່ວາທ່ານ.

ໃນພິທີ ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກໍາ ແລະ ປ່າໄມ້ແຂວງ  ໄດ້ຜ່ານບົດສະຫຼຸບຕີລາຄາຄວາມຄືບໜ້າ ແລະ ແຜນ 6 ເດືອນທ້າຍປີ 2022 ການລົງທຶນຂອງພາກເອກະຊົນ ພາຍໃນ ແລະ ຕ່າງປະເທດ ໄລຍະຜ່ານມາ ໂດຍ ອົງການປົກຄອງແຂວງ ໄດ້ກຳນົດເອົາວຽກງານ ກະສິກຳ, ປ່າໄມ້ ແລະ ພັດທະນາຊົນນະບົດເປັນຕົ້ນການປູກ-ການລ້ຽງ ເປັນໜື່ງໃນ 5 ທ່າແຮງ ໂດຍກຳນົດນະໂຍບາຍທີ່ສອດຄ່ອງກັບເງື່ອນໄຂ ແລະ ທ່າແຮງຂອງທ້ອງຖິ່ນ ຮາກຖານການຜະລິດ ເປັນຕົ້ນແມ່ນຍຸດທະສາດການພັດທະນາ ກະສິກຳ ແລະ ປ່າໄມ້ ຮອດປີ 2025 ແລະ ວິໄສທັດ ຮອດປີ 2030 ແລະ ແຜນພັດທະນາກະສິກຳ, ປ່າໄມ້ 5 ປີ ຄັ້ງທີ່ 9 ປີ 2021-2025. ທ່ານ ບຸນພອນ ບຸດພະຈັນ ຫົວໜ້າຂະແໜງແຜນການ ແລະ ການເງີນ, ຂື້ນຜ່ານບົດສະເໜີ ແຜນການຈັດຕັ້ງປະຕິບັດ ວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ທີ່ຕິດພັນກັບຂະແໜງການກະສິກຳ ແລະ ປ່າໄມ້, ໃນໄລຍະທີ່ຜ່ານມາອຳນາດການປົກຄອງແຂວງ, ໄດ້ເອົາໃຈໃສ່ນຳພາ-ຊີ້ນຳ ໃນຂົງເຂດກະສິກຳ ແລະ ປ່າໄມ້ ໂດຍເລັ່ງໃສ່ການພັດທະນາວຽກງານກະສິກຳໃຫ້ມີການຂະຫຍາຍຕົວຢ່າງຕໍ່ເນື່ອງ ສາມາດຜະລິດ ເພື່ອຄໍ້າປະກັນທາງດ້ານສະບຽງອາຫານ, ການສະໜອງເຂົ້າກິນພາຍໃນໄດ້ໂດຍພື້ນຖານ, ມີສ່ວນແຮໄວ້ ແລະ ຂາຍເປັນສິນຄ້າ, ໄດ້ປະກອບສ່ວນແກ້ໄຂຊີວິດການເປັນຢູ່ ແລະ ຫຼຸດຜ່ອນຄວາມທຸກຍາກໄດ້ເທື່ອລະກ້າວ. ຕົວແທນນັກທຸລະກິດ ຂື້ນຜ່ານ ບົດສະຫຼຸບການສົ່ງເສີມປູກກາເຟ ຂອງບໍລິສັດ ຢູນີ້ ຄ໋ອບຟີ. ການປະຕິບັດວຽກງານສົ່ງເສີມຜະລິດກາເຟ ຂອງສະຫະກອນກາເຟວັນໃໝ່. ຜ່ານບົດສະເໜີການລ້ຽງໝູພັນຊີ້ນເປັນສິນຄ້າ ຢູ່ບ້ານສົບສານ, ເມືອງຊຽງຄໍ້. ບົດສະເໜີການເຄື່ອນໄຫວຂອງສະມາຄົມນັກທຸລະກິດໜຸ່ມ ຜ່ານນະໂຍບາຍສົ່ງເສີມການລົງທືນຢູ່ແຂວງຫົວພັນ ແລະ ຂໍ້ຕົກລົງວ່າດ້ວຍການຍ້ອງຍໍ ບັນດາຫົວໜ່ວຍທຸລະກິດທີ່ມີຜົນງານດີເດັ່ນໃນການສົ່ງເສີມ ແລະ ພັດທະນາ ວຽກງານກະສິກຳ ແລະ ປ່າໄມ້ 10 ເມືອງທົ່ວແຂວງຈຳນວນ 43 ໃບ.ຈາກນັ້ນທີ່ປະຊຸມຍັງໄດ້ປະກອບຄຳຄິດເຫັນກົງໄປກົງມາ, ເພື່ອເຮັດໃຫ້ວຽກງານການປູກ-ການລ້ຽງ ແລະ ຜະລິດເປັນສິນຄ້າໃຫມີບາດກ້າວຂະຫຍາຍຕົວໃນຕໍ່ໜ້າ.

ທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ. ກ່າວສະແດງຄວາມຊົມເຊີຍຕໍ່ຄວາມຮັບຜິດຊອບຂອງບັນດາທ່ານ, ທີ່ໄດ້ສະຫຼບການຈັດຕັ້ງປະຕິບັດວຽກງານການປູກ ແລະ ການລ້ຽງ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ຕິດພັນກັບແຜນການຈັດຕັ້ງປະຕິບັດວາລະແຫ່ງຊາດ ແລະ ການແກ້ໄຂຄວາມຍຸ້ງທາງດ້ານເສດຖະກິດ-ການເງີນ, ໃນຂົງເຂດກະສິກຳທີ່ມີຜົນສຳເລັດເປັນຢ່າງດີ ແລະ ເພີ່ນໄດ້ເໜັ້ນໜັກບາງຕອນວ່າ:1/. ທາງອອກກົນໄກທາງດ້ານການລົງທຶນແຂວງໄດ້ມີນິຕິກຳລຸ່ມກົດໝາຍ ປັບປຸງຄືນບາງຈຸດ ແລະ ເຜີຍແຜ່ໃຫ້ທົ່ວເຖີງ 2/. ການຈັດຕັ້ງຄຸ້ມຄອງບັນດາຫົວໜ່ວຍທຸລະກິດໄດ້ມີການມອບໂອນໃຫ້ຂັ້ນເມືອງ, ທັງສິດ ແລະ ຄວາມຮັບຜິດຊອບຂອງແຕ່ລະຄົນຢ່າງຈະແຈ້ງ 3/. ຢາກໃຫ້ມີການຄົ້ນຄ້ວາຂະຫຍາຍກິດຈະການກ່ຽວກັບການຜະລິດເປັນສິນຄ້າ ເພື່ອກຸ້ມຕົນເອງ, ທົດແທນການນຳເຂົ້າ ແລະ ສາມາດສົ່ງອອກໃຫ້ຫຼາຍຂື້ນ 4/ ວິຊາການດ້ານກະສິກຳ ຕ້ອງຍົກສູງຄວາມຮັບຜິດຊອບທາງດ້ານວິຊາສະເພາະ ແລະ ຂະຫຍາຍແນວພັນພືດ, ແນວພັນສັດໃຫ້ແທດເໝາະກັບຄວາມຕ້ອງການຂອງທ້ອງຖິ່ນ 5/. ສະເໜືຄົ້ນຄ້ວາໃຫ້ມີສູນປົວພະຍາດສັດເຫັນວ່າມີຄວາມຈຳເປັນ.

ພາບ-ຂ່າວ: ທ່ານ ຄຳພະແກ້ວ ອິນທະວົງ

ຕິດຕໍ່ໂທ: 020 5593 7535

ທີ່ຫ້ອງປະຊຸມຫໍວັດທະນະທໍາແຂວງຫົວພັນ, ໂຄງການຫຼຸດຜ່ອນຄວາມທຸກຍາກ ແລະ ຂາດໂພສະນາການໃນເຂດຊົນນະບົດ ໄດ້ສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານໄລຍະຜ່າມມາ ແລະ ວາງທິດທາງແຜນການ ທ້າຍປີ 2022 ໂດຍການເປັນປະທານ ຂອງທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ, ທ່ານ ຄິ່ນ ທຸມມາລາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີທ່ານ ຮອງເຈົ້າເມືອງ 4 ເມືອງ, ຜູ້ຊີ້ນໍາວຽກງານຂອງໂຄງການ, ຫ້ອງການກະສີກຳ ແລະ ປ່າໄມ້ 4 ເມືອງ ຄື: ເມືອງຫົວເມືອງ, ຊໍາໃຕ້, ເມືອງກັວນ, ເມືອງຊ່ອນ ແລະ ວິຊາການຂອງໂຄງການ ເຂົ້າຮ່ວມ 20 ກ່ວາທ່ານ.

ໃນພິທີ ທ່ານ ໄມພຽງ ມາດາຈິດ ຫົວໜ້າຂະແໜງພັດທະນາຊົນນະບົດ ແລະ ສະຫະກອນ ໄດ້ຜ່ານບົດສະຫຼຸບຕີລາຄາຄວາມຄືບໜ້າ ແລະ ແຜນ 6 ເດືອນທ້າຍປີ 2022 ຂອງໂຄງການ,ຫຼຸດຜ່ອນຄວາມທຸກຍາກ ແລະ ຂາດໂພສະນາການໃນເຂດຊົນນະບົດ ໄລຍະຜ່ານມາ ໂດຍໄດ້ຍົກໃຫ້ເຫັນດ້ານດີຜົນງານທີ່ຈັດຕັ້ງປະຕິບັດໄດ້ ເປັນຕົ້ນແມ່ນໂຄງການໄດ້ເອົາໃຈໃສ່ຈັດຕັ້ງປະຕິບັດ ເພື່ອປະກອບສ່ວນເຂົ້າໃນການປັບປຸງໂພສະນາການໃນເຂດຊົນນະບົດ ໂດຍການໃຫ້ເງີນອູດໜູນແມ່ຍິງຖືພາ ແລະ ແມ່ລູກອ່ອນທີ່ມີລູກບໍ່ເກີນ 2 ປີ, ໃນນັ້ນຜູ້ປະສານງານຍັງໄດ້ຜ່ານບົດລາຍງານຄວາມຄືບໜ້າວຽກງານ ຫຼື ຜົນການທົບທວນຄືນຂອງໂຄງການ ໃນໄລຍະກາງສະໄໝ ສົກປີ 2019-2022, ຈາກນັ້ນທີ່ປະຊຸມຍັງໄດ້ປະກອບຄຳຄິດເຫັນກົງໄປກົງມາ, ເພື່ອສືບຕໍ່ວາງແຜນຈັດຕັ້ງປະຕິບັດໂຄງການຫຼຸດຜ່ອນຄວາມທຸກຍາກ ແລະ ຂາດໂພສະນາການໃນເຂດຊົນນະບົດໃຫ້ໄດ້ຕາມຄາດໝາຍທີ່ວາງໄວ້, ສໍາລັບແຜນການໃນຕໍ່ໜ້າ ໂຄງການດັ່ງກ່າວຍັງຈະໄດ້ສືບຕໍ່ເຄື່ອນໄຫວ ແລະ ຈັດຕັ້ງປະຕິບັດບັນດາກິດຈະກຳ ເປັນຕົ້ນແມ່ນສືບຕໍ່ປັບປຸງຂໍ້ມູນຄວາມທຸກຍາກ ຕາມດຳລັດ 348/ລບ, ຢູ່ຂັ້ນບ້ານທີ່ຍັງບໍ່ທັນສຳເລັດ ແລະ ຈັດກອງປະຊຸມຮັບຮອງເອົາຂໍ້ມູນຄວາມທຸກຍາກຢູ່ຂັ້ນແຂວງ, ຂັ້ນເມືອງ ແລະ ຂັ້ນບ້ານ.

ທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ. ກ່າວສະແດງຄວາມຊົມເຊີຍຕໍ່ຄວາມຮັບຜິດຊອບຂອງບັນດາທ່ານ, ນັບແຕ່ການກະກຽມ ແລະ ເຂົ້າຮ່ວມປະກອບຄຳຄິດ-ຄຳເຫັນ, ເພື່ອເປັນການສືບຕໍ່ຈັດຕັ້ງປະຕິບັດໂຄງການດັ່ງກ່າວໃຫ້ໄດ້ຮັບຜົນດີ ເພີ່ນໄດ້ເໜັ້ນໜັກບາງຕອນວ່າ:1/. ຕໍ່ກັບບົດສະຫຼຸບ ແລະ ແຜນການ ສະເໜີໃຫ້ຄະນະຮັບຜິດຊອບປັບປຸງໃຫ້ລະອຽດ ແລະ ມີຕົວເລກຊີ້ວັດ, 2/. ນໍາເອົາບັນດາຂໍ້ຄິດເຫັນຂອງຜູ້ແທນປະກອບໃສ່ຮ່າງບົດສະຫຼຸບ ແລະ ແຜນການ 3/. ນໍາເອົາເນື້ອໃນບົດບັນທຶກກອງປະຊຸມທີ່ວັງວຽງເປັນແຜນການສືບຕໍ່ຈັດຕັ້ງປະຕິບັດ 4/. ປັບປຸງຂອດປະສານງານ ແລະ ແບບແຜນວິທີເຮັດວຽກຂອງໂຄງການນັບແຕ່ຂັ້ນສູນກາງ, ແຂວງ, ເມືອງ ແລະ ຂັ້ນບ້ານ, ລະບົບຂໍ້ມູນຂ່າວສານໃຫ້ວ່ອງໄວ, ສະດວກ ແລະ ທັນເວລາ 5/. ເອົາໃຈໃສ່ແກ້ໄຂບັນຫາຫຼຸດຜ່ອນຄວາມທຸກຍາກຂອງປະຊາຊົນ ແລະ ວຽກງານໂພສະນາການ. ກອງປະຊຸມໄດ້ດຳເນີນເປັນເວລາ 1 ຕອນຂອງວັນທີ 11 ສິງຫາ 2022.

ພາບ-ຂ່າວ: ທ່ານ ຄຳພະແກ້ວ ອິນທະວົງ

ທີ່ຫ້ອງປະຊຸມ ຫ້ອງການກະສິກຳ ແລະ ປ່າໄມ້ ເມືອງສົບເບົາ, ໄດ້ຈັດກອງປະຊຸມ ສຳມະນາໃນຫົວຂໍ້ ການນຳໃຊ້ທິດສະດີການປ່ຽນແປງໃໝ່ ເຂົ້າໃນວຽກງານກະສິກຳ ໂດຍສະເພາະແມ່ນການຜະລິດສາລີ ລຽບຕາມຊາຍແດນ ສປປລາວ-ຫວຽດນາມໃຫ້ກຽດເຂົ້າຮ່ວມໂດຍທ່ານ ວັນໄຊ ສຸລິວົງ ຮອງເຈົ້າເມືອງສົບເບົາ, ທ່ານ ປອ ພູທອນ ທຳມະວົງ ຫົວໜ້າສູນພັດທະນາທີ່ດິນ ແລະ ຄຸ້ມຄອງການນຳໃຊ້ຝຸ່ນ ທັງເປັນຫົວໜ້າປະສານງານໂຄງການ ມີພາກສ່ວນທີ່ກ່ຽວຂ້ອງຈາກພະແນກກະສິກຳ ແລະ ປ່າໄມ້, ພະແນກອຸດສາຫະກຳ ແລະ ການຄ້າ, ແຂວງ ແລະ 3 ເມືອງຄື: ເມືອງສົບເບົາ, ຊຽງຄໍ້, ເມືອງແອດ ແລະ ພະນັກງານວິຊາການເຂົ້າຮ່ວມ 20 ທ່ານ.

ທ່ານ ທິດສະດີ ຈຸນລະມຸນຕີ ວິຊາການ ກົມຄຸ້ມຄອງ ແລະ ພັດທະນາທີ່ດິນກະສິກໍາ ໄດ້ນໍາສະເໜີຄວາມເປັນມາຂອງໂຄງການ, ພ້ອມດ້ວຍຈຸດປະສົງ ແລະ ຄາດຄະເນຜົນໄດ້ຮັບຈາກກອງປະຊຸມດັ່ງກ່າວ, ຈາກນັ້ນ ນັກສຳມະນາກອນໄດ້ແບ່ງກຸ່ມສົນທະນາຖາມ-ຕອບເປັນ 3 ກຸ່ມຄື: ກຸ່ມພາກສ່ວນລັດ, ກຸ່ມພໍ່ຄ້າ ແລະ ກຸ່ມຊາວກະສິກອນ, ທົບທວນຄືນ ບັນດານະໂຍບາຍ ທີ່ສະໜັບສະໜູນວຽກງານກະສິກຳ ແລະ ປ່າໄມ້ຂັ້ນແຂວງ ໂດຍສະເພາະແມ່ນການຜະລິດສາລີ ແລະ ລ້ຽງສັດ ລຽບຕາມຊາຍແດນ, ການຮ່ວມມືແບບພິເສດ, ຄວາມຮັບຜິດຊອບແຕ່ລະຂະແໜງການ ທີ່ມີສ່ວນຮ່ວມເຂົ້າໃນການຜະລິດກະສິກຳ (ກຸ່ມຊາວກະສິກອນ, ການເຂົ້າເຖິງສິນເຊື່ອ, ສັນຍາຊື້ຂາຍ ແລະ ອື່ນໆ). ແຜນຍຸດທະສາດແຕ່ລະຂະແໜງການ ທີ່ພົວພັນເຖິງວຽກງານການຜະລິດພືດ, ສັດ ແລະ ການຄ້າ ລຽບຕາມຊາຍແດນລາວ-ຫວຽດ ລະຫ່ວາງ 2 ແຂວງ (ຫົວພັນ-ເຊິນລາ), ຈຸດດີ, ຈຸດອ່ອນ ແລະ ການປະເມີນຜົນໃນການແກ້ໄຂບັນຫາດັ່ງກ່າວ ໄດ້ຕອບຄຳຖາມເຈາະຈີ້ມຢ່າງກົງໄປກົງມາ. ໃນນີ້ທີ່ປະຊຸມຍັງໄດ້ວາງທິດທາງແຜນການ, ໜ້າທີ່ລວມ, ຄາດໝາຍໃຫ່ຍໃນ 5 ປີຂ້າງໜ້ານັບແຕ່ 2021-2025, ລວມມີ 4 ແຜນງານ 13 ວຽກສະໜັບສະໜຸນ 3 ຂົງເຂດຄື: ກະສິກໍາ, ປ່າໄມ້ ແລະ ພັດທະນາຊົນນະບົດ.

ທ່ານ ປອ ພູທອນ ທຳມະວົງ ຫົວໜ້າສູນພັດທະນາທີ່ດິນ ແລະ ຄຸ້ມຄອງການນຳໃຊ້ຝຸ່ນ ທັງເປັນຫົວໜ້າປະສານງານໂຄງການ ກ່ອນອື່ນເພີ່ນໄດ້ສະແດງຄວາມຍ້ອງຍໍຊົມເຊີຍ ມາຍັງນັກສຳມະນາກອນແຕ່ລະກຸ່ມທີ່ໃຫ້ຄວາມຮ່ວມມືໃນການເກັບກຳຂໍ້ມູນ, ໄດ້ຕາມຈຸດປະສົງແລ້ວສັງລວມກວດກາຄືນໃຫ້ສັດເຈນ ນຳສະເໜີໂຄງການເພື່ອສືບຕໍ່ຈັດຕັ້ງປະຕິບັດຕັ້ງແຕ່ນີ້ ເຖິງປີ 2025, ໃຫ້ໄດ້ຕາມແຜນທີ່ວາງໄວ້, ກອງປະຊຸມດຳເນີນເປັນເວລາ 1 ວັນ ຂອງວັນທີ 10 ສິງຫາ 2022.

ພາບ-ຂ່າວ: ຄຳພະແກ້ວ ອິນທະວົງ ພະແນກກະສິກຳ ແລະ ປ່າໄມ້ແຂວງຫົວພັນ.

ວັນທີ 12 ສິງຫາ 2022, ໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ ແລະ ໂຄງການຊົນລະກະເສດ ແລະ ການຜະລິດເປັນສິນຄ້າຂະໜາດນ້ອຍ, ຈັດກອງປະຊຸມຂື້ນທີ່ຫ້ອງປະຊຸມຫໍວັດທະນະທຳ ໂດຍເປັນປະທານຂອງທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ, ທ່ານ ໄຈເພັດ ເຮືອງຖາວອນ ຮັກສາການຫົວໜ້າພະແນກກະສິກຳ ແລະ ປ່າໄມ້ແຂວງ, ມີທ່ານ ຮອງເຈົ້າເມືອງ 3 ເມືອງເປົ້າໝາຍໂຄງການຄື: ເມືອງຊຳເໜືອ, ສົບເບົາ ແລະ ເມືອງວຽງໄຊ, ມີຄະນະກຳມະການຈາກພະແນກການທີກ່ຽວຂ້ອງ, ມີຫົວໜ້າຫ້ອງການກະສິກຳ ແລະ ປ່າໄມ້ເມືອງ, ທີມງານຈາກສູນກາງ, ແຂວງ, ເມືອງ ເຂົ້າຮ່ວມທັງໝົດ 68 ທ່ານ, ຍິງ 18 ທ່ານ.

ທ່ານ ວິໄລຈິດ ສຸກຈະເລີນ ຜູ້ປະສານງານໂຄງການ ຜ່ານບົດສະຫຼຸບຕີລາຄາຄວາມຄືບໜ້າ ແລະ ແຜນ 6 ເດືອນທ້າຍປີ 2022 ຂອງໂຄງການ, ເພື່ອຈັດຕັ້ງປະຕິບັດໂຄງການພັດທະນາພື້ນຖານໂຄງລ່າງຊົນນະບົດ ແລະ ການຄຸ້ມຄອງອ່າງໂຕ່ງແບບຍືນຍົງ ແລະ ໂຄງການຊົນລະກະເສດ, ການຜະລິດເປັນສິນຄ້າຂະໜາດນ້ອຍ ໃນໄລຍະຜ່ານມາ ໂດຍໄດ້ຍົກໃຫ້ເຫັນດ້ານດີຜົນງານທີ່ຈັດຕັ້ງປະຕິບັດໄດ້ ເປັນຕົ້ນແມ່ນທັງ 2 ໂຄງການໄດ້ເອົາໃຈໃສ່ຈັດຕັ້ງປະຕິບັດວຽກງານ ປັບປຸງລາຍຮັບ ຂອງປະຊາຊົນໃນເຂດຊົນນະບົດ, ຈາກການຜະລິດກະສິກຳທີ່ຫຼາກຫຼາຍ ເຊີ່ງອິງຕາມຄວາມຕ້ອງການຂອງຕະຫຼາດ, ຊ່ວຍປັບປຸງສຸຂະພາບ ແລະ ໂພສະນາການຂອງປະຊາຊົນ, ສົ່ງເສີມໃຫ້ປະຊາຊົນໄດ້ຮັບຜົນປະໂຫຍດຈາກການພັດທະນາເສດຖະກິດແຫ່ງຊາດ ແລະ ເພື່ອເຮັດໃຫ້ບັນດາຄົວເຮືອນທີ່ໄດ້ຮັບຜົນປະໂຫຍດ, ເພື່ອຄວາມຍືນຍົງໃນການພັດທະນາເສດຖະກິດທ້ອງຖິ່ນ ໃນຂົງເຂດວຽກງານການຜະລິດກະສິກຳຂະໜາດນ້ອຍ,ການເຊື່ອມໂຍງກັບຕະຫຼາດ ແລະ ດ້ານໂພສະນາການ, ທີ່ປະຊຸມຍັງໄດ້ປະກອບຄຳຄິດເຫັນກົງໄປກົງມາ, ເພື່ອສືບຕໍ່ວາງແຜນຈັດຕັ້ງປະຕິບັດ, ສົ່ງເສີມຊາວບ້ານໃນການປູກຝັງ ແລະ ລ້ຽງສັດ, ທົບທວນຄືນການວາງແຜນນຳໃຊ້ທີ່ດິນ ແລະ ພື້ນທີ່ຊົນລະປະທານໄດ້ຮັບການປັບປຸງດີຂື້ນ.

ທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ. ກ່ອນອື່ນເພີ່ນໄດ້ສະແດງຄວາມຊົມເຊີຍຕໍ່ຜົນສຳເລັດຂອງໂຄງການທີ່ໄດ້ຈັດຕັ້ງປະຕິບັດວຽກງານຜ່ານມາ, ໂອກາດດັ່ງກ່າວເພີ່ນໄດ້ມີຄຳເຫັນເພີ່ມເຕີມບາງບັນຫາຄື: 1/. ຮ່າງບົດສະຫຼຸບ ແລະ ທິດທາງແຜນການ, ສະເໜີໃຫ້ຄະນະຮັບຜິດຊອບກວດກາລະອຽດ, ຄຳຄິດ-ຄຳເຫັນຂອງບັນດາຜູ້ແທນທີ່ເຂົ້າຮ່ວມກອງປະຊຸມ ເພື່ອເຮັດໃຫ້ວຽກງານດັ່ງກ່າວລົງຮອດຂັ້ນທ້ອງຖິ່ນຖືກຈັດຕັ້ງປະຕິບັດຢ່າງມີປະສິດທິຜົນສູງ 2/. ເພີ່ມຂອດປະສານງານ ແລະ ແບບແຜນວິທີເຮັດວຽກ ໃຫ້ຕິດພັນກັບຫຼາຍຂະແໜງການນັບແຕ່ສູນກາງ, ແຂວງ, ເມືອງ ແລະ ທ້ອງຖີ່ນ 3/. ເພີ່ມຄວາມຮັບຜິດຊອບໃນການຕິດຕາມກວດກາຄົ້ນຄ້ວາ ແກ້ໄຂບັນຫາທີ່ມີຄວາມຍຸ້ງຍາກ ແລະ ສຸມໃສ່ຊຸກຍູ້ໂຄງການໃຫ້ສຳເລັດຜົນຕາມຄາດໝາຍ ມີຜົນປະໂຫຍດສູງສຸດໃຫ້ແກ່ປະຊາຊົນບັນດາເຜົ່າ.

ພາບ-ຂ່າວ: ຄຳພະແກ້ວ ອິນທະວົງ ພະແນກກະສິກຳ ແລະ ປ່າໄມ້ແຂວງຫົວພັນ.

ວັນທີ 3-7 ພຶດສະພາ 2022 ພະແນກກະສິກຳ ແລະ ປ່າໄມ້, ສູນສົ່ງເສີມເຕັກນິກກະສິກຳ ແລະ ປ່າໄມ້ ຮ່ວມມືລາວ-ຫວຽດນາມ, ໄດ້ສຳເລັດ ຝຶກອົບຮົມ ເຕັກນິກການປູກ-ລ້ຽງ ທີ່ຕິດພັນກັບໂພສະນາການໃຫ້ຜູ້ອຳນວຍຄວາມສະດວກດ້ານໂພສະນາການ ບ້ານ ແລະ ຕົວແທນຊາວກະສິກອນບ້ານເປົ້າໝາຍຂອງໂຄງການກະສິກຳເພື່ອໂພສະນາການໂດຍໃຫ້ກຽດເປັນປະທານຂອງທ່ານ ພວງສະຫັວດ ພົມມາສີ ຮອງຫົວໜ້າພະແນກກະສິກຳ ແລະ ປ່າໄມ້, ມີຄູຝຶກ ແລະ ມີນັກສຳມະນາກອນເມືອງຊ່ອນ, ບ້ານເປົ້າໝາຍຂອງໂຄງຄື: ບ້ານ ລ້ອງງົວປ່າ, ຫ້ວຍຕຶນ, ບວມຝາດ, ນ້ຳງາວ, ນາໝໍ້, ໜອງໃສ ແລະ ບ້ານບໍ່ ເຂົ້າຮ່ວມທັງໝົດ 27 ທ່ານ, ຍິງ 11 ທ່ານ.

ການຝຶກອົບຮົມຄັ້ງນີ້ ນັກສຳມະນາກອນໄດ້ຮຽນຮູ້ເຕັກນິກການປູກຝັງມີ 4 ຫົວຂໍ້ຄື:

1. ການເຮັດຝຸ່ນບົ່ມປັບປຸງດິນ, ນ້ຳໝັກບຳລຸງດິນ, ບຳລຸງພືດຜັກ ແລະ ການເຮັດນ້ຳໝັກຂັບໄລ່ສັດຕູພືດ.
2. ການປູກພືດຜັກສວນຄົວ ກາງແຈ້ງ ແລະ ໃນເຮືອນຮົ່ມ.
3. ຄວາມຮູ້ພື້ນຖານຂອງພືດສວນຄົວ ແລະ ໂພສະນາການຂອງພືດ.
4. ການໂທມງ່າ, ຕິດຕາ ແລະ ສຽບຍອດ ເພື່ອຂະຫຍາຍພັນໄມ້ໃຫ້ໝາກ.

ນອກນີ້ຍັງໄດ້ຝຶກເຕັກນິກການລ້ຽງສັດມີ 4 ຫົວຂໍ້ຄື:

1. ເຕັກນິກການລ້ຽງໄກ່ ແລະ ການອະນຸບານໄກ່ນ້ອຍ.
2. ເຕັກນິກການລ້ຽງເປັດ.
3. ເຕັກນິກການລ້ຽງປາແບບປະສົມ.
4. ເຕັກນິກການລ້ຽງປາດຸກພັນ ແລະ ການລ້ຽງກົບ.

ທັງໝົດນີ້ນັກສຳມະນາກອນຍັງໄດ້ຮຽນຮູ້ພາກທິດສະດີ ແລະ ພາກປະຕິບັດຕົວຈິງໄປພ້ອມໆ ກັນ, ຄູຝຶກຍັງໄດ້ນຳພານັກສຳມະນາກອນໄປທັດສະນະສຶກສາເບິ່ງວິທີການປູກ-ລ້ຽງຢູ່ບ້ານໃກ້ຄຽງນຳອີກ.

ການຝຶກອົບຮົມຄັ້ງນີ້ ທ່ານ ພວງສະຫັວດ ພົມມາສີ ໃນນາມເປັນປະທານ ເພິ່ນໄດ້ເໜັ້ນໜັກ ໃຫ້ນັກສຳມະນາກອນນຳເອົາບົດຮຽໄປຈັດຕັ້ງປະຕິບັດ ໃຫ້ໄດ້ຮັບຜົນໃນຕໍ່ໜ້າ ແລະ ນັກສຳມະນາກອນທຸກທ່ານມີຄວາມເຂົ້າໃຈບົດຮຽນດີເປັນສ່ວນໃຫ່ຍເພື່ອຫັນປ່ຽນອາຊີບ ມາປູກ-ລ້ຽງໃຫ້ຫຼາຍກາຍເປັນສິນຄ້າ ແລະ ມີລາຍຮັບເຂົ້າສູ່ຄອບຄົວທີ່ໝັ້ນຄົງ.

ບັນນາທິການກວດແກ້: ນ. ພວງວັນ ມີວົງສາ

ພາບ-ຂ່າວ: ຄຳພະແກ້ວ ອິນທະວົງ